ទីក្រុងអាប៊ីដហ្សង់នៃប្រទេសកូតឌីវ័ររង់ចាំការវាយប្រយុទ្ធផ្តាច់ព្រ័ត្រ
ចុះផ្សាយនៅថ្ងៃ៖
ស្តាប់ - ០៤:២៨
កងកម្លាំងគាំទ្រលោកប្រធានាធិបតីវ៉ាត់តារ៉ាបានសន្យាថានឹងមាន ការវាយលុកមួយដែលមានទ្រង់ទ្រាយធំនៅថ្ងៃសៅរ៍ម្សិលមិញ ក៏ប៉ុន្តែនៅទីបំផុតគេពុំឃើញអ្វីកើតមានឡើយ។ ទោះបីជា គេឃើញមានការបាញ់គ្នានៅជុំវិញវិមានរបស់ឡូរ៉ង់បាកបូហើយនិងនៅជិត បន្ទាយទាហានក៏ដោយ ក៏គេពុំបានឃើញកើតមានការវាយប្រហារគ្នាដែលមានលក្ខណៈខ្លាំងក្លា ដូចកាលនៅថ្ងៃសុក្រកន្លងទៅឡើយ។ "បំរាមគោចរ”ដែលបានប្រកាសដោយរដ្ឋាភិបាលរបស់លោកវ៉ាត់តារ៉ាបានត្រូវ ដាក់បន្តឲ្យមានរហូតដល់ថ្ងៃចន្ទស្អែកវេលាម៉ោង៦ព្រឹក។
នៅពេញមួយថ្ងៃសៅរ៍ទី២មេសាឆ្នាំ២០១១ គេនាំគ្នាទន្ទឹងរង់ចាំមើលកងកម្លាំងគាំទ្រលោកប្រធានាធិបតីវ៉ាត់តារ៉ាធ្វើការវាយលុកមួយដែលមានទ្រង់ទ្រាយធំទៅលើទីក្រុងអាប៊ីដហ្សង់ដ៏ធំជាងគេនៅប្រទេសកូតឌីវ័រ ក៏ប៉ុន្តែនៅទីបំផុតគេពុំឃើញអ្វីកើតមានឡើយ ក្រៅតែពីមានការវាយប្រយុទ្ធគ្នានៅសង្កាត់Plateau ដែលមានវិមានប្រធានាធិបតី។
បើយោងតាមប្រភពជាក់ច្បាស់ខ្លះបានឲ្យដឹងថា ទាំងនេះបណ្តាលមកពីកងកម្លាំងយោធាគាំទ្រលោកប្រធានាធិបតីវ៉ាត់តារ៉ានៅរង់ចាំកងកម្លាំងមួកខៀវរបស់អ ស ប វាយកំទេចសព្វាវុធធុនធ្ងន់ៗរបស់កងកម្លាំងយោធាគាំទ្រឡូរ៉ង់បាកបូជាមុនសិន។ ក៏ប៉ុន្តែ ដោយមានការខកខាន ការវាយលុកមួយដែលមានទ្រង់ទ្រាយធំទៅលើទីក្រុងអាប៊ីដហ្សង់ដោយកងកម្លាំងគាំទ្រលោកប្រធានាធិបតីវ៉ាត់តារ៉ាក៏ពុំបានកើតមានដូចសន្យា។
ការខកខាននៃការវាយប្រយុទ្ធផ្តាច់ព្រ័ត្រនៅទីក្រុងអាប៊ីដហ្សង់ដែលជាទីក្រុងធំជាងគេនៅប្រទេសកូតឌីវ័រពិតជាធ្វើឲ្យឡូរ៉ង់បាកបូទាញយកផលចំណេញបានច្រើន ហើយដោយសារតែកងកម្លាំងយោធាគាំទ្រឡូរ៉ង់បាកបូវាយយកទូរទស្សន៍រដ្ឋកូតឌីវ័របានមកវិញ ទើបពួកឡូរ៉ង់បាកបូបានមានលទ្ធភាពបញ្ជូនសារឲ្យទៅទាហានរបស់ខ្លួន ជាពិសេស “ក្រុមយុវជនស្នេហាជាតិ”របស់ឡូរ៉ង់បាកបូឲ្យកេណ្ឌប្រមូលគ្នីគ្នាដើម្បីការពារបក្សពួករបស់ខ្លួន។
គួរកត់សម្គាល់ថា នៅរសៀលនៃថ្ងៃសៅរ៍ម្សិលមិញ គេឃើញមានអ្នកគាំទ្រឡូរ៉ង់បាកបូជាច្រើនរយនាក់បាននាំគ្នាដើរសំដៅទៅកាន់វិមានប្រធានាធិបតីនិងគេហដ្ឋានរបស់ឡូរ៉ង់បាកបូដោយបាននាំគ្នាស្រែកច្រៀងចម្រៀងសាសនានិងស្រែកពាក្យស្លោកថា “ប្រទេសកូតឌីវ័រជារបស់ប្រជាជនកូតឌីវ័រ” ហើយពូកគេមានឆន្ទៈយ៉ាងមុតមាំថា គេនឹងនាំគ្នាធ្វើជា “ខែលមនុស្ស”សម្រាប់ការពារបុរសជើងឯករបស់គេ។
ការចូលប្រឡូកក្នុងឆាកប្រយុទ្ធនៃ “ក្រុមយុវជនស្នេហាជាតិ”របស់ឡូរ៉ង់បាកបូពិតជាធ្វើឲ្យកងកម្លាំងគាំទ្រលោកវ៉ាត់តារ៉ាជួបនឹងបញ្ហាច្រើន។ ដោយហេតុថា ដើម្បីបំពេញកាតព្វកិច្ចយោធារបស់ខ្លួន កងកម្លាំងគាំទ្រលោកវ៉ាត់តារ៉ាអាចនឹងបាញ់ទៅលើ“ក្រុមយុវជនស្នេហាជាតិ”របស់ឡូរ៉ង់បាកបូដែលជាជនស៊ីវិល។ ទាំងនេះពិតជាបង្កើតឲ្យមានបញ្ហាចម្រូងចម្រាសច្រើន។ ក៏ប៉ុន្តែអ្នកជំនិតនឹងលោកប្រធានាធិបតីវ៉ាត់តារ៉ាបានសម្តែងឲ្យដឹងនៅថ្ងៃសៅរ៍ម្សិលមិញថា គោលដៅរបស់លោកប្រធានាធិបតីវ៉ាត់តារ៉ាគ្មានប្តូរប្រែបន្តិចសោះឡើយ។ បើឡូរ៉ង់បាកបូអាចបង្កឲ្យមានវឹកវរនៅក្នុងប្រទេសកូតឌីវ័រ កងកម្លាំងគាំទ្រលោកប្រធានាធិបតីវ៉ាត់តារ៉ាក៏ពុំអាចដើរថយក្រោយបានឡើយ។
សូមបញ្ជាក់ថា នៅព្រឹកថ្ងៃអាទិត្យទី៣មេសានេះ រដ្ឋមន្ត្រីក្រសួងការបរទេសអាមេរិកលោកស្រីគ្លីនតុនបានថ្លែងប្រកាសថា ឡូរ៉ង់បាកបូត្រូវតែចាកចេញពីមុខតំណែងភ្លាមៗដោយគ្មានបង្អង់ ដោយហេតុថាការរក្សាមុខតំណែងប្រធានាធិបតីដោយលោកឡូរ៉ង់បាកបូនឹងរុញច្រានឲ្យប្រទេសកូតឌីវ័រធ្លាក់ទៅក្នុងភាពវឹកវរអនាធិបតេយ្យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ