Sipri៖ចំណាយយោធាក្នុងពិភពលោកបានកើនឡើងក្នុងឆ្នាំ ២០១៥
ក៏ដូចជារៀងរាល់ឆ្នាំ វិទ្យាស្ថានស្រាវជ្រាវសន្តិភាពអន្តរជាតិហៅកាត់ថា ស៊ីព្រី (Sipri) ដែលមានទីស្នាក់ការក្នុងទីក្រុងស្តុកខុល ប្រទេសស៊ុយអែតតែងតែបានចេញផ្សាយរបាយការណ៍ប្រចាំឆ្នាំស្តីពីការចំណាយយោធានៅក្នុងពិភពលោក។ សម្រាប់របាយការណ៍ប្រចាំឆ្នាំ ២០១៥ ត្រូវបានស៊ីព្រីប្រាប់ឲ្យដឹងនៅថ្ងៃអង្គារ ទី៥ មេសាថា ការចំណាយយោធាក្នុងលោកបានផ្តើមកើនឡើងជាថ្មី បើធៀបនឹង៤ឆ្នាំកន្លងទៅ។
ចុះផ្សាយនៅថ្ងៃ៖
ស្តាប់ - ០២:២០
១ ៦៧៦ ០០០លានដុល្លារ នេះជាចំនួនទឹកប្រាក់ដែលពិភពលោកបានចំណាយនៅក្នុងវិស័យយោធាសម្រាប់ឆ្នាំ ២០១៥ កន្លងទៅ ពោលបានកើនឡើងចំនួន ១% បើគិតក្នុងរយៈពេល ១ឆ្នាំពេញ។ ក្រៅពីមានការកើនឡើងជាលក្ខណៈទូទៅ វិទ្យាស្ថានស្រាវជ្រាវសន្តិភាពអន្តរជាតិហៅកាត់ថា ស៊ីព្រី (Sipri) ក៏បានកត់សម្គាល់ឃើញពីកំណើនចំណាយយោធានៅអឺរ៉ុបខាងកើត នៅអាស៊ី និងនៅមជ្ឈិមបូព៌ា។ ចំណែកចំណាយយោធានៅបស្ចិមលោកមានការថយចុះបន្តិច។
នៅអាមេរិក ថវិកាយោធាក្នុងឆ្នាំ ២០១៥ មានចំនួន ៥៩៦ ០០០លានដុល្លារ ពោលតិចជាងឆ្នាំ ២០១៤ ចំនួន ២,៤%។ ក៏ប៉ុន្តែ អាមេរិកបន្តស្ថិតជាប្រទេសជើងឯកផ្តាច់មុខនៅក្នុងចំណាយផ្នែកយោធា ពិសេសការចាយវាយបន្ថែមនៅបរទេសក្នុងសង្រ្គាមប្រឆាំងនឹងអង្គការរដ្ឋអ៊ីស្លាម។ រីឯប្រទេសដែលមានកញ្ចប់ថវិកាយោធាធំលំដាប់ទី២បន្ទាប់ពីអាមេរិកគឺចិនចំនួន ២១៥ ០០០លានដុល្លារ បន្តដោយប្រទេសអារ៉ាប៊ីសាអូឌីតដែលមាន ៨៧ ២០០លានដុល្លារ និងប្រទេសរុស្ស៊ីដែលមានកញ្ចប់ថវិកាយោធាចំនួន ៦៦ ៤០០លានដុល្លារ។
ដោយឡែក បារាំងដែលធ្លាប់ស្ថិតលំដាប់ទី៥ ក្នុងឆ្នាំ ២០១៤ បានធ្លាក់ចុះនៅលេខរៀងទី៧សម្រាប់ឆ្នាំ ២០១៥ ពោលនៅក្រោមប្រទេសអង់គ្លេស និងប្រទេសឥណ្ឌា។ បើគេគិតក្នុងរយៈពេល ១០ឆ្នាំ ពីឆ្នាំ ២០០៦ ដល់ឆ្នាំ ២០១៥ កញ្ចប់ថវិកាយោធាអាមេរិកមានការធ្លាក់ចុះចំនួន ៤% តែនៅចិនមានការស្ទុះឡើងជាង ១៣២% បន្តដោយអារ៉ាប៊ីសាអូឌីតដែលកើនចំនួន ៩៧% និងរុស្ស៊ីកើនឡើងចំនួន ៩១%។ នៅអឺរ៉ុបខាងលិចវិញ គេសម្គាល់ឃើញជារួមពីការកាត់បន្ថយថវិកាយោធា តែមានចង្វាក់យឺតៗ។
នៅអាស៊ី ប្រទេសដែលបានបង្កើនការចាយវាយក្នុងផ្នែកយោធា រួមមានឥណ្ឌូណេស៊ី ហ្វីលីពីន ជប៉ុន និងវៀតណាម។ តាមស៊ីព្រី កំណើនចំណាយផ្នែកយោធារបស់ប្រទេសអាស៊ីទាំងនេះក៏ដោយតែមានប្រទេសខ្លះកំពុងប្រឈមមុខដោយផ្ទាល់ ឬដោយប្រយោលជាមួយនឹងចិន និងជាមួយកូរ៉េខាងជើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ