ការកំណត់រូបមន្តតម្លៃប្រេងនៅកម្ពុជា ត្រូវបានដាក់ចេញហើយ!
ទីបំផុតទៅការកំណត់រូបមន្តសម្រាប់កែសម្រូលថ្លៃលក់រាយប្រេងឥន្ធនៈនៅកម្ពុជាត្រូវបានអន្តរក្រសួងប្រកាសដាក់ចេញជាផ្លូវការហើយនៅថ្ងៃទី៩ មីនាម្សិលមិញនេះ។ ការកំណត់រូបមន្តប្រេងនៅកម្ពុជាត្រូវបានសម្រេចដោយមាន១១ប្រការ ហើយផ្តោតសំខាន់ទៅលើការកំណត់រូបមន្តតម្លៃប្រេងសម្រាប់លក់រាយ។ គួររម្លឹកជូនថា ការកំណត់រូបមន្តនេះត្រូវបានធ្វើឡើងបន្ទាប់ពីតម្លៃប្រេងសាំងនៅកម្ពុជានៅតែបន្តមានតម្លៃថ្លៃប្រៀបធៀបនឹងបណ្តាប្រទេសជិតខាង ហើយទោះបីជាតម្លៃប្រេងនៅលើពិភពលោកចុះថ្លៃខ្លាំងក៏ដោយ។ អញ្ចឹងហើយទើបរដ្ឋាភិបាលកម្ពុជាបង្កើតក្រុមការងារអន្តរក្រសួងដើម្បីដោះស្រាយបញ្ហានេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
ក្រសួងពាណិជ្ជកម្ម ក្រសួងសេដ្ឋកិច្ច និងហិរញ្ញវត្ថុ និងក្រសួងរ៉ែ និងថាមពល ដែលជាអន្តរក្រសួងបានសម្រេចដាក់ចេញនូវការកំណត់រូបមន្តសម្រាប់កែសម្រួលថ្លៃលក់រាយប្រេងសាំងនៅកម្ពុជា ដែលផ្តោតសំខាន់ទៅលើតម្លៃលក់រាយ ប្រេងក្នុងមួយលីត្រៗ។ ប្រការ១ បានបញ្ជាក់ថា កំណត់រូបមន្តសម្រាប់កែសម្រួលថ្លៃលក់រាយ ប្រេងឥន្ធនៈនៅកម្ពុជាដើម្បីឲ្យថ្លៃលក់រាយប្រេងឡើងចុះតាមតម្លៃប្រេងនៅលើទីផ្សារអន្តរជាតិ។ ការកំណត់រូបមន្តនេះ សម្រាប់ដាក់ឲ្យអនុវត្តតែទៅលើការលក់រាយប្រេងឥន្ធនៈតែប៉ុណ្ណោះ។
ការកំណត់រូបមន្តនេះទៀតសោតក៏ត្រូវបានធ្វើឡើងដោយមានរូមមន្តកំណត់មួយច្បាស់លាស់ ហើយដែលត្រូវបានព្រមព្រៀងឡើងរវាងតំណាងក្រុមហ៊ុនប្រេងនៅកម្ពុជា និងរដ្ឋាភិបាលកម្ពុជា។ ការកំណត់តម្លៃនេះនឹងត្រូវធ្វើឡើងក្នុងរយៈពេល១០ថ្ងៃម្តង។ តម្លៃដែលត្រូវបានកំណត់រួចនឹងដាក់ចេញនៅរៀងរាល់ថ្ងៃទី ០១ ថ្ងៃទី១១ និងថ្ងៃទី២១ នៃខែនីមួយៗ។
ការសម្រេចនេះក៏បានសង្កត់ធ្ងន់ផងដែរថា ប្រសិនបើស្ថានីយ៍ណាមួយមិនគោរពទៅតាមសេចក្តីប្រកាសនេះ នឹងត្រូវពិន័យជាប្រាក់ដោយមិនលើសពី ៤លានរៀល។ ហើយប្រសិនបើរងការផាកពិន័យរួចហើយ ហើយនៅតែបន្តធ្វើខុសទៀតនោះ អាចនឹងត្រូវបិទផ្អាកមិនឲ្យធ្វើអាជីវកម្មតែម្តង។
ជាងនេះទៅទៀតអន្តរក្រសួងក៏នឹងធ្វើការប្រជុំរៀងរាល់៦ខែម្តង ជាមួយនឹងក្រុមហ៊ុនប្រេងឥន្ធនៈ ដើម្បីពិនិត្យឡើងវិញអំពីតម្លៃប្រេង។ សូមជម្រាបជូនផងដែរតម្លៃប្រេងសាំងនៅកម្ពុជានៅថ្ងៃទី១០មីនានេះ គឺមានតម្លៃប្រហាក់ប្រហែលគ្នាសម្រាប់ក្រុមហ៊ុនប្រេងឥន្ធនៈធំៗនៅកម្ពុជា ដែលមានដូចជាក្រុមហ៊ុនតូតាល់ កាល់តិច សូគីម៉ិច តេលា និងភីធីធីជាដើម គឺមានតម្លៃ ៣៥៥០រៀល សម្រាប់ប្រេងសាំងស៊ុបពែរ និងតម្លៃ ៣២៥០រៀលសម្រាប់សាំងធម្មតា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ