បារាំងព្រួយបារម្ភនឹងដ្រូនចម្លែកហោះកាត់លើមជ្ឈមណ្ឌលនុយក្លេអ៊ែរ
យន្តហោះដ្រូនតូចៗ បានហោះកាត់ជាថ្មីពីលើមជ្ឈមណ្ឌលនុយក្លេអ៊ែរបារាំង។ ការបង្ហោះកូនដ្រូនលើមជ្ឈមណ្ឌលនុយក្លេអ៊ែរចំនួន៥កន្លែង បាននិងកំពុងធ្វើឱ្យរដ្ឋាភិបាលបារាំង ងើយឆ្ងល់និងខ្វាយខ្វល់បំផុត។ តើនរណាជាអ្នកទទួលខុសត្រូវបង្ហោះដ្រូនលើតំបន់ហាមឃាត់នេះ ? និង ដើម្បីអ្វី ? មានតែសំណួរតែគ្មានចម្លើយ ! ដ្រូនចម្លែកនេះស្ថិតនៅជាអាថ៌កំបាំងដដែលរហូតមកទល់នឹងពេលនេះម៉ោងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ការហោះហើរពីលើនិងជុំវិញមជ្ឈមណ្ឌលនុយក្លេអ៊ែរ ក្នុងរង្វង់៥គីឡូម៉ែត្រ និងក្នុងកម្ពស់១ពាន់ម៉ែត្រ ត្រូវបានហាមឃាត់ដោយច្បាប់។ ជនល្មើសអាចជាប់ពន្ធនាគារដល់មួយឆ្នាំ និងពិន័យជាប្រាក់៧៥០០០អឺរ៉ូ។ ប៉ុន្តែតាំងពីខែតុលាមក មានដ្រូនហោះហើរកាត់លើ៧ មជ្ឈមណ្ឌល ដោយគ្មានកងរក្សាសន្តិសុខណាម្នាក់កម្ទេចដ្រូនឬចាប់អ្នកបញ្ជាដ្រូននោះបានសោះ។ នៅយប់ថ្ងៃព្រហស្បតិ៍ឆ្លងមកថ្ងៃសុក្រ សប្តាហ៍នេះ មជ្ឈមណ្ឌលនុយក្លេអ៊ែរនៅភាគខាងត្បូង ត្រូវបានដ្រូនហោះកាត់ ហើយនៅយប់អាធ្រាត្រយប់ថ្ងៃសុក្រឆ្លងចូលថ្ងៃសៅរ៍ មានការហោះហើរឆ្វែលពីមជ្ឈមណ្ឌលហាមឃាត់ដល់ទៅ៥កន្លែងទៀត ក្នុងនោះមានមួយមានទីតាំងនៅជាយទីក្រុងប៉ារីស។
មានការបង្ហោះដ្រូនក្នុងតំបន់ហាមឃាត់តែគ្មានការកម្ចាត់ ?! ក្រសួងមហាផ្ទៃបានអះអាងថាចាប់បានសញ្ញាមានការហោះហើរ តែគ្មានគ្រោះថ្នាក់ដល់សន្តិសុខនុយក្លេអ៊ែរឡើយ ព្រោះមជ្ឈមណ្ឌលបារាំងមានសមត្ថភាពធុននឹងគ្រោះរញ្ជួយដីខ្លាំង ឬក៏យន្តដឹកជញ្ជូនអ្នកដំណើរធ្លាក់ផង។ ដូច្នេះ ដ្រូនតូចៗដែលអាចរកទិញបានយ៉ាងងាយនៅតាមទីផ្សារ មិនបង្កគ្រោះថ្នាក់ និងមិនមែនជាការគំរាមកំហែងអ្វីដែរ បើទោះបីជាមានសមត្ថភាពអាចហោះលើមជ្ឈមណ្ឌលយ៉ាងណាក៏ដោយ។ ដ្រូនប្រើជាគ្រាប់គប់ ក៏មិនបង្កគ្រោះថ្នាក់អ្វីដែរ នៅពេលធ្លាក់ ព្រោះ
មានទម្ងន់ស្រាល។ មីនីដ្រូន ដែលសាក្សីបានឃើញហោះលើមជ្ឈមណ្ឌលនុយក្លេអ៊ែរបារាំង អាចបញ្ជាពីចម្ងាយដោយទូរស័ព្ទសម័យថ្មី មានលក់នៅតាមផ្សារ ក៏មិនមែនជាគំរាមកំហែងអ្វីដែរ ព្រោះមានទម្ងន់ក្រោមតែ២គីឡូ មិនអាចដឹកសារធាតុផ្ទុះបានទេ។ ប៉ុន្តែបើដ្រូនទំនើបខ្លាំង ប្រើប្រាស់ក្នុងឧស្សាហកម្ម សម្រាប់យាម និងត្បាតថែរក្សាហេដ្ឋារចនាសម្ព័ន្ធផ្លូវដែកនិងឧស្សាហកម្ម កសិកម្ម ទើបមិនអាចធ្វេសប្រហែសបាន។ នេះបើតាមការពន្យល់របស់អ្នកនាំពាក្យយោធាអាកាសបារាំង។
បើតាមក្រុមហ៊ុនអគ្គីសនីបារាំង ម្ចាស់គ្រប់គ្រង់មជ្ឈមណ្ឌលនុយក្លេអ៊ែរ កូនដ្រូនហោះពីលើមជ្ឈមណ្ឌលនុយក្លេអ៊ែរ មិនបានបង្កជាផលវិបាកអ្វីមែន ប៉ុន្តែបញ្ហាសន្តិសុខនុយក្លេអ៊ែរកំពុងចោទឡើងជាថ្មី ព្រមទាំងមានគម្រោងដាក់ពាក្យបណ្តឹងផង។ ចំណែកក្រុមអ្នកបរិស្ថាន Greenpeace ដែលធ្លាប់បានជិះឆ័ត្រយោងចូលមជ្ឈមណ្ឌលនុយក្លេអ៊ែរមួយ បានបដិសេធមិនពាក់ព័ន្ធនឹងដ្រូនចម្លែកនេះទេ និងបានទាមទារឱ្យមានការបើកអង្កេតស៊ីជម្រៅ ព្រោះជាស្ថានភាពគួរឱ្យព្រួយបារម្ភ។ សម្រាប់ពេលនេះ ក្រុមអ្នកប្រយុទ្ធប្រឆាំងនឹងកំពុងសិក្សាលើគ្រប់សេណារីយោទាំងអស់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ