Amnesty International៖២០១៤ ជាឆ្នំាដែលមានជនស៊ីវិលស្លាប់ និងភៀសខ្លួនយ៉ាងច្រើន
ក៏ដូចជារៀងរាល់ឆ្នំា អង្គការការពារសិទ្ធិមនុស្សអន្តរជាតិ Amnesty International តែងតែបានចេញផ្សាយរបាយការណ៍ប្រចំាឆ្នំាស្តីពីស្ថានភាពសិទ្ធិមនុស្ស នៅក្នុងពិភពលោក។ របាយការណ៍ឆ្នំា ២០១៤ ដែលបានចេញផ្សាយក្នុងថ្ងៃពុធ ទី២៥ កុម្ភៈនេះត្រូវបាន Amnesty International ចាត់ទុកជាឆ្នំាពោរពេញដោយជម្លោះប្រដាប់អាវុធ និងជាឆ្នំាដែលមានជនស៊ីវិលស្លាប់ ព្រមទំាងភៀសខ្លួនយ៉ាងច្រើនសម្បើម។ ទន្ទឹមគ្នានេះ Amnesty International ក៏បានស្តីបន្ទោសសហគមន៍អន្តរជាតិពីអសមត្ថភាពក្នុងការដោះស្រាយបញ្ហា ព្រមទំាងជំរុញឲ្យមានកំណែទម្រង់នៅផ្ទៃក្នុងស្ថាប័ន ក្រុមប្រឹក្សាសន្តិសុខអង្គការសហប្រជាជាតិ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:១៦
Amnesty International បានចាត់ទុកឆ្នំា ២០១៤ ជាឆ្នំាពិសេសគ្របដណ្តប់ដោយជម្លោះប្រដាប់អាវុធដែលបានបណ្តាលឲ្យមាន មនុស្សស្លាប់ជាច្រើនលាននាក់ និងមានជនភៀសខ្លួនយ៉ាងតិច ១៥លាននាក់។ លោក Salil Shetty អគ្គលេខាធិការ Amnesty International បានបញ្ជាក់ថា ឆ្នំា ២០១៤ ជាឆ្នំាដែលមានចំនួនជនភៀសខ្លួនដ៏ច្រើនសម្បើមមិនធ្លាប់មាន បើគិតតំាងពីក្រោយសង្រ្គាមលោកលើកទី២។ ក្នុងចំណោម ១៦០ប្រទេសដែល Amnesty International បានវាយតម្លៃពីរឿងសិទ្ធិមនុស្សនៅក្នុងរបាយការណ៍ឆ្នំា ២០១៤ មាន ៣៥ប្រទេសដែលបាន និងកំពុងបន្តគ្របដណ្តប់ដោយជម្លោះប្រដាប់អាវុធរវាងទ័ពរដ្ឋាភិបាល និងក្រុមឧទ្ទាម ឬមួយក៏ពួកជ្រុលនិយម ដូចយ៉ាងពួកជីហាតអង្គការរដ្ឋអ៊ីស្លាម និងពួកបូកូអារ៉ាមជាដើម។
ជាក់ស្តែង សង្រ្គាមស៊ីវិលនៅស៊ីរីដែលកំពុងបន្តមកដល់សព្វថ្ងៃបានសម្លាប់ មនុស្សជាង ២០០ ០០០នាក់ និងមានជនភៀសខ្លួន ១០លាននាក់។ វិបត្តិអ៊ុយក្រែនបានបណ្តាលឲ្យមានមនុស្សស្លាប់ជាង ៥ ០០០នាក់ និងអ្នករត់ចោលផ្ទះសម្បែងជាច្រើនពាន់នាក់។ នៅតំបន់ដើមបូព៌ា ការវាយប្រហាររបស់ទាហានអ៊ីស្រាអែលលើចលនាហាម៉ាស់ប៉ាឡស្ទីននៅតំបន់ ហ្គាហ្សាបានសម្លាប់ប្រជាជនប៉ាឡេស្ទីន ២ ០០០នាក់។ នៅទ្វីបអាហ្រ្វិក ពួកអ៊ីស្លាមនិយមជ្រុលបូកូ អារ៉ាមបានបង្កើនការវាយប្រហារនៅក្នុងប្រទេសនីហ្សេរីយ៉ា និងប្រទេសជិតខាង។ នៅអាហ្រ្វិកកណ្តាល ជម្លោះសាសនាបានបណ្តាលឲ្យមានមនុស្សស្លាប់ជាង ៥ ០០០នាក់។ នៅស៊ូដង់ខាងត្បូង មានស្លាប់ជនស៊ីវិលជាច្រើនរយពាន់នាក់នៅក្នុងជម្លោះប្រដាប់អាវុធ រវាងរដ្ឋាភិបាល និងពួកប្រឆំាង។
ក្រៅពីជនភៀសខ្លួនដែលបានរត់គេចពីជម្លោះប្រដាប់អាវុធ Amnesty International ក៏បានផ្តោតលើជនភៀសខ្លួនដែលបានរត់ចេញតាមសមុទ្រពីប្រទេសកំណើត ដើម្បីស្វែងរកអនាគតថ្មីនៅក្នុងប្រទេសផ្សេង ពិសេសនៅអឺរ៉ុប។ យោងតាម Amnesty International មានមនុស្សជាង ២០ម៉ឺននាក់បានព្យាយាមរត់ភៀសខ្លួនផ្សងព្រេងតាមផ្លូវសមុទ្រកាលពី ឆ្នំា ២០១៤ ក្នុងនោះ មានស្លាប់យ៉ាងតិច ៣ ៥០០នាក់។ ឧត្តមស្នងការអង្គការសហប្រជាជាតិទទួលបន្ទុកជនភៀសខ្លួនបានចាត់ទុក ផ្លូវសមុទ្រ ជាផ្លូវមរណៈជាងគេក្នុងលោក។
Amnesty International ទម្លាក់កំហុសដាក់សហគមន៍អន្តរជាតិ
Amnesty International បានស្តីបន្ទោសត្រង់ៗពីអសមត្ថភាពរបស់សហគមន៍អន្តរជាតិក្នុងការ ដោះស្រាយបញ្ហា ពិសេសគឺជួយការពារជនស៊ីវិល។ អ្នកដែល Amnesty International បានចង្អុលចំមុខ គឺក្រុមប្រឹក្សាសន្តិសុខអង្គការសហប្រជាជាតិ ពិសេសសមាជិកអចិន្រ្តៃយ៍ទំាង ៥ប្រទេសរបស់ក្រុមប្រឹក្សាសន្តិសុខអង្គការសហប្រជាជាតិ។ ពាក្យស្តីបន្ទោសនេះត្រូវបានថ្លែងជាសាធារណៈដោយលោកអគ្គលេខាធិការ Amnesty International Salil Shetty។ លោក Salil បានចាត់ទុកចម្លើយរបស់សហគមន៍អន្តរជាតិក្នុងការការពារជនស៊ីវិល និងបង្រ្កាបទង្វើរំលោភសិទ្ធិមនុស្សថា ជាចម្លើយឥតបានការ និងគ្មានប្រសិទ្ធិភាព។
អ្នកដែលលោក Salil បានចង្អុលចំមុខ គឺក្រុមប្រឹក្សាសន្តិសុខអង្គការសហប្រជាជាតិដែល Amnesty International បានយល់ឃើញថា ជាស្ថាប័នអន្តរជាតិមួយដែលត្រូវបានបង្កើតឡើងដើម្បីការពារជនស៊ីវិល និងធានាសន្តិភាព ព្រមទំាងសន្តិសុខនៅក្នុងពិភពលោក។ ត្រង់ចំណុចនេះ លោក Salil បាននិយាយផ្តោតសំខាន់លើសមាជិកអចិន្រ្តៃយ៍ទំាង ៥ប្រទេសនៃក្រុមប្រឹក្សាសន្តិសុខអង្គការសប្រជាជាតិ រួមមានអាមេរិក បារំាង អង់គ្លេស ចិន និងរុស្ស៊ី។ លោក Salil បានចោទប្រទេសទំាងនោះថា បានរំលោភបំពានអំណាចរបស់ខ្លួន និងបានប្រើសិទ្ធិវេតូដើម្បីការពារប្រយោជន៍នយោបាយ ឬភូមិសាស្រ្តនយោបាយផ្ទាល់ខ្លួនដោយមិនខ្ចីរវីរវល់ការពារជនស៊ីវិល។
នៅក្នុងន័យនេះ លោក Salil បានស្នើឲ្យមានការធ្វើកំណែទម្រង់នៅផ្ទៃក្នុងក្រុមប្រឹក្សាសន្តិសុខ ពិសេសគឺការកម្រិតសិទ្ធិវេតូរបស់សមាជិកអចិន្រ្តៃយ៍ទំាង ៥ប្រទេស។ អ្វីដែលលោក Salil ចង់បាន គឺសុំកុំឲ្យសមាជិកអចិន្រ្តៃយ៍ទំាង ៥ប្រទេសអាចប្រើសិទ្ធិវេតូប្រឆំាងនឹងសេចក្តីសម្រេចចិត្តណាដែល ទាក់ទងនឹងឧក្រិដ្ឋកម្មប្រល័យពូជសាសន៍ ឧក្រិដ្ឋកម្មសង្រ្គាម និងឧក្រិដ្ឋកម្មប្រឆំាងមនុស្សជាតិ។ សំណើដូចនេះដោយលោក Salil យល់ឃើញថា នឹងផ្តល់អំណាចយ៉ាងធំធេងដល់សហគមន៍អន្តរជាតិក្នុងការជួយការពារ ជនស៊ីវិល ព្រមទំាងជាសញ្ញាប្រាប់ថ្នាក់ដឹកនំាផ្តាច់ការ និងឧក្រិដ្ឋជនគ្រប់រូបថា ទង្វើរបស់ពួកគេនឹងមិនអាចគេចពីសំណាញ់ច្បាប់អន្តរជាតិបានទេ។
គួររម្លឹកជូនថា វិបត្តិពិភពលោកមួយចំនួនដែលបានអូសបន្លាយមិនអាចដោះស្រាយបានមកដល់ សព្វថ្ងៃ ក៏ដោយសារតែមានការជំទាស់ពីប្រទេសខ្លះជាសមាជិកអចិន្រ្តៃយ៍នៃ ក្រុមប្រឹក្សាសន្តិសុខ។ ជាក់ស្តែងវិបត្តិនៅស៊ីរី រុស្ស៊ី និងចិនដែលជាសម្ព័ន្ធមិត្តរបស់លោកប្រធានាធិបតីស៊ីរីអាសាដបានប្រើ សិទ្ធិវេតូប្រឆំាងនឹងសេចក្តីសម្រេចចិត្តរបស់ក្រុមប្រឹក្សាសន្តិសុខ ចំនួន ៤៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ