បារាំង៖ លោកអេម៉ានុយអែលម៉ាក្រុង និងលោកស្រីម៉ារីនឡឺប៉ែនជាប់ឆ្នោតជុំទីមួយ
ការិយាល័យបោះឆ្នោតនៅទូទាំងប្រទេសបានបិទទ្វារតាំងពីម៉ោង ៨យប់។ ការរាប់សន្លឹកឆ្នោតកំពុងបន្តធ្វើ ក៏ប៉ុន្តែ យោងតាមលទ្ធផលបណ្តោះអាសន្នបង្ហាញថា លោកអេម៉ានុយអែល ម៉ាក្រុង ទទួលបានសំឡេងនាំមុខគេ ( ២៣,៩%) ចំណែកលោកស្រីម៉ារីន ឡឺប៉ែន ជាប់លំដាប់ទីពីរ (២១,៧%)។ បេក្ខជនទាំងពីរនឹងត្រូវប្រកួតប្រជែងគ្នាផ្តាច់ព្រ័ត នៅជុំទីពីរ ដែលនឹងប្រព្រឹត្តទៅ នៅថ្ងៃអាទិត្យ ៧ឧសភា។
ចុះផ្សាយនៅថ្ងៃ៖ កែប្រែថ្ងៃទី៖
ខាងក្រោមនេះជាលទ្ធផលបោះឆ្នោតជុំទីមួយ ថ្ងៃទី២៣ មេសា ឆ្នាំ២០១៧។ លោកអ្នកក៏អាចមើលផងដែរនូវលទ្ធផលនៃការបោះឆ្នោតប្រធានាធិបតីឆ្នាំមុនៗ ដោយចុចរើសឆ្នាំ នៅជ្រុងខាងលើប៉ែកខាងស្តាំ។
លទ្ធផលសំឡេងឆ្នោតរបស់បេក្ខជនទាំង១១រូប
ការស្ទាបស្ទង់មតិនៅមុនពេលបោះឆ្នោតសុទ្ធតែបង្ហាញថា បេក្ខជនចំនួន ៤រូប មានសំឡេងយ៉ាងប្រកៀកប្រកិតគ្នា ក៏ប៉ុន្តែ នៅទីចុងបំផុត គឺលោកអេម៉ានុយអែល ម៉ាក្រុង និងលោកស្រីម៉ារីន ឡឺប៉ែល ដែលបានជាប់ឈានទៅជុំទីពីរ។
នៅថ្ងៃអាទិត្យទី៧ឧសភាខាងមុខ ពលរដ្ឋបារាំងនឹងត្រូវជ្រើសរើស អ្នកនយោបាយជាន់ថ្មី គឺ លោកអេម៉ានុយអែល ម៉ាក្រុង (En Marche !) និងលោកស្រីម៉ារីន ឡឺប៉ែន មកពីគណបក្សស្តាំនិយមជ្រុល (Front National)។ នេះគឺជាលើកទីមួយក្នុងប្រវត្តិនៃរបបសាធារណរដ្ឋទី៥របស់បារាំង ដែលបេក្ខជនមកពីគណបក្សធំៗទាំងពីរ គឺគណបក្សសាធារណរដ្ឋ (ស្តាំ) និងគណបក្សសង្គមនិយម (ឆ្វេង) សុទ្ធតែត្រូវអវត្តមាននៅក្នុងការបោះឆ្នោតប្រធានាធិបតីជុំទីពីរ។
លោកហ្វ្រង់ស័រ ហ្វីយ៉ុង បេក្ខជនមកពីគណបក្សស្តាំនិយម (Les Républicains) ហើយដែលពេញក្នុងអំឡុងយុទ្ធនាការឃោសនាបោះឆ្នោតត្រូវជាប់វក់វីនឹងរឿងអាស្រូវទាក់ទងនឹងលុយកាក់ ទទួលបានសំឡេងក្នុងរង្វង់ ២០% ប្រហាក់ប្រហែលនឹងលោកហ្សង់លុច មេឡង់ស្ហុង បេក្ខជនមកពីគណបក្សឆ្វេងនិយមជ្រុល (១៩,២%)។ ចំណែកឯលោកបឺណ័រ អាម៉ុង បេក្ខជនមកពីគណបក្សឆ្វេងនិយម (Parti Socialiste) ស្ថិតនៅលំដាប់ទី៥ ដោយទទួលបានសំឡេងតែប្រមាណជាង ៦% តែប៉ុណ្ណោះ។
ចាប់ពីថ្ងៃចន្ទនេះទៅ យុទ្ធនាការឃោសនាបោះឆ្នោត សម្រាប់ជុំទីពីរនឹងត្រូវចាប់ផ្តើម ដោយបេក្ខជននីមួយៗ ទាំងលោកអេម៉ានុយអែល ម៉ាក្រុង និងលោកស្រីម៉ារីន ឡឺប៉ែន ត្រូវព្យាយាមធ្វើយ៉ាងណាទាក់ទាញសំឡេងឆ្នោតពីបេក្ខជន ៩នាក់ផ្សេងទៀត ដែលមិនជាប់នៅជុំទី១។
នៅក្នុងស្ថានភាពបច្ចុប្បន្ននេះ គេសង្កេតឃើញថា លោកអេម៉ានុយអែល ម៉ាក្រុង កំពុងតែមានប្រៀបខ្លាំងលើលោកស្រីម៉ារីន ឡឺប៉ែន។ ភ្លាមៗក្រោយពីគេដឹងលទ្ធផលជុំទីមួយ នៅយប់ថ្ងៃអាទិត្យ លោកអេម៉ានុយអែល ម៉ាក្រុង បានទទួលការគាំទ្រពីសំណាក់អ្នកនយោបាយសំខាន់ៗមួយចំនួន ទាំងមកពីគណបក្សស្តាំនិយម និងឆ្វេងនិយម។
អ្នកដែលចេញមុខអំពាវនាវមុនគេឲ្យបោះឆ្នោតឲ្យលោកអេម៉ានុយអែល ម៉ាក្រុង នៅជុំទីពីរ គឺលោកប៊ែរណា កាហ្សណូវ នាយករដ្ឋមន្រ្តីបច្ចុប្បន្នដែលមកពីគណបក្សសង្គមនិយម។ ចំណែកឯលោកហ្វ្រង់ស័រ ហ្វីយ៉ុង បេក្ខជនមកពីគណបក្សសាធារណរដ្ឋ (Les Républicains) ក៏បានអំពាវនាវឲ្យបោះឆ្នោតឲ្យលោកអេម៉ានុយអែល ម៉ាក្រុងផងដែរ ដើម្បីធ្វើយ៉ាងណារារាំងកុំឲ្យតំណែងប្រធានាធិបតីបារាំងត្រូវធ្លាក់ក្នុងដៃគណបក្សស្តាំនិយមជ្រុល។
ចំណុចសំខាន់មួយដែលគេកត់សម្គាល់នៅក្នុងការបោះឆ្នោតជុំទីមួយ គឺអត្រាអ្នកចេញទៅបោះឆ្នោត ដែលមានកម្រិតខ្ពស់ (៧៧,៣%) បើទោះបីជាមានការគំរាមកំហែងភេរវកម្ម ជាពិសេស ការវាយប្រហារភេរវកម្មនៅកណ្តាលក្រុងប៉ារីស តែ៣ថ្ងៃប៉ុណ្ណោះមុនថ្ងៃបោះឆ្នោត។ អត្រាអ្នកចេញទៅបោះឆ្នោតជិត ៨០% ស្ថិតក្នុងចំណោមអត្រាខ្ពស់បំផុតនៅក្នុងរយៈពេល៤០ឆ្នាំកន្លងទៅនេះ។
លទ្ធផលបង្ហាញពីបេក្ខជនដែលមានសំឡេងនាំមុខគេតាមតំបន់នៅទូទាំងប្រទេសបារាំង
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ