យន្តហោះចម្បាំងរុស្ស៊ី បានផ្តើមវាយប្រហារ នៅស៊ីរី
តបនឹងសំណូមពររបស់លោក បាស្ហារ អាល់ អាសាដ ហើយ ក្រោយពីបានទទួល ភ្លើងខៀវ ពីរដ្ឋសភារុស្ស៊ី ម៉ូស្គូ បានប្រកាសអំពី ការចាប់ផ្តើមមែន នូវការវាយប្រហារពីអាកាស ទៅលើទីតាំង របស់ពួកក្រុមភេរវជន ជីហាត នៃអង្គការ”រដ្ឋអ៊ីស្លាម” ក្នុងប្រទេសស៊ីរី។ ការនេះ ត្រូវបានបញ្ជាក់ ល្ងាចថ្ងៃ ៣០កញ្ញា តាមទូរទស្សន៍ជាតិ ដោយលោកប្រធានាធិបតីរុស្ស៊ីផ្ទាល់។
ចុះផ្សាយនៅថ្ងៃ៖
ស្តាប់ - ០២:០៨
តាមប្រសាសន៍លោកពូទីន វិធីតែមួយគត់ សម្រាប់ប្រយុទ្ធឲ្យបានស័ក្តិសិទ្ធិ ទល់នឹង ភេរវនិយមអន្តរជាតិ នៅស៊ីរី ក៏ដូចជា នៅតាមដែនដីជិតខាង គឺសំពង ហើយ កំទេចពួកភេរវជន យ៉ាងទាន់ហន់ ជាមុន នៅតាមដែនដីណា ដែលស្ថិតនៅ ក្រោមការត្រួតត្រារបស់វា ដើម្បីកុំឲ្យវាអាចស្ទុះហក់ មកដល់ ប្រទេសយើង។
តាមក្រសួងការពារជាតិរុស្ស៊ី ក្នុង១ ថ្ងៃដំបូង កងអាកាសរុស្ស៊ី បានធ្វើការវាយប្រហារ ប្រមាណ ២០លើក ទៅលើ ទីតាំងពួកភេរវជននៃអង្គការ”រដ្ឋអ៊ីស្លាម” នៅលើដែនដីស៊ីរី ដោយបានកំទេច បរិក្ខារយោធា ឃ្លាំងស្តុកអាវុធ និងស្បៀង របស់ពួកនោះ។ ក្រសួងលម្អិតថា ការវាយប្រហារនោះ ឥតប៉ះពាល់ដល់សំណង់ ស៊ីវិល របស់អ្នកស្រុកឡើយ។
ប្រភពក្នុងស្ថាប័នសន្តិសុខស៊ីរី បានអះអាងថា “យន្តហោះរុស្ស៊ី និង ស៊ីរី បានធ្វើប្រតិបត្តិការ ជាច្រើនលើក ទៅលើទីតាំងពួកភេរវជន នៅ ក្បែរក្រុង Hama និង Homs ត្រង់ប៉ែកពាយ័ព្យ និង តំបន់កណ្តាលប្រទេស។ តំបន់ទាំងនេះ កាន់កាប់ ដោយរណសិរ្ស Al-Nosra ជាសាខាស៊ីរី របស់ អង្គការភេរវនិយមអន្តរជាតិ Al-Qaeda និងដោយពួកឧទ្ទាមអ៊ីស្លាម មិនមែនកាន់កាប់ ដោយ ពួកជីហាដ នៃអង្គការរដ្ឋអ៊ីស្លាម” ឡើយ។
ការវាយប្រហារនៃយន្តហោះរុស្ស៊ី បានប៉ះពាល់ ជាពិសេសដល់ក្រុង Rastane និងTalbissé ស្ថិតក្នុងខេត្ត Homs។ ទូរទស្សន៍ផ្លូវការស៊ីរី បន្ទាប់មកបានបញ្ជាក់ថា ការទំលាក់គ្រាប់បែក នៃ យន្តហោះរុស្ស៊ី បានប្រព្រឹត្តទៅ ក្នុងខេត្តពីរ ហើយ ពិតជាទៅលើទីតាំងនៃ អង្គការ”រដ្ឋអ៊ីស្លាម” តែម្តង។
ចំណែក លោករដ្ឋមន្ត្រីការពារជាតិបារាំង Jean-Yves Le Drian ដោយឆ្លើយក្នុងរដ្ឋសភាបារាំង ថ្លែងថា កងអាកាសរុស្ស៊ី បានចាប់ផ្តើមវាយប្រហារមែន ប៉ុន្តែ គួរឲ្យឆ្ងល់ មិនមែនទៅចំលើ ទីដៅរបស់អង្គការ “រដ្ឋអ៊ីស្លាម” ឯណា។ ក្នុងរឿងនេះ បើតាមយោបល់ ប្រមុខការទូតបារាំង គប្បីផ្ទៀងផ្ទាត់មើលសិន តើទីដៅណាទៅ ដែលគ្រាប់បែកយន្តហោះរុស្ស៊ី បានធ្លាក់ទៅ ចំ?
រីឯ ក្រសួងការបរទេសអាមេរិក អះអាងថា ការវាយប្រហារនៃកងអាកាសរុស្ស៊ី ទៅលើស៊ីរី មិននាំ ឲ្យប្រែប្រួលឡើយ ដល់ បេសកកម្ម ដែលស.រ.អា. និង សម្ព័ន្ធអន្តរជាតិ ប្រឆាំងអង្គការ ”រដ្ឋអ៊ីស្លាម” កំពុងបំពេញ នៅទីនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ