ប្រតិបត្តិការផ្លូវអាកាសលើស៊ីរីរបស់កងទ័ពរុស្ស៊ី កំពុងតែធ្វើឲ្យអាមេរិកព្រួយបារម្ភ
នៅមិនប៉ុន្មានម៉ោងក្រោយ ប្រតិបត្តិការទម្លាក់គ្រាប់បែករបស់កងទ័ពរុស្ស៊ី នៅស៊ីរី ភាពមន្ទិលសង្ស័យ បានកើតមានឡើង កាន់តែខ្លាំងឡើងៗ ទាក់ទិនទៅនឹងចេតនាពិតប្រាដក របស់រុស្ស៊ី ពោលគឺថាការដែលរុស្ស៊ីធ្វើការទម្លាក់គ្រាប់បែកនៅស៊ីរី គឺដើម្បីកម្ទេចក្រុមជីហាដអ៊ីស្លាម រឺមួយក៏ដើម្បីជួយពង្រឹងកម្លាំង របស់កងទ័ពរដ្ឋាភិបាលស៊ីរី ឲ្យតទល់ជាមួយនឹងក្រុមឧទ្ទាមប្រឆាំង។ នៅថ្ងៃព្រហស្បតិ៍នេះ រដ្ឋមន្ត្រីការបរទេសអាមេរិក និងរុស្ស៊ី បានប្រកាសរួមគ្នា ថាថ្នាក់ដឹកនាំកងទ័ពទាំងពីរប្រទេស នឹងជួបគ្នាបន្ទាន់ ដើម្បីនិយាយគ្នាឲ្យច្បាស់លាស់ ដើម្បីចៀសវាង ការប៉ះទង្គិចណាមួយ រវាងយន្តហោះទម្លាក់គ្រាប់បែក របស់មហាអំណាចទាំងពីរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៧:២៧
គ្រប់គ្នា ខ្លាចចាញ់បោករុស្សី និងបាស្ឆា អាល់អាសាដ៖
ដើម្បីយល់ ពីបញ្ហានេះ យើងត្រូវយល់ជាចាំបាច់ នូវបរិបទទូរទៅ នៃសមរភូមិសង្រ្គាមនៅស៊ីរី ហើយនិងដំណើរដើមទង ដែលឈានទៅដល់អន្តរាគមន៍របស់កងទ័ពរុស្ស៊ីនាពេលនេះ។ នៅស៊ីរី មិនមែនមានតែក្រុមជីហាដអង្គការរដ្ឋអ៊ីស្លាមតែមួយទេ ដែលធ្វើការប្រយុទ្ធ។ បើសរុបជារួមទៅ គឺមានបីក្រុម ដែលកំពុងតែវ៉ាយគ្នា ទៅវិញទៅមក។ ទីមួយគឺទាហានរដ្ឋាភិបាលស៊ីរី ដែលដឹកនាំដោយប្រធានាធិបតី បាស្ឆា អាល់អាសាដ។ ទីពីរគឺក្រុមឧទ្ទាមប្រឆាំងនឹងរដ្ឋាភិបាល ដែលក្រុមនេះទៀតសោត មានច្រើនក្រុមតូចៗ ផ្សេងគ្នាទៀត។ ហើយចុងក្រោយ គឺក្រុម ជីហាដអង្គការរដ្ឋអ៊ីស្លាម ដែលជាក្រុមដ៏សាហាវព្រៃផ្សៃ។
តាំងពីណា ពីណីមក រុស្ស៊ីគឺជាសម្ព័ន្ធមិត្ត ជាមួយនឹងរដ្ឋាភិបាលរបស់លោក បាស្ឆាអាល់ អាសាដ។ ជាច្រើនខែមកហើយ ដែលរុស្ស៊ីបញ្ជូនសព្វាវុធ និងជំនួយជាច្រើន ទៅឲ្យទាហានរដ្ឋាភិបាលស៊ីរី។ កម្មវត្ថុរបស់ទាហានរដ្ឋាភិបាលស៊ីរី គឺវាយបង្រ្កាបក្រុមជីហាដផង និងវាយក្រុមឧទ្ទាមប្រឆាំង ដែលទាមទារឲ្យបាស្ឆា អាល់អាសាដ ចុះចេញពីដំណែង ផងដែរ។ ត្រង់ចំណុចនេះ ហើយដែលធ្វើឲ្យគេមិនទុកចិត្ត ថាតើរុស្ស៊ី ដែលបានធ្វើការវាយប្រហារតាមផ្លូវអាកាស នេះ គឺគេវាយក្រុមជីហាដ រឺមួយក៏ជួយរដ្ឋាភិបាលស៊ីរី ទៅវាយក្រុមឧទ្ទាមប្រឆាំង។ ព្រោះថា មហាអំណាចនៅអឺរ៉ុប មានបារាំង អង់គ្លេស និងសហរដ្ឋអាមេរិក គេគាំទ្រខាងក្រុមឧទ្ទាមប្រឆាំង ដែលពួកគេខំតស៊ូរើបំរះ ដើម្បីរំលាយរដ្ឋាភិបាលផ្តាច់ការ របស់បាស្ឆាអាល់អាសាដ។
ប៉ុន្តែជាមួយនឹងកាលៈទេសៈអាសន្នបែបនេះ បារាំង និងអាមេរិក ហាក់បន្ទន់ឥរិយបទបន្តិចវិញ ដោយមិនទាមទារឲ្យបាស្ឆា អាល់អាសាដ ចុះចេញពីតំណែងភ្លាមទេ។ ប៉ុន្តែត្រូវតែចរចាគ្នា បញ្ចប់អាណត្តិរបស់ប្រធានាធិបតីផ្តាច់ការនេះ ដោយសន្តិវិធី នៅពេលខាងមុខ។ ដូចយើងបានដឹងហើយថា កាលពីថ្ងៃចន្ទ លោកអូបាម៉ា បានធ្មេចភ្នែក ព្រមទទួលការចូលរួមរបស់រុស្ស៊ី នៅក្នុងសមរភូមិស៊ីរី ក៏បន្តែទន្ទឹមនឹងនេះ ភាពមិនច្បាស់លាស់ នៅតែមានអញ្ចឹង ព្រោះថា រុស្ស៊ីទៅនេះ គឺដូចជាទៅការពាររដ្ឋាភិបាលបាស្ឆា អាល់អាសាដ បើទោះបីជាលោកពូទីន អះអាងហើយ អះអាងទៀតក៏ដោយថា រុស្ស៊ីទៅវាយនៅស៊ីរី គឺដើម្បីកម្ទេចក្រុមជីហាដ។
អាមេរិកនិងរុស្ស៊ីជួបនិយាយគ្នាបន្ទាន់ ដើម្បីចៀសវាងការប៉ះទង្គិចគ្នា៖
កិច្ចប្រជុំបន្ទាន់រវាង ថ្នាក់ដឹកនំាកងទ័ពអាមេរិក និងកងទ័ពរុស្ស៊ី នឹងធ្វើឡើងជាបន្ទាន់ ដើម្បីបំភ្លឺរាល់បញ្ហាទាំងឡាយណា ដែលនៅមិនទាន់ច្បាស់ប្រាកដ។ លោក ចន ឃែរី បានមានប្រសាសន៍ថា វាជាការចាំបាច់ ដែលត្រូវតែជួបនិយាយគ្នា ដើម្បីចៀសវាង ការប៉ះទង្គិចណាមួយ រវាងយន្តហោះចម្បាំងរបស់កងទ័ពទាំងពីរ ដែលកំពុងតែធ្វើប្រតិបត្តិការនៅ សមរភូមិស៊ីរី ដូចគ្នា។ ចៀសវាង ការប៉ះទង្គិចគ្នា ជារឿងមួយហើយ តែរឿងដែលសំខាន់មួយទៀត គឺអាមេរិកចង់ដឹងពីមាត់ថ្នាក់ដឹកនាំកងទ័ពរុស្ស៊ី ឲ្យពិតប្រាកដថា រុស្ស៊ីទៅទម្លាក់គ្រាំបែកនៅស៊ីរីនឹង ទម្លាក់របៀបម៉េច? ទម្លាក់លើអ្នកណា? ហើយនៅត្រង់ទីតាំងត្រង់ណាខ្លះ?
ទាំងអាមេរិក ទាំងបារាំង អត់មានអ្នកណាសប្បាយចិត្តទេ បើយើងនិយាយដោយងាយ គឺដោយសារថា គេមិនចង់ឃើញរុស្ស៊ីចេញមុខចេញមាត់ ដោះស្រាយវិបត្តិអន្តរជាតិ។ ក៏ប៉ុន្តែអ្វីដែលបារាំង និងអាមេរិក មិនសប្បាយចិត្តគឺ ថាគេមិនទុកចិត្តរុស្ស៊ីទាល់តែសោះ ទាក់ទិនទៅនឹងគោលជំហរការពារលោកបាស្ឆា អាល់អាសាដ។ គេក្រែងថា រុស្ស៊ីប្រើ ព្រួញមួយ បាញ់យកសត្វពីរ គឺយកលេស ទម្លាក់គ្រាប់បែក លើក្រុមជីហាដ តែការពិត គឺបន្លំទម្លាក់ទៅលើក្រុមឧទ្ទាម ដើម្បីឲ្យទាហានរដ្ឋាភិបាលរបស់បាស្ឆា អាល់អាសាដ ដណ្តើមកាន់កាប់អំណាចឡើងវិញ។
លោក ឡូរ៉ង់ ហ្វាប្យ៊ូស រដ្ឋមន្ត្រីការបរទេសបារាំង បានអះអាងនៅថ្ងៃនេះថា តាមព័ត៌មានជាច្រើនបញ្ជាក់ថា ការទម្លាក់គ្រាប់បែករបស់រុស៊្សីកាលពីយប់ថ្ងៃពុធ មិនបានធ្វើទៅលើក្រុមជីហាដអង្គការរដ្ឋអ៊ីស្លាមទេ។ ចំណែកលោក អាហ្សតុន ការទឺ រដ្ឋមន្ត្រីការពារជាតិអាមេរិក ក៏បានថ្លែង ដាក់ការសង្ស័យដែរថា តាមប្រភពព័ត៌មាន រុស្ស៊ីទំនងដូចជាមិនបានកំណត់គោលដៅវាយប្រហារ ទៅលើក្រុមជីហាដរដ្ឋអ៊ីស្លាមទេ។
រុស្ស៊ីទម្លាក់គ្រាប់បែកនៅភាគពាយ័ព្យស៊ីរី ដែលមិនមានជាទីតាំងរបស់ក្រុមជីហាដរដ្ឋអ៊ីស្លាម៖
ព័ត៌មានច្បាស់ការ១០០% យើងនៅមិនទាន់ទទួលបាននៅឡើយទេ។ ក៏ប៉ុន្តែតាមប្រភពជាច្រើន ដែលកំពុងតែលេចចេញមក គឺថា តាមមើលទៅ ប្រហែលជាការពិត ដែលថារុស្ស៊ីបានទម្លាក់គ្រាប់បែក ទៅលើមូលដ្ឋានរបស់ក្រុមឧទ្ទាម ប្រឆាំងរដ្ឋាភិបាល ហើយមិនបានទម្លាក់ទៅលើក្រុមជីហាដអ៊ីស្លាម ដូចដែលបានប្រកាសទេ។
តាមការប្រកាសឲ្យដឹង ពីកងទ័ពរុស្ស៊ីបានបញ្ជាក់ថា នៅយប់ថ្ងៃពុធ រុស្ស៊ីបានចេញយន្តហោះ ចំនួន២០ជើង ហើយទម្លាក់គ្រាប់ទៅលើទីតាំងចំនួន ៨កន្លែង ដែលសុទ្ធជាមូលដ្ឋានរបស់ក្រុមជីហាដ។ ប៉ុន្តែបើតាមការផ្សាយរបស់ទូរទស្សន៍ស៊ីរី ហើយនឹងប្រភពព័ត៌មានផ្លូវការរបស់កងទ័ពស៊ីរី បានបញ្ជាក់ថា កងទ័ពរុស្ស៊ី បានទម្លាក់គ្រាប់បែក នៅលើខេត្តពីរ គឺខេត្តហាម៉ា និងខេត្តហូម។ នរណាក៏ដឹងដែរថា ខេត្តទាំងពីរនេះ ជាតំបន់ដែលមិនមានក្រុមជីហាដអង្គការរដ្ឋអ៊ីស្លាមទេ តែជាសមរភូមិរបស់ក្រុមឧទ្ទាម ប្រឆាំងរដ្ឋាភិបាល។ អញ្ចឹងហើយបានជាគេមិនទុកចិត្តរុស្ស៊ី ព្រោះថាកន្លែងមួយគំនរ ដែលជាមូលដ្ឋានក្រុមជីហាដ មិនទៅទម្លាក់ បែរជាមកទម្លាក់ លើក្រុមឧទ្ទាមប្រឆាំង រដ្ឋាភិបាលទៅវិញ។
កាសែតញូយ៉កថាមស៍ ក៏បានចុះផ្សាយផងដែរថា ដោយយោងពីប្រភពមន្ត្រីការពារជាតិអាមេរិកធំៗ ក្រុមឧទ្ទាមប្រឆាំងរដ្ឋាភិបាលស៊ីរី ដែលអាមេរិកគាំទ្រ ត្រូវបានទាហានអាកាសរុស្ស៊ី ទម្លាក់គ្រាប់បែកពីលើ។ ហើយចំណែកលោក ខាលីដ ខូចា មេដឹកនាំនយោបាយខាងក្រុមប្រឆាំង នឹងរដ្ឋាភិបាលស៊ីរី បានបញ្ជាក់ថា នៅតំបន់ហូម មានប្រជាជនស្លូតត្រង់៣៦នាក់ យ៉ាងហោចណាស់ ដែលស្លាប់ ដោយសារគ្រាប់បែករុស្ស៊ី។ ឯចំណែក ទូរទស្សន៍លីបង់ក៏បានផ្សាយផងដែរថា រុស្ស៊ីបានទម្លាក់គ្រាប់បែក នៅតំបន់ខេត្តភាគពាយ័ព្យស៊ីរី ដែលតំបន់ទាំងនោះ មិនមែនជាមូលដ្ឋានរបស់ក្រុមជីហាដអ៊ីស្លាមទេ។
សែកហ្គៃ ឡារ៉ូហ្វ៖ រុស្ស៊ីទម្លាក់គ្រាប់បែកលើក្រុមភេរវកម្ម ទៅតាមការចង្អុលបង្ហាញ របស់រដ្ឋាភិបាលស៊ីរី
ឆ្លើយតបនឹងការចោទប្រកាន់នេះ រុស្ស៊ីគេឆ្លើយមកវិញ បើមិនដឹងកុំចេះតែថា កុំចេះតែចោទគេដោយគ្មានភស្តុតាងច្បាស់លាស់។ លោក សែកហ្គៃ ឡារូហ្វ ប្រមុខការទូតរុស្ស៊ី បានបញ្ជាក់ នៅថ្ងៃព្រហស្បតិ៍នេះថា កងទ័ពរុស្ស៊ី បានទម្លាក់គ្រាប់បែក យ៉ាងត្រឹមត្រូវបំផុត ទៅលើទីតាំងក្រុមភេរវកម្មនៅស៊ីរី ដែលមានតារាងរាយឈ្មោះច្បាស់លាស់ និងជាពិសេស គឺមានការសហការផ្លាស់ប្តូរព័ត៌មានគ្នាទៅវិញទៅមក ជាមួយនឹង កងទ័ពរដ្ឋាភិបាលស៊ីរី។
យើងមិនដឹងថាមានក្រុមណាខ្លះទេ ដែលមានឈ្មោះ នៅក្នុងតារាងបញ្ជីឈ្មោះក្រុមភេរវកម្មនេះ។ តែបើលោករដ្ឋមន្ត្រីការបរទេសរុស្ស៊ីថា គេសហការគ្នាស្អិតរមួត ជាមួយកងទ័ពរដ្ឋាភិបាលស៊ីរី ទៅហើយ អញ្ចឹងមានន័យថា តារាងបញ្ជីឈ្មោះនេះ ជារបស់រដ្ឋាភិបាលស៊ិរី។ ដូច្នេះ វាច្បាស់ណាស់ ដែលថាក្នុងនោះ ពិតជាមានឈ្មោះក្រុមឧទ្ទាមប្រឆាំងរដ្ឋាភិបាល ហើយការទម្លាក់គ្រាប់ កាលពីថ្ងៃពុធ គឺពិតជាបានធ្វើទៅលើមូលដ្ឋាន តំបន់របស់ក្រុមឧទ្ទាម មិនមែនទៅលើក្រុមជីហាដអ៊ីស្លាមទេ។
ពេលនេះ គ្រប់គ្នាកំពុងតែចាំស្តាប់លទ្ធផលប្រជុំ រវាងកងទ័ព អាមេរិក និងរុស្ស៊ី។ យើងចង់ដឹងថា រុស្ស៊ី មានសេចក្តីក្លាហាន ហ៊ានទទួលស្គាល់ការពិតដែររឺទេ? ហើយថាតើ ភាគីអាមេរិក នឹងមានគោលជំហរបែបណា ទៅវិញ បើសិនជារុស្ស៊ី ពិតជាបានទម្លាក់គ្រាប់ទៅលើក្រុមឧទ្ទាមពិតមែន? ពាក្យខ្មែរយើងថា គ្នាច្រើន អន្សមខ្លោច។ អ្នកទៅជួយពន្លត់ភ្លើងសង្រ្គាមនៅស៊ីរី មានច្រើន តែម្នាក់ៗ អាឡៃតែប្រកែកគ្នា ម្នាក់ថាកុំធ្វើអញ្ចេះ ម្នាក់ថាត្រូវធ្វើអញ្ចោះវិញ ដល់ទីបំផុត អ្នកដែលឈ្នះ គឺក្រុមជីហាដអង្គការរដ្ឋអ៊ីស្លាមដដែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ