រលាកថ្លើមប្រភេទ C ៖ រកឃើញថ្នាំថ្មីមានប្រសិទ្ធភាព៩០% តែតម្លៃកប់ពពក
ចុះផ្សាយនៅថ្ងៃ៖
ស្តាប់ - ០៨:២៧
អ្នកជំងឺរលាកថ្លើមប្រភេទ C ស្ទើរតែទាំងអស់ (សរុបប្រមាណជិត ១៨៥លាននាក់) នៅលើពិភពលោក មិនបានឬមិនអាចទទួលបានការព្យាបាលទេ នេះបើតាមការបរិហាររបស់អង្គការសហប្រជាជាតិ កាលពីថ្ងៃពុធកន្លងទៅនេះ ដោយបានអំពាវនាវឱ្យមានការបើកទូលាយផ្នែកព្យាបាល និងបញ្ចុះតម្លៃថ្នាំដ៏ខ្ពស់កប់ពពក។ ថ្នាំរកឃើញថ្មី មានប្រសិទ្ធិភាពដល់ទៅ៩០% ប៉ុន្តែមានតម្លៃកប់ពពក។ ហេតុអ្វីបានការព្យាបាលជំងឺនេះមានតម្លៃខ្ពស់ខ្លាំង ?
សព្វថ្ងៃនេះ តម្លៃព្យាបាលជំងឺរលាកថ្លើមប្រភេទC ថ្លៃជ្រុលហួសហេតុ ហួសសមត្ថភាពអ្នករបស់ជំងឺមួយភាគធំ។ នេះបើតាមការទីប្រឹក្សាអង្គការសុខភាពពិភពលោក ដែលអំពាវនាវឱ្យរដ្ឋាភិបាល អង្គការអន្តរជាតិ សប្បុរជន សង្គមស៊ីវិល និងឧស្សហកម្មឧសថ សហការគ្នា ស្វែងរកដំណោះស្រាយធ្វើយ៉ាងណាឱ្យការព្យាបាលជំងឺនេះ អាចផ្តល់ជូនដល់បណ្តាជនអ្នកមានផ្ទុកជំងឺរលាកថ្លើមប្រភេទC គ្រប់ៗរូប។
ប្រទេសដែលមានអត្រាអ្នកកើតជំងឺរលាកថ្លើមប្រភេទសេ ខ្ពស់ជាងគេនៅលើពិភពលោក គឺប្រទេសអេហ្ស៊ីប (ជាង១០%នៃប្រជាជនសរុប) ប្រទេសប៉ាគីស្ថាន ៤,៨% ចិន ៣,២%។ នេះបើតាមប្រភពព័ត៌មានផ្តល់ដោយអង្គការសុខភាពពិភពលោក OMS ដែលបានបញ្ជាក់ជាថ្មីនៅសប្តាហ៍នេះថា ស្ថិតិនៃអត្រាអ្នកកើតជំងឺរលាកថ្លើមប្រភេទនៅតាមប្រទេសផ្សេងទៀតលើលោក មានតិចតួចណាស់ ប៉ុន្តែអ្នកឯកទេសយល់ថាជាតួលេខដែលមិនអាចយកជាការណ៍បាន។ ហេតុអ្វី ? ព្រោះ មនុស្សភាគច្រើនមិនដឹងខ្លួនថាមានផ្ទុកមេរោគ។ អ្នកមានជំងឺរលាកថ្លើមប្រភេទសេ មួយភាគធំ គ្មានរោគសញ្ញា។
តើជំងឺរលាកថ្លើមប្រភេទសេ ជាអ្វី ? ជំងឺរលាកថ្លើមប្រភេទនេះបង្កឡើងដោយវីរ៉ុស VHC ចម្លងពីមនុស្សម្នាក់ទៅ ម្នាក់ទៀត តាមរយៈឈាម។ នៅលើពិភពលោកបច្ចុប្បន្ននេះ មានមនុស្ស១៨៥លាននាក់ រស់ជាមួយនឹងជំងឺរ៉ាំរ៉ៃ ប្រឈមនឹងគ្រោះធ្លាក់ខ្លួនកើតជំងឺមហារីកថ្លើម និងជំងឺក្រិនថ្លើម។ យោងតាមតួលេខអង្គការសុខភាពពិភពលោក អ្នកជំងឺចំនួន ៣៥០០០០នាក់បានស្លាប់ក្នុងមួយឆ្នាំៗ ដោយមេរោគ ឬដោយផលវិបាកនៃជំងឺរលាកថ្លើមប្រភេទសេ។
ការព្យាបាលមានតម្លៃខ្ពស់ ! ថ្លៃរហូតមានអ្នកជំងឺតិចតួចបំផុតហ៊ានចំណាយថវិកាព្យាបាលខ្លួន។ នេះមិនរាប់អំពីរយៈពេល និងផលវិបាកពេលកំពុងព្យាបាល ដែលមានទាមទារការតាំងចិត្តខ្លាំងរបស់អ្នកជំងឺផង។ នៅក្នុងរង្វង់សហភាពអឺរ៉ុប អង្គការសុខភាពពិភពលោករាប់ឃើញថា មានអ្នកជំងឺតែប្រមាណពី ២ទៅ៣ភាគរយប៉ុណ្ណោះបានទទួលការព្យាបាល ហើយនៅប្រទេសបារាំង ដោយមានប្រព័ន្ធធានារ៉ាប់រងសុខភាពល្អ មានអ្នកជំងឺដល់ទៅ ៦%បានទទួលព្យាបាល។
ជំងឺរលាកថ្លើមប្រភេទសេ គ្មានថ្នាំការពារ ថ្នាំវ៉ាក់សាំង ចាក់បង្កដូចជំងឺរលាកថ្លើមប្រភេទ អា ឬបេ មែន ប៉ុន្តែជាសំណាងល្អ ជំងឺប្រភេទនេះអាចព្យាបាលជា។ ថ្នាំទំនើបជំនាន់ចុងក្រោយ អាចព្យាបាល ជាសះស្បើយ ក្នុងកំរិតខ្ពស់បំផុត ពោលគឺមានប្រសិទ្ធិភាពឡើងដល់ ៩០% បើប្រៀបទៅនឹងថ្នាំជំនាន់មុន ដែលមានប្រសិទ្ធិភាពត្រឹម ពី ៥០ ទៅ៦០%។ ប៉ុន្តែអ្វីដែលជាការរំខាន ក្នុងការព្យាបាល គឺតម្លៃ។ តម្លៃដែលអង្គការសុខភាពពិភពលោក គិតថាថ្លៃជ្រុលហួសហេតុ មិនមែនសម្រាប់តែបណ្តាជនខ្មែរ ឬបណ្តាជនក្នុងប្រទេសក្រីក្រផ្សេងទៀតទេ សូម្បីតែប្រទេសអ្នកមានក៏ថ្នាំព្យាបាលជំងឺរលាកថ្លើមប្រភេទ សេ ត្រូវបានគេចាត់ទុក និងទទួលស្គាល់ថាជាថ្នាំថ្លៃស្ទើរខ្ពស់ជាងគេបំផុតបន្ទាប់ពីថ្នាំប្រឆាំងនឹងជំងឺមហារីក។ តើការតម្លៃខ្ពស់ខ្លាំងនេះ មានទំនាក់ទំនងនឹងប្រសិទ្ធិភាពថ្នាំឬយ៉ាងណា ?
បើតាមប្រសាសន៍របស់សាស្ត្រាចារ្យវេជ្ជបណ្ឌិត Jean Michel Pawlotsky នាយកមជ្ឈមណ្ឌលជាតិប្រយុទ្ធនឹងជំងឺរលាកថ្លើម នៅសកលវិទ្យាល័យវេជ្ជសាស្រ្ត Henri Mondor ប្រទេសបារាំង មានការអភិវឌ្ឍន៍យ៉ាងលឿនគួរកត់សម្គាល់ក្នុងការព្យាបាលជំងឺរលាកថ្លើមប្រភេទសេ ដែលពីមុនគេត្រូវការចាក់ថ្នាំ អាំងទែហ្វេរ៉ុង រាប់អាទិត្យ ពី២៤ ទៅ៤៨អាទិត្យ ឬពី៦ខែទៅមួយឆ្នាំ ដោយត្រូវទៅពេទ្យចាក់ជារៀងរាល់អាទិត្យ មានផលរំខានធ្ងន់ធ្ងរខ្លាំងស្ទើរទ្រាំមិនបាន
ប៉ុន្តែពេលនេះ ជាមួយថ្នាំថ្មី គេលែងត្រូវការចាក់ម្ជុលទៀតហើយ គឺជាថ្នាំ លេប សម្រាប់រយៈពេល១២អាទិត្យ ប៉ុណ្ណោះ ហើយប្រសិទ្ធិភាពថ្នាំនេះ ឡើងដល់៩០%។ ជាការជឿនលឿនគួរឱ្យកោតសរសើរ និងកត់សម្គាល់ ប៉ុន្តែការវិវឌ្ឍន៍នេះអបដោយតម្លៃក៏កប់ពពកទៅតាមនោះដែរ (៨០០អឺរ៉ូមួយបន្ទះ) គេត្រូវចំណាយអស់ប្រមាណជាង៨ម៉ឺនអឺរ៉ូ សម្រាប់ការព្យាបាលដោយប្រើថ្នាំជំនាន់ចុងក្រោយនេះ។
តើថ្នាំពិតជាថ្លៃជ្រុលឬ ? តម្លៃដើមនៃថ្នាំនេះមានលក្ខណៈថ្លៃស្រាប់មិនធ្លាប់មានទៅហើយ (ប្រមាណពី ៦៨ទៅ ១៣៦ដុល្លារ ក្នុងមួយបន្ទះ) បូកផ្សំនឹងប្រសិទ្ធភាពខ្ពស់ទៀត អាចបញ្ជៀសករណីក្រិនថ្លើម ឬបន្សាំថ្លើម ដែលថ្លៃខ្លាំងបាន ដូច្នេះ ក្រុមហ៊ុនផលិតឪសថ ពិតជាមានលេស និងហេតុផលគ្រប់យ៉ាងសម្រាប់រក្សាតម្លៃថ្នាំឱ្យខ្ពស់ដដែល។ ម្យ៉ាងវិញទៀត ក្រុមហ៊ុនផលិតថ្នាំនេះ ខ្លះមានលេងភាគហ៊ុនក្នុងទីផ្សារមូលប័ត្រទៀត ក្នុងករណីជាក់ស្តែងក្រុមហ៊ុនផលិតថ្នាំរលាកថ្លើមប្រភេទសេ ជំនាន់ក្រោយនេះ បានទិញភាគហ៊ុន តម្លៃដល់ទៅ ជាង៨ពាន់លានអឺរ៉ូ ដូច្នេះក្រុមហ៊ុនត្រូវការចំណេញ។ តម្លៃក៏ត្រូវតែនៅខ្ពស់។ ប្រទេសអេហ្ស៊ីបដែលមានអត្រាអ្នកកើតជំងឺរលាកថ្លើមខ្លាំងជាងនៅលើពិភពលោក បានធ្វើការចរចាជាមួយក្រុមហ៊ុនឱសថ Sofosbuvir បញ្ចុះតម្លៃថ្នាំមកត្រឹមតែ៩០០ដុល្លារក្នុងមួយបន្ទះ។
ដើម្បីអាចបញ្ចុះតម្លៃថ្នាំព្យាបាល សម្រាប់អ្នកឯកទេសអង្គការសុខភាពពិភពលោក គឺមានតែពង្រីកការប្រើប្រាស់ថ្នាំ ឱ្យបានទូលំទូលាយបំផុត តាមរយៈនយោបាយជាតិ និងការបង្កើតយុទ្ធសាស្ត្រពិភពលោក ដូចដែលអង្គការសុខភាពពិភពលោកធ្លាប់ធ្វើក្នុងការប្រយុទ្ធប្រឆាំងនឹងជំងឺអេសដ៏ ឬស៊ីដា។ ក្នុងពេលរង់ចាំនេះ អង្គកាសុខភាពពិភពលោក សង្ឃឹមថានឹងមានថ្នាំជំនាន់ថ្មីៗទៀតមកប្រកួតប្រជែងលើទីផ្សារ និងធ្វើឱ្យតម្លៃធ្លាក់ចុះ អាចឱ្យអ្នកជំងឺគ្រប់រូបអាចធ្វើការព្យាបាលបាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ