អាកាសធាតុ៖កិច្ចប្រជុំចុងក្រោយមុននឹងសន្និសីទអន្តរជាតិក្នុងទីក្រុងប៉ារីស ប្រទេសបារំាង
នៅ ៦សប្តាហ៍ មុនការបើកសន្និសីទអន្តរជាតិស្តីពីបញ្ហាអាកាសធាតុដែលនឹងត្រូវរៀបចំពីថ្ងៃទី៣០ វិច្ឆិកាដល់ថ្ងៃទី១១ ធ្នូក្នុងទីក្រុងប៉ារីស ប្រទេសបារំាង ប្រទេសទំាង ១៩៥ ផ្តើមកិច្ចប្រជុំនាសប្តាហ៍ចុងក្រោយចាប់ពីថ្ងៃចន្ទ ទី១៩ តុលាក្នុងទីក្រុងប៊ន ប្រទេសអាល្លឺម៉ង់។ គោលដៅសំខាន់នៃកិច្ចប្រជុំ គឺរៀបចំបញ្ចប់នូវសេចក្តីព្រាងអត្ថបទមួយស្តីពីបញ្ហាអាកាសធាតុសម្រាប់សន្និសីទអន្តរជាតិក្រុងប៉ារីស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
នៅក្នុងកិច្ចប្រជុំសប្តាហ៍ចុងក្រោយស្តីពីបញ្ហាអាកាសធាតុរៀបចំនៅទីស្នាក់ការកណ្តាលនៃអនុសញ្ញាអន្តរជាតិស្តីពីការប្រែប្រួលអាកាសធាតុក្នុងទីក្រុងប៊ន ប្រទេសអាល្លឺម៉ង់ថ្ងៃនេះ ប្រទេសទំាង ១៩៥ ត្រូវបន្តជជែកពិភាក្សាលើអត្ថបទព្រាងមួយដែលស្នើឡើងដោយសហប្រធានអនុសញ្ញាអន្តរជាតិស្តីពីការប្រែប្រួលអាកាសធាតុនាប៉ុន្មានកន្លងទៅ។ នៅក្នុងអត្ថបទព្រាងនោះ សហប្រធានដឹកនំាដោយជនជាតិអាល់ហ្សេរី និងអាមេរិកបានលើកឡើងពីបញ្ហាបន្ទាន់ដែលប្រទេសនីមួយៗត្រូវសន្យាឲ្យបានខ្ជាប់ខ្ជួនក្នុងការកាត់បន្ថយអត្រាផ្សែងពុលនៅក្នុងបរិយាកាស។ គឺជាអត្ថបទព្រាងមួយដែលមានកម្រាស់ ៨០ទំព័រ តែដោយមានសំណើពីប្រទេសជាច្រើន សហប្រធានទំាងពីររូបបានស្នើឲ្យមានការកាត់បន្ថយពី ៨០ មកនៅត្រឹម ២០ទំព័រដែលខ្លឹម និងងាយយល់។
លោក Laurent Fabius រដ្ឋមន្រ្តីការបរទេសបារំាង និងជាប្រធានសន្និសីទអន្តរជាតិស្តីពីបញ្ហាអាកាសធាតុហៅកាត់ COP២១ ដែលគ្រោងបើកក្នុងទីក្រុងប៉ារីស ប្រទេសបារំាងនៅ ៦សប្តាហ៍ខាងមុខបានគូសបញ្ជាក់កាលពីថ្ងៃសុក្រ ទី១៦ តុលាដោយអំពាវនាវឲ្យគ្រប់ភាគីទទួលយកអត្ថបទព្រាងធ្វើជាមូលដ្ឋានដើម្បីជជែកពិភាក្សា។ គួរជម្រាបជូនថាមកដល់ថ្ងៃនេះ គឺទើបមានតែ ១៥០ប្រទេសប៉ុណ្ណោះដែលបានបញ្ជូនឲ្យអង្គការសហប្រជាជាតិនូវវិធានការរួមចំណែកកាត់បន្ថយឧស្ម័នពុលនៅក្នុងបរិយាកាសសម្រាប់ចន្លោះឆ្នំា ២០២៥ និង ២០៣០។ កម្មវត្ថុសំខាន់ គឺទប់កុំឲ្យកម្តៅនៅក្នុងភពផែនដីកើនលើសពី ២អង្សារ។ បើពុំនោះសោតទេ វានឹងបង្កចេញនូវផលវិបាកយ៉ាងធ្ងន់ធ្ងរសម្រាប់ភពផែនដីទំាងមូល។
យ៉ាងណាក៏ដោយ ការខ្វែងគំនិតគ្នាកំពុងបន្តមាន ពិសេសពីក្រុមប្រទេសកំពុងអភិវឌ្ឍន៍ដែលកំពុងបន្តទាមទារឲ្យមានការជួយឧបត្ថម្ភថវិកាដល់ពួកគេនៅក្នុងយុទ្ធនាការប្រយុទ្ទប្រឆំាងនឹងការឡើងកំដៅនៅក្នុងបរិយាកាសដោយសារតែទង្វើរបស់ក្រុមប្រទេសអភិវឌ្ឍន៍។ អ្វីដែលក្រុមប្រទេសកំពុងអភិវឌ្ឍន៍បានរង់ចំាខ្លំាងនោះ គឺការសន្យាក្នុងឆ្នំា ២០០៩ ដែលក្រុមប្រទេសប៉ែកខាងជើងព្រមផ្តល់លុយចំនួន ១០០ ០០០លានដុល្លារក្នុងមួយឆ្នំាសម្រាប់ក្រុមប្រទេសប៉ែកខាងត្បូងពីពេលនេះដល់ឆ្នំា ២០២០។ គួរជម្រាបជូនថា មុននឹងការបើកសន្និសីទអន្តរជាតិស្តីពីបញ្ហាអាកាសធាតុនាពេលខាងមុខ ក៏មានជំនួបកំពូលជាច្រើនត្រូវបានរៀបចំជាលក្ខណៈទ្វេភាគី ឬ ត្រីភាគីនៅអង្គការសហប្រជាជាតិដែរ។ គោលដៅសំខាន់ គឺស្វែងរកកុងសង់ស៊ុសដើម្បីកាត់បន្ថយការចាក់ចោលឧស្ម័នពុលទៅក្នុងបរិយាកាស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ