នាយករដ្ឋមន្រ្តីក្រិកសុំអឺរ៉ុបឲ្យទុកពេល ៤ឆ្នំាសម្រាប់ក្រិកធ្វើកំណែទម្រង់ដោយខ្លួនឯង
ក្នុងដំណើរទស្សនកិច្ចនៅទីស្នាក់ការកណ្តាលអឺរ៉ុបក្នុងទីក្រុងព្រុចសែល ប្រទេសប៊ែលហ្ស៊ិក លោកនាយករដ្ឋមន្រ្តីនៃប្រទេសក្រិកអាឡិចស៊ី ស៊ីប្រាសបានលើកឡើងពីគម្រោងផែនការកំណែទម្រង់មួយដែលរដ្ឋាភិបាលរបស់លោកមានបំណងនឹងធ្វើសម្រាប់រយៈពេល ៤ឆ្នំាខាងមុខ ពោលពីឆ្នំា ២០១៥ នេះដល់ឆ្នំា ២០១៨ ខាងមុខ។ តែលោកស៊ីប្រាសបានបញ្ជាក់ច្បាស់ៗថា ទីក្រុងអាទែនមិនមែនសម្រេចអារកាត់តែម្នាក់ឯងទេ តែក៏ត្រូវមានការយល់ព្រមពីសហភាពអឺរ៉ុបផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៤
លោកនាយករដ្ឋមន្រ្តីក្រិកអាឡិចស៊ី ស៊ីប្រាសបាននិយាយយ៉ាងដូច្នេះជាមួយលោកប្រធានគណៈកម្មការអឺរ៉ុប Jean-Claude Juncker។ លោកស៊ីប្រាសបានស្នើសុំឲ្យសហភាពអឺរ៉ុបកុំបង្ខំសង្កត់ ក ក្រិក និងឲ្យអឺរ៉ុបអនុម័តចេញនូវកិច្ចព្រមព្រៀងអន្តរកាលមួយដោយផ្តល់ឱកាសឲ្យក្រិកអាចរៀបចំគម្រោងផែនការកំណែទម្រង់មួយសម្រាប់រយៈពេល ៤ឆ្នំា ពោលពីឆ្នំា ២០១៥ ដល់ឆ្នំា ២០១៨។ អ្វីដែលលោកស៊ីប្រាសចង់បានពីអឺរ៉ុបនៅក្នុងរយៈពេល ៤ឆ្នំានេះ គឺមិនមែនសុំឲ្យអឺរ៉ុបលុបចោលបំណុលទំាងអស់ដែលក្រិកកំពុងជំពាក់ទេ តែសុំឲ្យអឺរ៉ុបជួយសម្រួល និងសម្រាលនៅក្នុងការសងប្រាក់បំណុលទំាងអស់នោះ។
លោកស៊ីប្រាសបានបញ្ជាក់ថា នៅក្នុងរយៈពេលអន្តរកាល៤ឆ្នំានោះ រដ្ឋាភិបាលទីក្រុងអាទែននឹងធ្វើកំណែទម្រង់លើវិស័យចំាបាច់មួយចំនួនក្នុងគោលដៅស្រោចស្រង់ក្រិកពីវិបត្តិបំណុល ក៏ដូចជាការផ្តល់សន្ទុះសេដ្ឋកិច្ចឡើងវិញ។ ក្នុងចំណោមកំណែទម្រង់ដែលលោកប្រមុខរដ្ឋាភិបាលក្រិកសន្យាធ្វើរួមមាន យុទ្ធនាការប្រយុទ្ធប្រឆំាងនឹងអំពើពុករលួយនៅក្នុងស្ថាប័នរដ្ឋ កំចាត់ទង្វើលួចពន្ធ និងពង្រឹងប្រសិទ្ធិភាពរបស់ស្ថាប័នរដ្ឋ។ ទាក់ទងនឹងផ្នែកថវិកាវិញ លោកស៊ីប្រាសបានស្នើឲ្យសហភាពអឺរ៉ុបបញ្ឈប់ការដាក់គំនាបលើក្រិកឲ្យអនុវត្តនូវនយោបាយត្បិតត្បៀតដែលជាវិធានការកំពុងបំផ្លិចបំផ្លាញសង្គម និងសេចក្តីថ្នៃថ្នូររបស់ប្រទេសក្រិក។
ទន្ទឹមគ្នានេះ លោកប្រមុខរដ្ឋាភិបាលក្រិកបានធានាថា រដ្ឋាភិបាលរបស់លោកនឹងមិនរំលោភបំពានលើច្បាប់របស់សហភាពអឺរ៉ុបទេ តែបានបញ្ជាក់ថា វាក៏គ្មានច្បាប់ណាមួយដែលអឺរ៉ុបត្រូវចាប់បង្ខំក្រិកឲ្យអនុវត្តន៍នយោបាយត្បិតត្បៀតនោះដែរ។ គណៈកម្មការអឺរ៉ុបមិនបានធ្វើអត្ថាធិប្បាយអ្វីតបនឹងការថ្លែងរបស់លោកស៊ីប្រាសទេ តែប្រភពអឺរ៉ុបបានឲ្យដឹងថា បើអ្វីដែលលោកស៊ីប្រាសបានថ្លែងក្នុងគោលដៅបំបែកបំបាក់អឺរ៉ុប គឺមិនមែនជារឿងល្អទេ។ ដោយឡែកនៅក្នុងសន្និសីតកាសែតរួមគ្នា ក្រោយពីបានជួបជាមួយលោកប្រធានាធិបតីបារំាងហ្រ្វង់ស័រ ហូឡង់ លោកស៊ីប្រាសបានធានាថា ក្រិកមិនមែនជាប្រទេសគ្រោះថ្នាក់សម្រាប់អឺរ៉ុបទេ និងបានសុំឲ្យបារំាងដើរតួនាទីស្នូលសម្រាប់ប្រយោជន៍អឺរ៉ុបទំាងមូល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ