បារាំង៖លោកអេឌ័រ ហ្វីលីពការពារនយោបាយដំឡើងពន្ធលើប្រេងឥន្ធនៈរបស់រដ្ឋាភិបាល
នៅក្នុងប្រទេសបារាំង កំហឹង និងភាពមិនសប្បាយចិត្តរបស់ពលរដ្ឋប្រឆាំងនឹងតម្លៃប្រេងសាំង និងប្រេងម៉ាស៊ូតថ្លៃកំពុងបន្តមានយ៉ាងពុះកញ្ជ្រោល។ មានពលរដ្ឋជាង ៧០០ ០០០នាក់បានចុះហត្ថលេខាលើញ្ញតិមួយប្រឆាំងនឹងរដ្ឋាភិបាលដែលបានដំឡើងពន្ធលើប្រេងឥន្ធនៈ។ ក្បួនបាតុកម្មមួយប្រឆាំងនឹងតម្លៃប្រេងខ្ពស់គ្រោងនឹងរៀបចំនៅថ្ងៃទី១៧ វិច្ឆិកាខាងមុខ ហើយមានពលរដ្ឋបារាំងប្រមាណ ៧៨% បានគាំទ្រក្បួនបាតុកម្មនោះ។ ចំណែកលោកនាយករដ្ឋមន្រ្តីអេឌ័រ ហ្វីលីពបានថ្លែងនាថ្ងៃសៅរ៍ ទី៣ វិច្ឆិកាពីទីក្រុងហាណូយ ប្រទេសវៀតណាមដែលលោកបំពេញទស្សនកិច្ចថា រដ្ឋាភិបាលនឹងមិនបោះបង់ចោលនយោបាយដំឡើងពន្ធលើប្រេងឥន្ធនៈទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
« ខ្ញុំបានឮច្បាស់ណាស់ពីសម្រែក ភាពរអ៊ូរទាំ ភាពមិនសប្បាយចិត្ត និងពេលខ្លះជាកំហឹងដែលអាចសម្តែងចេញដោយពលរដ្ឋ។ តែខ្ញុំនិយាយថ្ងៃនេះ និងក៏ដូចជាខ្ញុំតែងតែនិយាយរួចហើយថា គេគ្មានរូបមន្តទិព្វដើម្បីដោះស្រាយបញ្ហានៃការឡើងកម្តៅនៅក្នុងបរិយាកាសទេ។
គេមិនអាចធ្វើក្នុងពេលតែមួយនូវសុន្ទរកថាដ៏ប្រពៃស្តីពីបញ្ហាអាកាសធាតុដោយយល់ព្រមជាគោលការណ៍ថា ពិតណាស់ គេត្រូវតែជំរុញសេដ្ឋកិច្ចដោយប្រើផលិតផលដែលបំពុលបរិយាកាសតិច។ បន្ទាប់មកថា ពិតណាស់ គេត្រូវតែដំឡើងពន្ធលើផលិតផលដែលបំពុលបរិយាកាសខ្លាំង។
គ្រប់គណបក្សនយោបាយទាំងអស់ មិនថាបក្សណា ឬបក្សណាទេបានយល់ព្រមឲ្យមានការដំឡើងពន្ធលើផលិតផលដែលបញ្ចេញឧស្ម័នកាបូនិកច្រើន។ ចំណែកបេក្ខជនប្រធានាធិបតីទាំងអស់ក៏ជំរុញឲ្យដើរតាមផ្លូវមួយនេះដែរ។ ដូច្នេះ យើងបាននិយាយច្បាស់ពីផ្លូវដែលយើងត្រូវដើរ និងយើងបានទទួលខុសត្រូវពីការសម្រេចចិត្តរបស់យើង។
ពិតណាស់ ការសម្រេចចិត្តនេះបានបង្កឲ្យមានសំណួរមួយចំនួន និងពេលខ្លះបង្កចេញនូវភាពមិនសប្បាយចិត្តទៀតផង។ តែយើងចាំបាច់ត្រូវតែនាំពលរដ្ឋដើរលើផ្លូវនៃការផ្លាស់ប្តូរមួយនេះ។ ជានិច្ចកាល គេត្រូវមានការប្រយ័ត្នប្រយែងខ្ពស់បំផុត ស្តាប់ ហើយយើងទាំងអស់គ្នាបានតាំងចិត្តរួចហើយ។ ប៉ុន្តែក្នុងពេលដែលយើងគ្រប់គ្រង បើយើងមិនសម្រេច និងទទួលការខុសត្រូវឲ្យបានច្បាស់ពីផ្លូវដែលត្រូវដើរទេ យើងប្រាកដជាមិនទទួលបានអ្វីទាំងអស់ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ