រហូតមកដល់ថ្ងៃសុក្រ ទី២៧ ធ្នូនេះ វិបត្តិនយោបាយថៃហាក់ដូចជាកាន់តែឡើងតានតឹងមួយកម្រិតទៀត។ បន្ទាប់ពីមានអំពើហិង្សាបណ្តាលឲ្យស្លាប់ប៉ូលិសម្នាក់ រងរបួស ៣នាក់ ព្រមទំាងរបួសបាតុករអាវលឿងជាច្រើននាក់មក គណៈកម្មការជាតិរៀបចំការបោះឆ្នោតបានអំពាវនាវឲ្យរដ្ឋាភិបាលលើកថ្ងៃបោះឆ្នោតដែលគ្រោងរៀបចំនៅថ្ងៃទី២ ខែកុម្ភៈ ឆ្នំា ២០១៤។ តែលោកស្រីនាយករដ្ឋមន្រ្តីយីងឡាក់មិនព្រម និងថែមទំាងបានអំពាវនាវឲ្យកងទ័ពចូលរួមជួយការពារសន្តិសុខនៅក្នុងការចុះឈ្មោះបេក្ខជនគណបក្ស ក៏ដូចជានៅក្នុងការរៀបចំបោះឆ្នោត។ ទន្ទឹមគ្នានេះ ក្រុមអាវក្រហមបានប្រកាសថា ពួកត្រៀមខ្លួននឹងចូលធ្វើបាតុកម្មក្នុងទីក្រុងបាងកកដើម្បីប្រឈមទប់នឹងពួកអាវលឿង។
ពួកអាវក្រហម គឺជាសកម្មជនអ្នកគាំទ្រលោកអតីតនាយករដ្ឋមន្រ្តីថាក់ស៊ីនដែលបច្ចុប្បន្នកំពុងភៀសខ្លួន រស់នៅឯបរទេស ឬអាចនិយាយបានម្យ៉ាងទៀតថា គឺជាក្រុមដែលនៅខាងលោកស្រីនាយករដ្ឋមន្រ្តីយីងឡាក់សព្វថ្ងៃ។ តំាងពីថ្ងៃផ្ទុះបាតុកម្មរបស់ពួកអាវលឿងមក ពួកអាវក្រហមក៏មានវត្តមាននាពេលនោះដែរ។ គឺទើបតែនៅដើមខែធ្នូនេះទេដែលពួកអាវក្រហមបាននំាគ្នាចាកចេញពីទីក្រុងបាងកកទៅវិញ។ ម្យ៉ាង មកពីពួកគេចង់ចៀសវាងភាពអានាធិបតេយ្យក្នុងទីក្រុង ដោយមិនចង់បង្កើនភាពតានតឹងជាមួយពួកអាវលឿង និងម្យ៉ាងទៀត មកពីពួកគេចង់ទុកឲ្យរដ្ឋាភិបាលរបស់លោកស្រីយីងឡាក់ព្យាយាមដោះស្រាយដោយសន្តិវិធី។
តែកន្លងមក ស្ថានការណ៍ហាក់ដូចជាកាន់តែដុនដាបខ្លំាងៗទៅវិញ។ ប្រឈមមុខនឹងឥទ្ធិពលកាន់តែពុះកញ្រ្ជោលខ្លំាងរបស់ពួកអាវលឿង លោកស្រីនាយករដ្ឋមន្រ្តីយីងឡាក់បានធ្វើសម្បទានច្រើនណាស់ ពិសេសការប្រកាសរំលាយសភា និងយល់ព្រមរៀបចំបោះឆ្នោតឡើងវិញដែលគ្រោងធ្វើនៅថ្ងៃទី២ កុម្ភៈខាងមុខ។ តែគណបក្សប្រឆំាងមិនព្រម និងនៅតែបន្តទាមទារឲ្យលោកស្រីយីងឡាក់ចុះចេញពីតំណែង។ ទន្ទឹមគ្នានេះ មេបាតុករលោកស៊ូទេពបានស្នើឲ្យជ្រើសរើសមេដឹកនាំប្រទេស ដោយមិនចំាបាច់ឆ្លងកាត់ការបោះឆ្នោតទេ ពោលគឺត្រូវប្រគល់អំណាចរដ្ឋទៅឲ្យស្ថាប័នថ្មីមួយដែលគេឲ្យឈ្មោះថា “គណៈកម្មការប្រជាជន”។ តែលោកស្រីយីងឡាក់ទាត់ចោល ដោយបញ្ជាក់ថា វាមិនស្របតាមគោលការណ៍លទ្ធិប្រជាធិបតេយ្យ និងផ្ទុយទំាងស្រុងទៅនឹងច្បាប់រដ្ឋធម្មនុញ្ញ។
ដូច្នេះ សម្រាប់ពួកអាវក្រហម ទង្វើរបស់ពួកអាវលឿងពេលនេះ ហាក់ដូចជាជ្រុលហួសហេតុពេក និងវាល្មមដល់ពេលដែលខ្លួនត្រូវចុះផ្លូវជម្រះបញ្ជីជាមួយពួកអាវលឿងវិញម្តង។
បាតុកម្មទល់នឹងបាតុកម្ម ជារូបភាពនៃការផ្ទុះសង្រ្គាមស៊ីវិល
អ្វីដែលគ្រប់គ្នាកំពុងព្រួយបារម្ភខ្លំាង គឺការប៉ះទង្គិចគ្នាជាយថាហេតុរវាងក្រុមបាតុករអាវលឿង និងក្រុមបាតុករអាវក្រហម។ តែពួកអាវក្រហមដែលភាគច្រើនជាអ្នកក្រីក្រ រស់នៅស្រុកស្រែចម្ការស្ថិតប៉ែកខាងជើងបានបញ្ជាក់ថា ពួកគេត្រូវរង់ចំាមើលបន្តិចសិនថា តើគម្រោងរៀបចំបោះឆ្នោតដែលត្រៀមរៀបចំនៅថ្ងៃទី២ កុម្ភៈខាងមុខ នឹងត្រូវដំណើរការដូចការគ្រោងទុក ឬអត់។ សម្រាប់ពួកអាវក្រហម ប្រសិនបើការបោះឆ្នោតនៅថ្ងៃខាងមុខមិនអាចដំណើរការទៅបានទេ មានន័យថា សិទ្ធិរបស់ពួកគេត្រូវបានពួកអាវលឿងរំលោភ និងដែលពួកគេគ្មានជម្រើសអ្វី ក្រៅពីកែនប្រមូលគ្នាចូលក្នុងទីក្រុងបាងកកដើម្បីធ្វើបាតុកម្មប្រឆំាងទប់វិញទេ។
តើរូបភាពបាតុកម្មរបស់ពួកអាវលឿង ប្រឆំាងនឹងបាតុកម្មរបស់ពួកអាវក្រហមនៅថ្ងៃណាមួយនោះ, វាមិនមែនជារូបភាពនៃការផ្ទុះសង្រ្គាមស៊ីវិលនៅក្នុងប្រទេសថៃទេ ឬយ៉ាងណា?
ពួកអាវក្រហមបានប្រកាសព្រមានរួចហើយថា ក្រៅពីការទាមទារឲ្យមានការរៀបចំបោះឆ្នោតនៅថ្ងៃទី២ កុម្ភៈដូចដែលបានគ្រោងទុកនោះ ពួកគេក៏បានត្រៀមខ្លួនដើម្បីប្រឆំាងនឹងគណៈកម្មការប្រឆំាងអំពើពុករលួយដែលកំពុងរៀបចំចាត់វិធានការលើអ្នកតំណាងរាស្រ្តមួយចំនួនរបស់គណបក្សភឿថៃពីបទរំលោភអំណាច។ ពួកអាវក្រហមយល់ឃើញថា វិធានការរបស់គណៈកម្មការប្រឆំាងអំពើពុករលួយរបៀបនេះ អាចជាទង្វើថ្មីមួយទៀតក្នុងគោលដៅទម្លាក់រដ្ឋាភិបាលរបស់លោកស្រីយីងឡាក់។ ចូរកុំភ្លេចថា ប្រសិនបើពួកអាវក្រហមស្រុះគ្នាចុះផ្លូវធ្វើបាតុកម្មនោះ ចំនួនរបស់ពួកគេនឹងមានច្រើនជាងពួកអាវលឿងឆ្ងាយណាស់។
រដ្ឋាភិបាលរបស់លោកស្រីយីងឡាក់ហៅជំនួយពីកងទ័ព
ដំណើការចុះឈ្មោះបេក្ខជនរបស់គណបក្សនយោបាយដែលបានចាប់ផ្តើមតំាងពីថ្ងៃចន្ទដើមសប្តាហ៍នេះ ត្រូវបានតាមឈ្នានីសខ្លំាងពីក្រុមបាតុករអាវលឿង។ នៅថ្ងៃព្រហស្បតិ៍ម្សិលមិញ អំពើហិង្សារវាងកម្លំាងប៉ូលិស និងពួកបាតុករដែលបានព្យាយាមរារំាងមិនឲ្យបេក្ខជនចូលទៅចុះឈ្មោះនៅក្នុងពហុកីដ្ឋានមួយក្នុងទីក្រុងបាងកក បានបណ្តាលឲ្យស្លាប់ប៉ូលិសម្នាក់ របួស ៣នាក់ ព្រមទំាងរបួសបាតុករជាច្រើននាក់ទៀតផង។ បន្ទាប់មក គណៈកម្មការជាតិរៀបចំការបោះឆ្នោតក៏បានស្នើឲ្យរដ្ឋាភិបាលលើកថ្ងៃបោះឆ្នោត។ ភ្លាមៗ លោកស្រីយីងឡាក់ក៏បានឆ្លើយបដិសេធលើសំណើរបស់គណៈកម្មការជាតិរៀបចំការបោះឆ្នោត។
នៅថ្ងៃសុក្រនេះទៀត រដ្ឋាភិបាលរបស់លោកស្រីយីងឡាក់ថែមទំាងបានហៅជំនួយពីកងទ័ពឲ្យចូលរួមជួយរក្សាសន្តិសុខនៅក្នុងដំណើរការចុះឈ្មោះបេក្ខជនរបស់គណបក្ស និងបើអាច ចូលរួមជួយរក្សាសន្តិសុខ និងសណ្តាប់ធ្នាប់សង្គមនៅក្នុងថ្ងៃបោះឆ្នោតដែលគ្រោងរៀបចំនៅថ្ងៃទី២ កុម្ភៈ។ គួរបញ្ជាក់ជូនថា នៅប្រទេសថៃ អ្នកដែលមានអំណាចពិតប្រាកដក្នុងដៃ គឺក្រុមឧត្តមសេនីយ។ កន្លងមក ក្រុមបាតុករអាវលឿងក៏បានហៅរកជំនួយពីកងទ័ពដើម្បីទម្លាក់រដ្ឋាភិបាលរបស់លោកស្រីយីងឡាក់ដែរ។ តែមកទល់ម៉ោងនេះ កងទ័ពព្យាយាមមិនលូកដៃ ដោយបន្តនៅស្ងៀមស្ងាត់។
តែគេមិនត្រូវភ្លេចទេថា ជាទូទៅ វិបត្តិនយោបាយថៃដែលទុំជោរខ្លំាងច្រើនតែបិទបញ្ចប់ដោយអន្តរាគមន៍ពីក្រុមឧត្តមសេនីយ៍ ព្រោះថា ថៃល្បីឈ្មោះខាងធ្វើរដ្ឋប្រហារយោធា។ តំាងពីប្រទេសផ្តើមអនុវត្តរបបនយោបាយរាជានិយមអាស្រ័យរដ្ឋធម្មនុញ្ញក្នុងឆ្នំា ១៩៣២ មក ថៃបានស្គាល់រដ្ឋប្រហារយោធា ឬមួយក៏ប៉ុនប៉ងធ្វើរដ្ឋប្រហារយោធាចំនួន ១៨ដង ហើយចុងក្រោយគឺទម្លាក់លោកថាក់ស៊ីនក្នុងឆ្នំា ២០០៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ