លោកចន ឃ៊ែរី៖រុស្ស៊ីត្រូវតែប្តូរផ្ទាំងស៊ីបនៃការវាយប្រហារផ្លូវអាកាសនៅស៊ីរី
សង្រ្គាមពាក្យសម្តីកំពុងបន្តមានយ៉ាងផុសផុលរវាងអាមេរិក និងរុស្ស៊ីទាក់ទងនឹងសំណុំរឿងស៊ីរី។ នៅថ្ងៃសៅរិ៍ ទី១៣ កុម្ភៈ លោកប្រមុខការទូតអាមេរិកចន ឃ៊ែរីបានថ្លែងថា ប្រតិបត្តិការយោធាផ្លូវអាកាសរបស់រុស្ស៊ីនៅស៊ីរីត្រូវតែផ្លាស់ប្តូរផ្ទាំងស៊ីបរបស់ខ្លួន។ លោកឃ៊ែរីបានថ្លែងយ៉ាងនេះនៅក្នុងសន្និសីទស្តីពីសន្តិសុខរៀបចំក្នុងទីក្រុងមុយនិច ប្រទេសអាល្លឺម៉ង់។ អ្វីដែលលោកឃ៊ែរីចង់និយាយ គឺស្នើឲ្យរុស្ស៊ីប្តូរពីការវាយប្រហារលើក្រុមប្រឆាំងស៊ីរីស្របច្បាប់ទៅលើពួកជីហាតអង្គការរដ្ឋអ៊ីស្លាមវិញ។ ការថ្លែងរបស់ប្រមុខការទូតអាមេរិកពេលនេះបានធ្វើឡើង ក្រោយពីវ៉ាស៊ីនតោន និងមូស្គូបានព្រមព្រៀងឲ្យមានបទឈប់បាញ់នៅស៊ីរី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៩
« នៅថ្ងៃនេះ អ្វីដែលយើងបានដឹងនោះគឺថា ការវាយប្រហារផ្លូវអាកាសរបស់ទ័ពរុស្ស៊ីលើទឹកដីស៊ីរីភាគច្រើនបានសំដៅលើក្រុមប្រឆាំងស៊ីរីស្របច្បាប់។ ដូច្នេះ និងដើម្បីអាចភ្ជាប់ខ្លួនទៅនឹងកិច្ចព្រមព្រៀងឈប់បាញ់ដែលរុស្ស៊ីបានយល់ព្រមនោះ វាចាំបាច់ដែលរុស្ស៊ីត្រូវតែផ្លាស់ប្តូរផ្ទាំងស៊ីបវាយប្រហាររបស់ខ្លួន។
គ្រប់ភាគីទាំងអស់ដែលមានវត្តមាននៅទីនេះ រួមទាំងភាគីរុស្ស៊ីផង យើងទាំងអស់គ្នាបានយល់ព្រមដើម្បីឈានទៅដល់គោលដៅ។
អនុញ្ញាតឲ្យខ្ញុំបំភ្លឺឲ្យបានច្បាស់នៅត្រង់ចំណុចនេះបន្តិច លោករដ្ឋមន្រ្តីក្រសួងការបរទេសរុស្ស៊ី Lavrov បាននិយាយថា យើងត្រូវការធ្វើការងាររួមគ្នាដូចជាក្រុមមួយដើម្បីកំណត់ឲ្យបានច្បាស់ថា តើនរណាដែលត្រូវវាយប្រហារ និងនរណាដែលមិនត្រូវវាយប្រហារ និងថា តើនរណាដែលត្រូវចាត់ទុកជាភេរវនិយម និងនរណាដែលមិនត្រូវចាត់ទុកជាភេរវនិយម។
ដើម្បីអាចឈានទៅសម្រេចឲ្យបាននូវបទឈប់បាញ់បាន គឺគ្មានដំណោះស្រាយអ្វីផ្សេងក្រៅពីការចូលអង្គុយតុចរចា និងធ្វើការងាររួមគ្នាទេ។ នៅក្នុងកិច្ចចរចានោះ គេត្រូវតែលើកយកគ្រប់ប្រធានបទទៅជជែក មិនថាជាប្រធានបទនយោបាយ មនុស្សធម៌ ឬមួយក៏ប្រធានបទយោធាទេ »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ