ផ្ទុះភេរវកម្មនៅក្រុងគែរ ថ្ងៃប្រារព្ធខួប៣ឆ្នាំនៃចលនាបដិវត្តន៍ទំលាក់លោកមូបារ៉ាក់
នៅប្រទេសអេហ្ស៊ីប ព្រឹកថ្ងៃសៅរ៍នេះ ការបំផ្ទុះភេរវកម្មគ្រាប់បែកមួយបានកើតឡើង នៅជិតសាលាប៉ូលិសទីក្រុងគែរ ប៉ុន្តែមិនបានបណ្តាលអោយមានអ្នករបួសទេ។ ភេរវកម្មនេះ កើតឡើង ចំថ្ងៃប្រារព្ធខួប៣ឆ្នាំនៃចលនាបដិវត្តទំលាក់អតីតប្រធានាធិបតី ហូស្ន៊ី មូបារ៉ាក់ កាលពីថ្ងៃ២៥មករា ឆ្នាំ២០១១។ នៅថ្ងៃសុក្រម្សិលមិញនេះដែរ មានភេរវកម្មចំនួន៤ បានផ្ទុះឡើង នៅទីក្រុងគែរ សម្លាប់មនុស្ស៦នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
ថ្ងៃសៅរ៍ ២៥មករា នេះ អេហ្ស៊ីបរៀបចំប្រារព្ធខួប៣ឆ្នាំ នៃចលនាបដិវត្តន៍ទំលាក់អតីតប្រធានាធិបតី ហូស្ន៊ី មូបារ៉ាក់ ក្នុងស្ថានភាពតានតឹងបំផុត។ តាំងតែពីព្រឹកព្រលឹម គ្រាប់បែកបានផ្ទុះនៅជិតសាលាប៉ូលិសមួយកន្លែង នៅទីក្រុងគែរ។ ហើយនៅថ្ងៃសុក្រម្សិលមិញនេះដែរ ក្រុងគែររងនូវភេរវកម្មចំនួន៤ ក្នុងនោះ ភេរវកម្មចំនួន៣ ជាភេរវកម្មប្រឆាំងប៉ូលិស ដោយសារការផ្ទុះបានកើតឡើង នៅមុខអគារប៉ូលិស និងស្នងការប៉ូលិស ធ្វើអោយមានប៉ូលិសស្លាប់។
អំពើភេរវកម្មទាំង៤នៅថ្ងៃសុក្រម្សិលមិញ គឺជាស្នាដៃរបស់ក្រុមឧទ្ទាមជីហាដមួយ នៅស៊ីណៃ មានឈ្មោះថា អាន់សារ បៃអ៊ីត អាល់ ម៉ាក់ឌី ជាក្រុមជាប់ពាក់ព័ន្ធនឹងក្រុមអាល់កៃដា។ ចាប់តាំងពីកងទ័ពអេហ្ស៊ីបទំលាក់អតីតប្រធានាធិបតីមរស៊ី ពីអំណាច នៅដើមខែកក្កដា ឆ្នាំ២០១៣មក ក្រុមឧទ្ទាមជាច្រើនបានបង្កភេរវកម្មវាយប្រហារប៉ូលិស ដើម្បីសងសឹកនឹងការដែលកងទ័ពបានប្រើហិង្សាបង្ក្រាប សកម្មជនគាំទ្រលោមមរស៊ី។
រដ្ឋាភិបាលយោធាអេហ្ស៊ីបបច្ចុប្បន្ន ដឹកនាំដោយប្រមុខទ័ព អាល់ស៊ីសស៊ី បានចោទសកម្មជនបក្សភាតរអ៊ីស្លាមរបស់លោកមរស៊ី ថាជាអ្នកបង្កអំពើភេរវកម្មទាំងអស់នេះ ហើយបានចាត់ទុកសកម្មជនភាតរអ៊ីស្លាម ជាក្រុមភេរវជន។ ជាង៧ខែមកនេះ រដ្ឋាភិបាលអេហ្ស៊ីប បានបង្ក្រាបរាល់បាតុកម្មគាំទ្រលោកមរស៊ី។ មនុស្សជាងមួយពាន់នាក់ បានស្លាប់ ហើយរាប់ពាន់នាក់ទៀត ត្រូវបានចាប់ខ្លួន ភាគច្រើនជាសមាជិកបក្សភាតរអ៊ីស្លាមរបស់លោកមរស៊ី។
សម្រាប់ថ្ងៃប្រារព្ធខួប៣ឆ្នាំនៃចលនាបដិវត្តន៍ទំលាក់អតីតប្រធានាធិបតីមូបារ៉ាក់ ថ្ងៃសៅរ៍នេះ ក្រសួងមហាផ្ទៃអេហ្ស៊ីបបានអំពាវនាវអោយប្រជាជនចុះតាមផ្លូវអោយបានច្រើនកុះករ ក្នុងពិធីបុណ្យនេះ។ ដោយឡែក ក្រសួងមហាផ្ទៃអេហ្ស៊ីបបានព្រមានទុកជាមុនថា នឹងធ្វើការតបតប្រសិនបើក្រុមភាតរអ៊ីស្លាមហ៊ានប៉ះពាល់ទិវាខួបនេះ។ គួររំលឹកថា បន្ទាប់ពីបានទំលាក់លោកមូបារ៉ាក់ ពីអំណាច ថ្ងៃ២៥មករា ឆ្នាំ២០១១មក កងទ័ពអេហ្ស៊ីបបានគ្រប់គ្រងអេហ្ស៊ីបបណ្តោះអាសន្ន មុននឹងប្រគល់អំណាចអោយទៅលោកមរស៊ី ដែលបានជាប់ឆ្នោតជាប្រធានាធិបតី ក្នុងខែមិថុនា ឆ្នាំ២០១២។ ការទំលាក់លោកមរស៊ីពីអំណាច បានធ្វើអោយកងទ័ពអេហ្ស៊ីបទទួលបានការគាំទ្រខ្លាំងក្លា ពីប្រជាជន ក្នុងពេលបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ