ភាគីជម្លោះអ៊ុយក្រែនប្រកាសដករថក្រោះចេញពីខ្សែត្រៀម
កងទ័ពជាតិអ៊ុយក្រែន និងក្រុមឧទ្ទាមផ្តាច់ទឹកដី សុទ្ធតែបាននាំគ្នាប្រកាស នៅថ្ងៃសៅរ៍ថា ពួកគេបានចាប់ផ្តើមដកកងរថក្រោះចេញពីតំបន់ជម្លោះ នៅខាងកើតប្រទេសអ៊ុយក្រែន ទៅតាមអ្វីដែលបានព្រមព្រៀងគ្នា។ ក៏ប៉ុន្តែ បើទោះបីជាមានការដកគ្រឿងសព្វាវុធធុនធ្ងន់បែបនេះក៏ដោយ ដំណើរឆ្ពោះទៅរកសន្តិភាពពេញលេញនៅខាងកើតអ៊ុយក្រែន នៅសល់វែងឆ្ងាយតទៅទៀត។
ចុះផ្សាយនៅថ្ងៃ៖
ស្តាប់ - ០២:០៣
ការប្រកាសដករថក្រោះចេញពីតំបន់ជម្លោះ ត្រូវបានធ្វើឡើង តែមួយថ្ងៃប៉ុណ្ណោះ ក្រោយពីមានជំនួបកំពូល នៅក្នុងទីក្រុងប៉ារីស រវាងប្រមុខដឹកនាំបារាំង អាល្លឺម៉ង់ រុស្ស៊ី និងអ៊ុយក្រែន។ ក៏ប៉ុន្តែ រហូតមកទល់នឹងពេលនេះ គេនៅទាន់អាចបញ្ជាក់ឲ្យបានច្បាស់លាស់នៅឡើយទេថា តើភាគីជម្លោះទាំងពីរពិតជាបានអនុវត្តតាមការប្រកាសរបស់ខ្លួនបានយ៉ាងពេញលេញដែរឬក៏យ៉ាងណា។
គួររំឭកឡើងវិញថា កាលពីពេលកន្លងមក ការដកគ្រឿងសព្វាវុធធុនធ្ងន់ចេញពីខ្សែត្រៀមប្រយុទ្ធ ដែលភាគីជម្លោះបានព្រមព្រៀងគ្នា និងបានប្រកាសរៀងៗខ្លួនថានឹងធ្វើតាមនោះ មិនដែលត្រូវបានអនុវត្តយ៉ាងពេញលេញនោះទេ ហើយការវាយប្រយុទ្ធគ្នាដោយប្រើអាវុធធុនធ្ងន់ នៅតែបន្តកើតមានឡើងជារឿយៗ។
ការដករថក្រោះ និងកាំភ្លើងផ្លោងធុនស្រាល ទាបជាង ១០០មីលីម៉ែត្រ ឲ្យចេញមកនៅចម្ងាយយ៉ាងតិច ១៥គីឡូម៉ែត្រពីខ្សែត្រៀម ត្រូវបានភាគីជម្លោះអ៊ុយក្រែនព្រមព្រៀងគ្នា កាលពីដើមសប្តាហ៍ ក្នុងគោលដៅបង្ហាញពីសុឆន្ទៈ ដើម្បីបើកផ្លូវឲ្យមានបទឈប់បាញ់ពេញលេញ ស្របទៅតាមកិច្ចព្រមព្រៀងឈប់បាញ់ ដែលបានចុះ នៅទីក្រុងមីនស្ក៍ ប្រទេសបេឡារុស្ស៊ី កាលពីខែកុម្ភៈកន្លងទៅ។ ក៏ប៉ុន្តែ រហូតមកទល់នឹងពេលនេះ គេដឹងរួចទៅហើយថា កិច្ចព្រមព្រៀងទីក្រុងមីនស្ក៍នេះ នឹងមិនអាចអនុវត្តបានពេញលេញ ទៅតាមការគ្រោងទុកនោះទេ។
នៅក្រោយជំនួបកំពូល រវាងប្រមុខដឹកនាំបារាំង អាល្លឺម៉ង់ រុស្ស៊ី និងអ៊ុយក្រែន កាលពីថ្ងៃសុក្រ លោកហ្វ្រង់ស័រ ហូឡង់ បានប្រកាសឲ្យដឹងថា ការបោះឆ្នោតនៅក្នុងតំបន់ខាងកើតអ៊ុយក្រែន នឹងមិនអាចរៀបចំធ្វើទៅបាន នៅក្នុងឆ្នាំ២០១៥ ដូចដែលបានកំណត់នៅក្នុងកិច្ចព្រមព្រៀងទីក្រុងមីនស្ក៍។
ចំណុចដ៏សំខាន់មួយទៀត គឺការផ្ទេរការគ្រប់គ្រងព្រំដែនអ៊ុយក្រែន-រុស្ស៊ី ទៅឲ្យអាជ្ញាធរក្រុងគៀវ ដែលមានចែងនៅក្នុងកិច្ចព្រមព្រៀងទីក្រុងមីនស្ក៍ដែរនោះ ក៏មិនត្រូវបានគេកំណត់កាលបរិច្ឆេទនៃការអនុវត្តឲ្យបានច្បាស់លាស់នោះដែរ។ ខ្សែបន្ទាត់ព្រំដែន ចម្ងាយប្រមាណជា ៤០០គីឡូម៉ែត្រ ដែលអាជ្ញាធរអ៊ុយក្រែន និងបណ្តាប្រទេសលោកខាងលិចអះអាងថា ជាច្រកឆ្លងកាត់ដ៏សំខាន់ ដែលរុស្ស៊ីប្រើ ដើម្បីបញ្ជូនគ្រឿងសព្វាវុធ និងទាហានឲ្យចូលទៅជួយក្រុមឧទ្ទាមផ្តាច់ទឹកដី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ