រដ្ឋាភិបាលធ្វើច្បាប់ដែលនឹងផ្តល់អំណាចច្រើនជាងមុន ដល់ចារកិច្ចបារាំង
រដ្ឋាភិបាលបារាំងបានបញ្ចេញឲ្យឃើញ សេចក្តីច្បាប់ស្តីពីចារកម្ម។ សេចក្តីច្បាប់ថ្មី ដែលគណរដ្ឋមន្រ្តីបារាំង លើកយកទៅពិភាក្សា កាលពីថ្ងៃព្រហស្បតិ៍ មានទិសដៅផ្តល់អំណាច និងមធ្យោបាយមហាសាលដល់ទីភ្នាក់ងារស៊ើបការណ៍សម្ងាត់របស់បារាំង ដើម្បីអាចប្រយុទ្ធប្រឆាំងនឹងអំពើភេរវកម្ម។
ចុះផ្សាយនៅថ្ងៃ៖
សេចក្តីព្រាងច្បាប់ថ្មី ស្តីពីចារកម្ម បានប្រសូត្រចេញជារូបរាងឡើង នៅក្រោយពេលដែលទីក្រុងប៉ារីសបានរងអំពើភេរវកម្ម ដែលបានសម្លាប់មនុស្ស ១៧នាក់ កាលពីខែមករា ដើមឆ្នាំនេះ។ ក្រោយអំពើភេរវកម្ម ភ្នាក់ងារចារកិច្ចបារាំងត្រូវគេរិះគន់ ថា បានខកខាន មិនបានទប់ស្កាត់ជាមុន អំពើភេរវកម្ម។
សេចក្តីព្រាងច្បាប់ស្តីពីចារកម្ម គ្រោងនឹងផ្តល់អំណាច និងមធ្យោបាយបន្ថែមដល់ស្ថាប័ន ឬបុគ្គល ដែលធ្វើការប្រយុទ្ធប្រឆាំងអំពើភេរវកម្ម។ ទិសដៅ គឺច្បាប់នេះនឹងអនុញ្ញាតឲ្យទីភ្នាក់ងារ ស៊ើបការណ៍សម្ងាត់របស់បារាំង អាចទប់ស្កាត់បានល្អប្រសើរជាងមុន គម្រោងធ្វើភេរវកម្ម។
ដើម្បីអាចទប់ស្កាត់ជាមុន អំពើភេរវកម្ម សេចក្តីព្រាងច្បាប់ថ្មី នឹងអនុញ្ញាត ឲ្យភ្នាក់ងារស៊ើបការណ៍សម្ងាត់បារាំង តាមដាន លួចស្តាប់ទូរស័ព្ទ ឬចូលមើលទិន្និន័យ ខ្លឹមសារសារអេឡេចត្រូនិក ដើម្បីស្ទាក់ ចាប់រក ជនសង្ស័យ ជាប់ពាក់ព័ន្ធនឹងក្រុមជីហាត ភេរវនិយម។ អាចនិយាយក្នុងន័យម្យ៉ាងទៀតថា ច្បាប់នេះនឹងបើកដៃឲ្យភ្នាក់ងារស៊ើបការណ៍សម្ងាត់បារាំង ចូលមើលទិន្នន័យផ្ទាល់ខ្លួនរបស់ប្រជាជនបារាំង ដោយស្របច្បាប់។
ចំណុចថ្មីមួយទៀតរបស់សេចក្តីព្រាងច្បាប់ស្តីពីចារកម្ម គឺទីភ្នាក់ងារស៊ើបការណ៍សម្ងាត់អាចផ្តើមប្រតិបត្តិការស៊ើបអង្កេត ដូចជា លួចស្តាប់ទូរស័ព្ទ ឬចូលមើលខ្លឹមសារម៉ែលអេឡិចត្រូនិក របស់បុគ្គល ណាម្នាក់ ដោយមិនចាំបាច់រង់ចាំភ្លើងខៀវពីចៅក្រម ដូចពេលមុន។
បើទោះបីជាអ្នកនយោបាយ បារំាងមកពីគ្រប់គណបក្ស គាំទ្រចង់ឲ្យមានច្បាប់ថ្មី ស្តីពីចារកម្ម អង្គការការពារសិទ្ធិមនុស្សបារម្ភថា តាមរយៈច្បាប់ថ្មី នេះ សិទ្ធិ ជីវិតឯកជនរបស់ប្រជាជនបារាំងនឹងត្រូវគេរំលោភបំពាន។ គេបានប្រៀបធៀបច្បាប់ថ្មីស្តីពីចារកម្ម របស់បារាំងទៅនឹងច្បាប់ Patriot Act ដែលអាមេរិកបានបង្កើតឡើង នៅក្រោយអំពើភេរវកម្មឆ្នាំ ២០០១។ ច្បាប់ Patriot Actត្រូវបានអង្គការការពារសិទ្ធិមនុស្សរិះគន់ថា បានរំលោភសិទ្ធិសេរីភាពបុគ្គលយ៉ាងធ្ងន់ធ្ងរ នៅអាមេរិក។ លោកនាយករដ្ឋមន្រ្តីបារាំង Manuel Valls ដែលបានចេញមុខការពារច្បាប់ថ្មី ថា នឹងមិនដូច Patriot Act បានសន្យាហើយថា នឹងបណ្តុះបណ្តាល ធនធានមនុស្សដែលត្រូវធ្វើការខាងផ្នែកចារកម្ម និងធានាថា ការតាមដាននឹងធ្វើតែទៅលើបុគ្គលដែលសង្ស័យ ធ្វើអំពើភេរវកម្ម ប៉ុន្តែ មិនមែនបុគ្គលទូទៅនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ