តំបន់ចាយប្រាក់អឺរ៉ូធ្លាក់ក្នុងស្ថានភាពមិនច្បាស់លាស់ក្រោយប្រជាជនក្រិក បោះឆ្នោត មិនព្រម
លទ្ធផលបោះឆ្នោតប្រជាមតិក្រិក កាលពីថ្ងៃអាទិត្យបង្ហាញថា ជាង ៦០ភាគរយនៃប្រជាជនក្រិក បោះឆ្នោត មិនព្រមទទួលយកផែនការផ្តល់ជំនួយ ពី អឺរ៉ុប និងមូលនិធិរូបិយវត្ថុ។ នេះជាលើកទីមួយ ក្នុងប្រវត្តិសាស្រ្តអឺរ៉ុប ដែលប្រជាជននៅក្នុងប្រទេសមួយ បានបោះឆ្នោតប្រឆាំងនឹងវិធានការរឹតត្បិតថវិកា ដែលដាក់ចេញដោយអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:០៤
នៅក្នុងការបោះឆ្នោតប្រជាមតិ កាលពីថ្ងៃអាទិត្យ ប្រជាជនក្រិកបោះឆ្នោតប្រឆាំង មិនចង់បានផែនការផ្តល់ជំនួយរបស់អឺរ៉ុប ដែលមានចងភ្ជាប់មកជាមួយនឹងលក្ខខណ្ឌ ធ្វើនយោបាយរឹតត្បិតថវិកានៅក្រិក។ តាំងពីមុន ក្រិករៀបចំ ការបោះឆ្នោតប្រជាមតិម្ល៉េះ ភាគីអឺរ៉ុប ជាពិសេស អាល្លឺម៉ង់បានព្រមានពីផលវិបាក បើសិន សំឡេងមិនព្រម ទទួលជោគជ័យ នៅក្នុងការបោះឆ្នោតប្រជាមតិក្រិក។
តាំងពីយប់ថ្ងៃអាទិត្យម្សិលមិញ គឺគ្រាន់តែ លទ្ធផលឆ្នោតបង្ហាញថា ក្រុមមិនព្រម ក្រុមប្រឆាំងនឹងផែនការជំនួយរបស់អឺរ៉ុប បានទទួលជោគជ័យភ្លាម លោកស្រី នាយករដ្ឋមន្រ្តីអាល្លឺម៉ង់ បានទាក់ទងទូរស័ព្ទភ្លាម ទៅប្រធានាធិបតីបារាំង លោកហ្វ្រង់ស័រ ហូឡង់។ លោកស្រី អង់គែឡា ម៉ែរគែល បានស្នើឲ្យមានការកោះប្រជុំបន្ទាន់ ប្រមុខដឹកនាំ ប្រទេសនៅក្នុងតំបន់ចាយប្រាក់អឺរ៉ូ នៅថ្ងៃអង្គារស្អែក។ ហើយ នៅថ្ងៃចន្ទទី ៦ កក្កដា លោកស្រី ត្រូវជួបប្រធានាធិបតីបារាំង ក្នុងក្រុងប៉ារីស ដើម្បីជជែកពីផលប៉ះពាល់ ដែលអាចមាន ទៅលើតំបន់ចាយប្រាក់អឺរ៉ូ នៅក្រោយប្រជាជនក្រិកបោះឆ្នោត មិនព្រម។
ប្រធាន គណៈកម្មការអឺរ៉ុប លោកហ្សង់ក្លូត ហ្សុងគ័រ បានជួបទូរស័ព្ទ ជាមួយមេដឹកនាំរបស់ប្រទេសទាំង ១៨ ដែលជាសមាជិករបស់តំបន់ចាយប្រាក់អឺរ៉ូ ប៉ុន្តែ ផាត់ចោលមិននិយាយជាមួយ នាយករដ្ឋមន្រ្តីក្រិក។ នៅថ្ងៃចន្ទ នេះ នៅក្នុងសន្និសីទវីដេអូ ប្រធានគណៈកម្មការអឺរ៉ុបត្រូវជួបពិគ្រោះយោបល់ជាមួយប្រធានក្រុមប្រឹក្សាអឺរ៉ុប និងប្រធានធនាគារកណ្តាលអឺរ៉ុប ដែលត្រូវកោះប្រជុំបន្ទាន់ផងដែរ រដ្ឋមន្រ្តីថវិការបស់សហភាពអឺរ៉ុបទាំងមូល នៅថ្ងៃចន្ទ។
អាឡិចស៊ីស ស៊ីប្រាស៖ សំឡេងមិនព្រម របស់ប្រជាជនក្រិក នឹងរឹតតែជួយឲ្យរដ្ឋាភិបាល មានកម្លាំងខ្លាំងជាងមុន ដើម្បីចរចា ទាមទារឲ្យម្ចាស់បំណុល
នាយករដ្ឋមន្រ្តីក្រិក លោកអាឡិចស៊ីស ស៊ីប្រាសបានទទួលជោគជ័យក្នុងការកៀងគរប្រជាជនក្រិក ឲ្យបោះឆ្នោតប្រឆាំងកម្មវិធី ធ្វើកំណែទម្រង់ ទាមទារដោយអឺរ៉ុប ម្ចាស់បំណុល។ ជាមួយនឹងសំលេងមិនព្រម ច្រើនលើសលប់ លោកចង់បង្ហាញថា មិនមែនមានតែរដ្ឋាភិបាលក្រិកតែម្នាក់ឯងទេ ប៉ុន្តែ គឺប្រជាជនក្រិកទាំងមូល ដែលប្រឆាំង មិនចង់បានកញ្ចប់ជំនួយ ជាថ្នូរនឹងនយោបាយរឹតត្បិតថវិកា ដែលដាក់ដោយអឺរ៉ុប។
សម្រាប់នាយករដ្ឋមន្រ្តីក្រិក សំឡេងរបស់ប្រជាជនក្រិក សំឡេងប្រជាធិបតេយ្យ នឹងអាចមានសម្ពាធទៅលើមេដឹកនាំអឺរ៉ុប ផ្សេងទៀត ដែលជាភាគីម្ចាស់បំណុល ឲ្យគិតពិចារណាឡើងវិញ ពីកម្មវិធីធ្វើនយោបាយរឹតត្បិតថវិកានៅក្រិក។ ម្តងហើយ ម្តងទៀត លោកអាឡិចស៊ីស ស៊ីប្រាសបញ្ជាក់ថា ការបោះឆ្នោត មិនទទួលយកផែនការធ្វើកំណែទម្រង់របស់អឺរ៉ុប មិនមែនមានន័យថា ក្រិកត្រូវកាត់ផ្តាច់ខ្លួនចេញពីតំបន់ចាយប្រាក់អឺរ៉ូនោះទេ។ លោកស៊ីប្រាស អះអាងថា ក្រិកនៅតែចង់ស្ថិតនៅក្នុងតំបន់ចាយប្រាក់អឺរ៉ូ ប៉ុន្តែ សុំឲ្យភាគីម្ចាស់បំណុលធ្វើសម្បទាន និងសាមគ្គីជួយក្រិកឲ្យស្មោះអស់ពីចិត្ត។
អឺរ៉ុប៖ ក្រិករំលោភ មិនគោរពច្បាប់របស់អឺរ៉ុប។
សម្រាប់ភាគីអឺរ៉ុប ចម្លើយមិនព្រមរបស់ប្រជាជនក្រិក មានន័យស្មើនឹងការដែលក្រិកចង់ដើរចេញពីតំបន់ចាយប្រាក់អឺរ៉ូ។ សេណារីយ៉ូ ដ៏អាក្រក់នេះ ដែលនឹងធ្វើឲ្យទាំងក្រិក និងអឺរ៉ុបខាតបង់ទាំងអស់គ្នានោះ គឺគ្មានអ្នកណាចង់បាននោះទេ។ គេក៏មិនសង្ឃឹមថា វានឹងអាចកើតឡើងដែរ ព្រោះថា រហូតមកដល់ម៉ោងនេះ គ្រប់ភាគីសុទ្ធតែបង្ហាញចេតនាចង់ចរចា ដើម្បីរកដំណោះស្រាយ។
ប្រមុខដឹកនាំរដ្ឋាភិបាលអាល្លឺម៉ង់ ដែលជាម្ចាស់បំណុលសំខាន់មួយរបស់ក្រិក នៅតែបើកផ្លូវចរចាជាមួយក្រិក នៅក្រោយការបោះឆ្នោតប្រជាមតិ។ ចំណែក រដ្ឋាភិបាលក្រិកបាន សុខចិត្តលះបង់ចោលរដ្ឋមន្រ្តីសេដ្ឋកិច្ច ដើម្បីអាចផ្តើមចរចាជាថ្មី ជាមួយម្ចាស់បំណុល។ នៅថ្ងៃចន្ទនេះ រដ្ឋមន្រ្តីសេដ្ឋកិច្ចក្រិក ដែលជាអ្នកតំណាងចរចាយ៉ាងតឹងសសៃក ឲ្យរដ្ឋាភិបាលក្រិកបានប្រកាសលាចេញពីតំណែង ដែលបើតាមលោក គឺដើម្បីជួយសម្រាលភាពតានតឹង ដែលក្រិក ធ្លាប់មានភាគីម្ចាស់បំណុល។ រដ្ឋមន្រ្តីសេដ្ឋកិច្ច លែងចូលខ្លួន ជាដៃគូចរចា ជាមួយអឺរ៉ុប ដោយសារមកពីនៅ ប៉ុន្មានថ្ងៃមុននេះ លោកធ្លាប់បានប្រើពាក្យធ្ងន់ៗ ចាត់ទុក ក្រុមប្រទេសម្ចាស់បំណុល ថា ជាភេរវជន។
នៅថ្ងៃចន្ទ គ្រប់គ្នាកំពុងតាមដានមើលប្រតិកម្ម ជំហររបស់ធនាគារកណ្តាលរបស់អឺរ៉ុប។
នៅក្រោយសំឡេង មិនព្រម ឈ្នះដាច់ សំឡេងព្រម នៅក្នុងការបោះឆ្នោតប្រជាមតិ រដ្ឋាភិបាលក្រិកបានដាក់ពាក្យស្នើសុំឲ្យធនាគារកណ្តាលអឺរ៉ុប បង្កើនប្រាក់កម្ចីទៅឲ្យក្នុងធនាគារក្រិក ដែលតាមរដ្ឋាភិបាលគ្រោងនឹងបើកឲ្យដំណើរការវិញ នៅថ្ងៃអង្គារ។
ធនាគារកណ្តាលអឺរ៉ុបទំនងមិនទាន់សម្រេចចិត្តអ្វី នៅមុនការសម្រេចរបស់កិច្ចប្រជុំកំពូលបន្ទាន់របស់ថ្នាក់ដឹកនាំប្រទេសចាយប្រាក់អឺរ៉ូនៅថ្ងៃអង្គារនោះទេ នោះបើទោះជា ធនាគារកណ្តាលអឺរ៉ុប ជាស្ថាប័នឯករាជ្យក៏ដោយ។
ធនាគារកណ្តាលអឺរ៉ុប កាលពីថ្ងៃអាទិត្យសប្តាហ៍មុន ធ្លាប់បានបញ្ជូនសាច់ប្រាក់ ទៅឲ្យធនាគារក្រិកខ្ចី បន្ទាប់ពីរដ្ឋាភិបាលក្រិកប្រកាសបោះឆ្នោតប្រជាមតិ និងបិទធនាគារ មួយរយៈ។ ធនាគារកណ្តាលអឺរ៉ុប កាលណោះ បានសម្រេចចិត្ត ដោយឯកេង ផ្តល់សាច់ប្រាក់ ទៅឲ្យធនាគារក្រិក ក្នុងបំណងជួយរក្សា ធានាតម្លៃរូបិយបណ្ណអឺរ៉ូ តែមួយ កុំឲ្យធ្លាក់ថ្លៃ ដោយសារវិបត្តិប្រាក់បំណុលក្រិក។ ប៉ុន្តែ សម្រាប់ សមាជិកមួយចំនួន របស់ក្រុមប្រឹក្សាធនាគារកណ្តាលអឺរ៉ុប រំលោភវិធានផ្ទៃក្នុង ហើយការធ្វើដូច្នេះ គឺរឹតតែបំផ្លាញលុយអឺរ៉ូទៅវិញទេ។ មួយវិញទៀត ធនាគារកណ្តាលដែលបញ្ចេញលុយជាង ៥០ពាន់លានអឺរ៉ូ រួចទៅហើយនោះ នឹងអាចជួបបញ្ហា ខ្វះខាតសាច់ប្រាក់ នៅក្នុងកេស ទៅថ្ងៃមុខ។
បើធនាគារកណ្តាលអឺរ៉ុប មិនផ្តល់ប្រាក់កម្ចីទៅឲ្យធនាគារក្រិកខ្ចី នោះធនាគារក្រិកនឹងលែងមានលុយ សម្រាប់ប្រជាជនក្រិក។ សេដ្ឋកិច្ចក្រិកនឹងអាចធ្លាក់ចុះដាំដូងកាន់តែខ្លាំង ព្រោះថា ក្រិកលែងអាចខ្ចីលុយពីអ្នកណាផ្សេងទៀតក្រៅតែពីអឺរ៉ុប តំាងពីឆ្នាំ ២០១២ ដែលក្រិកកើតមានប្រាក់បំណុលលើកដំបូងម្ល៉េះ។ ហើយនៅពេលដែលក្រិកអស់លុយអឺរ៉ូនៅក្នុងធនាគារ រដ្ឋក្រិកនឹងអាចបង្កើតបុង សម្រាប់ចាយបណ្តោះអាសន្ន ប៉ុន្តែ ធ្វើដូច្នេះ នឹងធ្វើឲ្យក្រិកត្រូវដើរចេញ ដោយឯកឯងចេញពីតំបន់ចាយប្រាក់អឺរ៉ូ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ