ផលប៉ះពាល់នៃការដំឡើងអត្រាការប្រាក់របស់ធនាគារកណ្តាលអាមេរិក
ទីផ្សារហិរញ្ញវត្ថុនៅថ្ងៃព្រហស្បតិ៍ទី ១៧ ធ្នូ បានប្រតិកម្មវិជ្ជមានទៅនឹងការដំឡើងអត្រាការប្រាក់ ជាលើកដំបូងបង្អស់ របស់ធនាគារកណ្តាលអាមេរិក ក្នុងរយៈពេលជិត១០ឆ្នាំចុងក្រោយនេះ។ កាលពីថ្ងៃពុធ ធនាគារកណ្តាលអាមេរិក ដែលបានរក្សាអត្រាការប្រាក់ក្បែរសូន្យអស់ ជាង៧ឆ្នាំនោះ បានដំឡើងអត្រាការប្រាក់ប្រមាណ ០,២៥%។
ចុះផ្សាយនៅថ្ងៃ៖
ស្តាប់ - ០៦:៤១
ធនាគារកណ្តាលអាមេរិកបានប្រកាសដំឡើងអត្រាការប្រាក់ប្រមាណ ០,២៥%។ ជាចំណាត់ការមិនធ្លាប់មាន ក្នុងរយៈពេល ជិត ១០ឆ្នាំចុងក្រោយនេះ ប៉ុន្តែ មិនមែនដំណឹងគួរឲ្យភ្ញាក់ផ្អើលនោះទេ។ លុយដុល្លារដែលចាប់ឡើងថ្លៃ ជាសញ្ញាឲ្យគេដឹងថា ធនាគារកណ្តាលអាមេរិកត្រូវដំឡើងអត្រាការប្រាក់របស់ខ្លួន ដែលត្រូវបានរក្សាស្មើសូន្យ អស់រយៈពេល ៧ឆ្នាំ។ វិធានការរបស់ធនាគារកណ្តាលអាមេរិកបានធ្វើឲ្យតម្លៃលុយដុល្លារ បានឡើងថ្លៃ នៅថ្ងៃព្រហស្បតិ៍ បើប្រៀបធៀបនឹងរូបិយប័ណ្ណបរទេសផ្សេងទៀត ដូចជាលុយយេនរបស់ជប៉ុន ឬលុយដុល្លារអូស្រ្តាលីជាដើម។
នៅចន្លោះឆ្នាំ ២០០៧ និងឆ្នាំ ២០០៨ ធនាគារកណ្តាលអាមេរិក បានទម្លាក់អត្រាការប្រាក់របស់ខ្លួន ពី ៥,២៥% រហូតដល់សូន្យ ក្នុងទិសដៅ ជួយស្រោចស្រង់សេដ្ឋកិច្ចរបស់អាមេរិកដែលបានស្គាល់ការដើរថយក្រោយ ដោយសារតែវិបត្តិហិរញ្ញវត្ថុពិភពលោក ឆ្នាំ ២០០៨។ ដើម្បីស្រោចស្រង់សេដ្ឋកិច្ចអាមេរិក កាលណោះ ធនាគារកណ្តាលអាមេរិក បានចាក់បញ្ចូលផងដែរ សាច់ប្រាក់២៥០០ ពាន់លានដុល្លារ ចូលទៅក្នុងសេដ្ឋកិច្ចអាមេរិក។ ក្នុងរយៈពេល ៧ឆ្នាំ ធនាគារកណ្តាលអាមេរិកបានរក្សាអត្រាការប្រាក់នៅត្រឹមសូន្យ។
នៅក្នុងសន្និសីទកាសែត កាលពីថ្ងៃម្សិលមិញ លោកស្រី Janet Yellen ប្រធានធនាគារកណ្តាលអាមេរិក បានមានប្រសាសន៍ថា ការដែលធនាគារកណ្តាល សម្រេចដំឡើងអត្រាការប្រាក់នៅពេលនេះ ដោយមកតែពីធនាគារបានសម្រេចគោលដៅរបស់ខ្លួន នោះ គឺចំនួនអ្នកអត់ការងារធ្វើបានធ្លាក់ចុះនៅអាមេរិក មកនៅត្រឹម៥%។ លើសពីនោះ អត្រាអតិផរណាក៏បានកើនឡើង ដល់២ភាគរយដែរ។ ការថយចុះនៃអ្នកគ្មានការងារធ្វើ ហើយនិងអតិផរណាកើនឡើង គឺជាកត្តាសំខាន់ពីរដែលបង្ហាញថា សេដ្ឋកិច្ចរបស់អាមេរិកបានចាប់រឹងមាំឡើងវិញ បន្ទាប់ពីបានដើរថយក្រោយខ្លាំង ដោយសារវិបត្តិហិរញ្ញវត្ថុឆ្នាំ ២០០៨។ ការប្រកាសដំឡើងអត្រាការប្រាក់របស់ធនាគារកណ្តាលអាមេរិកក៏ជាជំហានមួយសំខាន់ ដែលបង្ហាញថា អ្វីៗបានត្រលប់ទៅរកភាពធម្មតា ហើយដែលគេជឿទុកចិត្តថា សេដ្ឋកិច្ចរបស់អាមេរិកបានចាប់ល្អប្រសើរឡើងវិញ។
ធនាគារកណ្តាលអាមេរិកនៅបានព្យាករថា សេដ្ឋកិច្ចអាមេរិកនឹងបន្តកើនឡើងបន្តិច ពីរ ២,៣% ទៅ ២,៤%នៅឆ្នាំក្រោយ។ ដោយសារមកតែពី ការដំឡើងអត្រាការប្រាក់មិនធ្វើឲ្យប៉ះពាល់ដល់កំណើនសេដ្ឋកិច្ច អ៊ីចឹងហើយបានទីផ្សារហិរញ្ញវត្ថុអាមេរិក និងនៅកន្លែងផ្សេងទៀត ដូចជានៅអាស៊ី ឬអឺរ៉ុប ស្វាគមអបអរ រហូតធ្វើឲ្យតម្លៃភាគហ៊ុន នៅទីផ្សារមូលប័ត្រ បានកើនឡើងនៅថ្ងៃព្រហស្បតិ៍នេះ។
ធនាគារកណ្តាលអាមេរិកបានបញ្ជាក់ដែរថា អត្រាការប្រាក់នឹងត្រូវដំឡើងដោយសន្សឹមៗ មិនគំហុកនោះទេ។ គេរំពឹងថា អត្រាការប្រាក់របស់ធនាគារកណ្តាលអាមេរិកនឹងឡើងដល់ ៣,៣នៅឆ្នាំ ២០១៩។
ផលប៉ះពាល់នៃការដំឡើងអត្រាការប្រាក់ របស់ធនាគារកណ្តាលអាមេរិក
អ្នកដែលទទួលប្រយោជន៍ពីការដំឡើងអត្រាការប្រាក់របស់ធនាគារកណ្តាលអាមេរិក គឺក្រុមអ្នកសន្សំប្រាក់នៅអាមេរិក និងក្រុមអ្នកវិនិយោគទុនបរទេស ដែលសង្ឃឹមថា នឹងបានប្រាក់ចំណេញ ដែលបានមកពីអត្រាការប្រាក់ខ្ពស់ ពីទឹកប្រាក់វិនិយោគ ដែលខ្លួនឲ្យគេខ្ចី។
ក្នុងរយៈពេលវែង ការដំឡើងអត្រាការប្រាក់របស់ធនាគារកណ្តាលអាមេរិក នឹងមិនប៉ះពាល់ដល់ប្រជាជនអាមេរិកាំងទេ ជាពិសេស អ្នកដែលខ្ចីប្រាក់ពីធនាគារសម្រាប់ទិញផ្ទះជាដើម ព្រោះពួកគេខ្ចីក្នុងរយៈពេលវែង ជាមួយនឹងអត្រាការប្រាក់ដែលគេកំណត់ តាំងពីពីមុនការប្រកាសដំឡើងអត្រាការប្រាក់របស់ធនាគារកណ្តាលអាមេរិក។ ចំនួនប្រជាជនអាមេរិកាំង ដែល រស់នៅ ជំពាក់បំណុលគេ ក៏មានកាន់តែតិច បើប្រៀបធៀបនឹងឆ្នាំ២០០៨។
ដូច្នេះ ការដំឡើងអត្រាការប្រាក់នឹងប៉ះពាល់តិចតួចបំផុត ជីវភាពរបស់ប្រជាជនអាមេរិក ដែលមួយចំនួនត្រូវការខ្ចីប្រាក់ដើម្បី ទិញសំភារៈប្រើប្រាស់ប្រចាំថ្ងៃ។ ប៉ុន្តែនេះមិនមែនមានន័យថា វាជាដំណឹងល្អ ១០០% សម្រាប់ប្រទេស ឬក្រុមហ៊ុនដែលមានជាប់បំណុល ជាលុយដុល្លារនោះទេ។ ការដំឡើងអត្រាការប្រាក់របស់ធនាគារកណ្តាលអាមេរិកនឹងធ្វើលុយដុល្លារ ឡើងថ្លៃ ជាស្វ័យប្រវត្តិ (អ្នកដែលចាយលុយបរទេស នឹងឃើញការចំនាយរបស់ខ្លួនកើនឡើង នៅពេលគេធ្វើដំណើរកំសាន្តនៅទឹកដីអាមេរិក)។ គេព្រួយបារម្ភថា ក្រុមហ៊ុនដែលកំពុងជំពាក់បំណុលច្រើន នឹងអាចជួបវិបត្តិ ព្រោះថា ការដំឡើងអត្រាការប្រាក់របស់ធនាគារកណ្តាលអាមេរិកនឹងលើកទឹកចិត្តឲ្យគ្រប់ធនាគារផ្សេងទៀត នៅលើពិភពលោកដំឡើងអត្រាការប្រាក់ដែរ។
ជាក់ស្តែង ក្រុមហ៊ុនខាងនាំចេញវត្ថុធាតុដើម និងក្រុមហ៊ុនប្រេងជាដើម ដែលមានប្រាក់ចំណូលធ្លាក់ចុះ រួចទៅហើយ ដោយសារតម្លៃប្រេងធ្លាក់ចុះ នឹងត្រូវរងសង្កត់កមួយជាន់ទៀត ដោយត្រូវចំណាយលុយបន្ថែម ដើម្បីបង់ថ្លៃការប្រាក់ដែលឡើងខ្ពស់។
តើប្រទេសណាខ្លះ ដែលប៉ះពាល់ខ្លាំងជាងគេ?
ប្រទេសដែលទើបមានសេដ្ឋកិច្ចរីកលូតលាស់ថ្មី ដែលត្រូវរងប៉ះពាល់ធ្ងន់ធ្ងរដោយសារការប្រកាសដំឡើងការប្រាក់របស់ធនាគារកណ្តាលអាមេរិក។ តាមការចុះផ្សាយរបស់ទូរទស្សន៍ អាមេរិកាំង CNN ប្រេស៊ីល តួកគី និងអាហ្រ្វិកខាងត្បូងជាដើម នឹងរងគ្រោះដោយសារការដំឡើងអត្រាការប្រាក់របស់ធនាគារកណ្តាលអាមេរិក។
ប្រេស៊ីល ដែលកំពុងជាប់ក្នុងវិបត្តិសេដ្ឋកិច្ច កំពុងឃើញតម្លៃរូបិយប័ណ្ណជាតិរបស់ខ្លួន ធ្លាក់ចុះខ្លាំងបើប្រៀបធៀបនឹងលុយដុល្លារអាមេរិក។ ប្រេស៊ីលជាប្រទេសទី ២ នៅក្នុងពិភពលោក បន្ទាប់ពីចិន ដែលមានបំណុលរបស់ខ្លួន ជាដុល្លារ។ ក្នុងរយៈពេល ជិត ១០ឆ្នាំចុងក្រោយនេះ ដោយឃើញ អត្រាការប្រាក់របស់ធនាគារកណ្តាលមានតម្លៃស្មើសូន្យ ក្រុមហ៊ុនប្រេស៊ីលជាច្រើនបានខ្ចីលុយរាប់ពាន់លានដុល្លារ។ ដូច្នេះ បើសិនប្រាក់ដុល្លារ ឡើងថ្លៃ ដោយមកពីការដំឡើងអត្រាការប្រាក់ របស់ធនាគារកណ្តាលអាមេរិក នោះ ក្រុមហ៊ុន និងរតនាគារជាតិប្រេស៊ីលនឹងអាចជួបវិបត្តិប្រាក់បំណុល។
តួកគីវិញ ដែលបានចំណេញច្រើនបំផុត ដោយសារអត្រាការប្រាក់សូន្យរបស់ធនាគារកណ្តាលជាង ៧ឆ្នាំរហូតមក នឹងត្រូវប៉ះពាល់ធ្ងន់ធ្ងរ ដោយសារវិធានការរបស់ធនាគារកណ្តាលអាមេរិក នៅថ្ងៃម្សិលមិញ។ អត្រាការប្រាក់សូន្យ របស់ធនាគារកណ្តាលអាមេរិកធ្លាប់បានជំរុញឲ្យក្រុមហ៊ុនបរទេស ទៅបោះទុន វិនិយោគយ៉ាងគំហុក និងបានជួយឲ្យតួកគីមានកំណើនសេដ្ឋកិច្ចដល់ទៅ ៩ ភាគរយ ពីឆ្នាំ២០១០ ដល់ឆ្នាំ ២០១១។
ឆ្នាំនេះ កំណើនសេដ្ឋកិច្ចរបស់តួកគីមានត្រឹម ៣ភាគរយ។ ប្រាក់ដុល្លារឡើងថ្លៃ នឹងធ្វើឲ្យសេដ្ឋកិច្ចតួកគីកាន់តែយាប់យ៉ឺន ព្រោះថា តួកគីរស់ពឹងដោយការនាំចូល ច្រើនជាង ការនាំចេញ។ អត្រាការប្រាក់ខ្ពស់របស់អាមេរិកនឹងធ្វើឲ្យការនាំចូលរបស់តួកគីមានតម្លៃឡើងថ្លៃ ខ្ពស់កប់ពពក។
ចុងក្រោយ គឺអាហ្វ្រិកខាងត្បូង ដែលរស់ដោយសារការវិនិយោគពីបរទេស។ ដូច្នេះ តម្លៃលុយដុល្លារខ្ពស់នឹងធ្វើឲ្យសេដ្ឋកិច្ចរបស់អាហ្រ្វិកខាងត្បូង កាន់តែពិបាក។ នេះគេនៅមិនទាន់និយាយពីវិបត្តិដែលអាហ្វ្រិកខាងត្បូងកំពុងជួបពេលបច្ចុប្បន្នដោយសារតែ តម្លៃធនធានរ៉ែ របស់ខ្លួន ធ្លាក់ចុះថ្លៃ ដោយសារតែតម្រូវការថយចុះ ក្នុងទីផ្សារពិភពលោក ជាពិសេសនៅចិន ដែលកំពុងជួបបញ្ហាសេដ្ឋកិច្ច មិនដើរទៅមុខ។
ការដំឡើងអត្រាការប្រាក់របស់ធនាគារកណ្តាលអាមេរិកអាចជាសញ្ញាល្អបញ្ជាក់ថា សេដ្ឋកិច្ចរបស់មហាអំណាចអាមេរិករឹងមាំឡើងវិញ ប៉ុន្តែ ជាមួយគ្នានេះ វាបានផ្តល់ផលវិបាកច្រើនដល់ប្រទេស ដែលមានជាប់បំណុលជាប្រាក់ដុល្លារ។ តាមអ្នកវិភាគជាច្រើន នេះមិនមែនជាពេលវេលាល្អដែលគេត្រូវដំឡើងអត្រាការប្រាក់ទេ។ ប្រទេសជាច្រើន ដែលកំពុងមានសេដ្ឋកិច្ចមិនដើរទៅមុខ ឬមានតែដើរថយក្រោយ កំពុងត្រូវការប្រាក់វិនិយោគ ក្នុងអត្រាការប្រាក់ទាប។ ជំហររបស់ធនាគារកណ្តាលរបស់អាមេរិកកំពុងដើរផ្ទុយស្រឡះពីធនាគារកណ្តាលអឺរ៉ុបដែលនៅដើមខែធ្នូ បានបញ្ចុះអត្រាការប្រាក់ មកនៅត្រឹម ០,៣% និងចាក់សាច់លុយប្រមាណ៦០ពាន់លានអឺរ៉ូ ដើម្បី ជំរុញកំណើនសេដ្ឋកិច្ចនៅអឺរ៉ុប។ នៅថ្ងៃព្រហស្បតិ៍ លុយអឺរ៉ូបានធ្លាក់ចុះបន្តិច បើប្រៀបធៀបនឹងលុយដុល្លារ ពី ១,០៩៣០មក១,០៨៦៨ដុល្លារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ