ឃាតកម្មផ្ទួនៗនៅអ៊ុយក្រែនទៅលើអ្នកនយោបាយគាំទ្ររុស្ស៊ី
នៅក្នុងសប្តាហ៍នេះ នៅប្រទេសអ៊ុយក្រែនបរិយាកាសនយោបាយ មានភាពតានតឹងជាខ្លាំង ដោយសារតែមានឃាតកម្មពីរផ្ទួនៗគ្នា ដែលបានធ្វើទៅលើអ្នកកាសែតម្នាក់ ដែលគេស្គាល់ថា ជាអ្នកគាំទ្រ ចេញមុខចេញមាត់ លើនយោបាយពង្រីកឥទ្ធិពលរបស់រុស្ស៊ី ហើយម្នាក់ទៀតគឺជា អតីតអ្នកតំណាងរាស្រ្ត ស្និតជាមួយលោកអតីតប្រធានាធិបតី យ៉ាណូកូវិឆ ដូចគ្នាដែរ គឺសុទ្ធសឹងជាមនុស្សដែលស្រលាញ់គាំទ្ររុស្ស៊ី។ ឃាតកម្មទាំងនេះ ត្រូវបានគេមើលឃើញថា ជាឃាតកម្មនយោបាយ ដែលមានទិសដៅ បង្កអស្ថិរភាពនយោបាយនៅអ៊ុយក្រែន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៩
ថ្ងៃព្រហស្បតិ៍ទី ១៦ មេសា អ្នកកាសែត ជនជាតិអ៊ុយក្រែនម្នាក់ឈ្មោះ អូលេស ប៊ូហ្ស៊ីណា ត្រូវបានជនមិនស្គាល់មុខពីរនាក់ បាញ់សម្លាប់ទាំងកណ្តាលថ្ងៃត្រង់ នៅក្បែរផ្ទះ ក្នុងទីក្រុងគាវ រដ្ឋធានីអ៊ុយក្រែន។ អ្នកកាសែតរូបនេះ ត្រូវបានគេស្គាល់ថាជាអ្នកកាសែត ដែលធ្លាប់បានសរសេរអត្ថបទ គាំទ្រយ៉ាងពេញទំហឹង ទៅលើការបង្រួបបង្រួមអ៊ុយក្រែន ជាមួយនឹងរុស្ស៊ី។
អូលេស ប៊ូហ្ស៊ីណា ធ្លាប់ជាអ្នកសរសេរគាំទ្រគោលនយោបាយរុស្ស៊ីនិយម របស់លោកអតីតប្រធានាធិបតីអ៊ុយក្រែន យ៉ាណូកូវិឆ ហើយធ្លាប់បានប្រកាសថា ចង់ឲ្យបង្កើតអាណាចក្ររុស្ស៊ី។ ក្រៅពីសរសេរអត្ថបទ រិះគន់ចលនាបដិវត្តន៍ម៉ៃដាន់ អ្នកកាសែតរូបនេះ ធ្លាប់បានឈរឈ្មោះជាបេក្ខជន ក្នុងការបោះឆ្នោតនៅអ៊ុយក្រែនផងដែរ ប៉ុន្តែមិនបានជោគជ័យនោះទេ។
មុនឃាតកម្មនេះ មួយថ្ងៃ មានករណី ស្លាប់ អតីតអ្នកតំណាងរាស្ត្រម្នាក់ទៀតផងដែរ។ អតីតអ្នកតំណាងរាស្ត្រនោះ ត្រូវបានគេស្គាល់ថា ជាអ្នកស្និតជាមួយលោកអតីតប្រធានាធិតបតី រណបរុស្ស៊ី យ៉ាណូកូវិឆ ហើយបើតាមការសង្ស័យ អ្នកតំណាងរាស្ត្រនេះឯង ដែលបានបញ្ជាឲ្យមាន ការបង្រ្កាបដោយហឹង្សា នៅទីលាន ម៉ៃដាន់ កាលពីឆ្នាំ ២០១៤។ ទោះបីជាយ៉ាងណា នគរបាលអ៊ុយក្រែន បានចាត់ទុកករណីនេះ ជាការធ្វើអត្តឃាត។
អ៊ុយក្រែនបានដាក់ការសង្ស័យថានេះប្រាកដជាទង្វើរបស់រុស្ស៊ី ដែលចង់បង្កអស្ថិរភាព នយោបាយនៅអ៊ុយក្រែន ចំនែករុស្ស៊ីវិញ បានចោទទៅលើក្រុមអ្នកជាតិនិយមអ៊ុយក្រែន ដែលមានចេតនា ទម្លាក់កំហុសលើរុស្ស៊ី មិនខុសពី ស្វាស៊ីបាយលាបមាត់ពពែ។ លោកប្រធានាធិបតីរុស្ស៊ី បានថ្លែងក្នុងសន្និសីទកាសែត កាលពីថ្ងៃព្រហស្បតិ៍ ម្សិលមិញ ថា ឃាតកម្មទាំងអស់នេះ សុទ្ធសឹងជាឃាតកម្មនយោបាយ ដែលអ៊ុយក្រែន ដែលរដ្ឋាភិបាលអ៊ុយក្រែន ត្រូវតែទទួលខុសត្រូវ។ លោកពូទីន បានទាំងនិយាយចំអកថា អ៊ុយក្រែនសុទ្ធតែអ៊ួតខ្លួន ថាជាប្រទេសប្រជាធិបតេយ្យ ដូចប្រទេសក្នុងសហភាពអឺរ៉ុបផ្សេងទៀត ប៉ុន្តែធាតុពិត អ៊ុយក្រែនគ្មានទាំងសមត្ថភាព វែករកមុខឃាតករឃើញផង។
ស្ថិតក្នុងកាលៈទេសៈនេះ បរិយាកាសនយោបាយរវាង អ៊ុយក្រែន និងរុស្ស៊ីកាន់តែខ្មៅងងឹតថែមទៀត។ អាចមានមូលហេតុច្រើន ដែលនៅពីក្រោយឃាតកម្មទាំងនេះ ដូចជាករណីចង់សម្លាប់បំបិតមាត់ ពីសំណាក់ក្រុមអ្នកគាំទ្ររុស្ស៊ី ហើយឆ្លៀតឱកាសនេះ ចោទទៅលើរដ្ឋាភិបាលអ៊ុយក្រែន និងក្រុមអ្នកជាតិនិយម។
ដោយឡែក កងទាហានឆ័ត្រយោងអាមេរិក ៣០០នាក់ បានទៅដល់អ៊ុយក្រែនហើយ នៅថ្ងៃសុក្រ ទី ១៧ មេសានេះ ដើម្បីទៅជួយបង្វឹក កងសេនាការពារជាតិអ៊ុយក្រែន។ រុស្ស៊ីមើលឃើញថានេះ គឺជាអាកប្បកិរិយាអុចអាលរបស់អាមេរិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ