ថៃ៖ អំពើហិង្សាជាថ្មីរវាងក្រុមបាតុករ និងកម្លំាងប៉ូលីសបានបណ្តាលឲ្យមានរបួស និងស្លាប់
នៅក្នុងប្រទេសថៃ វិបត្តិនយោបាយបានផ្ទុះចេញនូវអំពើហិង្សាជាថ្មីរវាងកម្លំាងប៉ូលីស និងក្រុមបាតុករនាថ្ងៃព្រហស្បតិ៍ ទី២៦ ធ្នូនេះ ដោយបានបណ្តាលឲ្យមានអ្នករងរបួសជាច្រើននាក់ ក្នុងនោះមានស្លាប់ប៉ូលីសម្នាក់។ ក្រុមបាតុករដែលបានព្យាយាមរារំាងបេក្ខជនរបស់គណបក្សមិនឲ្យចូលទៅចុះឈ្មោះសម្រាប់ឈរឈ្មោះបោះឆ្នោតនាការបោះឆ្នោតនៅដើមខែកុម្ភៈខាងមុខ។ ទន្ទឹមគ្នានេះ កម្លំាងរបស់ក្រុមបាតុករក៏បានបង្ខំឲ្យសមាជិកនៃគណៈកម្មការជាតិរៀបចំការបោះឆ្នោតរត់ចោលកន្លែងតាមឧទ្ធម្ភាគចក្រ ព្រមទំាងស្នើឲ្យមានការលើកថ្ងៃបោះឆ្នោតដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៣
ជាថ្មីម្តងទៀត កម្លំាងប៉ូលីសបានប្រើគ្រាប់បែកផ្សែងបង្ហូរទឹកភ្នែកបាញ់ទៅលើហ្វូងបាតុករដែលបានព្យាយាមបុកទម្លាយចូលទៅក្នុងពហុកីឡាដ្ឋានមួយក្នុងទីក្រុងបាងកក។ គឺនៅក្នុងពហុកីឡាដ្ឋាននោះឯងដែលតំាងពីថ្ងៃចន្ទដើមសប្តាហ៍នេះមក ត្រូវបានគណៈកម្មការជាតិរៀបចំការបោះឆ្នោតយកធ្វើជាកន្លែងសម្រាប់ចុះឈ្មោះបេក្ខជនរបស់គណបក្សនយោបាយសម្រាប់ចូលរួមការបោះឆ្នោតនៅដើមខែកុម្ភៈខាងមុខ។ តែនៅថ្ងៃនេះ និងប្រឈមមុខនឹងឥទ្ធិពលកាន់តែខ្លំាងឡើងៗរបស់ក្រុមបាតុករអាវលឿង កម្លំាងប៉ូលីសក៏បានសម្រេចបើកប្រតិបត្តិវាយបង្រ្កាបដោយប្រើគ្រាប់បែកផ្សែងបង្ហូរទឹកភ្នែក។ ប្រតិបត្តិការវាយបង្រ្កាបដោយបានបណ្តាលឲ្យមានអ្នករងរបួសប្រមាណជា ៤០នាក់កំពុងសម្រាកព្យាបាលក្នុងមន្ទីរពេទ្យ ក្នុងនោះមានម្នាក់របួសធ្ងន់ចំកណ្តាលក្បាលដោយប្រហែលជាត្រូវគ្រាប់កំាភ្លើងពិតផង នេះបើយោងតាមអ្នកទទួលខុសត្រូវម្នាក់ក្រសួងសុខាភិបាល។
ក្រៅពីបាតុករ ក៏មានស្លាប់ប៉ូលីសម្នាក់ដោយត្រូវគ្រាប់កំាភ្លើង និងរបួសចំនួន ៣នាក់ផ្សេងទៀត។ នេះជាទង្វើមួយដែលត្រូវបានលោកឧបនាយករដ្ឋមន្រ្តីថ្លែងថា ក្រុមបាតុករបានប្រើអាវុធសង្រ្គាម ពោលមិនមែនជាបាតុករសន្តិវិធី និងគ្មានអាវុធដូចដែលពួកគេបានប្រកាសនោះទេ។ ទន្ទឹមគ្នានេះ លោកឧបនាយករដ្ឋមន្រ្តីក៏បានចោទក្រុមបាតុករពីបទបានព្យាយាមសម្លុតបំភ័យអ្នកទទួលខុសត្រូវរបស់គណៈកម្មាធិការជាតិរៀបចំការបោះឆ្នោត រហូតធ្វើឲ្យពួកគេនំាគ្នារត់ចេញពីពហុកីឡាដ្ឋានតាមឧទ្ធម្ភាគចក្រ។ ជាមួយគ្នានេះ គណៈកម្មការជាតិរៀបចំការបោះឆ្នោតក៏បានស្នើឲ្យរដ្ឋាភិបាលលើកថ្ងៃបោះឆ្នោតដែរ។
សូមរម្លឹកជូនថា អស់ជាច្រើនសប្តាហ៍មកហើយដែលក្រុមបាតុករអាវលឿងដឹកនំាដោយលោកអតីតឧបនាយករដ្ឋមន្រ្តីស៊ូទេពបានទាមទារឲ្យលោកស្រីនាយករដ្ឋមន្រ្តីយីងឡាក់ចុះចេញពីតំណែង។ តែលោកស្រីយីងឡាក់មិនព្រម ដោយសុខចិត្តរំលាយសភា និងរៀបចំការបោះឆ្នោតថ្មីនៅដើមខែកុម្ភៈខាងមុខវិញ។ ក៏ប៉ុន្តែ គណបក្សប្រជាធិបតេយ្យរបស់លោកអាប់ភីសិតដែលជាបក្សប្រឆំាងដ៏ធំបានប្រកាសធ្វើពហិការមិនចូលរួម និងក៏បានព្យាយាមរារំាងមិនឲ្យគណបក្សផ្សេងចូលរួមដែរ។
យ៉ាងណាក៏ដោយនៅពេលនេះ ស្ថានការណ៍នយោបាយនៅថៃកំពុងជាប់គំាងគ្មានច្រកចេញ។ កម្លំាងប៉ូលីស និងទាហានហាក់ដូចជាព្យាយាមរក្សាភាពអត់ធ្មត់មិនប្រើហិង្សាខ្លំាងក្លា រីឯរដ្ឋាភិបាលចំាផ្ទះរបស់លោកស្រីយីងឡាក់ក៏បានប្រកាសពន្យារពេលការអនុវត្តន៍ច្បាប់សន្តិសុខពិសេសដែលហាមមិនឲ្យមានការជួបជុំគ្នា ដាក់បំរ៉ាមគោចរ ឬមួយក៏អនុញ្ញាតឲ្យប៉ូលីសធ្វើការឆែកឆេរលើជនសង្ស័យជាដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ