ក្រោយរងភេរវកម្ម Charlie hebdo នឹងចេញផ្សាយ១លានច្បាប់
ភេរវកម្មសំដៅបិទខ្ទប់សេរីភាពបញ្ចេញមតិរបស់អ្នកកាសែតបារាំងហាក់មិនបានទទួលជោគជ័យទេ។ នៅមួយថ្ងៃក្រោយភេរវកម្មសម្លាប់អ្នកកាសែត អ្នកគំនូរ របស់Charlie hebdo អ្នកគ្រប់គ្រងទស្សនាវដ្តីបានអះអាង កាលពីថ្ងៃព្រហស្បតិ៍ ទី ៨មករា ថា ទស្សនាវដ្តីនឹងបោះពុម្ពផ្សាយចំនួន ១លានច្បាប់ នៅថ្ងៃពុធសប្តាហ៍ក្រោយ។ នេះបើតាមការអះអាងរបស់មេធាវី របស់ Charlie hebdo (ស្ហារលីអិបដូ)។
ចុះផ្សាយនៅថ្ងៃ៖ កែប្រែថ្ងៃទី៖
បន្ទាប់ពីអ្នកកាសែត អ្នកគំនូរ របស់ Charlie hebdo(ស្ហារលីអិបដូ)ត្រូវពួកភេរវជនពីររូបបាញ់សម្លាប់ កាលពីថ្ងៃពុធ Charlie hebdoបានទទួលសមានចិត្តគាំទ្រ និងការសន្យាជាច្រើនខាងផ្នែកហិរញ្ញវត្ថុ ពីសំណាក់សប្បុរសជន និងអ្នកមានវិជ្ជាជីវៈជាមួយគ្នា។
តាមRichard Malka មេធាវីរបស់ Charlie hebdo ដែលបានជួបប្រជុំជាមួយបុគ្គលិក សេសសល់របស់ទស្សនាវដ្តី កាលពីថ្ងៃព្រហស្បតិ៍ កាសែតបារាំង Le Monde រួមជាមួយក្រុមហ៊ុនសោតទស្សន៍ Canal+ បានសន្យាជួយទស្សនាវដ្តីដើម្បីចេញផ្សាយឲ្យបាន១លានច្បាប់ នៅសប្តាហ៍ក្រោយ។ ចំណែកកាសែត ឆ្វេងនិយមLibération នឹងផ្តល់ទីកន្លែងធ្វើការដល់អ្នកគំនូរ និងអ្នកកាសែតរបស់ Charlie hebdo។
ទស្សនាវដ្តី Charlie hebdo ដែលនឹងចេញផ្សាយនៅសប្តាហ៍ក្រោយនឹងមានចំនួនតែ ៨ទំព័រ គឺតិចជាងពាក់កណ្តាលនៃចំនួនផ្សាយធម្មតា ដែលមាន១៦ទំព័រ។ ជាធម្មតា ទស្សនាវដ្តី Charlie hebdoមានចេញផ្សាយតែ៦ម៉ឺនច្បាប់ប៉ុណ្ណោះ។
ច្បាប់ចុងក្រោយ លេខ ១១៧៧ ដែលចេញផ្សាយ នៅថ្ងៃដែលក្រុមភេរវកម្មសម្លាប់អ្នកកាសែតរបស់ Charlie hebdo ត្រូវបានលក់ដាច់អស់គ្មានសល់នៅតាមតូបលក់កាសែត។ ប៉ុន្តែ លេចចុងក្រោយរបស់ Charlie hebdo ត្រូវបានគេលក់ក្នុងតម្លៃថ្លៃកប់ពពក នៅតាមវិបសៃតិ៍។ នៅលើវិបសៃតិ៍ Ebay លេចផ្សាយចុងក្រោយរបស់ Charlie hebdo ត្រូវបានដាក់លក់ក្នុងតម្លៃពី៦០០ ទៅ១០០០អឺរ៉ូ នៅក្នុងពេលដែលទស្សនាវដ្តី Charlie hebdo ធ្លាប់លក់ត្រឹមតែ៣អឺរ៉ូ ក្នុងមួយច្បាប់។
កាលពីថ្ងៃព្រហស្បតិ៍ នៅក្នុងសារចូលរួមកាន់ទុក្ខជាតិ សម្រាប់អ្នកកាសែតរបស់ Charlie hebdo ដែលបានស្លាប់នៅក្នុងការវាយប្រហាររបស់ភេរវជន លោកស្រី Cécile Mégie បានបញ្ជាក់ថា ប្រព័ន្ធផ្សព្វផ្សាយបារាំងត្រៀមខ្លួនផ្តល់នូវប្រភពធនធានគ្រប់យ៉ាងដែលចាំបាច់ ទាំងធនធានមនុស្ស និងទាំងសម្ភារៈ ដើម្បីធ្វើយ៉ាងណាឲ្យសារព័ត៌មាន Charlie hebdo អាចបន្តការផ្សាយរបស់ខ្លួនតទៅទៀត។ “យើងចាំបាច់ត្រូវតែរួបរួមគ្នា ដើម្បីការពារសិទ្ធិសេរីភាពសារព័ត៌មាន ហើយយើងនឹងបន្តធ្វើ នៅក្នុងនាមអ្នកសារព័ត៌មាន Charlie hebdo (ស្ហារលីអិបដូ)។
សូមបញ្ជាក់ថា នៅមុនជួបរងគ្រោះអំពើភេរវកម្ម ទស្សនាវដ្តីធ្លាប់ជួបដំណាក់កាលលំបាកខាងផ្នែកហិរញ្ញវត្ថុ និងវិះតែនឹងក្ស័យធនម្តងៗ រហូតធ្វើឲ្យគេខ្លាចថា ទស្សនាវដ្តីនេះអាចបាត់មុខ នៅតាមតូបកាសែត ក្នុងពេលឆាប់ៗខាងមុខ។ ប្រធានទស្សនាវដ្តី លោកCharb ដែលត្រូវភេរវករបាញ់សម្លាប់ កាលពីថ្ងៃពុធ ធ្លាប់បាននិយាយប្រាប់ទីភ្នាក់ងារព័ត៌មានបារាំង AFP ថា Charlie hebdo ធ្លាប់បានអំពាវនាវរកជំនួយគំាទ្រហិរញ្ញវត្ថុ ប៉ុន្តែ គេរកអាចរកបានតែប៉ុន្មានអឺរ៉ូប៉ុណ្ណោះ ក្នុងពេលដែលទស្សនាវដ្តីត្រូវការ ១លានអឺរ៉ូ ដើម្បី ទ្រទ្រង់ការចេញផ្សាយរបស់ខ្លួន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ