រុស្ស៊ីរងការចោទប្រកាន់ថា ធ្វើអោយបែកធ្លាយរឿងអាស្រូវបក្សកាន់អំណាចអាមេរិក ដើម្បីជួយដូណាល់ ត្រាំ
ចុះផ្សាយនៅថ្ងៃ៖
ស្តាប់ - ០៤:៥៧
ក្រោយវេបសាយWikiLeaks ចុះផ្សាយអ៊ីមែលផ្ទៃក្នុងរបស់បក្សប្រជាធិបតេយ្យអាមេរិក បក្សប្រជាធិបតេយ្យបានចោទរុស្ស៊ីតែម្តង ថាជាអ្នកធ្វើអោយបែកធ្លាយរឿងអាស្រូវអ៊ីមេលនេះឡើង ដើម្បីជាប្រយោជន៍ដល់យុទ្ធនាការឃោសនាឆ្នោតរបស់លោកដូណាល់ ត្រាំ ដែលជាបេក្ខជនប្រធានាធិបតី មកពីបក្សសាធារណរដ្ឋ។ រុស្ស៊ីបានបដិសេធការចោទប្រកាន់នេះ។
ស្ថានទូតរុស្ស៊ីប្រចាំសហរដ្ឋអាមេរិក លើកឡើងថា ការចោទនេះ គ្មានមូលដ្ឋានច្បាស់លាស់ទេ។ ថ្ងៃអង្គារនេះ ក្នុងកិច្ចប្រជុំប្រចាំឆ្នាំអាស៊ាន ប្រមុខការទូតរុស្ស៊ី ស៊ែរហ្កី ឡាវ្រូវ បាននិយាយទៅប្រមុខការទូតអាមេរិក ឃែររី ថា លោកមិនចង់ប្រើពាក្យតាមព្យញ្ជនៈប្រកបទេ។ លោកឡាវ្រ៉ូវ ចង់សំដៅន័យថា លោកមិនចង់ប្រកបពាក្យ តាំងពីព្យញ្ជនៈ “ក” ដល់ ព្យញ្ជនៈ “អ” ដើម្បីបញ្ជាក់ថា រុស្ស៊ីគ្មានជាប់ពាក់ព័ន្ធរឿងអាស្រូវអ៊ីមែលបក្សកាន់អំណាចអាមេរិក។ ទីភ្នាក់ងារFBI កំពុងស៊ើបអង្កេតបញ្ហានេះ។
សារអ៊ីមែលផ្ទៃក្នុងបក្សប្រជាធិបតេយ្យបង្កភាពអាម៉ាសដល់រូបភាពបក្ស មុនការបោះឆ្នោត
រឿងអាស្រូវបែកធ្លាយ តាំងពីថ្ងៃសុក្រសប្តាហ៍មុន គឺ៣ថ្ងៃមុនថ្ងៃបើកសមាជបក្សប្រជាធិបតេយ្យអាមេរិក។ វេបសាយវីគីល្លីក បានចុះផ្សាយនូវអ៊ីមែលប្រមាណ២០០០០ច្បាប់របស់មន្ត្រីជាន់ខ្ពស់បក្សប្រជាធិបតេយ្យ៧រូប។ ជាអ៊ីមែលសរសេរឡើង ក្នុងចន្លោះខែមករា ឆ្នាំ២០១៥ និងខែឧសភា២០១៦។ អ៊ីមែលមួយចំនួនបង្ហាញថា ក្នុងការបោះឆ្នោតបឋមជ្រើសតាំងបេក្ខជនប្រធានាធិបតី តំណាងបក្ស គឺតាំងពីដំបូងទីម្ល៉េះ មន្ត្រីធំៗក្នុងបក្សប្រជាធិបេតយ្យបានលំអៀង និងគាំទ្របេក្ខភាពរបស់លោកស្រីហ៊ីលឡារី គ្លីនតុនរួចទៅហើយ។
អ៊ីមែលទាំងនេះបង្ហាញផងដែរ ថាមន្ត្រីធំៗក្នុងបក្សប្រជាធិបតេយ្យបានចំអកមើលងាយសមត្ថភាពលោក ប៊ែរនី សាន់ដឺ មកពីរដ្ឋVermont ដែលជាគូប្រជែងរបស់លោកស្រីគ្លីនតុន។ នេះជាភាពអាម៉ាសរបស់បក្សប្រជាធិបតេយ្យ ព្រោះវាបង្ហាញពីការរើសអើងរបស់មន្ត្រីជាន់ខ្ពស់ក្នុងបក្ស ចំពោះសមាជិកបក្សខ្លួន។
ការលំអៀងនេះ ក៏អាចចាត់ទុកថា ជាអំពើពុករលួយ ជាទង្វើបក្សពួកនិយម។ រឿងអាស្រូវនេះធ្វើអោយខូចឈ្មោះបក្សប្រជាធិបតេយ្យដែលកំពុងកាន់អំណាច ហើយអាចប៉ះពាល់ជំនឿទុកចិត្តប្រជាជនអាមេរិកទៀតផង។ ប្រជាជនដែលគាំទ្របក្សកាន់អំណាច អាចប្រែចិត្ត បោះឆ្នោតអោយលោកដូណាល់ ត្រាំ មកពីបក្សប្រឆាំង បានជាប់ជាប្រធានាធិបតី ពេលខាងមុខ វិញផងក៏ថាបាន។ ពេលបើកសមាជបក្សប្រជាធិបតេយ្យ ម្សិលមិញនេះ មន្ត្រីធំៗក្នុងបក្សបានត្រឹមតែសុំទោសលោកសាន់ដឺប៉ុណ្ណោះ។
សកម្មជនគាំទ្របេក្ខភាពលោកសាន់ដឺ ក៏សង្ស័យពីដំបូងដែរថា វាអាចមានភាពលំអៀងបែបនេះ។ ក្រោយការបែកធ្លាយរឿងអាស្រូវនេះ ក្រុមអ្នកគាំទ្រលោកសាន់ដឺមួយចំនួន ប្រាប់ថា មិនដឹងថា តើខ្លួនត្រូវបោះអោយលោកស្រីគ្លីនតុន ជាប់ជាប្រធានាធិបតីអាមេរិក ខែវិច្ឆិកាខាងមុខរឺយ៉ាងណាទេ។ ដោយសាររឿងអាស្រូវនេះ ថ្ងៃអាទិត្យកន្លងទៅ លោកស្រី ឌែបប៊ី វ៉ាសសឺម៉ាន ស្ហ៊ូល បានប្រកាសលាចេញពីតំណែងប្រធានបក្សប្រជាធិបតេយ្យ។
បក្សប្រជាធិបតេយ្យធ្លាប់រងគ្រោះដោយក្រុមចោរព័ត៌មានវិទ្យាដែលជាប់ពាក់ព័ន្ធនឹងរុស្ស៊ី
ការទំលាក់កំហុសលើរុស្ស៊ី ជារឿងងាយស្រួលធ្វើ។ មូលហេតុដោយសារតែកន្លងមក បក្សកាន៉អំណាចអាមេរិក ធ្លាប់រងគ្រោះដោយសារចោរព័ត៌មានវិទ្យា ដែលជាប់ពាក់ព័ន្ធនឹងរុស្ស៊ី។ កាលពីពាក់កណ្តាលខែមិថុនា ក្រុមហ៊ុនបច្ចេកវិទ្យាព័ត៌មានឈ្មោះថា Crowdstrike ធ្លាប់ប្រាប់ថា ក្រុមចោរព័ត៌មានវិទ្យាយ៉ាងហោច២ក្រុម ជិតដិតនឹងអាជ្ញាធររុស្ស៊ី បានចូលលួចយកព័ត៌មានផ្ទៃក្នុងរបស់បក្សប្រជាធិបតេយ្យ។ ក្រុមទាំង២នេះ ហើយប្រហែលជាប់ពាក់ព័ន្ធនឹងការលួចយកទិន្នន័យព៌ត៌មានរបស់ក្រសួងមន្ទីរផ្សេងៗរបស់អាមេរិកដែរ។
លើសពីនេះ សប្តាហ៍មុន លោកដូណាល់ ត្រាំ លើកឡើងថា បើលោកជាប់ឆ្នោតជាប្រធានាធិបតី ករណីប្រទេសសមាជិកអង្គការអូតង់ណាមួយ រងការវាយប្រហារពីរុស្ស៊ី មុននឹងលោកសម្រេចអោយអាមេរិកធ្វើអន្តរាគមន៍ជួយប្រទេសនោះ លោកត្រូវមើលសិនថា តើប្រទេសនោះបានបំពេញកាតព្វកិច្ចខ្លួនក្នុងអង្គការអូតង់ត្រឹមត្រូវរឺទេ។ ការលើកឡើងបែបនេះ បង្ហាញថា លោកត្រាំមានទំនោរទៅរករុស្ស៊ី។ ហេតុនេះហើយទើបបានជាបក្សប្រជាធិបតេយ្យចោទថា រុស្ស៊ីបង្ករឿងនេះ ដើម្បីជួយលោកត្រាំ។
ក្រុមគាំទ្រលោកស្រីហ៊ីលឡារី គ្លីនតុន ចោទរហូតដល់វេបសាយវីគីល្លីក ដែលចុះផ្សាយអ៊ីមែលទាំងនេះទៀតផង។ ពួកគេចោទថា វីគីល្លីករួមដៃជាមួយរុស្ស៊ី ក្នុងរឿងអាស្រូវនេះ។
អ្នកណាអាចនៅពីក្រោយរឿងអាស្រូវអ៊ីមែលបក្សប្រជាធិបតេយ្យ?
ត្បិតថា រុស្ស៊ីមានជំនាញខ្ពស់ក្នុងរឿងបច្ចេកវិទ្យាព័ត៌មានក៏ពិតមែន ប៉ុន្តែ គេក៏មិនអាចចោទរុស្ស៊ីដោយគ្មានភស្តុតាងជាក់ស្តែងដែរ។ ហើយបើយោងតាមក្រុមជំនាញ បើរុស្ស៊ីពិតជានៅពីក្រោយរឿងអាស្រូវនេះមែន គេក៏ប្រហែលពិបាករកឃើញភស្តុតាងដែរ។
អ្នកជំនាញខ្លះគិតថា រឿងអ៊ីមែលផ្ទៃក្នុងបក្សប្រជាធិបតេយ្យបែកធ្លាយបែបនេះ ប្រហែលអាចជាស្នាដៃសមាជិកក្នុងបក្សខ្លួនឯងផងក៏ថាបាន ហើយពួកគេយករុស្ស៊ីមកធ្វើចង្អេរបាំងមុខតែម្តងទៅ។
ពេលនេះ បញ្ហាកាន់តែស្មុគស្មាញ ព្រោះមានចោរព័ត៌មានវិទ្យាមួយឈ្មោះថា Guccifer បានប្រកាសថា ខ្លួនបានលួចព័ត៌មានបក្សកាន់អំណាចអាមេរិក។ ហើយប្រាប់ទៀតថា ខ្លួនជាជនជាតិរូម៉ានី។ ទីភ្នាក់ងារ FBI បានប្រកាសបើកការស៊ើបអង្កេតលើរឿងរ៉ាវនេះ។
វេបសាយវីគីល្លីកលើកឡើងថា ខ្លួនមិនដឹង ហើយក៏មិនចង់ដឹងថា តើព័ត៌មានដែលខ្លួនបានទទួល និងបានចុះផ្សាយនោះ មានប្រភពមកពីខាងណាដែរ។ លោកដូណាល់ ត្រាំ វិញប្រតិកម្មបែបកំប្លែងថា វាជារឿងកំប្លែងប្រចាំថ្ងៃ។ លោកត្រាំ ថារុស្ស៊ីធ្វើអោយបែកធ្លាយអ៊ីមែលបក្សប្រជាធិបតេយ្យ ក៏ដោយសារតែលោកពូទីនស្រលាញ់ចូលចិត្តរូបលោកដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ