ចិន-បារាំង កាន់ដៃគ្នាជំរុញសន្និសីទអន្តរជាតិឱ្យសម្រេចជោគជ័យ
នៅល្ងាចថ្ងៃចន្ទនេះ ចិននិងបារាំងបានស្រុះស្រួលគ្នាថានឹងប្រឹងប្រែងធ្វើគ្រប់យ៉ាង រកឱ្យឃើញ នាឱកាសសន្និសីទស្តីអំពីអាកាសធាតុខែក្រោយនេះ នូវកិច្ចព្រមព្រៀងប្រកបដោយមហិច្ឆតាមួយ និងតាមផ្លូវច្បាប់ ដែលមានលក្ខណៈបង្ខិតបង្ខំឱ្យប្រទេសជាសមាជិកទាំងអស់ត្រូវតែគោរពតាម។ មិនតែប៉ុណ្ណោះកិច្ចព្រមព្រៀងនោះ នឹងត្រូវភ្ជាប់ពាក្យខសន្យាសើរើដើម្បីផ្ទៀងផ្ទាត់លទ្ធផល ជារៀងរាល់៥ឆ្នាំម្តង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤០
កិច្ចព្រមព្រៀងបារាំង-ចិន ត្រូវបានប្រកាសឡើងរួមគ្នាដោយប្រធានាធិបតីបារាំងនិងចិន ពីវិមានប្រជាជនចិន ក្រុងប៉េកាំង។ ប្រធានាធិបតីចិន ប្រទេសដែលបញ្ចេញឧស្ម័នពុលខ្លាំងជាងគេនៅលើពិភពលោក បានអះអាងថា សេចក្តីថ្លែងការណ៍រួមបារាំងចិននេះ មាន១២ចំណុច និងបញ្ជាក់អំពីការប្តេជ្ញាចិត្តរួមគ្នា ក្នុងការដឹកនាំសន្និសីទស្តីអំពីអាកាសធាតុ ក្រុងប៉ារីស នៅចុងខែ ឱ្យបានសម្រេចជោគជ័យ។ សម្រាប់លោកហ្វ្រង់ស័រហូឡង់វិញ កិច្ចព្រមព្រៀងបារាំង-ចិន ជាជំហានដ៏សំខាន់មួយ នាំឆ្ពោះទៅរកកិច្ចព្រមព្រៀងទូទៅ-COP២១។
នៅក្នុងសេចក្តីថ្លែងការណ៍រួម ប៉ារីសបានមើលឃើញអំពីភាពចាំបាច់ នៃការតាមដានសកម្មភាព។ យន្តការផ្ទៀងផ្ទាត់លទ្ធផល នឹងត្រូវដាក់ឱ្យដំណើរការ នៅរៀងរាល់៥ឆ្នាំម្តង សម្រាប់វាស់វែងថា ប្រទេសជាសមាជិកគោរពកិច្ចសន្យាកាត់បន្ថយឧស្ម័នផ្ទះកញ្ចក់បានប៉ុណ្ណា។
នៅពេលមិនដល់មួយខែទេ សន្និសីទអន្តរជាតិស្តីអំពីអាកាសធាតុនឹងត្រូវចាប់ផ្តើម ! ប៉ុន្តែ កិច្ចព្រមព្រៀងទូទៅហាក់ដូចជានៅឆ្ងាយ ប៉ុន្តែប្រធានាធិបតីបារាំងនិងចិន បានប្រកាសក្តែងៗ ក្នុងសំឡេងតែមួយ ថានឹងធ្វើឱ្យកិច្ចព្រមព្រៀងដ៏លំបាកសម្រេចមួយនេះ ក្លាយជាកិច្ចព្រមព្រៀងដែលមានលក្ខណៈដាក់កំហិត ជាច្បាប់ត្រូវគោរព គ្រប់គ្នាៗ និងជាកញ្ចក់ឆ្លុះបញ្ចាំងអំពីគោលការណ៍ទទួលខុសត្រូវរួម របស់ប្រទេសជាសមាជិកទាំង១៩៥ប្រទេស ទៅតាមសមត្ថភាពនិងលទ្ធភាព ដើម្បីកំរិតការឡើងកម្តៅនៃភពផែនដីត្រឹមក្រោម២អង្សារ។
ប៉ារីសនិងប៉េកាំង បានគូសបញ្ជាក់ផងដែរអំពីភាពចាំបាច់នៃការអភិវឌ្ឍន៍ទីផ្សារឧស្ម័នកាបូនិច កំណត់តម្លៃ កំណត់កូតា ដើម្បីឱ្យមានតម្លាភាពនិងការទុកចិត្តលើគ្នាទៅវិញទៅមក។ ចិនបានផ្តើមអភិវឌ្ឍន៍ទីផ្សារកាបូនជាតិ ដែលបើតាមសេចក្តីថ្លែងការណ៍ គឺដំណាក់កាលដ៏សំខាន់ ប្រកបដោយនិមិត្តរូប និងជាសន្យាប្រកបដោយសេចក្តីក្លាហានរបស់ចិន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ