សន្និសីទបន្ទាន់នៅក្រុងមុយនិច ទាមទារឲ្យរុស្ស៊ីឈប់ទម្លាក់គ្រាប់នៅស៊ីរី
នៅថ្ងៃទី១១ កុម្ភៈនេះ នៅទីក្រុងមុយនិច ភាគខាងត្បូងប្រទេសអាល្លឺម៉ង់ មានរៀបចំសន្និសីទអន្តរជាតិមួយ ដែលមានការចូលរួមពីភាគីពាក់ព័ន្ធទាំងអស់១៧ប្រទេស។ កម្មវត្ថុនៃសន្និសីទដ៏បន្ទាន់នេះ គឹដើម្បីស្វែងរកដំណោះស្រាយ ឲ្យមានការទំលាក់អាវុធជាបន្ទាន់នៅស៊ីរី។ រុស្ស៊ីដែលបានធ្វើការទម្លាក់គ្រាប់បែកយ៉ាងដំណំ ទៅលើតំបន់អាឡិប រយៈពេលប៉ុន្មានថ្ងៃចុងក្រោយនេះ កំពុងត្រូវបានសន្និសីទនេះ ទាមទារ ឲ្យធ្វើការឈប់ទម្លាក់គ្រាប់ និងផ្តល់ដំណោះស្រាយថ្មី ដើម្បីស្វែរកសន្តិភាពនៅស៊ីរី។ ប្រជាជនស៊ីរីប្រមាណជា៤ម៉ឺននាក់ កំពុងតែរត់ខ្ចាត់ខ្ចាយ គេចចេញពីការទំលាក់គ្រាប់របស់រុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៦:០៦
សន្និសីទអន្តជាតិ នៅមុយនិចថ្ងៃនេះ មានការចូលរួមពីរដ្ឋមន្ត្រីក្រសួងការបរទេស នៃប្រទេសចំនួន ១៧ ដែលជាភាគីពាក់ព័ន្ធ ក្នុងវិបត្តិនយោបាយនិងសង្រ្គាមនៅស៊ីរី។ ក៏ប៉ុន្តែតួអង្គធំៗ សំខាន់ៗ គឺមានរុស្ស៊ី និងអាមេរិកតែម្តង ដែលជាមេក្រុមចរចា។ កម្មវត្ថុនៃសន្និសីទនេះ គឺទីមួយចាត់ចែងឲ្យមានការទម្លាក់អាវុធ ឈប់បាញ់នៅស៊ីរី ជាបន្ទាន់។ ហើយកម្មវត្ថុទីពីរគឺ ផ្តល់សន្ទុះថ្មីដល់ការចរចាសន្តិភាព នៅក្រុងហ្សឺណែវ ស្តីពីការរៀបចំសន្តិភាពនៅស៊ីរី។ ការចរចាសន្តិភាពនេះ កំពុងតែជាប់គាំងដោយសារតែ ប៉ុន្មានថ្ងៃចុងក្រោយនេះ រុស្ស៊ីបានទម្លាក់គ្រាប់សង្រ្គុបលើក្រុមឧទ្ទាមប្រឆាំងរដ្ឋាភិបាល ដែលធ្វើឲ្យពួកគេដកថយ លែងចូលតុចរចា។
រុស្ស៊ីត្រូវតែឈប់ទម្លាក់គ្រាប់ជាបន្ទាន់៖
សម្រាប់កម្មវត្ថុទីមួយ គឺគ្រប់គ្នាសំឡឹងទៅមើលរុស្ស៊ីតែម្តង។ សំណើររបស់ក្រុមប្រទេសលោកខាងលិច គឺទាមទារឲ្យរុស្ស៊ី ផ្អាកការទម្លាក់គ្រាប់នៅស៊ីរីជាបន្ទាន់។ សំណើរនេះ ត្រូវបានរដ្ឋាភិបាលអាមេរិកគាំទ្រដែរ។ មួយសប្តាហ៏ចុងក្រោយនេះ បើតាមការឲ្យដឹងពីអ្នកនាំពាក្យយោធារុស្ស៊ី កងទ័ពអាកាសរុស្ស៊ី បានទម្លាក់គ្រាប់ជិត២ពាន់គ្រាប់ នៅតំបន់អាឡិប ដើម្បីបើកផ្លូវឲ្យកងទ័ពរដ្ឋាភិបាល របស់បាស្ឆាអាល់អាសាដ វាយយកទីក្រុងនេះ ពីក្រុមឧទ្ទាម។ ប្រជាជនដែលនៅតំបន់នេះ រាប់ម៉ឺននាក់បាននាំគ្នារត់ប្រសេចប្រសាច ធ្វើដំណើរទៅព្រំដែនតួកគី ដើម្បីរកកន្លែងជ្រក។
ការចរចាសន្តិភាពនៅហ្សឺណែវ ជាប់គាំង៖
នេះជាស្ថានភាពមនុស្សធម៌ ដែលកំពុងតែអាសន្នខ្លាំង ហើយដែលគេត្រូវតែរកដំណោះស្រាយ។ អាសន្នមួយទៀត ដែលបណ្តាលមកពីការទម្លាក់គ្រាប់របស់រុស្ស៊ីនេះដែរ គឺការចរចារកសន្តិភាព ដែលជាកម្មវត្ថុទីពីរ របស់សន្និសីទនៅមុយនិច។ ការចរចាសន្តិភាព ដែលចាប់ផ្តើមកាលពីថ្ងៃ៣កុម្ភៈ ឥឡូវកំពុងជាប់គាំង ដោយសារតែក្រុមឧទ្ទាមលែងចូលចរចា។ មូលហេតុគឺថា ពួកគេមិនអាចទទួលយកបានទេ នៅពេលដែលរដ្ឋាភិបាលស៊ីរីរបស់បាស្ឆា អាល់អាសាដ នៅក្នុងតុចរចាសន្យាថាចរចារកសន្តិភាព ក៏ប៉ុន្តែនៅសមរភូមិឯណោះវិញ បានបន្ថែមកម្លាំង ឃុបឃិតជាមួយរុស្ស៊ី ទម្លាក់គ្រាប់ កម្ទេចមូលដ្ឋានរបស់ក្រុមឧទ្ទាម។ ត្រង់ចំណុចនេះហើយ ដែលសហគមអន្តរជាតិ ទាមទារហើយទាមទារទៀតថា រុស្ស៊ីត្រូវចាប់ផ្តើម ឈប់ទម្លាក់គ្រាប់ជាមុនសិន មុននឹងអ្វីៗ អាចបន្តដំណើរទៅមុខទៀត។
ដំណើរការចរចា រៀបចំសន្តិភាពនៅស៊ីរី កំពុងជាប់គាំងទាំងស្រុង នាពេលនេះ ដោយសារក្រុមប្រឆាំង បានដាក់កំហិត ថាដរាបណារុស្ស៊ីមិនព្រមឈប់ទម្លាក់គ្រាប់ទេ គេនឹងមិនចូលតុចរចាទេ។ ហើយក្នុងខណៈពេលនេះ ប្រជាជនស៊ីរីវេទនា ស្លាប់កាន់តែច្រើន។ គ្រាន់តែនៅក្រុងអាឡិប ចាប់ពីដើមខែកុម្ភៈនេះ មានស្លាប់ប្រហែលជា៥០០នាក់។ ដូច្នេះ ចង់មិនចង់ សហគមន៍អន្តរជាតិ ត្រូវតែពន្យល់រុស្ស៊ីឲ្យឈប់ធ្វើការទម្លាក់គ្រាប់ ឲ្យខាងតែបាន។ ពន្យល់ដោយវិធីណាគេមិនដឹងទេ តែគេសង្ឃឹមយ៉ាងខ្លាំងទៅលើ គោលជំហររបស់សហរដ្ឋអាមេរិក ដែលមានលោកចន ឃែរី ជាអ្នកតំណាង។
រុស្ស៊ីត្រៀមខ្លួនឈប់ទម្លាក់គ្រាប់ ចាប់ពីដើមខែមីនា៖
តាមការឲ្យដឹងនៅថ្ងៃនេះពីអនុរដ្ឋមន្ត្រីក្រសួងការបរទេសរុស្ស៊ី បានបញ្ជាក់ថា រុស្ស៊ីនឹងចូលរួមសន្និសីទនេះ ដោយត្រៀមខ្លួនចរចាទាក់ទិននឹងរបៀបវារៈ នៃការដាក់អាវុធចុះជាបណ្តោះអាសន្ន។ ក្នុងន័យនេះ មានន័យថា រុស្ស៊ីប្រហែលជាសុខចិត្តផ្អាកការទម្លាក់គ្រាប់បែក។ ហើយបើតាមដំណឹងល្ហៀងៗ ការដាក់អាវុធចុះរបស់រុស្ស៊ី អាចនឹងចាប់ផ្តើមធ្វើនៅថ្ងៃទី១មីនា ខាងមុខនេះ។
ក៏ប៉ុន្តែ ពីនេះរហូតដល់ថ្ងៃទី១មីនា គឺនៅសល់ពេលជាងពីរអាទិត្យទៀតឯណោះ។ មានន័យថា ទំរាំដល់ពេលនោះ គឺរុស្ស៊ី និងកងទ័ពរបស់បាស្ឆា អាល់អាសាដ និងវាយយកក្រុងអាឡិប បានជាស្ថាពរទៅហើយ។ ដូច្នេះ ក្រុមឧទ្ទាមប្រឆាំង អស់មានដែនដីមូលដ្ឋានជាបង្អែក ព្រមទាំងលែងមានទំងន់អីទៅចរចានៅហ្សឺណែវទៀតហើយ។ នេះជាចំណុចសំខាន់ណាស់ បើយើងវិភាគឲ្យមែនទែន គឺរុស្ស៊ីនិងរដ្ឋាភិបាលបាស្ឆា កំពុងតែលេងខ្សែលើ បោកប្រាស់សហគមន៍អន្តរជាតិ ជាពិសេសអង្គការសហប្រជាជាតិ និងសហរដ្ឋអាមេរិកតែម្តង។
ព្រមដាក់អាវុធ នៅពេលដែលបានឈ្នះទៅហើយ៖
ទីបំផុតទៅយុទ្ធសាស្ត្ររុស្ស៊ី នៅតែឈ្នះដដែល។ ព្រមផ្អាកការទម្លាក់គ្រាប់ បើស្តាប់មួយភ្លែត ហាក់ដូចជារុស្ស៊ីព្រមបន្ទន់ឥរិយាបថ តែបើសម្លឹងឲ្យឆ្ងាយ គឺគេឈប់ទម្លាក់គ្រាប់ ព្រោះថាគេបានជោគជ័យទៅហើយ។ បើសិន ជារុស្ស៊ីព្រមផ្អាកការទម្លាក់គ្រាប់ ចាប់ពីខែមីនាទៅ មានន័យថា ពីនេះទៅ គេនឹងនៅតែធ្វើការទម្លាក់គ្រាប់ ដើម្បីកម្ចាយមូលដ្ឋានរបស់ក្រុមឧទ្ទាម។ ដូច្នេះ នៅខែមីនា នៅពេលរុស្សីឈប់ទម្លាក់គ្រាប់ រដ្ឋាភិបាលបាស្ឆា អាល់អាសាដ នឹងបានជោគជ័យនយោបាយ ក្នុងការចរចា ដោយសារតែក្រុមឧទ្ទាម លែងមានអីមកចរចាទៀតហើយ ព្រោះបាត់បង់ដែនដីមូលដ្ឋានអស់រលីងទៅហើយ។
អាមេរិក និងអង្គការសហប្រជាជាតិទន់ជ្រាយ៖
បញ្ហានេះ បានធ្វើឲ្យអ្នកវិភាគមួយចំនួន រិះគន់សហរដ្ឋអាមេរិកជាខ្លាំង ដែលបណ្តែតបណ្តោយ ឲ្យសមរភូមិស៊ីរី ត្រូវរុស្ស៊ីធ្វើផ្គរធ្វើភ្លៀងតែម្នាក់ឯង ដូចរាល់ថ្ងៃនេះ។ នរណាក៏ដឹងដែរ ថារុស្ស៊ីកំពុងតែដើរខ្សែលើ យកលេសកម្ទេចក្រុមភេរវកម្ម ដើម្បីវាយបំបែកក្រុមឧទ្ទាមតស៊ូ ហើយអនុញ្ញាត ឲ្យបាស្ឆា អាល់អាសាដ ដណ្តើមអំណាចបានវិញ។
មិនមែនតែអ្នកវិភាគឯករាជ្យទេ ដែលយល់ដូច្នេះ។ លោករដ្ឋមន្ត្រីការបរទេសបារាំង ឡូរ៉ង់ ហ្វាប្យ៊ូស បានថ្លែងរិះគន់នៅថ្ងៃនេះដែរ ពីគោលជំហរមិនច្បាស់លាស់ គោលជំហរមិនលះ របស់សហរដ្ឋអាមេរិក ទាក់ទិននឹងវិបត្តិនៅស៊ីរី។ សហរដ្ឋអាមេរិក កន្លងមកទន់ជ្រាយពេក បណ្តោយឲ្យរុស្ស៊ីញាក់បានតាមចិត្ត។ ឥឡូវវាចង់ហួសពេលទៅហើយ។
អង្គការសហប្រជាជាតិ ក៏ត្រូវគេរិះគន់ដែរ។ នៅថ្ងៃនេះ នាយករដ្ឋមន្ត្រីតួកគី បានរិះគន់អង្គការសហប្រជាជាតិចំៗតែម្តង ដែលគិតតែពីអំពាវនាវឲ្យតួកគី បើកព្រំដែនទៅ ដើម្បីទទួលជនភៀសខ្លួនស៊ីរី ដែលរត់គេចពីការទម្លាក់គ្រាប់របស់រស្ស៊ី។ តួកគីថា ម្តេចមិនអំពាវនាវឲ្យរុស្ស៊ីឈប់ទម្លាក់គ្រាប់បែកផង? តួកគី ណាត្រូវគិតពីបញ្ហាមនុស្សធម៌ ណាជាប់ករណីកិច្ចជាមួយនឹងសហភាពអឺរ៉ុប ដែលទាមទារ ឲ្យតួកគីយាមព្រំដែនឲ្យជាប់ ដើម្បីកុំឲ្យជនភៀសខ្លួនរបូតហូរចូលទៅអឺរ៉ុប។
ដូច្នេះយើងឃើញថា មានគោលជំហរប្រទាំងប្រទើសគ្នាច្រើនណាស់។ ដរាបណា មេដំបូលធំ មានសហរដ្ឋអាមេរិកនិងអង្គការសហប្រជាជាតិ នៅតែមិនចង់ប្រឈមមុខជាមួយរុស្ស៊ី មានន័យថា របបបាស្ឆា អាល់អាសាដ អាចនឹងត្រឡប់មកវិញ។ អាមេរិក និងក្រុមប្រទេសលោកខាងលិច ប្រាកដជាបាក់មុខបន្ទោសគ្នាទៅវិញទៅមក។ កន្លែងនេះហើយដែល ប្រធានាធិបតីពូទីនចង់ឃើញ គឺរុស្ស៊ីចង់ឃើញសហរដ្ឋអាមេរិក និងមហាអំណាចអឺរ៉ុប បែកបាក់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ