វិបត្តិនយោបាយថៃ៖ក្រុមប្រឆំាងកំពុងរៀបចំជើងព្រួលផ្តាច់ព្រ័ត្រដើម្បីទម្លាក់លោកស្រីយីងឡាក់
ចុះផ្សាយនៅថ្ងៃ៖
ស្តាប់ - ០៥:៥៧
វិបត្តិនយោបាយនៅក្នុងប្រទេសថៃបានឈានចូលដល់ផ្លូវរបត់ថ្មីមួយដោយនៅថ្ងៃចន្ទ ទី១៣ មករា ក្រុមបាតុករអាវលឿងដែលដឹកនំាដោយលោកអតីតឧបនាយករដ្ឋមន្រ្តីស៊ូថេបកំពុងត្រៀមខ្លួនចុះផ្លូវធ្វើមហាបាតុកម្មជាថ្មីក្នុងទីក្រុងបាងកក។ គោលដៅនៃបាតុកម្មនៅតែដដែល គឺរារំាងកុំឲ្យមានការរៀបចំបោះឆ្នោតសភានៅថ្ងៃទី២ កុម្ភៈខាងមុខ ព្រមទំាងទាមទារឲ្យលោកស្រីនាយករដ្ឋមន្រ្តីយីងឡាក់ចុះចេញពីមុខតំណែង។ ទន្ទឹមគ្នានេះ រដ្ឋាភិបាលក៏បានត្រៀមកម្លំាងប៉ូលិស និងទាហានរាប់ម៉ឺននាក់ដើម្បីរក្សាសន្តិសុខ និងសណ្តាប់ធ្នាប់សង្គម។
ក្នុងថ្ងៃអាទិត្យ ទី១២ មករានេះ ភាគីនីមួយៗកំពុងត្រៀមរៀបចំជើលព្រួលសំលៀងអាវុធរៀងៗខ្លួនដើម្បីទប់ទល់។ នៅម្ខាង គឺក្រុមបាតុករអាវលឿងដឹកនំាដោយលោកអតីតឧបនាយក រដ្ឋមន្រ្តីស៊ូថេបដែលបានប្រមែប្រមូលសម្ភារៈរបស់ខ្លួនទៅដាក់ទីកន្លែងរួមមួយ មុននឹងធ្វើការចែកចាយនៅតាមទីតំាងយុទ្ធសាស្រ្តសំខាន់ៗចំនួន ៧ ក្នុងទីក្រុងបាងកក។ ក្រៅពីគ្នីគ្នាគេដែលមាននៅក្នុងទីក្រុងបាងកកស្រាប់ ក៏មានការចូលរួមយ៉ាងច្រើនកុះករពីក្រុមអាវលឿងមកពីខេត្តមួយចំនួនដែរ។ វិធានការដែលក្រុមបាតុករអាវលឿងគ្រោងនឹងធ្វើចាប់ពីព្រលឹមស្រាងៗថ្ងៃចន្ទស្អែក គឺធ្វើឲ្យជាប់គំាងទីក្រុងបាងកកទំាងមូល តាមរយៈការរារំាងមិនឲ្យមន្រ្តីរាជការទៅធ្វើការ ឬមួយក៏ការកាត់ផ្តាច់ចរន្តអគ្គិសនីនៅតាមស្ថាប័នរបស់រដ្ឋមួយចំនួន។ នៅម្ខាងទៀត គឺរដ្ឋាភិបាលដែលបានប្រកាសដាក់ពង្រាយកម្លំាងប៉ូលិស និងទាហានសរុបប្រមាណជា ២០ ០០០នាក់ដើម្បីធានាសន្តិសុខ និងរក្សាសណ្តាប់ធ្នាប់សង្គម។ ទន្ទឹមគ្នានេះ រដ្ឋអំណាចក៏បានប្រកាសបិទទ្វារសាលារៀនចំនួន ១៤០ ព្រមទំាងមហាវិទ្យាល័យមួយចំនួនក្នុងទីក្រុងបាងកកនៅថ្ងៃចន្ទស្អែក។
ក្រឡេកទៅមើលប្រជាជនថៃរស់ក្នុងទីក្រុងបាងកកវិញ មានអ្នកខ្លះបានផ្តើមទិញស្តុកទុកនូវគ្រឿងឧបភោគ បរិភោគ និងគ្រឿងសម្ភារៈចំាបាច់មួយចំនួន។ ស្ថានទូតអាមេរិកប្រចំាក្រុងបាងកកក៏បានអំពាវនាវឲ្យពលរដ្ឋខ្លួនទិញម្ហូបអាហារស្តុកទុកសម្រាប់រយៈពេល ២សប្តាហ៍។ ដោយឡែក និងចំពេលដែលក្រុមអាវលឿងកំពុងត្រៀមខ្លួនធ្វើមហាបាតុកម្មនៅថ្ងៃចន្ទស្អែក ក្រុមអាវក្រហមក៏បានអំពាវនាវគ្នីគ្នាគេឲ្យចុះផ្លូវធ្វើបាតុកម្មចាប់ពីថ្ងៃអាទិត្យនេះទៅនៅតាមខេត្តមួយចំនួនក្បែរទីក្រុងបាងកក។
លោកស៊ូថេប៖« ខ្ញុំដើរចេញពីក្បួនបាតុកម្ម បើចលនានេះធ្លាក់ក្នុងអំពើហិង្សា និងប្រែក្លាយជាសង្រ្គាមស៊ីវិល »
នៅថ្ងៃអាទិត្យ ទី១២ មករានេះ មេបាតុករលោកស៊ូថេបបានប្រាប់ឲ្យដឹងរួចហើយថា លោកនឹងប្រកាសបិទបញ្ចប់ចលនាបាតុកម្មភ្លាមៗ នៅក្នុងករណីណាដែលក្បួនបាតុកម្មនោះបែរជាធ្លាក់ក្នុងអំពើហិង្សា និងប្រែក្លាយទៅជាសង្រ្គាមស៊ីវិល។ តែជាមួយគ្នានេះ លោកស៊ូថេបក៏បានបដិសេធមិនចូលចរចាជាមួយរដ្ឋាភិបាលរបស់លោកស្រីយីងឡាក់ទេ។ លោកស៊ូថេបបានថ្លែងយ៉ាងដូចនេះនៅក្នុងកិច្ចសន្ទនាមួយរបស់លោកជាមួយនឹងកាសែតជាភាសាអង់គ្លេស « Sunday Nation » ចេញផ្សាយក្នុងថ្ងៃអាទិត្យនេះ។
« បើរឿងការទាមទារនេះបែរជាក្លាយទៅជាសង្រ្គាមស៊ីវិល ខ្ញុំនឹងបោះបង់វាចោល។ ជីវិតមនុស្ស គឺថ្លៃណាស់សម្រាប់រូបខ្ញុំ » នេះជាសម្តីរបស់លោកស៊ូថេបនៅក្នុងកាសែត « Sunday Nation »។ បើគេស្តាប់ទៅឃើញថា លោកស៊ូថេបពិតជាមានការគិតគូរខ្លំាងណាស់ចំពោះអាយុជីវិតរបស់ប្រជារាស្រ្តថៃ តែគេក៏មិនត្រូវភ្លេចទេថា គឺរូបលោកស៊ូថេបនេះឯងជាអ្នកផ្តើមបញ្ឆេះក្រុមអាវលឿងឲ្យងើបឡើងបះបោរប្រឆំាងនឹងរដ្ឋាភិបាលរបស់លោកស្រីយីងឡាក់នាពេលនេះ។ គ្រាន់តែក្នុងរយៈពេលប៉ុន្មានសប្តាហ៍ចុងក្រោយនេះ ចលនាបះបោររបស់ពួកអាវលឿងបានបណ្តាលឲ្យមានមនុស្សស្លាប់ ៨នាក់ ក្នុងនោះប៉ូលិស ២នាក់ ព្រមទំាងមានអ្នករបួសជាច្រើននាក់ផ្សេងទៀត។
ក្រុមអ្នកវិភាគបានយល់ឃើញថា ការនិយាយរបស់លោកស៊ូថេបពេលនេះ គ្រាន់តែជាការបង្ការមួយដើម្បីដកខ្លួនចេញពីការទទួលខុសត្រូវរបស់លោកប៉ុណ្ណោះ នៅក្នុងករណីណាដែលមានផ្ទុះអំពើហិង្សា ឬមួយក៏មានផ្ទុះសង្រ្គាមស៊ីវិលនៅថ្ងៃខាងមុខ។ អំពើហិង្សា ឬមួយសង្រ្គាមស៊ីវិលដែលគ្មាននរណាម្នាក់អាចគ្រប់គ្រងស្ថានការណ៍បានឡើយ។ គួររម្លឹកជូនថា គោលដៅរបស់លោកស៊ូថេប គឺទាមទារឲ្យលោកស្រីយីងឡាក់ចុះចេញពីតំណែង ព្រមទំាងរារំាងមិនឲ្យមានការរៀបចំបោះឆ្នោតនៅថ្ងៃទី២ កុម្ភៈខាងមុខ។
ប្រជារាស្រ្តថៃទូទៅចង់ឲ្យកងទ័ពចូលខ្លួនធ្វើអន្តរាគមន៍ដើម្បីបញ្ចប់វិបត្តិ
ជាទូទៅ ប្រជារាស្រ្តថៃហាក់ដូចជាគ្មានជំនឿលើរដ្ឋាភិបាល ឬមួយក៏ក្រុមប្រឆំាងទេថា ជាអ្នកដែលអាចបិទបញ្ចប់វិបត្តិសព្វថ្ងៃនេះ។ អ្នកដែលពួកគេយល់ថា អាចអារកាត់ក្នុងរឿងនេះបាន គឺមានតែកងទ័ពទេ។ កងទ័ពដែលជាអ្នកមានអំណាចខ្លំាងជាងគេនៅក្នុងប្រទេសថៃ។ គ្រាន់តែក្នុងរយៈពេល ៨១ឆ្នំាចុងក្រោយនេះ ថៃបានស្គាល់រដ្ឋប្រហារយោធា ឬមួយក៏ការប៉ុនប៉ងធ្វើរដ្ឋប្រហារយោធាចំនួន ១៨ដង។ ចុងក្រោយគឺការទម្លាក់លោកថាក់ស៊ីនក្នុងឆ្នំា ២០០៦។
ប្រជារាស្រ្តថៃភាគច្រើនយល់ឃើញថា កងទ័ពត្រូវតែចូលខ្លួនធ្វើអន្តរាគមន៍ក្នុងរឿងនយោបាយ ប្រសិនបើបាតុកម្មពេលនេះបែរជាធ្លាក់ក្នុងអំពើហិង្សាខ្លំាងក្លានោះ។ មកដល់ពេលនេះ កងទ័ពនៅបន្តរក្សាជំហរអព្យាក្រឹតដដែល។ តែនៅថ្ងៃសៅរ៍ ទី១១ មករាម្សិលមិញ មេទ័ពថៃលោក ប្រាយុទ្ធ ចាន់អូចាបានថ្លែងពីក្តីបារម្ភរបស់លោកចំពោះការផ្ទុះអំពើហិង្សាជាយថាហេតុនៅថ្ងៃខាងមុខ។ លោកចាន់អូចាបានអំពាវនាវដោយព្រមានគ្រប់ភាគីទំាងអស់ឲ្យបញ្ចៀសអំពើហិង្សា និងថា ទំាងអស់គ្នាជាជនជាតិថៃដូចគ្នា និងដែលទំាងអស់គ្នាត្រូវតែរស់នៅជាមួយគ្នា ទោះបីជាមិនចុះសម្រុងគ្នាក្នុងរឿងនយោបាយក៏ដោយ។ តាមរយៈសម្តីនេះបានធ្វើឲ្យគេយល់ថា កងទ័ពបានត្រៀមខ្លួនរួចជាស្រេចដើម្បីធ្វើអន្តរាគមន៍ បើចំាបាច់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ