អូតង់ថាការធ្វើសមយុទ្ធមិនមែនជាការត្រៀមខ្លួនចង់ធ្វើសង្រ្គាម
អង្គការអូតង់បានអះអាងនៅថ្ងៃពុធថា សមយុទ្ធដែលខ្លួនបានរៀបចំធ្វើឡើងនៅតាមបណ្តាប្រទេសសមាជិកនៅអឺរ៉ុបខាងកើតនាពេលកន្លងទៅនេះ មិនមែនមានន័យថាជាការត្រៀមខ្លួនចង់ឃើញសង្រ្គាមផ្ទុះឡើងនៅអឺរ៉ុបនោះទេ។ ការថ្លែងនេះ គឺជាការឆ្លើយតបទៅនឹងការរិះគន់ ដែលថា ការធ្វើសមយុទ្ធតបតគ្នាទៅវិញទៅមក រវាងរុស្ស៊ី និងអូតង់ នៅក្នុងពេលបច្ចុប្បន្ននេះ កំពុងតែធ្វើឲ្យប្រូបាប៊ីលីតេនៃការកើតសង្រ្គាមមានកាន់តែខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៨
វិទ្យាស្ថានស្រាវជ្រាវឯករាជ្យមួយ ឈ្មោះថា European Leadership Network ដែលមានមូលដ្ឋាននៅក្នុងទីក្រុងឡុងដ៍ ប្រទេសអង់គ្លេស បានចេញផ្សាយអត្ថបទមួយនៅថ្ងៃពុធនេះ ដោយធ្វើការកត់សម្គាល់ថា នៅក្នុងពេលបច្ចុប្បន្ននេះ ទាំងរុស្ស៊ី និងទាំងអូតង់សុទ្ធតែនាំគ្នាបង្ហាញពីការត្រៀមខ្លួនធ្វើសង្រ្គាមទៅវិញទៅមក តាមរយៈការធ្វើសមយុទ្ធទ្រង់ទ្រាយធំៗ ដែលទាំងអស់នេះ កំពុងតែធ្វើឲ្យស្ថានភាពនៅអឺរ៉ុបត្រូវជួបនឹងភាពតានតឹងខ្លាំង។
វិទ្យាស្ថានស្រាវជ្រាវនេះបានលើកឡើងជាឧទាហរណ៍នូវសមយុទ្ធទ្រង់ទ្រាយធំរបស់រុស្ស៊ី ដោយមានទាហានចូលរួមរហូតដល់ទៅ ៨ម៉ឺននាក់ កាលពីខែមីនា និងសមយុទ្ធរបស់អូតង់ ដោយមានទាហានចូលរួម ១ម៉ឺន៥ពាន់នាក់ កាលពីខែមិថុនា នៅក្នុងប្រទេសប៉ូឡូញ និងប្រទេសជុំវិញសមុទ្របាល់ទិក។ អ្វីដែលធ្វើឲ្យគេបារម្ភ គឺនៅត្រង់ថា នៅក្នុងសមយុទ្ធទាំងពីរនេះ អតីតគូសត្រូវនៃសង្រ្គាមត្រជាក់ទាំងពីរសុទ្ធតែនាំគ្នាហាត់សមអំពីសេណារីយ៉ូនៃការផ្ទុះសង្រ្គាមនឹងគ្នា ពោលគឺ រុស្ស៊ីហាត់សមពីសេណារីយ៉ូសង្រ្គាមទល់នឹងអូតង់ ចំណែកអូតង់ហាត់សមពីសេណារីយ៉ូសង្រ្គាមទល់នឹងរុស្ស៊ី។
អ្នកស្រាវជ្រាវនៃវិទ្យាស្ថាន European Leadership Network បានបញ្ជាក់ថា គេមិនមែនចោទថា មេដឹកនាំអូតង់ និងមេដឹនាំរុស្ស៊ីសុទ្ធតែមានគំនិតចង់ឲ្យផ្ទុះសង្រ្គាម ឬក៏ថា សង្រ្គាមរវាងអូតង់ និងរុស្ស៊ី គឺជារឿងដែលមិនអាចចៀសរួចនោះទេ គ្រាន់តែថា ការធ្វើសមយុទ្ធតបគ្នាទៅវិញទៅមកនេះ កំពុងតែបង្កើតឲ្យមានបរិយាកាសតានតឹងនៅក្នុងតំបន់អឺរ៉ុប។
ប្រឈមមុខនឹងការរិះគន់នេះ អ្នកនាំពាក្យរបស់អង្គការអូតង់បានឆ្លើយតបមកវិញភ្លាមៗ នៅល្ងាចថ្ងៃពុធថា ការធ្វើសមយុទ្ធរបស់អូតង់មិនធ្វើឲ្យប្រូបាបីលីតេនៃសង្រ្គាមនៅអឺរ៉ុបត្រូវកើនឡើងនោះទេ ហើយថា អ្វីដែលអូតង់កំពុងធ្វើសព្វថ្ងៃនេះ គឺគ្រាន់តែជាការឆ្លើយតបនឹងទង្វើរបស់រុស្ស៊ីតែប៉ុណ្ណោះ គឺ “ឆ្លើយតបទៅនឹងសកម្មភាពឈ្លានពានរបស់រុស្ស៊ីដែលកើតមានកាន់តែខ្លាំង” ចាប់តាំងពីមានការកាត់យកតំបន់គ្រីមេពីអ៊ុយក្រែន។
អ្នកនាំពាក្យអូតង់ក៏បានលើកឡើងផងដែរថា រាល់ការធ្វើសមយុទ្ធម្តងៗអូតង់តែងតែប្រកាសឲ្យដឹងជាមុនរាប់ខែ ព្រមទាំងបានអញ្ជើញអ្នកសង្កេតការណ៍ខាងក្រៅ ជាពិសេស មកពីរុស្ស៊ី ឲ្យចូលរួមត្រួតពិនិត្យ គឺផ្ទុយពីរុស្ស៊ី ដែលពេលខ្លះបើកធ្វើសមយុទ្ធភ្លាមៗ ដោយមិនប្រកាសឲ្យដឹងជាមុន។
រហូតមកទល់នឹងពេលនេះ គេនៅមិនទាន់ឃើញមានប្រតិកម្មណាមួយពីសំណាក់រុស្ស៊ីនៅឡើយទេ ទាក់ទងនឹងការថ្លែងអស់ទាំងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ