មន្រ្តីជាន់ខ្ពស់បារាំងជាន់ទឹកដីគុយបាជាលើកទីមួយ បន្ទាប់ពីខកខានជាង៣០ឆ្នាំ
លោករដ្ឋមន្រ្តីការបរទេសបារំាង ឡូរ៉ង់ ហ្វាប៊្យូសបានចុះធ្វើទស្សនកិច្ចមួយភ្លែត កាលពីថ្ងៃសៅរ៍ទី ១២ មេសា ក្នុងប្រទេសគុយបា បន្ទាប់ ពីធ្វើដំណើរចេញពីប្រទេសម៉ិចស៊ិក។ នៅក្នុងដំណើរទស្សនកិច្ចដែលមានរយៈពេលតែ៨ម៉ោង ក្នុងទឹកដី គុយបា ប្រមុខការបរទេសបារាំងបានជួបពិភាក្សា ពីរឿងសេដ្ឋកិច្ច នយោបាយ និងសិទ្ធិមនុស្សជាមួយលោកប្រធានាធិបតីរាអ៊ូល កាស្រ្តូ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
វត្តមានរបស់ប្រមុខការបរទេសបារាំងក្នុងប្រទេសកុម្មុយនិស្តគុយបា ទើបតែមានជាលើកទីមួយ ក្នុងរយៈពេល ៣១ឆ្នាំក្រោយនេះ។ ឆ្លៀតឱកាសបញ្ចប់ទស្សនកិច្ចអមលោកប្រធានាធិបតីបារាំង នៅក្នុងប្រទេសម៉ិចស៊ិក លោកឡូរ៉ង់ ហ្វាប៊្យូសបានឈៀងចូលធ្វើទស្សនកិច្ចរយៈពេលខ្លី នៅទីក្រុងឡាហាវ៉ាន ជាទីដែលលោកបានជួបពិភាក្សាជាមួយសមភាគី របស់លោក និងលោកប្រធានាធិបតីគុយបា រាអ៊ូល កាស្រ្តូ។
នៅក្នុងសន្និសីទកាសែត ក្រោយជំនួបជាមួយប្រធានាធិបតី គុយបា រដ្ឋមន្រ្តីការបរទេសបារាំងបាននិយាយថា ប្រទេសទាំងពីរ បារាំង គុយបា មានចេតនាចង់អភិវឌ្ឍទំនាក់ទំនងរវាងគ្នា នៅក្នុងវិស័យវប្បធម៌ អប់រំ សេដ្ឋកិច្ច និងនយោបាយ។ តាមលោកប្រមុខការបរទេសបារាំង គុយបាបានកែប្រែមុខមាត់ច្រើន នៅផ្នែកសេដ្ឋកិច្ច និងសង្គម។ ប៉ុន្តែ យ៉ាងណាក៏ដោយ បារាំងនៅចង់ឃើញការគោរពសិទ្ធិនយោបាយ ឲ្យបានច្រើន នៅក្នុងប្រទេសកុម្មុយនិស្តមួយនេះ។
ចាប់តាំងពីចូលកាន់តំណែងជារដ្ឋមន្រ្តីការបរទេសបារាំង នៅឆ្នាំ ២០១២ លោកឡូរ៉ង់ ហ្វាប៊្យូសប្រឹងប្រែងសកម្មភាពការទូតបរទេសច្រើន ដើម្បីជួយយឹតយោងក្រុមហ៊ុនបារាំង នៅបរទេស។ ទីក្រុងប៉ារីសកំពុងចងពង្រឹងទំនាក់ទំនងសេដ្ឋកិច្ចជាមួយអាមេរិកឡាទីន ដោយក្នុងនោះ គុយបាជាភាគីមិនអាចខ្វះបាន។ នៅឆ្នាំ ២០១៣ ទំហំដោះដូរពាណិជ្ជកម្មរវាងប្រទេសទាំងពីរមានតម្លៃ២៨០លានអឺរ៉ូ ដែលភាគច្រើន គឺក្រុមហ៊ុនបារាំងដែលជាអ្នកទទួលផលចំណេញ ដែលបានមកពីការនាំផលិតផលកសិកម្មចូលទៅកាន់ដីកោះ គុយបា។
ទស្សនកិច្ចរបស់ប្រមុខការបរទេសបារាំង នៅគុយបាធ្វើឡើង នៅក្នុងខណៈដែល សហភាពអឺរ៉ុប និងគុយបាចាប់ផ្តើមចង់បោះដៃរកគ្នា បន្ទាប់ពីសហភាពអឺរ៉ុបដកទណ្ឌកម្មចេញពីគុយបា កាលពី៦ឆ្នាំមុន។ កាលពីខែកុម្ភៈ កន្លងទៅ សហភាពអឺរ៉ុបបានបើកភ្លើងខៀវឲ្យមានពិភាក្សាជាមួយទីក្រុងឡាហាវ៉ាន ដើម្បីឈានទៅដល់ការបង្កើតកិច្ចព្រមព្រៀងពិសេស ស្តីពីការផ្លាស់ប្តូរពាណិជ្ជកម្ម វិនិយោគ និងការគោរពសិទ្ធិមនុស្ស។ ទីក្រុងឡាហាវ៉ានវិញ ដែលនៅជាប់រងទណ្ឌកម្មពី អាមេរិកអស់ពាក់កណ្តាលសតវត្សរ៍មកហើយនោះ សង្ឃឹមថា សហភាពអឺរ៉ុបនឹងបោះបង់ចោលគោលការណ៍ចាស់ ដែលអនុវត្តតាំងពីឆ្នាំ ១៩៩៦ និងដែលថា គេអាចរឹងចំណងសេដ្ឋកិច្ច ជាមួយគុយបា ប្រសិនបើប្រទេសនេះ គោរពលទ្ធិប្រជាធិបតេយ្យ។
ការពិភាក្សារវាងភាគី ទាំងពី (សហភាពអឺរ៉ុប និងគុយបា) នឹងធ្វើឡើង នៅថ្ងៃទី ២៩មេសា ខាងមុខ នៅទីក្រុងឡាហាវ៉ាន។ មុននឹងឈានទៅបង្កើតកិច្ចព្រមព្រៀង សហភាពអឺរ៉ុបត្រូវទទួលការយល់ព្រមពី ប្រទេសសមាជិកទាំង២៨សិន។ ប៉ុន្តែ រហូតមកដល់ពេលនេះ ប្រទេសប៉ូឡូញ សាធារណរដ្ឋឆែកជាដើម នៅតែមានអរិភាពនឹងគុយបា ដោយសារតែដានប្រវត្តិកុម្មុយនិស្តដែលប្រទេសទាំងពីរធ្លាប់ជួបប្រទះកន្លងមក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ