អេហ្ស៊ីប៖បន្ទាប់ពីឋានន្តរស័ក្តិជាសេនាប្រមុខ លោកស៊ីសស៊ីកំពុងសម្លឹងវិមានប្រធានាធិបតី
ចុះផ្សាយនៅថ្ងៃ៖
ស្តាប់ - ០៤:៥១
នៅក្នុងប្រទេសអេហ្ស៊ីប ជិតមួយឆ្នំាក្រោយរដ្ឋប្រហារយោធាទម្លាក់លោកប្រធានាធិបតីជាប់ឆ្នោតស្របច្បាប់ម័រស៊ី និងមួយខែបន្ទាប់ពីអេហ្ស៊ីបមានច្បាប់រដ្ឋធម្មនុញ្ញថ្មីមក ការរៀបចំបោះឆ្នោតជ្រើសរើសប្រធានាធិបតីថ្មីត្រូវបានគេគ្រោងរៀបចំក្នុងឆ្នំា ២០១៤ នេះ តែនៅមិនទាន់កំណត់ថ្ងៃ ខែច្បាស់លាស់ទេ។ និយាយពីចំនួនបេក្ខជនដែលកំពុងត្រៀមប្រកាសឈរឈ្មោះវិញ គឺទើបមានតែលោកហាម ដេន សាបាហ៊ីម្នាក់គត់ដែលបានប្រកាសឲ្យដឹងកាលពីថ្ងៃទី៨ កុម្ភៈសប្តាហ៍កន្លងទៅ។ លោកសាបាហ៊ី គឺជាប្រធានគណបក្សឆ្វេងនិយម។ តែបើការស្ទង់មតិ និងពាក្យចចាមអារ៉ាម ឥស្សរជនដែលប្រជាជនអេហ្ស៊ីបទូទៅចង់បានជាប្រធានាធិបតីនោះ គឺលោកសេនាប្រមុខលោកអាប់ដែល ហ្វាត់តា អាល់-ស៊ីសស៊ីឯណោះទេ។ លោកស៊ីសស៊ីដែលនៅបន្តស្ងាត់ស្ងៀមមិនទាន់និយាយអ្វីទំាងអស់មកដល់ថ្ងៃនេះ។ តើលោកស៊ីសស៊ីផ្តើមមានប្រជាប្រិយភាពយ៉ាងដូចម្តេច?
ចាប់ផ្តើមពីឋានៈជាឧត្តមសេនីយ ឈ្មោះស៊ីសស៊ីបានចាប់ផ្តើមជ្រាបចូលបន្តិចម្តងៗទៅក្នុងស្រទាប់អ្នកនយោបាយអេហ្ស៊ីប ក៏ដូចជាមហាជនអេហ្ស៊ីបទូទៅ នៅពេលដែលលោកបានលាតត្រដាងប្រាប់ពិភពលោកអំពីភាពស្អាតស្អំរបស់កូនទាហានរបស់ខ្លួន។ អ្វីៗបានកើតមានឡើងនៅក្នុងឆ្នំា ២០១១ ឆ្នំាដែលអេហ្ស៊ីបបានទទួលចម្លងយកបដិវត្តន៍អារ៉ាប់ដែលបានផ្ទុះដំបូងនៅក្នុងប្រទេសទុយនីស៊ី។ នៅក្នុងព្រឹត្តិការណ៍បាតុកម្មបះបោរនៅក្នុងប្រទេសអេហ្ស៊ីបនាពេលនោះ កម្លំាងទ័ពរបស់ឧត្តមសេនីយស៊ីសស៊ីបានឃាត់ខ្លួនបាតុករនារីវ័យក្មេងស្អាតៗជាច្រើនរូប។ តែភស្តុតាងដែលលោកស៊ីសស៊ីបានបង្ហាញប្រាប់ពីភាពស្អាតស្អំរបស់កម្លំាងទាហានរបស់គាត់នោះនៅត្រង់ថា គ្មាននារីបាតុករវ័យក្មេងណាម្នាក់ត្រូវបានកូនទាហានរបស់គាត់ចាប់រំលោភនោះទេ។ នេះពិតជាទង្វើមួយដែលបានធ្វើឲ្យស្ថាប័នកងទ័ពរួចផុតពីការចោទប្រកាន់របស់នារីបាតុករវ័យក្មេងទំាងនោះ។
ផ្តើមចេញពីចំណុចនេះ និងអ្វីដែលគួរឲ្យកត់សម្គាល់នាពេលនោះនៅត្រង់ថា គ្មានមធ្យោបាយឃោសនាមហាជនណាមួយបានចាប់អារម្មណ៍ និងនឹកស្មានដល់សោះឡើយថា រូបឧត្តមសេនីយដ៏វ័យក្មេងជាងគេនៅក្នុងឧត្តមក្រុមប្រឹក្សាកងទ័ពអេហ្ស៊ីបរូបនេះបានក្លាយជាតួអង្គដ៏សំខាន់ម្នាក់នៅក្នុងស្ថានការណ៍ប្រទេសអេហ្ស៊ីបសព្វថ្ងៃឡើយ។ ជាការពិតនៅពេលនោះ សូម្បីតែមហាជនអេហ្ស៊ីបទូទៅក៏មិនសូវស្គាល់លោកស៊ីសស៊ីដែរ ទោះបីជាគាត់មានតួនាទីជាប្រធានផ្នែកស៊ើបការណ៍សម្ងាត់ក៏ដោយ។
នៅក្រោយការលាលែងពីមុខតំណែងប្រធានាធិបតីរបស់លោកហូស្នី មូបារាក់ក្នុងខែកុម្ភៈ ឆ្នំា ២០១១ ក្រោមសម្ពាធរបស់បាតុករនៅតាមផ្លូវ ឧត្តមក្រុមប្រឹក្សាកងទ័ពក៏បានឡើងកាន់អំណាចដើម្បីដោះស្រាយកិច្ចការប្រទេស។ គឺនៅពេលនោះហើយដែលការិយាល័យរបស់លោកស៊ីសស៊ីបានក្លាយជាទីស្នាក់ការកណ្តាលនៃកិច្ចចរចានយោបាយគ្រប់ស្រទាប់វណ្ណៈ។ គឺរូបឧត្តមសេនីយស៊ីសស៊ីនេះឯងជាអ្នករៀបចំឲ្យមានជំនួបរវាងឥស្សរជននយោបាយគ្រប់និន្នាការដើម្បីស្វែងរកដំណោះស្រាយនយោបាយមួយ នៅក្រោយលោកមូបារ៉ាក់។ កាលណោះ ក៏មានការចូលរួមពីក្រុមភាតរៈអ៊ីស្លាមដែលតំណាងដោយលោកម័រស៊ីផងដែរ។ លោកម័រស៊ីដែលបានជាប់ឆ្នោតជាប្រធានាធិបតីក្នុងខែមិថុនា ឆ្នំា ២០១២តែត្រូវបានគេធ្វើរដ្ឋប្រហារយោធាទម្លាក់វិញកាលពីរដូវក្តៅឆ្នំា ២០១៣។
គឺនៅក្នុងជំនាន់លោកប្រធានាធិបតីម័រស៊ីនោះឯងដែលលោកស៊ីសស៊ីបានទទួលតំណែងជារដ្ឋមន្រ្តីក្រសួងការពារជាតិ។ គឺតាមរយៈពិធីស្បថចូលកាន់តំណែងប្រមុខក្រសួងការពារជាតិនោះហើយដែលមជ្ឈដ្ឋានទូទៅបានឃើញ បានស្គាល់ និងបានឮសម្លេងលោកស៊ីសស៊ី។ មានអាយុ ៥៩ឆ្នំា ឧត្តមសេនីយស៊ីសស៊ីមានកូនប្រុស ៣នាក់ និងកូនស្រីម្នាក់។ នៅក្នុងខែមករាកន្លងទៅថ្មីៗនេះ លោកស៊ីសស៊ីបានទទួលឋានន្តរស័ក្តិជាសេនាប្រមុខដែលតួនាទីនេះបានធ្វើឲ្យលោកក្លាយជាសេនាប្រមុខទី៩ នៅក្នុងប្រវត្តិកងទ័ពអេសហ្ស៊ីប។
តាមពិតទៅ កេរ្តិ៍ឈ្មោះលោកស៊ីសស៊ីបានលេចលឺ ខ្ចរខ្ចាយខ្លំាងនៅក្នុងមហាបាតុកម្មប្រឆំាងលោកប្រធានាធិបតីម័រស៊ីក្នុងឆ្នំា ២០១៣។ គឺជាព្រឹត្តិការណ៍មួយដែលឧត្តមសេនីយស៊ីសស៊ីយល់មិនច្រឡំទេថា ជាឱកាសមួយល្អណាស់សម្រាប់រូបលោក។ អ៊ីចឹងហើយបានជាឆ្លៀតក្នុងឱកាសនោះ លោកស៊ីសស៊ីបានធ្វើអ្វីៗគ្រប់បែបយ៉ាងទំាងអស់ដើម្បីកំចាត់លោកម័រស៊ីចេញពីអំណាច ព្រមទំាងគាស់រំលើងឫសគល់រចនាសម្ព័ន្ធរបស់ក្រុមភាតរៈអ៊ីស្លាមទៀតផង។ គឺការចេញឆ្លើយតបតាមការចង់បានរបស់ប្រជាជននេះហើយដែលបានធ្វើឲ្យលោកស៊ីសស៊ីទទួលបានប្រជាប្រិយភាពខ្ពស់ រហូតដល់ធ្វើឲ្យប្រជាជនអេហ្ស៊ីបទូទៅចាត់ទុកលោកជាវីរជនម្នាក់ដែលសក្តិសមនឹងទទួលបានតំណែងប្រធានាធិបតីនាពេលខាងមុខ។
អស់រយៈពេលជាច្រើនសប្តាហ៍កន្លងមកហើយ ដែលប្រជាជនអេហ្ស៊ីបបានអំពាវនាវឲ្យឧត្តមសេនីយស៊ីសស៊ីប្រកាសបេក្ខភាពឈរឈ្មោះបោះឆ្នោតនៅថ្ងៃខាងមុខ។ តែមកទល់ពេលនេះ លោកស៊ីសស៊ីនៅបន្តស្ងៀមស្ងាត់ មិនទាន់និយាយស្តីអ្វីទំាងអស់។ ទោះជាយ៉ាងនេះក្តី ក៏ប្រជាជនអេហ្ស៊ីបមិនបារម្ភដែរ ព្រោះលោកស៊ីសស៊ីធ្លាប់បានបង្ហើបឲ្យដឹងរួចហើយថា លោកត្រូវការជំនួយពីប្រជាជនដើម្បីព្យាបាលជំងឺប្រចំាកាយរបស់អេហ្ស៊ីបដែលបានធ្លាក់ដុនដាបខ្លំាងក្នុងរយៈពេលប៉ុន្មានខែចុងក្រោយនេះ។ តើនេះមិនមែនជាសម្តីអំពាវនាវរបស់ថ្នាក់ដឹកនំាជាន់ខ្ពស់ម្នាក់ទេ ឬយ៉ាងណា?
សូមជម្រាបជូនថា នៅក្នុងប្រវត្តិប្រធានាធិបតីនៅក្នុងប្រទេសអេហ្ស៊ីប រូបប្រធានាធិបតីសុទ្ធតែមានប្រភពចេញមកពីជួរកងទ័ពទំាងអស់ គឺទើបតែមានលោកប្រធានាធិបតីម័រស៊ីជាប់ឆ្នោតក្នុងឆ្នំា ២០១២ តែម្នាក់គត់ដែលមិនធ្លាប់ពាក់ឯកសណ្ធានជាយោធា។ តែដូចគេបានឃើញជាក់ស្តែងនឹងភ្នែករួចហើយ រូបប្រធានាធិបតីដែលមិនធ្លាប់ពាក់ខោ អាវទាហានមិនអាចអង្គុយកៅអីប្រធានាធិបតីបានយូរឡើយ។ ដូច្នេះ វាពិតជាមិនភ្ញាក់ផ្អើលអ្វីទេ ដែលប្រទេស និងប្រជាជនអេហ្ស៊ីបកំពុងត្រៀមខ្លួនទទួលរូបប្រធានាធិបតីថ្មីម្នាក់ដែលចេញពីជួរកងទ័ព។ បន្ទាប់ពីទទួលបានឋានន្តរស័ក្តិជាសេនាប្រមុខ លោកស៊ីសស៊ីកំពុងសម្លឹងវិមានប្រធានាធិបតី។ វិមានប្រធានាធិបតីដែលលោកស៊ីសស៊ីត្រូវការឈានតែមួយជំហានទៀតប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ