អាមេរិកចោទរុស្ស៊ីថា បានទម្លាក់គ្រាប់បែកទៅលើក្រុមឧទ្ទាមស៊ីរី ដែលបណ្តុះបណ្តាលដោយក្រុមCIA
រុស្ស៊ី នៅថ្ងៃព្រហស្បតិ៍បាន បន្តធ្វើប្រតិបត្តិការវាយប្រហារតាមផ្លូវអាកាស ក្នុងប្រទេសស៊ីរី។ ប្រតិបត្តិការទ័ពអាកាសរុស្ស៊ី ត្រូវអមដោយការប្រយុទ្ធជើងគោក របស់ទ័ពអេស្បូឡា លីបង់ និងទាហានអ៊ីរ៉ង់ ដែលគាំទ្រទាហានរបស់រដ្ឋាភិបាលបាស្ហា អាល់អាសាដរហូតមក។ កាលពីថ្ងៃម្សិលមិញ ក្រសួងការពារជាតិរុស្ស៊ី ដើម្បីជំរះរាល់មន្ទិលសង្ស័យ និងការចោទប្រកាន់ពីអាមេរិក បារាំង បានបញ្ជាក់លម្អិតថា យន្តហោះចម្បាំងរបស់ខ្លួនមិនមែនវាយប្រហារតែទៅលើក្រុមជីហាត នៃអង្គការរដ្ឋអ៊ីស្លាមមួយទេ ប៉ុន្តែ នឹងទម្លាក់គ្រាប់បែកផងដែរ ទៅលើអង្គការភេរវជនផ្សេងទៀត នៅស៊ីរី។
ចុះផ្សាយនៅថ្ងៃ៖
នៅថ្ងៃព្រហស្បតិ៍ នៅទន្ទឹមនឹងការទម្លាក់គ្រាប់បែករបស់យន្តហោះចម្បាំងរុស្ស៊ី កងទ័ពស៊ីរី ដែលអមកៀកស្មា ដោយទាហានអ៊ីរ៉ង់ និងកងកម្លាំងហេស្បូឡា បានបើកប្រតិបត្តិការផងដែរ នៅលើដី ភាគខាងជើង ស៊ីរី ក្នុងគោលដៅ វាយដណ្តើមយកវិញ ទឹកដី ដែលរដ្ឋាភិបាលស៊ីរី បានបាត់បង់ ធ្លាក់ទៅក្នុងដៃក្រុមអ៊ីស្លាម ដែលមានលាយចូលគ្នា តាំងពីក្រុមឧទ្ទាម ប្រឆាំងរដ្ឋាភិបាល និងក្រុមអាល់នូស្រា ដែលជាបណ្តាញរបស់អាល់កៃដា នៅស៊ីរី។
តាមប្រភពរបស់លីបង់ ទាហានអ៊ីរ៉ង់រាប់រយនាក់បានធ្វើដំណើរទៅដល់ស៊ីរី ជាមួយនឹងអាវុធរបស់ពួកគេ កាលពី១០ថ្ងៃ មុន ដើម្បី ចូលរួមប្រយុទ្ធក្នុងសមរភូមិ ជួយទាហានរដ្ឋាភិបាលស៊ីរី។ ទូរទស្សន៍លីបង់ អាល់ ម៉ាយ៉ាឌីន ដែលគាំទ្ររដ្ឋាភិបាល បាស្ហា អាល់អាសាដ បានផ្សាយថា នៅថ្ងៃព្រហស្បតិ៍ យន្តហោះចម្បាំងរុស្ស៊ី បានចេញទៅទម្លាក់គ្រាប់បែក លើទីតាំង របស់ក្រុមភេរវជន ៨កន្លែង នៅភាគខាងជើង ស៊ីរី ដែលក្នុងនោះ មាន៤កន្លែង ជាទីតាំងរបស់ក្រុមជីហាត អង្គការរដ្ឋអ៊ីស្លាម។ ក្រុមឧទ្ទាម លូឡា ស៊ូឃួ អាល់ ចាបាល់ ដែលជាសាខាមួយរបស់ទាហានស៊ីរី សេរី ដែលជាក្រុមប្រឆាំងរដ្ឋាភិបាល បាននិយាយប្រាប់ទូរទស្សន៍លីបង់មួយទៀត ដែលស្និទ្ធនឹងក្រុមប្រឆាំងស៊ីរីថា នៅថ្ងៃព្រហស្បតិ៍ យន្តហោះចម្បាំងរុស្ស៊ីបានបាញ់គ្រាប់មីស៊ីលជាង ២០គ្រាប់ទៅលើជំរំហ្វឹកហាត់របស់ក្រុមខ្លួន នៅក្នុងខេត្តអ៊ីដលីប។ ក្រុមឧទ្ទាមស៊ីរី ឈ្មោះ ចាបាល់ជាក្រុមធ្លាប់ទទួលការបណ្តុះបណ្តាល នៅប្រទេសកាតា និងអារ៉ាប៊ី សាអូឌីត ដោយក្រុមភ្នាក់ងារស៊ើបការណ៍សម្ងាត់អាមេរិកាំង CIA។ ព័ត៌មាននេះត្រូវបានបញ្ជាក់បន្ថែមពីលោកចន ម៉ៃខេន សមាជិកព្រឹទ្ធសភា អាមេរិក ទៅទូរទស្សន៍អាមេរិក CNN។
បន្ទាប់ពីមានការសង្ស័យពីអាមេរិក និងក្រុមប្រឆាំងស៊ីរី ទៅលើទីដៅវាយប្រហាររបស់រុស្ស៊ី នៅស៊ីរី ក្រេមឡាំង នៅល្ងាចថ្ងៃព្រហស្បតិ៍ បានបញ្ជាក់ថា គោលដៅវាយប្រហាររបស់ខ្លួន មានច្រើន គឺមិនថា ក្រុមជីហាត អង្គការរដ្ឋអ៊ីស្លាម និងក្រុមភេរវនិយម ដទៃទៀត ដែលគ្រោះថ្នាក់ដល់រដ្ឋាភិបាល ស៊ីរី ដែលជាសម្ព័ន្ធមិត្តរបស់ខ្លួន។ នៅល្ងាចថ្ងៃព្រហស្បតិ៍ដដែល មន្រ្តីយោធាអាមេរិក និងរុស្ស៊ី ត្រូវនិយាយ ដោះដូរព័ត៌មានយោធាគ្នា ដើម្បីជៀសវាង ឧប្បត្តិហេតុ បុកយន្តហោះ លើអាកាស ព្រោះថា ផ្ទៃមេឃរបស់ស៊ីរី ដែលមានដេដាស ដោយយន្តហោះចម្បាំងរបស់សម្ព័ន្ធអន្តរជាតិ ដែលដឹកនាំដោយអាមេរិក និងសម្ព័ន្ធអារ៉ាប់ រួចទៅហើយ នោះ ត្រូវទទួលបន្ថែមទៀត យន្តហោះចម្បាំង និងឧទ្ធម្ភាគចក្ររុស្ស៊ី ចំនួន៥០គ្រឿង នៅថ្ងៃព្រហស្បតិ៍៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ