Panama Papers៖ ភូតនៅនឹងហោរ ចោរនៅនឹងធនាគារ
ចុះផ្សាយនៅថ្ងៃ៖
ស្តាប់ - ០៥:៣៣
រឿងអាស្រូវPanama Papers បានបង្ហាញឈ្មោះមនុស្សជាច្រើននាក់ដែលមានជាប់ពាក់ព័ន្ធក្នុងការយកលុយចំណូលដែលបានមកពីភាពមិនស្មោះត្រង់រឺក៏ដើម្បីគេចវេសការបង់ពន្ធយកទៅលាក់នៅតាមក្រុមហ៊ុនខ្មោចដែលចុះបញ្ជីនៅក្នុងប្រទេសប៉ាណាម៉ា។រឿងនេះកំពុងតែធ្វើឲ្យរញ្ជួយវិស័យហិរញ្ញវត្ថុអន្តរជាតិព្រមទាំងនយោបាយរបស់ប្រទេសអឺរ៉ុបមួយចំនួនផងដែរ ដោយសារតែម្នាក់ៗថ្លែងកប់ៗមាត់ថាសន្យាទប់ស្កាត់ការគេចពន្ធរដ្ឋតែទីបំផុតអ្នកដែលលួចបន្លំឃុបឃិតក្នុងសកម្មភាពខុសច្បាប់ទាំងនេះគឺភាគច្រើនគ្មាននរណាក្រៅពីធនាគាធំៗនៅប្រទេសអឺរ៉ុបនោះទេ។
ក្រុមហ៊ុនប៉ាណាម៉ា ឈ្មោះ Mossack Fonseca គឺជាការិយាល័យច្បាប់ ដែលទទួលចុះបញ្ជីក្រុមហ៊ុនពាណិជ្ជកម្មនានា ដើម្បីរកស៊ីនៅប៉ាណាម៉ា។ បញ្ហាត្រង់ថាក្រុមហ៊ុនដែលទៅចុះបញ្ជីរនៅការិយាល័យច្បាប់នេះ គឺភាគច្រើនសុទ្ធជាក្រុមហ៊ុនខ្មោច ដែលមានតែឈ្មោះ និងសាច់ប្រាក់តែប៉ុណ្ណោះ។ ការធ្វើបែបនេះ អាចមានហេតុផលច្រើនរបស់មនុស្សដែលទៅរកសេវានេះ ដូចជាដើម្បីគេចវេសពីការបង់ពន្ធទៅជូនរដ្ឋក្នុងប្រទេសរបស់ខ្លួន រឺក៏ដើម្បីបិទបាំងប្រភពមិនស្មោះត្រង់នៃចំណូលរបស់ខ្លួន តួយ៉ាងចំណូលដែលបានមកពីការជួញដូរគ្រឿងញៀន អំពើពុករលួយ រឺសកម្មភាពឧក្រិដ្ឋផ្សេងៗ ជាដើម។
ធនាគារភាគច្រើន ជាអ្នករៀបចំឲ្យបើកក្រុមហ៊ុនខ្មោច៖
ចាប់តាំងពីក្រុមហ៊ុន Mossack Fonseca នេះបានបង្កើតឡើងនៅឆ្នាំ១៩៧៧ ការិយាល័យច្បាប់នេះ បានបង្កើតក្រុមហ៊ុនខ្មោចបានចំនួន២១៤ ៤៨៨ ក្រុមហ៊ុន ហើយក្នុងចំណោមនោះ មាន ១៥ ៥៧៩ ក្រុមហ៊ុនត្រូវបានបញ្ជាឲ្យបង្កើត ដោយធនាគារជាច្រើន ទៅតាមសំណើររបស់ភ្ញៀវ ដែលជាអ្នកមានធំៗ ដែលមានប្រាក់ច្រើនត្រូវការយកទៅលាក់ រឺយកទៅលាង។ ក្រុមហ៊ុនខ្មោចបញ្ជាឲ្យបង្កើតដោយធនាគារទាំងនេះ ភាគច្រើនបានបង្កើតឡើងនៅក្រោយឆ្នាំ២០០០ ហើយបើតាមការស្រាវជ្រាវព័ត៌មានអន្តរជាតិ ICIJ មានក្រុមហ៊ុនខ្មោចយ៉ាងហោចណាស់ ២០០០ ដែលកំពុងតែនៅមានជីវិតនៅឡើយ។
៣៦៥ធនាគារជាប់ក្នុងរឿងអាស្រូវ៖
យោងតាមឯកសារដែលទើបតែបែកធ្លាយ មានសរុបទាំងអស់ ធនាគារចំនួន៣៦៥ ធនាគារ នៅទូទាំងពិភពលោក ដែលបានទៅរកសេវាបង្កើតក្រុមហ៊ុនខ្មោច ជាមួយនឹងក្រុមហ៊ុន Mossack Fonseca របស់ប៉ាណាម៉ា។ ក្នុងចំណោមធនាគារទាំងអស់នោះ មានធនាគារអឺរ៉ុបជាច្រើន ហើយសុទ្ធតែជាធនាគារធំគ្រាក់ៗ ជាងគេលើពិភពលោកតែម្តង។ តួយ៉ាង ធនាគារ HSBC របស់អង់គ្លេស ធនាគារស្វីស UBC និង ធនាគារ Crédit Suisse ធនាគារអាល្លឺម៉ង់ Deutsch Bank ធនាគារស្កង់ឌីណាវ Norda និងធនាគារបារាំង Société Générale ជាដើម។ នៅមានធនាគារតូចតែខ្លឹមៗ ដ៏ទៃទៀត នៅស្វីស នៅលុចហ្សំបួរ និងនៅម៉ូណាកូ ក៏ជាធនាគារឃុបឃិត ដែលបំរើសេវា បង្វិលលាក់លុយខុសច្បាប់ លុយគេចពន្ធរាប់រយពាន់លានដុល្លារផងដែរ។
ឯណាទៅការប្តេជ្ញាចិត្ត របស់ប្រទេសមហាអំណាចសេដ្ឋកិច្ចទាំង២០ ដែលបានធានាថានឹងប្រឹងប្រែងបំបែកបណ្តាញលាក់លុយ និងមូលធន ចាប់តាំងពីឆ្នាំ២០០៩មក ក្រោយពេលដែលពិភពលោក បានស្គាល់នូវវិបត្តិសេដ្ឋកិច្ចនិងហិរញ្ញវត្ថុដ៏ធ្ងន់ធ្ងរនោះ?
ថ្វីបើមានរឿងអាស្រូវបានផ្ទុះឡើងជាបន្តបន្ទាប់ ក៏បន្តែគេនៅតែឃើញវិស័យធនាគារនៅតែបន្តធ្វើសកម្មភាពមិនសូវស្អាតស្អំ បែបនេះដដែល ហាក់ដូចជាគ្មានញញើតនឹងច្បាប់សោះ។ ប្រជាជនដែលធ្លាប់តែរិះគន់ បានឃើញនៅនឹងភ្នែកកាន់តែច្បាស់ ពីភាពអសកម្មរបស់រដ្ឋ។ រដ្ឋបណ្តោយឲ្យពួកធនាគារ ធ្វើសកម្មភាពទុច្ចរិត ដោយស្របច្បាប់ ខណៈដែលរដ្ឋចំណាយថវិការដ្ឋរាប់ពាន់លាន ដើម្បីស្រោចស្រង់ធនាគារមួយចំនួន មិនឲ្យក្ស័យធន កាលពីឆ្នាំ២០០៨។ លុយរដ្ឋទាំងនោះ គឺជាលុយប្រជាពលរដ្ឋស្លូតត្រង់ ដែលប្រឹងប្រែធ្វើការបង់ពន្ធជូនរដ្ឋ។
ផ្ទុយទៅវិញធនាគារធំៗ បានរកស៊ីឃុបឃិត ជួយរៀបចំធ្វើប្រព័ន្ធហិរញ្ញវត្ថុស្មុគស្មាញ និងបញ្ជាឲ្យក្រុមហ៊ុនប៉ាណាម៉ា បង្កើតក្រុមហ៊ុនខ្មោច ឲ្យភ្ញៀវរបស់ខ្លួន ដែលភាគច្រើនមិនបានបញ្ជាក់ពីប្រភពនៃប្រាក់ចំណូលដ៏សន្ធឹកសន្ធាប់នោះទេ។
គេចពីកន្លែងមួយទៅកន្លែងមួយ៖
វិធីសាស្ត្រមួយ ដើម្បីបំរើសេវាកម្មផ្លូវងងឹតជូនភ្ញៀវ ធនាគារទាំងនេះ ត្រូវរំពៃរកប្រទេសណា ដែលគ្មានការរិតត្បិតវិស័យហិរញ្ញវត្ថុល្អិតល្អន់ ហើយគ្មានវិធានការច្បាស់លាស់ដើម្បីត្រួតពិនិត្យពីភាពស្អាតស្អំ តម្លាភាពនៃក្រុមហ៊ុនដែលបង្កើតឡើង។ ក្នុងករណីប្រទេសមួយធ្វើកំណែទម្រង់ ធនាគារទាំងនោះវិចបង្វិចទៅរកប្រទេសមួយទៀត ដើម្បីបន្តសកម្មភាពលេងបិទពួននេះ ជាមួយប្រទេសផ្សេងដែលមានអំណោយផលល្អជាងនេះ។
ជាក់ស្តែង កាលពីរវាងឆ្នាំ២០០០ គេពេញនិយមណាស់ យកលុយទៅកប់នៅ តាមក្រុមហ៊ុនខ្មោច រឺធនាគារនៅតាមប្រទេស រឺដែនដីកូនកោះផ្សេងៗ ក្នុងមហាសមុទ្រ។ ឧទាហរណ៍ ប្រជុំកោះ Seychelles រឺកោះTortila ជាដើម។ តែក្រោយមក គេបានរត់ទៅពួន នៅតាមប្រទេសមួយចំនួនវិញ ដូចជា ប្រទេសប៉ាណាម៉ា កោះហុងកុង និងក្រុងឌូបៃ។
ដើម្បីចំណេញ ហ៊ានក្បត់សីលធម៌វិជ្ជាជីវៈ៖
ដើម្បីប្រាក់ចំណូល ធនាគារមិនខ្លាចនឹងរំលងច្បាប់ រំលងក្របខណ្ឌសីលធម៌ទេ។ ជាមួយនឹងសកម្មភាពទាំងអស់នេះ ធនាគារអស់ទាំងនោះ ព្យាយាមប្រកែក មិនទទួលខុសត្រូវពីតួនាទីខ្លួន ដែលបានឃុបឃិត ក្នុងបណ្តាញគេចពន្ធរដ្ឋ រឺបណ្តាញលាងលុយក្រខ្វក់ទេ។ ធនាគារស្វីស UBS ធ្លាប់ត្រូវសហរដ្ឋអាមេរិកពិន័យ្យឲ្យសងប្រាក់៧៨០លានដុល្លារ ពីបទជួយជនជាតិអាមេរិកឲ្យគេចពន្ធរដ្ឋ។ ថ្នាក់ដឹកនាំម្នាក់ របស់ធនាគារនេះ ដែលដឹងពីសកម្មភាពទុច្ចរិតនេះ បានទាំងព្រមានប្តឹងទៅអាជ្ញាធរទៀតផង ក្រោយពីធនាគារនេះ បានព្យាយាមបំផ្លាញឯកសារ និងភស្តុតាងនានា នៅចុងឆ្នាំ២០១០។
សន្យាខ្យល់៖
យើងសង្ឃឹមថា រឿងអាស្រូវPanama Papersដែលផ្ទុះឡើងនាពេលនេះ អាចនឹងធ្វើឲ្យអាជ្ញាធរតាមប្រទេសនៅអឺរ៉ុប និងជាពិសេសស្ថាប័នកំពូលរបស់សហភាពអឺរ៉ុប បានភ្លឺភ្នែក នឹងចាត់វិធានការឲ្យមានប្រសិទ្ធិភាព។ ច្បាប់ហិរញ្ញវត្ថុជាច្រើន ត្រូវបានអនុម័ត តែប្រសិទ្ធិភាព និងភាពខ្វះចន្លោះនៅតែមាន។
សហភាពអឺរ៉ុប បានសន្យាថា នៅថ្ងៃទី១៤មេសាខាងមុខនេះ និងធ្វើកំណែទំរង់ច្បាប់គណនីជាថ្មី ដើម្បីតំរូវឲ្យក្រុមហ៊ុនពហុជាតិធំៗ ដែលមានសាខាគ្រប់ប្រទេស ត្រូវលាតត្រដាងតម្លាភាព នៃសកម្មភាពសេដ្ឋកិច្ច ចំណូលចំណាយគ្រប់ខ្ទង់ នៅតាមប្រទេសនីមួយៗ ចៀងវាងការបង្វិលប្រាក់ចំណូលទៅដាក់ក្នុងប្រទេសមួយ ដើម្បីគេចពន្ធពីប្រទេសមួយទៀត។ ហើយគម្រោងមួយទៀត គឺសហភាពអឺរ៉ុប អាចនឹងបង្កើតជាបញ្ជីរខ្មៅមួយ រាយនាមប្រទេសនិងក្រុមហ៊ុនដែលរកស៊ីគេចពន្ធ និងលាក់លុយ នៅបរទេស។
ដោយឡែក ដើមឆ្នាំ២០១៦នេះ លោកទេសាភិបាលថ្មី នៃធនាគារជាតិបារាំង ដែលទើបតែចូលកាន់មុខតំណែង បានប្តេជ្ញាថានឹងធ្វើសង្រ្គាម ដើម្បីលប់បំបាត់ការគេចពន្ធរដ្ឋ ការលាងលុយក្រខ្វក់នៅតាមក្រុមហ៊ុនខ្មោច ព្រោះលុយមិនស្អាតស្អំទាំងនោះ អាចត្រូវគេបង្វិលយកទិញអាវុធឲ្យពួកភេវកម្ម ក៏អាចថាបាន។ សង្ឃឹមថា ទាំងអស់នេះ នឹងមិនមែនជាសន្យាខ្យល់ទៅចុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ