ជប៉ុនសន្យាស្វែងរកដំណោះស្រាយសន្តិភាពឲ្យភាគខាងកើតអ៊ុយក្រែន
នាយករដ្ឋមន្រ្តី ជប៉ុន លោកស៊ីនហ្សូ អាបេ កាលពីថ្ងៃសៅរ៍ បានសន្យាធ្វើគ្រប់មធ្យោបាយដើម្បីស្វែងរកដំណោះស្រាយសន្តិភាព មួយសម្រាប់បិទបញ្ចប់ជម្លោះប្រដាប់អាវុធ នៅ ភាគខាងកើតអ៊ុយក្រែន។ ប្រមុខរដ្ឋាភិបាលជប៉ុនបានធ្វើទស្សនកិច្ចមួយថ្ងៃ ក្នុងទីក្រុងគៀវ មុននឹងធ្វើដំណើរទៅចូលក្នុងកិច្ចប្រជុំនៃប្រទេសមហាអំណាចឧស្សាហកម្ម G7 ដែលរៀបចំធ្វើ ក្នុងប្រទេសអាល្លឺម៉ង់ នៅថ្ងៃ អាទិត្យទី ៧មិថុនា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៦
លោកស៊ីនហ្សូ អាបេជានាយករដ្ឋមន្រ្តីជប៉ុនទីមួយ ដែលបានធ្វើទស្សនកិច្ចផ្លូវរដ្ឋក្នុងប្រទេសអ៊ុយក្រែន។ នៅទីក្រុងគៀវ ប្រមុខរដ្ឋាភិបាលជប៉ុនបានធ្វើការសន្យាទៅប្រធានាធិបតីអ៊ុយក្រែន ដោយថា ជប៉ុន ក្នុងនាមជាប្រធានដឹកនាំជំនួបកំពូលG7 នៅឆ្នាំក្រោយ នឹងធ្វើគ្រប់មធ្យោបាយ ដើម្បីស្វែងរកដំណោះស្រាយសន្តិភាពឲ្យភាគខាងកើតអ៊ុយក្រែន។
ជប៉ុន មានទំនាក់ទំនងតានតឹងជាមួយរុស្ស៊ី ដោយសារតែជម្លោះដណ្តើមគ្រប់គ្រងប្រជុំកោះ នៅភាគខាងជើង ជប៉ុនបានថ្កោលទោសនយោបាយភ្ជាប់តំបន់គ្រីមេ របស់អ៊ុយក្រែន ទៅក្នុងទឹកដីរុស្ស៊ី។ តាំងពីមានជម្លោះ ប្រដាប់អាវុធ នៅភាគខាងកើតអ៊ុយក្រែន ទីក្រុងតូក្យូបានផ្តល់កញ្ចប់ជំនួយជាងមួយ ពាន់លានដុល្លារ ដល់ទីក្រុងគៀវ។ លើសពីនោះ ជប៉ុន ដែលជាសម្ព័ន្ធមិត្តរបស់អាមេរិកបានប្រកាស ដាក់ឈ្មោះមន្រ្តីរុស្ស៊ីដែលមានពាក់ព័ន្ធនឹងការធ្វើឲ្យគ្រីមេក្លាយជាទឹកដីរុស្ស៊ី ទៅក្នុងបញ្ជីខ្មៅរបស់រដ្ឋាភិបាលជប៉ុន។
លោកប្រធានាធិបតីអ៊ុយក្រែន ប៉ូរ៉ូឈិនកូ ដែលឈរនៅ ក្បែរលោកនាយករដ្ឋមន្រ្តីជប៉ុន នៅចំពោះមុខអ្នកកាសែត កាលពីថ្ងៃសៅរ៍ បានចាត់ទុកដំណើរទស្សនកិច្ចរបស់នាយករដ្ឋមន្រ្តីជប៉ុន ជាប្រវត្តិសាស្ត្រ និងនិមិត្តរូបក្នុងទំនាក់ទំនងរវាងប្រទេសពីរ។ ប្រធានាធិបតីអ៊ុយក្រែន បានកោតសរសើរដឹងគុណ ជប៉ុន ដែលបានប្រកាសមិនទទួលស្គាល់ការភ្ជាប់តំបន់គ្រីមេរបស់អ៊ុយក្រែន ទៅក្នុងទឹកដីរុស្ស៊ី។
ការប្រយុទ្ធនៅតែបន្តមាន នៅភាគខាងកើតអ៊ុយក្រែន ដោយបានសម្លាប់ទាហានរដ្ឋាភិបាលអ៊ុយក្រែន ម្នាក់ទៀត កាលពីថ្ងៃសៅរ៍។ ភាគីទាំងសងខាងចោទទម្លាក់កំហុសដាក់គ្នា ថាបានរំលោភបទឈប់បាញ់ ដែលរដ្ឋាភិបាលអ៊ុយក្រែន និងពួកឧទ្ទាមនិយមរុស្ស៊ី បានចុះជាមួយ គ្នា នៅទីក្រុងមីងស្ក៍ កាលពីខែកុម្ភៈកន្លងទៅ។
កិច្ចប្រជុំប្រទេសមហាឧស្សាហកម្ម G7 នឹងត្រូវប្រព្រឹត្តទៅ នៅថ្ងៃអាទិត្យក្នុងប្រទេសអាល្លឺម៉ង់។ ប្រធានាធិបតីអ៊ុយក្រែន កំពុងឆ្លៀតធ្វើយុទ្ធនាការអូសទាញប្រទេសមហាអំណាច តាមរយៈ កិច្ចប្រជុំG7 ដាក់សម្ពាធទៅលើរុស្ស៊ី ដែលអ៊ុយក្រែន ចោទថា ជាអ្នកផ្តល់អាវុធ និងបញ្ជូនទ័ពរុស្ស៊ី ចូលឈ្លានពាន ក្នុងទឹកដីអ៊ុយក្រែន។ បន្ទាប់ពីនាយករដ្ឋមន្ត្រីជប៉ុន លោកប្រធានាធិបតីអ៊ុយក្រែនទទួលជួប គាវរកិច្ចលោកនាយករដ្ឋមន្រ្តីកាណាដា ដែលធ្វើដំណើរឆ្លងកាត់ទីក្រុងគៀវ មុននឹងទៅទៅចូលរួមកិច្ចប្រជុំG 7 នៅElmau ប្រទេសអាល្លឺម៉ង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ