រដ្ឋាភិបាលនិងម្ចាស់ជំនួយជួបប្រជុំ ខណៈប្រជាពលរដ្ឋតវ៉ារឿងដីធ្លី
កិច្ចប្រជុំ លើកទី១៩ នៃគណៈកម្មាធិការសម្របសម្រួលរវាងរាជរដ្ឋាភិបាលកម្ពុជា និងដៃគូអភិវឌ្ឍន៍ ដែលតំណាងឲ្យប្រទេសអ្នកផ្តល់ជំនួយដល់កម្ពុជា បានធ្វើឡើង កាលពីព្រឹកថ្ងៃពុធ ទី២៦ខែកញ្ញានេះ នៅទីស្ដីការក្រុមប្រឹក្សាអភិវឌ្ឍន៍កម្ពុជា (CDC) នៅជិតវត្តភ្នំ។ កិច្ចប្រជុំ ដែលដឹកនាំដោយលោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ដើម្បីពិភាក្សា និងអនុម័ត លើសូចនាករតាមដានរួមគ្នា ដើម្បីធានា និងបង្កើនប្រសិទ្ធភាព នៃភាពជាដៃគូរវាងរដ្ឋាភិបាល និងម្ចាស់ជំនួយ។ នៅក្រៅកិច្ចប្រជុំឯណោះវិញ នៅព្រឹកថ្ងៃពុធនេះ ក្រុមពលរដ្ឋបឹងកក់ និងបុរីកីឡា ក៏បានប្រមូលផ្តុំ លើកបដា និងស្រែកតវ៉ារឿងដីធ្លី។ រីឯក្រុមពលរដ្ឋ ជាអតីតអ្នកភូមិសំបុកចាប ក៏បានប្រមូលផ្តុំតវ៉ា នៅមុខសាលាក្រុងភ្នំពេញ ប្រឆាំងនឹងរុះរើផ្ទះពីសហគមន៍ភូមិអណ្តូង ដែលស្ថិតនៅជាយក្រុង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៤៣
មន្ត្រីជាន់ខ្ពស់រដ្ឋាភិបាល បានជួបប្រជុំនឹងដៃគូអភិវឌ្ឍន៍ ជាតំណាងប្រទេសម្ចាស់ជំនួយ នៅព្រឹកថ្ងៃពុធ ទី២៦កញ្ញានេះ នៅក្រុមប្រឹក្សាអភិវឌ្ឍន៍កម្ពុជា ជិតវត្តភ្នំ។
ក្នុងកិច្ចប្រជុំរវាងរដ្ឋាភិបាល និងម្ចាស់ជំនួយ លោកឧបនាយករដ្ឋមន្ត្រី គាត ឈន់ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានលើកឡើងថា កិច្ចការសំខាន់ ក្នុងរបៀបវារៈនៃកិច្ចប្រជុំពេលនេះ គឺការអនុម័តលើសូចនាករតាមដានរួមគ្នា (JMI)។ សូចនាករនោះ ត្រូវបានដាក់ឲ្យអនុវត្តចាប់តាំងពីឆ្នាំ២០០៤ ហើយបានក្លាយជាឧបករណ៍ដ៏មានប្រសិទ្ធភាព មិនត្រឹមតែសម្រាប់រំលេចពីការប្រឹងប្រែងរួមគ្នា ទាំងធនធាន និងទាំងបច្ចេកទេស ដើម្បីឈានទៅសម្រេចបានលទ្ធផលប៉ុណ្ណោះទេ ប៉ុន្តែសូចនាករតាមដានរួមគ្នានោះ គឺជាក្របខ័ណ្ឌ សម្រាប់ឆ្លុះបញ្ចាំង និងសម្រាប់ពិចារណាឲ្យកាន់តែទូលំទូលាយ ដើម្បីធានា និងបង្កើនប្រសិទ្ធភាព នៃភាពជាដៃគូ។
លោក គាត ឈន់ បានបន្ថែមថា សូចនាករតាមដានរួមគ្នា ដែលបានពិភាក្សាជាច្រើនលើកនោះ បានតម្រូវឲ្យមានតម្លាភាពក្នុងការប្រើប្រាស់ធនធានហិរញ្ញវត្ថុ ទាំងរបស់រាជរដ្ឋាភិបាល ទាំងពីប្រភពហិរញ្ញប្បទានរបស់ដៃគូអភិវឌ្ឍន៍ និងតម្រូវឲ្យមានលទ្ធផលជាក់ស្ដែងក្នុងការអនុវត្តន៍ការប្ដេជ្ញានានារបស់ខ្លួន។
មន្ត្រីរដ្ឋាភិបាល និងម្ចាស់ជំនួយ នៅពេលនេះ ក៏ត្រូវពិភាក្សាផងដែរ អំពីដំណើរការរៀបចំឯកសារគោលនយោបាយចំនួន ២ ដែលជាស្នូល នៃការងារភាពជាដៃគូ។ ឯកសារគោលនយោបាយទីមួយ គឺជាឯកសារស្ដីពី “ផែនការយុទ្ធសាស្ដ្រអភិវឌ្ឍន៍ជាតិ ឆ្នាំ២០១៤-២០១៨” ដែលត្រូវចាប់ផ្ដើមរៀបចំ នាឆ្នាំ២០១៣។ ឯកសារគោលនយោបាយទី២ គឺ “យុទ្ធសាស្ដ្រស្ដីពីកិច្ចសហប្រតិបត្តិការអភិវឌ្ឍន៍ និងភាពជាដៃគូ”។
ក្នុងកិច្ចប្រជុំ លោកស្រី អាណែត ឌីកសុន (Annette Dixon) នាយកធនាគារពិភពលោក ប្រចាំកម្ពុជា ដែលតំណាងឲ្យដៃគូអភិវឌ្ឍន៍ អ្នកផ្តល់ជំនួយ បានលើកឡើងថា ដើម្បីក្លាយជាប្រទេស ដែលមានប្រាក់ចំណូលមធ្យម កម្ពុជាត្រូវធ្វើផែនការយុទ្ធសាស្ដ្រអភិវឌ្ឍន៍ជាតិថ្មី មានភាពបត់បែន ដើម្បីឲ្យផលពីកិច្ចអភិវឌ្ឍនានា បានកាន់តែច្រើនឡើង កំណែទម្រង់ក្នុងការផ្ដល់សេវាសាធារណនានាកាន់តែលឿន កំណើនសេដ្ឋកិច្ចប្រកបដោយនិរន្តរភាព ហើយប្រជាជនកាន់តែច្រើនបានទទួលផល ព្រមទាំងបង្កើនប្រសិទ្ធភាពការងារ។
តំណាងប្រទេសផ្តល់ជំនួយ ក៏បានលើកឡើងនូវយោបល់ចំនួន ៥ ចំណុច សម្រាប់រដ្ឋាភិបាលកម្ពុជា ពិចារណា រួមមាន៖ ការរៀបរៀងតាក់តែងផែនការយុទ្ធសាស្ដ្រអភិវឌ្ឍន៍ជាតិ គួរមានការចូលរួមឲ្យបានទូលំទូលាយ ដើម្បីបង្កើនភាពស៊ីសង្វាក់គ្នារវាង ក្រសួង-ស្ថាប័ន និងភាគីនានា ដែលពាក់ព័ន្ធនឹងកិច្ចអភិវឌ្ឍន៍ ការបង្កើនល្បឿនកំណែទម្រង់ក្នុងការផ្ដល់សេវាសាធារណៈនានា ឲ្យប្រកបដោយគុណភាពខ្ពស់ដល់ប្រជាពលរដ្ឋ និងធានាថា ផលនៃកិច្ចអភិវឌ្ឍត្រូវបានបែងចែក ជូនប្រជាជនទាំងអស់ និងមនុស្សជំនាន់ក្រោយៗទៀត ជាដើម។
កាលពីថ្ងៃទី២៥ ខែកញ្ញា ឆ្នាំ២០១២ សម្ព័ន្ធអង្គការក្រៅរដ្ឋាភិបាល និងក្រុមការពារសិទ្ធិមនុស្ស ជាតិ-អន្តរជាតិជាង ១០០ ស្ថាប័ន បានជួបប្រជុំ និងបានចេញនូវសេចក្តីថ្លែងការណ៍រួម លើកឡើងពីក្តីបារម្ភជុំវិញបញ្ហាដីធ្លី ដំណើរការលទ្ធិប្រជាធិបតេយ្យ និងកំណែទម្រង់សិទ្ធិមនុស្សនៅក្នុងប្រទេសកម្ពុជា ជាដើម។ ក្តីបារម្ភទាំងនោះ ត្រូវបានអង្គការសង្គមស៊ីវិល ដាក់ជូនក្រុមប្រទេសម្ចាស់ជំនួយបរទេស និងរដ្ឋាភិបាល ដើម្បីបញ្ចូលក្នុងរបៀបវារៈ នៃកិច្ចប្រជុំកិច្ចប្រជុំ គណៈកម្មាធិការសម្របសម្រួលដៃគូអភិវឌ្ឍន៍រដ្ឋាភិបាល GDCC នាថ្ងៃទី២៦ ខែកញ្ញា ឆ្នាំ២០១២។
ដោយឡែកនៅក្រៅរបងក្រុមប្រឹក្សាអភិវឌ្ឍន៍កម្ពុជា នៅព្រឹកមិញ ក្រុមពលរដ្ឋបឹងកក់ និងអ្នករស់នៅបុរីកីឡា បានប្រមូលផ្តុំតវ៉ា អំពីបញ្ហាដីធ្លី ព្រមទាំងទាមទារឲ្យប្រទេសម្ចាស់ជំនួយ អន្តរាគមន៍ ដោះស្រាយរឿងដីនៅបឹងកក់ និងនៅបុរីកីឡា ព្រមទាំងទាមទារឲ្យដោះលែងស្ត្រីបឹងកក់ និងស្ត្រីបុរីកីឡាម្នាក់ ឲ្យមានសេរីភាពឡើងវិញ។
ដោយឡែកក្រុមពលរដ្ឋ ជាអតីតអ្នកភូមិសំបុកចាប ក៏បានប្រមូលផ្តុំតវ៉ានៅមុខសាលាក្រុងភ្នំពេញ នៅព្រឹកមិញ ដើម្បីប្រឆាំងនឹងការរុះរើផ្ទះ ពីសហគមន៍ភូមិអណ្តូង ដែលស្ថិតនៅជាយក្រុង។ អតីតអ្នកភូមិសំបុកចាប ១៩ គ្រួសារ ស្នើសុំរស់នៅសហគមន៍ភូមិអណ្តូងដដែល បន្ទាប់ពីពួកគេ រួមនឹងពលរដ្ឋក្រីក្រជាង ១.០០០ គ្រួសារផ្សេងទៀត ត្រូវបានអាជ្ញាធរក្រុង រុះរើលំនៅដ្ឋានទាំងបង្ខំ ចេញពីអតីតសហគមន៍ភូមិសំបុកចាប នៅជិតរដ្ឋសភា និងបញ្ជូនឲ្យទៅរស់នៅក្នុងសហគមន៍ភូមិអណ្តូង កាលពីថ្ងៃទី៦ ខែមិថុនា ឆ្នាំ២០០៦៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ