នៅក្រោយវិបត្តិ រដ្ឋាភិបាលក្រិកត្រូវកសាងមុខមាត់របស់ខ្លួនឡើងវិញ
ចុះផ្សាយនៅថ្ងៃ៖
ស្តាប់ - ០៤:៥៣
នៅប៉ុន្មានថ្ងៃចុងក្រោយ រដ្ឋាភិបាលក្រិក និងក្រុមប្រទេសចាយប្រាក់អឺរូ បានចរចាគ្នាយ៉ាងស្វិតស្វាញ ទាំងយប់ ទាំងថ្ងៃ ពីរឿងបន្តផ្តល់ជំនួយហិរញ្ញវិត្ថុដល់ប្រទេសក្រិក។ នៅថ្ងៃសុក្រ សប្តាហ៍មុន ក្រិកក៏បានទទួលការយល់ព្រម ពីសហភាពអឺរ៉ុប សម្រាប់បន្តជំនួយហិរញ្ញវត្ថុ។ ប៉ុន្តែ គេត្រូវរង់ចាំដល់ល្ងាចថ្ងៃអង្គារ សប្តាហ៍នេះ នៅពេលក្រិកបញ្ជូនបញ្ជី ធ្វើកំណែទម្រង់ ឲ្យឃើញ ទើបក្រុមប្រទេសចាយប្រាក់អឺរ៉ូ បើកភ្លើងខៀវជាផ្លូវការ ឲ្យក្រិកបន្តខ្ចីលុយសម្រាប់៤ខែទៅមុខ។
នៅប៉ុន្មានថ្ងៃមុន រដ្ឋាភិបាលក្រិកត្រូវអស់លុយ ពីកេស នៅថ្ងៃទី ២៨កុម្ភៈ សម្រាប់ចំណាយសាធារណៈ ក្រិកស្រាប់តែបានទទួលយល់ព្រមពីក្រុមប្រទេសចាយប្រាក់អឺរ៉ូ ឲ្យអាចបន្តទទួលជំនួយហិរញ្ញវត្ថុពីអឺរ៉ុប សម្រាប់រយៈពេល៤ខែទៅមុខ។ ទម្រាំឈានដល់កិច្ចព្រមព្រៀង ដែលធ្វើឡើង សឹងនៅនាទីចុងក្រោយ ក្រិក និងអឺរ៉ុបបានជជែក ចរចា គ្នាយ៉ាងស្វិតស្វាញបំផុត។
ដោយពិតទៅ ក្រិកនឹងអាចទទួលកញ្ចប់ជំនួយចុងក្រោយ នៅក្នុងកម្មវិធីផ្តល់ជំនួយរបស់សហភាពអឺរ៉ុប ទៅតាមកាលបរិច្ឆេទកំណត់ ដោយគ្មានបញ្ហា បើសិនជារដ្ឋាភិបាលថ្មីរបស់ក្រិក មិនរករឿង កិកកុក ចង់សើរើរឿងបំណុលរបស់ក្រិក ក៏ដូចជានយោបាយរឹតត្បិតថវិកាដាក់ដោយអឺរ៉ុបទេនោះ។ រដ្ឋាភិបាលថ្មីរបស់ក្រិកដែលប្រឆាំងនឹងកម្មវិធីនយោបាយរឹតត្បិតថវិកាដាក់ដោយអឺរ៉ុប បានព្យាយាមចរចា បញ្ចុះបញ្ចូលជាច្រើនលើក ដើម្បីសុំឲ្យអឺរ៉ុបជួយសម្រាល ឈប់សង្កត់កក្រិកឲ្យធ្វើនយោបាយរឹតត្បិតថវិកា ដែលតាមពិត ជាប្រភពរុញច្រានឲ្យប្រជាជនក្រិកកាន់តែធ្លាក់ខ្លួនក្រ។
នៅពេលដែលមានពាក្យចចាម អារ៉ាមថា ក្រិកអាចដើរចេញពីសហភាពអឺរ៉ុប បើសិនការចរចាជួបបរាជ័យនោះ គេអាចគិតថា រដ្ឋាភិបាលក្រិកជាអ្នកដឹកមុខ នៅក្នុងការចរចា ជាមួយអឺរ៉ុប។ និយាយក្នុងន័យម្យ៉ាង រដ្ឋាភិបាលក្រិកដែលជាកូនបំណុល ចង់សាកល្បងមួយក្តារ ដើម្បីអាចក្រែងទាមទារអ្វីបានខ្លះពី ម្ចាស់បំណុល ដូចជាទាមទារឲ្យគេលុបចោលបំណុលទាំងស្រុង។ នៅពេលដែលលឺសំលេងជាឯកច្ឆន្ទ របស់ម្ចាស់បំណុល រដ្ឋាភិបាលរបស់ស៊ីរីហ្សា ក៏បញ្ចេញស្នៀតមួយទៀត បាននិយាយគំរាមថា ខ្លួនលែងចង់បានជំនួយមានសំណងពីសហភាពអឺរ៉ុបតទៅទៀត។ ការអះអាងបែបនេះ អាចបំពេញចិត្តទាំងស្រុងប្រជាជនក្រិក ដែលជាម្ចាស់ឆ្នោត ព្រោះថា ជំនួយនោះ តាមពិតជាបំណុល ដែលនាំមកជាមួយនឹងលក្ខខណ្ឌធ្វើនយោយបាយរឹតត្បិតថវិកា។ ប៉ុន្តែ អឺរ៉ុបវិញ តាំងពីដំបូងទី មិនបានចុះចាញ់ទៅតាមការសម្លុតរបស់ក្រិក។ ផ្ទុយទៅវិញ អឺរ៉ុប ដែលនាំមុខដោយអាល្លឺម៉ង់ បានបញ្ជាក់ជំហរយ៉ាងម៉ឺងម៉ាត់ ថា អឺរ៉ុបមិនអាចផ្តល់លុយទៅឲ្យប្រទេសណាមួយ ដែលមិនចេះចាយត្បិតត្បៀតនោះទេ។ នៅចំពោះជំហរនឹងថ្កល់ មិនរង្គើរបស់អឺរ៉ុប ក្រិកបានចុះចាញ់ និងនៅទីបំផុតបានធ្វើទៅតាមការទាមទាររបស់សហភាពអឺរ៉ុប ម្ចាស់បំណុល ធំរបស់ខ្លួន។
បញ្ជីធ្វើកំណែទម្រង់ ដែលរដ្ឋាភិបាលក្រិក ដាក់ទៅឲ្យក្រុមប្រទេសចាយប្រាក់អឺរ៉ូពិនិត្យមើលកាលពីថ្ងៃចន្ទ ជាភស្តុតាងជាក់ស្តែង ដែលបង្ហាញពីការចុះចាញ់របស់រដ្ឋាភិបាលក្រិក នៅចំពោះមុខម្ចាស់បំណុល។ នៅពេលជាប់ឆ្នោត រដ្ឋាភិបាលថ្មីរបស់ក្រិក មកពី គណបក្សឆ្វេងនិយមជ្រុលធ្លាប់បានសន្យាធ្វើកំណែទម្រង់សង្គមជាច្រើនដើម្បីស្តារជីវភាពរស់នៅរបស់ប្រជាជនក្រិក ដែលនៅក្នុងនោះមានការដំឡើងប្រាក់ខែអប្បរមា ឬ ការដំឡើងប្រាក់សោធននិវត្តជាដើម។ ប៉ុន្តែ នៅក្នុងបញ្ជីធ្វើកំណែទម្រង់ របស់រដ្ឋាភិបាលស៊ីរីហ្សា កាលពីថ្ងៃចន្ទ រឿងដំឡើងប្រាក់ខែអប្បបរមា ត្រូវបានគេសរសេរនៅចុងទំព័របំផុត ហើយគេមិនបានបញ្ជាក់កាលកំណត់ដែលត្រូវធ្វើនោះទេ។ ជារួម កំណែទម្រង់របស់រដ្ឋាភិបាលក្រិកថ្មី គឺមិនចាកឆ្ងាយប៉ុន្មានពីនយោបាយកំណែទម្រង់ដែលរដ្ឋាភិបាលក្រិកចាស់បានអនុវត្តកន្លងមក ពោលគឺកំណែទម្រង់ដែលតាមពិតទាមទារដោយសហភាពអឺរ៉ុប ដូចជារដ្ឋាភិបាលនៅតែបន្តរឹតបន្តឹងលើសកម្មភាពរត់គេច មិនបង់ពន្ធ ឬប្រយុទ្ធប្រឆាំងនឹងអំពើពុករលួយ។
នៅពេលគេនិយាយពីរឿងលុយ គ្មានទេ ដែលម្ចាស់បំណុលត្រូវធ្វើសម្បទាន ហើយកូនបំណុលដែលអាចឈ្នះយកប្រៀបលើនោះ។ ចង់ ឬមិនចង់ អាគក ក៏ដូចអាចែ។ រដ្ឋាភិបាលក្រិកថ្មី ក៏មិនខុសពីរដ្ឋាភិបាលមុន។ អ្វីដែលខុសគ្នា គឺថា រដ្ឋាភិបាលក្រិកថ្មី បានខូចស្អុយឈ្មោះ មិនធ្វើឲ្យគេទុកចិត្ត នៅពេលដែលខ្លួនទើបចូលកាន់អំណាចបានប៉ុន្មានខែប៉ុណ្ណោះ។ លើកនេះ ទោះបីជាក្រុមប្រទេសចាយប្រាក់អឺរ៉ូបានបើកភ្លើងខៀវឲ្យក្រិកបន្តទទួលជំនួយហិរញ្ញវត្ថុ ដែលនៅសល់ ប្រមាណ ជាង ៧ពាន់លានអឺរ៉ូ មែន ប៉ុន្តែ ក្រិក មិនអាចទទួលបានទាំងអស់ភ្លាមៗទេ។ ដំបូង គេត្រូវរង់ចាំសិន ការសម្រេចរបស់ សភាប្រទេសអឺរ៉ុបចំនួន៤ ដូចជា អាល្លឺម៉ង់ ហ្វាំងឡង់ ដែលត្រូវប្រាកដក្នុងចិត្តថា ប្រាក់ពន្ធរបស់ប្រជាជនខ្លួន នឹងមិនត្រូវក្រិកយកទៅចាយខ្ជះខ្ជាយ។ ទម្រាំបានទឹកប្រាក់ជាង៧ពាន់លានអឺរ៉ូ ដែលជាកញ្ចប់ថវិកាចុងក្រោយ នៃកម្មវិធីជួយសង្រ្គោះ របស់អឺរ៉ុប ក្រិកត្រូវបន្តបើកដៃឲ្យអឺរ៉ុបចូលត្រួតពិនិត្យ ដូចមុន នៅក្នុងមុខចំណាយរបស់ខ្លួន។ បើសិនជាក្រិកមិន អនុវត្តនយោបាយកំណែទម្រង់តាមការទាមទារ របស់អឺរ៉ុបទេ នោះលុយដែលត្រូវផ្តល់ជាដំណាក់កាលនឹងត្រូវផ្អឹប ដោយស្វ័យប្រវត្តិ។
គណបក្សស៊ីរីហ្សា មិនត្រឹមបាក់មុខនៅឆាកអន្តរជាតិ ប៉ុន្តែ នៅក្នុងស្រុក រដ្ឋាភិបាលឆ្វេងនិយមមួយនេះ នឹងអាចរងការរិះគន់ពីម្ចាស់សំឡេងឆ្នោតរបស់ខ្លួន ដែលអាចខកចិត្ត ដ្បិត ពួកគេបានបោះឆ្នោតឲ្យគណបក្សនេះដោយសង្ឃឹមថា នឹងអាចជួយយឹតយោងក្រិកឲ្យរួចពីការគាបសង្កត់ក ពីអឺរ៉ុប ម្ចាស់បំណុល។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ