យន្តហោះចម្បាំង៥គ្រឿងរបស់កាដាហ្វ៊ីត្រូវបានបារាំងបាញ់ឆេះ
ក្រសួងការពារជាតិបារាំងបានឲ្យដឹងថា នៅក្នុងចន្លោះពីថ្ងៃសុក្រ ដល់យប់ថ្ងៃសៅរ៍ ម្សិលមិញនេះ យន្តហោះបារាំងបានបាញ់កម្ទេចយន្តហោះចម្បាំង៥គ្រឿង និងឧទ្ធម្ភាគចក្រ២គ្រឿង របស់ទ័ពអាកាសលោកកាដាហ្វ៊ី។ នៅថ្ងៃអាទិត្យនេះ ការវាយប្រហារតាមអាកាសទៅលើកងទ័ពរបស់លោកកាដាហ្វ៊ីនៅតែបន្តធ្វើ។ នៅពេលដែលកងទ័ពរបស់លោកកាដាហ្វ៊ីដកថយ ដើម្បីគេចចេញពីការទម្លាក់គ្រាប់បែករបស់កងទ័ពសម្ព័ន្ធមិត្ត កងកម្លាំងបដិវត្តន៍លីប៊ីបានវាយលុកចូលកាន់កាប់ទីក្រុងម្តងមួយៗ តម្រង់ឆ្ពោះទៅទីក្រុងទ្រីប៉ូលី។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ សេង ឌីណា
យោងតាមសេចក្តីប្រកាសរបស់ក្រសួងការពារជាតិបារាំង យន្តហោះចម្បាំង និងឧទ្ធម្ភាគចក្ររបស់លោកកាដាហ្វ៊ី ត្រូវបានយន្តហោះបារាំងបាញ់ឆេះ នៅពេលដែលយន្តហោះទាំងនេះរៀបហោះឡើងពីមូលដ្ឋានទ័ពអាកាស នៅទីក្រុងមីស្រាតា (Misrata) ប្រមាណ ១៨០គីឡូម៉ែត្រ ពីរដ្ឋធានីទ្រីប៉ូលី។
កាលពីថ្ងៃសៅរ៍ ម្សិលមិញនេះ ដោយមានជំនួយពីយន្តហោះរបស់កងទ័ពសម្ព័ន្ធមិត្ត កងកម្លាំងបដិវត្តន៍លីប៊ីបានវាយលុកចូលកាន់កាប់ទីក្រុង Ajdabiya ដែលជាតំបន់ប្រេងកាតដ៏ធំមួយ នៅប៉ែកខាងកើតប្រទេសលីប៊ី។ បន្ទាប់ពីវាយដណ្តើមបាន Ajdabiya ហើយ កងកម្លាំងបដិវត្តន៍បានបន្តរុលទៅមុខ ហើយវាយចូលដល់ទីក្រុង Brega ដែលស្ថិតនៅប្រមាណ ៨០គីឡូម៉ែត្រ ពី Ajdabiya ។ នៅថ្ងៃអាទិត្យនេះ កងកម្លាំងបដិវត្តន៍បានបន្តរុលទៅមុខចំនួន ៣០គីឡូម៉ែត្រទៀត។
នៅទីក្រុងទ្រីប៉ូលីឯណោះវិញ អ្នកនាំពាក្យរដ្ឋាភិបាលកាដាហ្វ៊ីបានអះអាងថា មានជនស៊ីវិលលីប៊ីជាច្រើននាក់បានបាត់បង់ជីវិត ដោយការទម្លាក់គ្រាប់បែករបស់កងទ័ពអន្តរជាតិ។ ក៏ប៉ុន្តែ មិនមានប្រភពឯករាជណាមួយអាចបញ្ជាក់អំពីការអះអាងនេះបានទេ។
លោករ៉ូបឺត ហ្កេតស៍ (Robert Gates) រដ្ឋមន្រ្តីក្រសួងការពារជាតិអាមេរិកបានប្រាប់ទូរទស្សន៍ CBS ថា ប្រភពពត៌មានពីភ្នាក់ងារចារកម្មបង្ហាញថា ក្រុមលោកកាដាហ្វ៊ីបានយកសាកសពជនស៊ីវិល ដែលពួកគេបានសម្លាប់ យកទៅផ្លុងចោលនៅកន្លែងដែលកងទ័ពអន្តរជាតិទម្លាក់គ្រាប់បែក ដើម្បីបន្លំភ្នែកគេថា ជនស៊ីវិលទាំងនេះត្រូវស្លាប់ដោយគ្រាប់បែករបស់កងទ័ពអន្តរជាតិ។
នៅពេលនេះ ព័ត៌មានស្តីពីចំនួនជនស៊ីវិល ដែលស្លាប់ដោយការទម្លាក់គ្រាប់បែករបស់កងទ័ពអន្តរជាតិ កំពុងក្លាយទៅជាអាវុធដ៏សំខាន់មួយ ក្នុងសង្រ្គាមនៅលីប៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ