ប្រមុខទ័ពអេហ្ស៊ីប អាល់ ស៊ីសស៊ី ឡើងឋានន្តរស័ក្តិជាសេនាប្រមុខ មុនការបោះឆ្នោតប្រធានាធិបតី
នៅប្រទេសអេហ្ស៊ីប លោក អាប់ឌែល ហ្វាតា អាល់ ស៊ីសស៊ី ជាប្រមុខទ័ពដែលបានទំលាក់អតីតប្រធានាធិបតីមរស៊ី ពីអំណាច កាលពីខែកក្កដា ឆ្នាំ២០១៣នោះ បានត្រូវដំឡើងឋានន្តរស័ក្តិជាសេនាប្រមុខ ក្នុងប្រទេស គឺជាឋានន្តរស័ក្តិយោធាខ្ពស់បំផុត។ នៅថ្ងៃចន្ទនេះ ផ្នែកបញ្ជាការយោធា បានពិភាក្សាគ្នាពីលទ្ធភាពដែលលោកអាល់ស៊ីសស៊ី អាចឈរបេក្ខភាព ជាប្រធានាធិបតី ក្នុងពេលបោះឆ្នោតខាងមុខនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៧
នៅប្រទេសអេហ្ស៊ីប ថ្ងៃចន្ទនេះ ផ្នែកបញ្ជាការយោធាបានរៀបចំការពិភាក្សាគ្នា ស្តីពីស្ថានភាពសុវត្ថិភាពសន្តិសុខក្នុងប្រទេស ព្រមទាំងពីលទ្ធភាពរបស់សេនាប្រមុខ អាប់ឌែល ហ្វាតា អាល់ស៊ីសស៊ី ក្នុងការដាក់បេក្ខភាពជាប្រធានាធិបតី សម្រាប់ការបោះឆ្នោតនាពេលខាងមុខនេះផងដែរ។ យោងតាមអ្នកជិតដិតនឹងសេនាប្រមុខយោធា អាល់ស៊ីសស៊ី ជាច្រើនរូប លោកអាល់ ស៊ីសស៊ី មានបំណងចង់ដាក់បេក្ខភាពលោក ជាប្រធានាធិបតី ក្នុងការបោះឆ្នោតប្រធានាធិបតីនេះ។
កាលពីថ្ងៃអាទិត្យ ប្រធានាធិបតីស្តីទី អាដលី ម៉ាន់សួ បានប្រកាសថា ការបោះឆ្នោតប្រធានាធិបតី នឹងធ្វើឡើង មុនការបោះឆ្នោតសភា។ ការបោះឆ្នោតប្រធានាធិបតី ត្រូវបានគ្រោងធ្វើ ក្នុងរវាង៣ខែខាងមុខនេះហើយ។ ប្រធានាធិបតីស្តីទី ម៉ាន់សួ បានដំឡើងឋានន្តរស័ក្តិ ប្រមុខទ័ព អាល់ ស៊ីសស៊ី អោយក្លាយជាសេនាប្រមុខប្រចាំប្រទេស។ នេះគឺជាឋានន្តរស័ក្តិយោធាខ្ពស់បំផុតនៅអេហ្ស៊ីប។ ឋានន្តរស័ក្តិនេះ សបង្ហាញថា កងទ័ពអេហ្ស៊ីបបានពោលពាក្យ លាគ្នាជាមួយមេដឹកនាំរបស់ខ្លួន មុនពេលបោះឆ្នោត។
ដើម្បីក្លាយជាបេក្ខជនឈរឈ្មោះបោះឆ្នោត លោកអាល់ស៊ីសស៊ី អាយុ៥៩ឆ្នាំ ក្នុងតួនាទីជារដ្ឋមន្ត្រីការពារជាតិ និងឧបនាយករដ្ឋមន្ត្រី ក្នុងរដ្ឋាភិបាលស្តីទីអេហ្ស៊ីប ត្រូវតែចូលនិវត្តន៍ រឺក៏លាលែងពីតំណែងជាមុនសិន ព្រោះថា រដ្ឋធម្មនុញ្ញចែងថា ប្រធានាធិបតីត្រូវតែជាជនស៊ីវិលធម្មតា។
ងាកមើលស្ថានភាពក្នុងប្រទេសវិញ។ ជាង៧ខែមកនេះ មានបាតុករគាំទ្រអតីតប្រធានាធិបតីមរស៊ី ជាង១ពាន់នាក់ហើយ ដៃលបានបាត់បង់ជីវិតក្នុងការបង្ក្រាបរបស់ប៉ូលិសនិងទាហាន។ សកម្មជនអ៊ីស្លាមរាប់ពាន់នាក់ ភាគច្រើនជាសមាជិកបក្សភាតរអ៊ីស្លាមរបស់លោកមរស៊ី ត្រូវបានអាជ្ញាធរចាប់ខ្លួន។
គ្រាន់តែចុងសប្តាហ៍កន្លងទៅ ពិសេសកាលពីថ្ងៃសៅរ៍ ២៥មករា ក្នុងឱកាសប្រារព្ធខួប៣ឆ្នាំនៃចលនាបដិវត្តន៍ទំលាក់អតីតប្រធានាធិបតីមូបារ៉ាក់ ពីអំណាច ទីក្រុងគែរបានរងភេរវកម្មជាច្រើន ហើយអំពើហិង្សាបានសម្លាប់មនុស្សយ៉ាងហោច៥០នាក់ផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ