ឈប់បាញ់បណ្តោះអាសន្ននៅស៊ីរី ក្នុងរយៈពេល៧ថ្ងៃទៀត
ការចរចាដើម្បីស្វែងរកកិច្ចឈប់បាញ់នៅស៊ីរី ដែលបានប្រព្រឹត្តិទៅនៅទីក្រុងមុយនិច កាលពីថ្ងៃព្រហស្បតិ៍ម្សិលមិញ បានបិទបញ្ចប់ទៅហើយ ដោយឆ្លងកាត់ការពិភាក្សាយ៉ាងតានតឹងជាច្រើនម៉ោង ភាគីសំខាន់ មានអាមេរិក និងរុស្ស៊ី បានសុខចិត្តឲ្យមានការដាក់អាវុធឈប់បាញ់គ្នា នៅរវាង៧ថ្ងៃទៀត នៅទូទាំងស៊ីរី។ ការផ្អាកការបាញ់គ្នានេះ នឹងអនុញ្ញាតិ ឲ្យក្រុមការងារមនុស្សធម៌ យកជំនួយទៅជួយប្រជាជនស៊ីរី ដែលកំពុងតែរស់នៅក្នុងភាពវេទនាជាទីបំផុត។
ចុះផ្សាយនៅថ្ងៃ៖ កែប្រែថ្ងៃទី៖
ប្រទេសស៊ីរី ដែលកំពុងតែហែកហួរដោយភ្លើងសង្រ្គាម រវាងក្រុមឧទ្ទាមជាច្រើនក្រុម ដែលធ្វើការប្រយុទ្ធប្រឆាំងរដ្ឋាភិបាលផ្តាច់ការរបស់បាស្ឆា អាល់អាសាដ។ នៅមានក្រុមផ្សេងទៀត ដែលត្រូវគេចាត់ទុកថាជាក្រុមភេរវកម្ម គឺក្រុមជីហាដអង្គការរដ្ឋអ៊ីស្លាម និងក្រុមអាល់ន័រស្រា ដែលជាក្រុមអាល់កាយដា។ រុស្ស៊ីបានចូលលូកដៃ ទៅទម្លាក់គ្រាប់បែកដើម្បីជួយកងទ័ពរដ្ឋាភិបាលស៊ីរី បានត្រូវគេរិះគន់ជាខ្លាំង ព្រោះគ្រាប់បែករបស់រុស្ស៊ី បានសម្លាប់ប្រជាជនស្លូតត្រង់ និងបានរុញច្រានពួកគេ ឲ្យរត់ចោលផ្ទះសម្បែង។
ផ្អាកឈប់បាញ់បណ្តោះអាសន្ន៖
កាលពីថ្ងៃព្រហស្បតិ៍ទី ១១ កុម្ភៈក្រុមប្រទេសមហាអំណាច ដែលមានចំណែកក្នុងកិច្ចការស៊ីរី ដូចជាអាមេរិក រុស្ស៊ី បារាំង និងអង់គ្លេស ជាដើម បានជួបប្រជុំគ្នានៅក្រុងមុយនិច ដើម្បីធ្វើការផ្អាកការបាញ់តបតបគ្នា ហើយអនុញ្ញាតិឲ្យក្រុមអង្គការមនុស្សធម៌ យកជំនួយទៅជួយប្រជាជនស៊ីរី។ កូនក្តីសង្ឃឹមតូចមួយ បានផ្តល់ឲ្យ នៅទីក្រុងមុយនិច ក្រោយពេលចរចាគ្នា ជិត៦ម៉ោង រវាងថ្នាក់ដឹកនាំការទូតរបស់ប្រទេសពាក់ព័ន្ធ។ ក្តីសង្ឃឹមនោះ គឺការដាក់អាវុធឈប់បាញ់បណ្តោះអាសន្ន នៅស៊ីរី។
យើងត្រូវយល់ឲ្យច្បាស់ថា នេះមិនមែនជាការទម្លាក់អាវុធទាំងស្រុងទេ។ លោកចន ឃែរី បានប្រើពាក្យថា ជាការផ្អាកឈប់បាញ់មួយរយៈ។ អញ្ចឹងមានន័យថា ជាការផ្អាកតែមួយរយៈតែប៉ុណ្ណោះ ដែលនឹងចាប់ផ្តើមធ្វើ ក្នុងរយៈពេល៧ថ្ងៃទៀត។ កាលពីមុននេះ តាមពាក្យល្ហិចល្ហៀង គឺរុស្ស៊ីចង់ផ្អាកការទម្លាក់គ្រាប់នៅដើមខែមីនា ក៏ប៉ុន្តែប្រហែលជាភាគីអាមេរិក បានទាមទារខ្លាំង ទើបរុស្ស៊ីព្រមធ្វើក្នុងពេល១អាទិត្យទៀតនេះ។ កិច្ចព្រមព្រៀងនេះ ជាការផ្អាកឈប់បាញ់បណ្តោះអាសន្ន ហើយមិនមានបញ្ជាក់ថា ផ្អាកដល់ពេលណាទេ។
តែការប្រយុទ្ធប្រឆាំងក្រុមភេរវកម្មនៅតែបន្ត៖
ចំណុចមួយទៀតដែលសំខាន់ដែរ គឺការផ្អាកបណ្តោះអាសន្ននេះ មានប្រសិទ្ធិភាពនៅទូទាំងស៊ីរីតែម្តង ហើយត្រូវគោរពដោយភាគីសំខាន់ៗទាំងអស់ លើកលែងតែក្រុមភេរវកម្ម។ មានន័យថា ក្រុមទាហានរដ្ឋាភិបាល ត្រូវតែផ្អាកការប្រយុទ្ធជាមួយនឹងក្រុមឧទ្ទាម ហើយយន្តហោះរុស្ស៊ីក៏ត្រូវផ្អាក ឈប់ទម្លាក់គ្រាប់លើមូលដ្ឋានរបស់ក្រុមឧទ្ទាមដែរ។ ក៏ប៉ុន្តែលើកលែងក្រុមភេរវកម្ម មានន័យថា ការប្រយុទ្ធដើម្បីកម្ទេចក្រុមភេរវកម្ម ដូចជាក្រុមជីហាដអង្គការរដ្ឋអ៊ីស្លាម និងក្រុមអាល់ន័រស្រា នឹងនៅតែបន្តធ្វើដដែល អត់មានផ្អាកទេ។
រុស្ស៊ីអ្នកសន្យា រុស្ស៊ីត្រូវតែប្រយត្ន័៖
លោករដ្ឋមន្ត្រីការបរទេសរុស្ស៊ីបានបញ្ជាក់ក្នុងសន្និសីទថា ក្រុមការងារពិសេសមួយ នឹងចាប់ផ្តើមធ្វើការនៅថ្ងៃនេះតែម្តង នៅក្រុងហ្សឺណែវ។ ក្រុមការងារនេះ ដឹកនាំដោយអ្នកជំនាញការរបស់រុស្ស៊ី និងអាមេរិក ដោយមានការសម្របសម្រួលពីមន្ត្រីរបស់អង្គការសហប្រជាជាតិ។ អ្វីៗ គឺវាស្ថិតនៅលើសមរភូមិទាំងស្រុង។ មិនមែនថា សរសេរលើក្រដាស ថាផ្អាក ហើយផ្អាកមែននោះទេ។
យ៉ាងណាក៏ដោយ ក្នុងនាមរុស្ស៊ី ដែលព្រមសន្យាផ្អាកការទម្លាក់គ្រាប់មួយរយៈនេះ វាជារឿងមួយគួរឲ្យត្រេកអរ ព្រោះថាបើរុស្ស៊ីមិនទម្លាក់គ្រាប់បើកផ្លូវ ទាហានរដ្ឋាភិបាល ក៏មិនអាចវាយសម្រុករុលទៅមុខដែរ។ ហើយក្រុមឧទ្ទាមបច្ចុប្បន្ននេះ កំពុងតែដកថយ មិនមានកម្លាំងមកវាយទេ។ ដូច្នេះបើរុស្ស៊ី ផ្អាក គ្រប់ភាគីអាចនឹងផ្អាកដែរ។
ក៏ប៉ុន្តែការលំបាក គឺវាស្ថិតនៅក្នុងបញ្ហា ដែលថាការវាយកម្ទេចក្រុមភេរវកម្មនឹងនៅតែបន្តទៅមុខ។ កន្លែងនេះអាចចោទជាបញ្ហា ដោយសារតែរុស្ស៊ីសន្យាថាផ្អាកទម្លាក់គ្រាប់តែទៅលើក្រុមឧទ្ទាមទេ តែក្រុមជីហាដអង្គការរដ្ឋអ៊ីស្លាម និងក្រុមអាល់ន័រស្រា ដែលជាក្រុមភេរវកម្ម គឺគេនៅតែទម្លាក់ដដែល។ ដូច្នេះប្រជាជនស្លូតត្រង់ ដែលនៅជាប់ក្នុងតំបន់ ដែលក្រុមទាំងនេះកាន់កាប់ គឺស្ថិតនៅក្នុងគ្រោះថ្នាក់ដដែល។ ហើយបើរុស្ស៊ីទម្លាក់ខុស ដោយចំទៅលើក្រុមឧទ្ទាម ដែលមិនមែនជាក្រុមជីហាដ មានន័យថា រុស្ស៊ីខ្លួនឯងត្រូវទទួលខុសត្រូវ។
ជំនួយបន្ទាន់នៅតាមដំបន់ដែលហ៊ុំព័ទ្ធដោយក្រុមជីហាដ៖
អាយុជីវិត ការផ្តល់ជំនួយទៅដល់ប្រជាជន គឺជាកម្មវត្ថុចំបងមួយ នៃការទម្លាក់អាវុធបណ្តោះអាសន្ននេះ។ តាមការឲ្យដឹង ក្រុមការងារពិសេស ដែលកំពុងតែធ្វើការនៅហ្សឺណែវ គឺកំពុងតែជជែកគ្នា ទាក់ទិននឹងកម្មវិធីដឹកជំនួយបន្ទាន់ទៅជួយប្រជាជនស៊ីរី។
តាមការគ្រោងទុក ជំនួយនឹងត្រូវបញ្ជូនទៅកាន់តំបន់ជាច្រើនកន្លែង ជាពិសេស កន្លែងដែលមានការហ៊ុំព័ទ្ធដោយក្រុមភេរវកម្មជីហាដ។ តំបន់ទាំងនោះកំពុងមានស្ថានភាពអាសន្ន ដោយសារប្រជាជនចេញទៅណាមិនរួច គ្មានការនាំចូលទំនិញ និងស្បៀងអាហារ ដោយសារតែក្រុមជីហាដ បិទផ្លូវជិតឈឹង អស់ជាច្រើនខែមកហើយ។ ក្រុមអន្តរជាតិដើម្បីស៊ីរី មួយត្រូវបានបង្កើតឡើងផងដែរ ដើម្បីប្រមូលជំនួយសប្បុរស ជួយដល់ស៊ីរី។
យ៉ាងណាក៏ដោយ ក្តីសង្ឃឹមធំនាពេលនេះ គឺគេសង្ឃឹមថាអ្វីៗ នឹងមានដំណើរការទៅដោយរលូន ការផ្អាកឈប់បាញ់បណ្តោះអាសន្ន នឹងត្រូវបានគោរពជាទូទៅ។ បើសិនបានជោគជ័យមែន មានភាពធូរស្រាលនេះ អាចនឹងនាំក្រុមប្រឆាំងស៊ីរី និងរដ្ឋាភិបាលបាស្ឆា អាល់អាសាដ ឲ្យចូលតុចរចា ជាថ្មីឡើងវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ