តើក្រិកអាចបញ្ចុះបញ្ចូលសហភាពអឺរ៉ុប ឲ្យអនុគ្រោះបំណុលដល់ខ្លួនដែរឬទេ?
អាជ្ញាធរក្រិក និងថ្នាក់ដឹកនាំជាន់ខ្ពស់របស់បណ្តាប្រទេសចាយប្រាក់អឺរ៉ូត្រូវជួបប្រជុំគ្នា នៅថ្ងៃនេះ នៅទីក្រុងព្រុចសែល ប្រទេសបែលហ្ស៊ិក។ កិច្ចប្រជុំ រយៈពេលពីរថ្ងៃ ដែលនឹងផ្តោតសំខាន់ទៅលើប្រាក់បំណុលក្រិក នឹងធ្វើឡើង នៅស្ថានភាពដ៏តានតឹងមួយ ព្រោះថា រដ្ឋាភិបាលថ្មីក្រិក សង្ឃឹមនឹងចរចាឡើងវិញ ពីរបៀបវារៈសងប្រាក់បំណុល ដែលក្រិកជំពាក់ធនាគារកណ្តាលអឺរ៉ុប ឬមូលនិធិរូបិយវត្ថុអន្តរជាតិ FMI ប៉ុន្តែ អាល្លឺម៉ង់ ដែលជាភាគីម្ចាស់បំណុលមួយរបស់ក្រិកបានបញ្ជាក់ជំហរដ៏រឹងមាំរបស់ខ្លួនរួចហើយថា នឹងមិនសើរើចរចាជាថ្មី ពីរឿងប្រាក់បំណុលជាមួយក្រិកទេ។
ចុះផ្សាយនៅថ្ងៃ៖
ស្តាប់ - ០៧:៥២
នៅម៉ោងមួយភ្លឺ ថ្ងៃអង្គារឆ្លងចូលដល់ថ្ងៃពុធ គឺប៉ុន្មានម៉ោងមុនបើកកិច្ចប្រជុំក្រិក និងប្រទេសអឺរ៉ុបផ្សេងទៀត សភាក្រិកបានបោះឆ្នោតផ្តល់ការជឿទុកចិត្តលើនយោបាយកំណែទម្រង់ថ្មីរបស់លោកអាឡិចស៊ី ស៊ីប្រាស ដែលជាប្រមុខដឹកនាំរបស់រដ្ឋាភិបាលក្រិកថ្មី។ ដើម្បីអនុវត្តឲ្យចេញ គម្រោងផែនការកំណែទម្រង់ រដ្ឋាភិបាលក្រិកត្រូវរកឲ្យឃើញសិន កិច្ចព្រមព្រៀង ជាមួយភាគីម្ចាស់បំណុល ដែលនៅក្នុងនោះ មានធនាគារកណ្តាលអឺរ៉ុប និងមូលនិធិរូបិយវត្ថុអន្តរជាតិ។
ប្រមុខរដ្ឋាភិបាលថ្មីរបស់ក្រិកបានស្នើចេញផែនការធ្វើកំណែទម្រង់ ក្នុងរយៈពេល ៤ឆ្នាំ គិតពីឆ្នាំ នេះ ដល់ឆ្នាំ ២០១៩ ក្នុងគោលដៅ ស្រោចស្រង់ក្រិកចេញពីវិបត្តិប្រាក់បំណុល ក៏ដូចជាផ្តល់សន្ទុះដល់កំណើនសេដ្ឋកិច្ចឡើងវិញ។ ដើម្បីអាចធ្វើកំណែទម្រង់នេះបាន រដ្ឋាភិបាលថ្មីរបស់ក្រិកបានស្នើសុំឲ្យសហភាពអឺរ៉ុបចូលរួមជាមួយខ្លួន។ មានន័យថា សហភាពអឺរ៉ុប ត្រូវឈប់ដាក់គំនាបលើក្រិកឲ្យធ្វើនយោបាយរឹតត្បិតថវិកា ជាថ្នូរនឹងប្រាក់ជំនួយ ដែលសហភាពអឺរ៉ុបឲ្យក្រិកខ្ចី តទៅទៀត។ រដ្ឋាភិបាលថ្មីរបស់ក្រិកលែងនិយាយពាក្យសុំឲ្យអឺរ៉ុបលុបចោលបំណុលទាំងស្រុងដែលក្រិកជំពាក់អឺរ៉ុបទៀតហើយ ប៉ុន្តែ រដ្ឋាភិបាលក្រិក តាមរយៈលោកនាយករដ្ឋមន្រ្តី ក្រិក អាឡិចស៊ី ស៊ីប្រាស បានទទូចសុំឲ្យអឺរ៉ុបយោគយល់ដល់ក្រិក គឺសម្រួល និងសម្រាលដល់ក្រិក ក្នុងសងប្រាក់បំណុលទាំងនោះ។
បច្ចុប្បន្ននេះ យោងទៅតាមលក្ខខណ្ឌផ្តល់ជំនួយរបស់សហភាពអឺរ៉ុប ក្រិកត្រូវសងប្រាក់កំចីបណ្តើរៗ ជាមួយនឹងការបង់ការប្រាក់ម្តង ទៅ ២ដង ក្នុងមួយឆ្នាំ ទៅឲ្យក្រុមម្ចាស់បំណុល។ សម្រាប់រដ្ឋាភិបាលក្រិក នេះជាបន្ទុកមួយធ្ងន់ណាស់ សម្រាប់ក្រិកដែលកំពុងតែមានសេដ្ឋកិច្ចមិនល្អ និងរស់ពឹងអាស្រ័យតែលើជំនួយ មានសំណងរបស់សហភាពអឺរ៉ុប។ ជំនួយមានសំណងប្រមាណ២៤០ពាន់លានអឺរ៉ូដែលសហភាពអឺរ៉ុប ផ្តល់ទៅឲ្យក្រិកខ្ចី ជាថ្នូរ នឹងការរឹតត្បិតថវិកា របស់រដ្ឋាភិបាលក្រិក មិនបានជួយក្រិកឲ្យរួចខ្លួនពីវិបត្តិប្រាក់បំណុលទេ ប៉ុន្តែ វារឹតតែជំរុញឲ្យប្រជាជនក្រិកធ្លាក់ចូលទៅក្នុងវិបត្តិកាន់តែខ្លាំង។ តាមរដ្ឋាភិបាលថ្មីរបស់ក្រិក ការកាត់បន្ថយចំណាយសាធារណៈ មិនបានធ្វើឲ្យក្រិកមានកំណើនសេដ្ឋកិច្ច ប៉ុន្តែ ផ្ទុយទៅវិញ វាបានធ្វើឲ្យប្រជាជនក្រិកកាន់តែច្រើន ធ្លាក់ទៅក្នុងភាពក្រីក្រហៅមិនលឺ។
ជារួម នៅក្នុងកិច្ចប្រជុំជាមួយសហភាពអឺរ៉ុប នៅថ្ងៃនេះ ក្រិកចង់ចរចាឡើងវិញ លក្ខខណ្ឌនៃជំនួយ ជាប្រាក់កំចី ជាមួយសហភាពអឺរ៉ុប។ រដ្ឋាភិបាលក្រិកថ្មីបានសុំឲ្យសហភាពអឺរ៉ុបគិតគូរឡើងវិញ ពីរបៀបវារៈ នៃការសងបំណុល ដូចជាក្រិកទាមទារថា ខ្លួនចង់សងត្រឹមការប្រាក់សិន ប៉ុន្តែមិនសងប្រាក់បំណុលភ្លាមៗទេ។ ក្រិកនឹងសងប្រាក់បំណុលទៅឲ្យម្ចាស់ដើម នៅពេលដែលក្រិកចាប់មានកំណើនសេដ្ឋកិច្ចឡើងវិញ។
ក្រិកអាចនឹងជួបឧបសគ្គច្រើននៅក្នុងការចរចាជាថ្មីជាមួយសហភាពអឺរ៉ុប ព្រោះអាល្លឺម៉ង់ ប្រទេសមានសេដ្ឋកិច្ចនាំមុខគេនៅអឺរ៉ុប ដែលតឹងរ៉ឹងខ្លាំងលើមុខចំណាយរបស់កេសប្រាក់សហភាពអឺរ៉ុប បានបញ្ជាក់រួចហើយ ថា នឹងមិនចរចា សើរើឡើងវិញ នូវលក្ខខណ្ឌ នៃកម្មវិធីផ្តល់ប្រាក់កម្ចីដល់ក្រិកទេ។ នៅក្នុងកិច្ចប្រជុំថ្ងៃនេះ ដែរ ប្រសិនបើក្រិកបរាជ័យ មិនអាចបញ្ចុះបញ្ចូលសហភាពអឺរ៉ុប ជាពិសេសអាល្លឺម៉ង់ នោះ ក្រិកនឹងមិនអាចគោរពកាតព្វកិច្ចសងបំណុលរបស់ខ្លួន។ បើសិនជាដូច្នេះមែន សហភាពអឺរ៉ុបនឹងផ្អាកមិនបញ្ជូនប្រាក់ជំនួយ ៧ពាន់លានអឺរ៉ូ (ផ្នែកមួយនៃទឹកប្រាក់ សរុប ២៤០ពាន់លានអឺរ៉ូ) ទៅឲ្យក្រិក ដែលត្រូវធ្វើនៅចុងខែកុម្ភៈនេះ។ បើសិនគ្មានជំនួយកម្ចីរបស់ធនាគារកណ្តាលអឺរ៉ុបទេ នោះក្រិកនឹងអាចជួបវិបត្តិគ្មានប្រាក់ខែបើកឲ្យមន្រ្តីរដ្ឋរបស់ខ្លួន នៅចុងខែនេះ។
ក្រិកទាមទារឲ្យរដ្ឋាភិបាលអាល្លឺម៉ង់ សងជម្ងឺចិត្តសង្រ្គាម
នៅក្នុងពេលដែលអាល្លឺម៉ង់ ប្រកាន់ជំហរតឹងរឹង ទាមទារឲ្យក្រិកគោរពកាតព្វកិច្ចសងប្រាក់បំណុល របស់ខ្លួន ក្រិកវិញ បានទាមទារឲ្យអាល្លឺម៉ង់សងប្រាក់បំណុល ដែលអាល្លឺម៉ង់ ជំពាក់ខ្លួន នៅក្នុងអតីតកាល។ កាលពីថ្ងៃអង្គារម្សិលមិញ មុននឹងចាកចេញទៅទីក្រុងម៉ូស្គូ រដ្ឋមន្រ្តីការបរទេស ក្រិក បានដាក់ពាក្យសុំជាផ្លូវការ ទៅទីក្រុងប៊ែរឡាំង ដើម្បីទាមទារឲ្យអាល្លឺម៉ង់ សងប្រាក់ជម្ងឺចិត្តសង្រ្គាម សម្រាប់ការដែលអាល្លឺម៉ង់ កាន់កាប់ បំផ្លាញ ក្រិក នៅក្នុង សម័យសង្រ្គាមលោកលើកទីពីរ។ តាមការវាយតម្លៃរបស់រដ្ឋាភិបាលក្រិក គិតត្រឹមឆ្នាំ ២០១២ ទឹកប្រាក់ជម្ងឺចិត្តដែលអាល្លឺម៉ង់ត្រូវបង់សងដល់ក្រិកមានតម្លៃ ១៦២ពាន់លានអឺរ៉ូ គឺស្មើនឹងពាក់កណ្តាល នៃប្រាក់បំណុលបច្ចុប្បន្នរបស់រដ្ឋក្រិក។
សម្រាប់អាល្លឺម៉ង់ ការទាមទាររបស់ក្រិក គឺគ្មានន័យ ព្រោះសំណុំរឿងសងប្រាក់ជម្ងឺចិត្តដល់ជនរងគ្រោះដោយសារសង្រ្គាមបង្កឲ្យអាល្លឺម៉ង់ ត្រូវបានបិទបញ្ចប់ តាំងពីឆ្នាំ ១៩៦០ម្ល៉េះ។ កាលណោះ អាល្លឺម៉ង់បានចុះកិច្ចព្រមព្រៀងជាមួយក្រិក ក៏ដូចជាជាមួយប្រទេសផ្សេងទៀត ក្នុងរឿងសងប្រាក់ជម្ងឺចិត្តដល់ជនរងគ្រោះដោយពួកណាហ្ស៊ីនៅសម័យសង្រ្គាមលោកលើកទីពីរ។ ដូច្នេះ ក្រិកគ្មានហេតុផលអ្វីដែលត្រូវមកសើរើឡើងវិញ ទាមទារឲ្យអាល្លឺម៉ង់សងជម្ងឺចិត្តសង្រ្គាម ដល់ក្រិកនៅពេលនេះទេ។
ក្រិក រត់រកជំនួយពីរុស្ស៊ី អាមេរិក និងចិន
នៅថ្ងៃពុធ នៅចំពេលដែលក្រិកកំពុងបើកជំនួបចរចាជាមួយប្រទេសចាយប្រាក់អឺរ៉ូផ្សេងទៀត នៅទីក្រុងព្រុចសែល រដ្ឋមន្រ្តីការបរទេស ក្រិកកំពុងបំពេញទស្សនកិច្ចនៅក្នុងប្រទេសរុស្ស៊ី។
ជំហរតឹងរ៉ឹងរបស់សហភាពអឺរ៉ុប ជាពិសេសអាល្លឺម៉ង់អាចជំរុញក្រិកឲ្យទៅរត់ជំនួយពីប្រទេសផ្សេងទៀត ដូចជាចិន រុស្ស៊ី ឬអាមេរិកជាដើមក្នុងករណី ក្រិកមិនអាចបញ្ចុះបញ្ចូលសហភាពអឺរ៉ុបឲ្យអនុគ្រោះបំណុលដល់ខ្លួន។ ត្រូវដឹងថា ប្រមុខរដ្ឋាភិបាលថ្មីរបស់ក្រិកបានទទួលការគាំទ្រភ្លាមៗពីលោកប្រធានាធិបតីអាមេរិក លោកបារ៉ាក់អូបាម៉ា ព្រោះថា លោកអូបាម៉ា ដូចមេដឹកនាំថ្មីរបស់ក្រិក បានរិះគន់នយោបាយរឹតត្បិតរបស់សហភាពអឺរ៉ុប។ សម្រាប់លោកអូបាម៉ា នយោបាយចាយរឹតត្បិតថវិកាអឺរ៉ុបជាឧបសគ្គរារាំងមិនឲ្យអឺរ៉ុបជួបកំណើនសេដ្ឋកិច្ច។
មុនដំណើរទស្សនកិច្ចរបស់ប្រមុខការបរទេសក្រិកទៅប្រទេសរុស្ស៊ី ទីក្រុងម៉ូស្គូធ្លាប់បានអះអាងរួចហើយថា ខ្លួននឹងអាចផ្តល់ជំនួយឥណទាន ទៅតាមតម្រូវការចង់បានរបស់ក្រិក។ ដូច្នេះ បើសិនជាក្រិកមិនអាចដោះស្រាយប្រាក់បំណុលជាមួយអឺរ៉ុប នោះក្រិកអាចរត់រកជំនួយពីរុស្ស៊ីបាន។ ក្រៅពីរុស្ស៊ី និងអាមេរិក ក្រិកនៅអាចសង្ឃឹមរំពឹងលើប្រទេសចិន ដែលជាដៃគូពាណិជ្ជកម្មដ៏សំខាន់របស់ក្រិក។ នៅឆ្នាំ ២០១២ ទំហំដោះដូរពាណិជ្ជកម្មរវាងចិន និងក្រិក បានកើន២៥០ភាគរយ គឺមានតម្លៃ ៤ ពាន់លានអឺរ៉ូ។ ដោយសារតែវិបត្តិប្រាក់បំណុល សឹងជួបក្ស័យធន រដ្ឋក្រិកបានបង្ខំចិត្តធ្វើឯកជនភាវូបនីយកម្មលើទីតាំងសម្បត្តិរដ្ឋ ដែលភាគច្រើន ត្រូវបានចិនប្រមូលទិញ រហូតដល់មានពាក្យថា ចិនចង់ប្រមូលទិញ ក្រិកទាំងមូលតែម្តង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ