អាកាសធាតុ៖បារំាងកោះប្រជុំរដ្ឋមន្រ្តីបរិស្ថាន និងថាមពលចំនួន ៦០នាក់ដើម្បីត្រៀមបើក COP២១
៣សប្តាហ៍ មុនការបើកសន្និសីទអន្តរជាតិស្តីពីបញ្ហាអាកាសធាតុរៀបចំក្នុងទីក្រុងប៉ារីស ប្រទេសបារំាង (COP២១) លោកប្រមុខការទូតបារំាងឡូរ៉ង់ ហ្វាប៊ីយូសបានកោះប្រជុំចុងក្រោយថ្នាក់រដ្ឋមន្រ្តីក្រសួងបរិស្ថាន និងថាមពលមកពី ៦០ប្រទេសរយៈពេល ៣ថ្ងៃដោយចាប់ផ្តើមពីថ្ងៃអាទិត្យ ទី៨ វិច្ឆិកា។ គោលដៅនៃកិច្ចប្រជុំ គឺពន្លឿនកិច្ចចរចាលើអត្ថបទដែលទើបអនុម័តក្នុងប្រទេសអាល្លឺម៉ង់ដើម្បីឆ្ពោះទៅសម្រេចឲ្យបាននូវកិច្ចព្រមព្រៀងអន្តរជាតិមួយស្តីពីបញ្ហាអាកាសធាតុ។ ដោយឡែក លោកប្រធានាធិបតីរុស្ស៊ីពូទីនក៏នឹងមានវត្តមាននៅក្បែរប្រមុខរដ្ឋនៃប្រទេសផ្សេងក្នុងឱកាសសន្និសីទនាពេលខាងមុខដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
វត្តមានរបស់លោកប្រមុខរដ្ឋរុស្ស៊ីពូទីន រួមទំាងរដ្ឋមន្រ្តីរុស្ស៊ីប្រមាណ ២០នាក់នៅក្នុងសន្និសីទអន្តរជាតិក្នុងទីក្រុងប៉ារីសត្រូវបានប្រកាសឲ្យដឹងដោយលោកប្រមុខការទូតបារំាងឡូរ៉ង់ ហ្វាប៊ីយូស។ តែក្រសួងការបទេសបារំាងបានគូសបញ្ជាក់ថា ខ្លួននៅមិនទាន់ទទួលបានការបញ្ជាក់ជាផ្លូវការពីខាងភាគីរុស្ស៊ីនៅឡើយទេ និងថា បារំាងបានទទួលដំណឹងនេះពីលោកស្រីគ្រីស្ទីណា ហ្វីហ្កេរ៉េស (Christina Figueres) អគ្គនាយការនៃសន្ធិសញ្ញាអាកាសធាតុរបស់អង្គការសហប្រជាជាតិដែលកំពុងមានវត្តមានក្នុងប្រទេសបារំាង។
គួរជម្រាបជូនថាមកដល់ពេលនេះ បារំាងក្នុងនាមជាម្ចាស់ផ្ទះរៀបចំសន្និសីទបានទទួលចម្លើយវិជ្ជមានពីប្រមុខរដ្ឋ និងប្រមុខរដ្ឋាភិបាលជាង ១០០ប្រទេសហើយ ក្នុងនោះមានលោកប្រធានាធិបតីអាមេរិកអូបាម៉ា លោកប្រធានាធិបតីចិនស៊ី ជីនពីង ឬមួយក៏លោកនាយករដ្ឋមន្រ្តីឥណ្ឌា។ លោកប្រមុខការទូតបារំាងឡូរ៉ង់ ហ្វាប៊ីយូសក្នុងនាមជាប្រធានសន្និសីទបានបញ្ជាក់ថា ការអញ្ជើញប្រមុខរដ្ឋ និងប្រមុខរដ្ឋាភិបាលឲ្យចូលរួមនៅថ្ងៃបើកសន្និសីទដំបូងក្នុងថ្ងៃទី៣០ វិច្ឆិកា គឺជាការដាក់សម្ពាធដើម្បីកុំឲ្យសន្និសីទទទួលបរាជ័យដូចក្នុងសន្និសីទនៅប្រទេសដាណឺម៉ាកកាលពីឆ្នំា ២០០៩។
ដោយឡែក ទាក់ទងនឹងកិច្ចប្រជុំថ្នាក់រដ្ឋមន្រ្តីក្រសួងបរិស្ថាន និងថាមពលមកពី ៦០ប្រទេសក្នុងទីក្រុងប៉ារីសរយៈពេល ៣ថ្ងៃពីថ្ងៃអាទិត្យ ទី៨ ដល់ថ្ងៃអង្គារ ទី១០ វិច្ឆិកាត្រូវបានលោកហ្វាប៊ីយូសប្រាប់ឲ្យដឹងថា មិនមែនដើម្បីចរចាឡើងវិញលើអត្ថបទកិច្ចព្រមព្រៀងចំនួន ៥៥ទំព័រដែលទើបអនុម័តនៅក្នុងកិច្ចចរចានាទីក្រុងប៊ន ប្រទេសអាល្លឺម៉ង់ថ្មីៗនេះទេ តែគឺដើម្បីជួយសម្រួលលើភាពមិនចុះសម្រុងគ្នាដែលនៅសេសសល់ក្នុងគោលដៅឈានទៅសម្រេចឲ្យបានជោគជ័យនូវកិច្ចព្រមព្រៀងអន្តរជាតិចុងក្រោយមួយនៅក្នុងសន្និសីទ។
សម្រាប់លោកហ្វាប៊ីយូស ការរៀបចំឲ្យមានកិច្ចប្រជុំនៅមុនសន្និសីទផ្លូវការ គឺជាជំហានសាកល្បងមួយដ៏សំខាន់ខ្លំាងណាស់។ គួររម្លឹកជូនថា កិច្ចព្រមព្រៀងអន្តរជាតិស្តីពីបញ្ហាអាកាសធាតុដែលគ្រប់គ្នាចង់បាននាឱកាសសន្និសីទក្នុងប្រទេសបារំាងខាងមុខ គឺការទប់ស្កាត់មិនឲ្យសីតុណ្ហភាពក្នុងភពផែនដីកើនលើសពី ២អង្សារធៀបនឹងកម្រិតនៅមុនសម័យឧស្សាហកម្ម។ តែថ្មីៗនេះ អង្គការសហប្រជាជាតិបានទាញសញ្ញាអាសន្នដោយបានអំពាវនាវប្រទេសនីមួយៗឲ្យចាត់វិធានការបន្ថែមទៀតដើម្បីអាចរក្សាកំដៅក្នុងភពផែនដីមិនឲ្យកើនលើសពី ២អង្សារ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ