កាកបាទក្រហមអាល្លឺម៉ង់ប្រកាសត្រៀមផ្តល់ជំនួយមនុស្សធម៌ ដល់ប្រជាជនក្រិក
កិច្ចប្រជុំកំពូលថ្នាក់ដឹកនាំតំបន់អឺរ៉ូ កាលពីថ្ងៃអង្គារ មិនបានផ្តល់ដំណោះស្រាយ បញ្ចប់វិបត្តិនៅក្រិក។ គ្មានជំនួយហិរញ្ញវត្ថុបន្ទាន់ពីអឺរ៉ុប វិបត្តិសេដ្ឋកិច្ចក្រិក នឹងរាលដាលទៅជាវិបត្តិមនុស្សធម៌ នៅពេលដែលប្រជាជនក្រិកមួយចំនួនធំ រស់ពឹងអាស្រ័យនឹងជំនួយសង្គមរបស់រដ្ឋក្រិក។ នៅក្នុងកាលៈទេសៈ ដែលប្រជាជនក្រិកកំពុងជួបអាសន្នអន់ក្រយ៉ាងដូច្នេះ អង្គការកាកបាទក្រហមអាល្លឺម៉ង់ បានប្រកាស នៅថ្ងៃពុធនេះ ថា បានត្រៀមខ្លួន នាំយកជំនួយ មនុស្សធម៌ទៅឲ្យប្រជាជនក្រិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៨
“ប្រជាជនក្រិកមិនត្រូវមករងគ្រោះ ទទួលថ្មបាក់ ដែលបង្កឡើងនយោបាយដ៏ងងឹតងងល់របស់ថ្នាក់ដឹកនាំ របស់ពួកគេទេ។” នេះជាការថ្លែងរបស់រដ្ឋមន្រ្តី អាល្លឺម៉ង់ លោកស៊ិកម៉ា ហ្គាប្រ៊ីយែល។ កាលពីថ្ងៃចន្ទ រដ្ឋមន្រ្តី សេដ្ឋកិច្ច និងជាឧបនាយករដ្ឋមន្រ្តី អាល្លឺម៉ង់រូបនេះ បានថ្លែងឲ្យដឹងថា ថ្នាក់ដឹកនាំអឺរ៉ុបនឹងជជែកពីការផ្តល់ជំនួយមនុស្សធម៌ដល់ប្រជាជនក្រិក ដែលជាជនរងគ្រោះ ខ្លាំងជាងគេ នៅក្នុងរឿងវិបត្តិប្រាក់បំណុលក្រិក។
កិច្ចប្រជុំវិសាមញ្ញរបស់តំបន់ចាយប្រាក់អឺរ៉ូ កាលពីថ្ងៃអង្គារម្សិលមិញ បានបញ្ចប់ទៅដោយគ្មានដំណោះស្រាយអ្វី។ គ្មានដំណោះស្រាយ ប្រទេសក្រិក ធ្លាក់ខ្លួនកាន់តែជ្រៅ ទៅក្នុងវិបត្តិហិរញ្ញវត្ថុ។ ប្រជាជនក្រិក នៅតែលំបាក មិនអាចបើកប្រាក់ពី ធនាគារក្រិក ដែលបានបិទទ្វារ អស់ជាង១សប្តាហ៍មកហើយ ហើយដែលកំពុងជួបបញ្ហាខ្វះខាតសាច់ប្រាក់។ រហូតមកដល់ថ្ងៃពុធនេះ មានតែប្រជាជនចូលនិវត្តន៍ដែលអាចបើកប្រាក់របស់ខ្លួន ដោយច្រើនបំផុត៦០អឺរ៉ូ ក្នុងមួយថ្ងៃ។ ក្នុងស្ថានភាពដែលប្រជាជនក្រិក កំពុងជួបគ្រោះអាសន្ន ផ្នែកហិរញ្ញវត្ថុ អង្គការកាកបាទក្រហម អាល្លឺម៉ង់ បានប្រកាស នៅថ្ងៃពុធនេះ ថា ខ្លួនត្រៀមខ្លួនផ្តល់ជំនួយ ដល់ប្រជាជនក្រិកដែលកំពុងជួបការលំបាក មិនបានទទួលគ្រប់គ្រាន់ សេវាសុខភាព។
កាកបាទក្រហម អាល្លឺម៉ង់ មិនអាចជួយក្រិកផ្នែកវិបត្តិហិរញ្ញវត្ថុ ប៉ុន្តែ អាចផ្តល់ជំនួយមនុស្សធម៌ ដល់ប្រជាជនក្រិក។ តាមអ្នកនាំពាក្យរបស់កាកបាទក្រហម អាល្លឺម៉ង់ ដែលបានផ្តល់បទសម្ភាសន៍ដល់កាសែត ក្នុងស្រុកអាល្លឺម៉ង់ គឺ ប្រជាជនក្រិក ដែលចូលនិវត្តន៍ ក្រីក្រ អ្នកជម្ងឺ និងក្រុមប្រជាជនភៀសខ្លួន នៅក្នុងទឹកដីក្រិក ដែលរងគ្រោះ ខ្លាំងជាងគេ ដោយសារវិបត្តិហិរញ្ញវត្ថុ នៅក្រិក។
ប្រធានរបស់អង្គការ SOSភូមិកុមារ វិញបានអះអាងថា ចំនួនគ្រួសារក្រិក ដែលរត់មកជំនួយពី អង្គការ បានកើនឡើង ៥០ដង ចាប់តាំងពីវិបត្តិប្រាក់បំណុលផ្ទុះឡើងនៅប្រទេសក្រិក។ ការដើរចេញរបស់ក្រិកពីតំបន់ចាយប្រាក់អឺរ៉ូ នឹងរឹតតែធ្វើឲ្យសង្គមប្រជាជនក្រិកធ្លាក់ចូលទៅក្នុងស្ថានភាពអត្តខាត់។
កាលពីថ្ងៃសុក្រ រូបថតរបស់ទីភ្នាក់ងារបារាំង AFPដែលបង្ហាញ ពីបុរសវ័យចំណាស់ ក្រិក ម្នាក់អង្គុយយំ នៅមុខធនាគារក្រិក បានបណ្តាលឲ្យមានប្រតិកម្ម រំជួលចិត្ត និងរិះគន់ នៅតាមអ៊ីនធ័រនែត។ តាមកាសែត បុរសចូលនិវិត្តន៍ អង្គុយយំ ដោយសារតែគាត់បាក់ទឹកចិត្ត និងអស់សង្ឃឹម ក្រោយពីធនាគារបដិសេធ មិនព្រមបើកលុយ ឲ្យគាត់។ នៅថ្ងៃពុធនេះ អ្នកជំនួញហិរញ្ញវត្ថុម្នាក់ ដើមកំណើតក្រិក រស់នៅប្រទេសអូស្ត្រាលី បានអះអាងថា គាត់នឹងនាំយកជំនួយហិរញ្ញវត្ថុដល់បុរសវ័យចំណាស់ ដែលគាត់ធ្លាប់ស្គាល់ ជាមិត្តភក្តិឪពុករបស់គាត់។ អ្នកជំនួញខាងលើ បញ្ជាក់ដែរថា គាត់នឹងរៃអង្គាសរកប្រាក់បន្ថែមទៀត ដើម្បី ជួយដល់ប្រជាជនចូលនិវត្តន៍ផ្សេងទៀត នៅក្រិក ដែលជួបការលំបាក ដោយសារតែវិបត្តិប្រាក់បំណុលក្រិកសព្វថ្ងៃ។
អាឡិចស៊ីស ស៊ីប្រាស៖ ក្រិកជាមន្ទីរពិសោធន៍នយោបាយរឹតត្បិតថវិការបស់អឺរ៉ុប ប៉ុន្តែ បទពិសោធន៍នេះកំពុងជួបបរាជ័យ
នាយករដ្ឋមន្រ្តីក្រិក ត្រូវឡើងថ្លែងសុន្ទរកថា នៅថ្ងៃ ពុធនេះ នៅក្នុងសភាអឺរ៉ុប នៅ៣ថ្ងៃក្រោយបោះឆ្នោតប្រជាមតិក្រិក ដែលសំឡេងមិនព្រម ទទួលយកផែនការផ្តល់ជំនួយរបស់អឺរ៉ុប បានឈ្នះលើសលប់។ កាលពីថ្ងៃអង្គារម្សិលមិញ នៅក្នុង កិច្ចប្រជុំ ថ្នាក់ដឹកនាំប្រទេសចាយប្រាក់អឺរ៉ូ ទាំង ១៩ គ្រប់គ្នា បានប្រកាសទុកពេល រហូតដល់ថ្ងៃអាទិត្យ ដើម្បីស្វែងរកឲ្យឃើញកិច្ចព្រមព្រៀង ក្រិក និងម្ចាស់បំណុល ដែលគណៈកម្មការអឺរ៉ុប ធនាគារកណ្តាលអឺរ៉ុប និងមូលនិធិរូបិយវត្ថុអន្តរជាតិ។ មុននឹងដល់ឱសានវាទ ចុងក្រោយ នៅថ្ងៃអាទិត្យ រដ្ឋាភិបាលក្រិក ត្រូវដាក់ស្នើកម្មវិធីកំណែទម្រង់ ឲ្យបាននៅត្រឹមថ្ងៃព្រហស្បតិ៍ ដើម្បីបើកការចរចាផ្តល់ជំនួយបន្តដល់រដ្ឋក្រិក។
នៅថ្ងៃអង្គារដដែល ប្រទេសដៃគូក្រិកជាច្រើនសំដែងការអស់សង្ឃឹម ដែលរដ្ឋមន្រ្តីហិរញ្ញវត្ថុរបស់ក្រិកថ្មី គ្មានបានយកឯកសារ មកដាក់ក្នុងតុចរចា។ ឥរិយាបថព្រងើយកន្តើយ ឬការធ្វេសប្រហែលរបស់ក្រិក បានធ្វើឲ្យពាក្យ ក្រិកដើរចេញពីតំបន់អឺរ៉ូ កាន់តែលឺបង្ហើរចេញពីមាត់របស់ថ្នាក់ដឹកនាំ អឺរ៉ុប ដែលនៅក្នុងនោះ មានប្រធានក្រុមប្រឹក្សាអឺរ៉ុប និងប្រធានគណៈកម្មការអឺរ៉ុប។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ