លោក ហ៊ុន សែន ទៅទស្សនកិច្ចនៅវៀតណាមពេលនយោបាយកំពុងតានតឹង
ដូចការគ្រោងទុក លោកនាយករដ្ឋមន្ត្រី ហ៊ុន សែន បានដឹកនាំគណៈប្រតិភូជាន់ខ្ពស់មួយក្រុមចាកចេញ ទៅបំពេញទស្សនកិច្ចនៅប្រទេសវៀតណាម នៅព្រឹកថ្ងៃព្រហស្បតិ៍នេះ។ មានឯកសារចំនួន៩ត្រូវគេគ្រោងចុះហត្ថលេខាក្នុងអំឡុងពេលទស្សនកិច្ចនេះ។ ដំណើរទស្សនកិច្ចរបស់ប្រមុខរដ្ឋាភិបាលកម្ពុជាទៅកាន់ប្រទេសវៀតណាមនៅពេលនេះ បានកើតឡើងចំពេលដែលស្ថានការណ៍នយោបាយផ្ទៃក្នុងកំពុងតានតឹងខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
លោកនាយករដ្ឋមន្ត្រី ហ៊ុន សែន អមដំណើរដោយមន្ត្រីជាន់ខ្ពស់រដ្ឋាភិបាលជាច្រើនបានចាកចេញពីភ្នំពេញនៅព្រឹកថ្ងៃទី ២៦ ធ្នូនេះ ដើម្បីបំពេញទស្សនកិច្ចរយៈពេលពីរថ្ងៃនៅប្រទេសវៀតណាម។
ដំណើរទស្សនកិច្ចនេះត្រូវបានរៀបចំឡើងក្រោមការអញ្ជើញពីនាយករដ្ឋមន្ត្រីវៀតណាមលោក ង្វៀន តឹងយុង។ នេះបើយោងតាមសេចក្តីជូនដំណឹងរបស់ក្រសួងការបរទេសកម្ពុជា។ នៅក្នុងអំឡុងពេលទស្សនកិច្ចនេះ លោកនាយករដ្ឋមន្ត្រីខ្មែរគ្រោងជួបពិភាក្សា
ការងារជាមួយសមភាគីវៀតណាមព្រមទាំងជួបជាមួយប្រធានសភា ប្រធានាធិបតី និងអគ្គលេខាធិការបក្សកុំម្មុយនិស្តវៀតណាមផងដែរ។
ឯកសារចំនួន៩ត្រូវគេគ្រោងនឹងចុះហត្ថលេខាក្នុងអំឡុងពេលនោះ។ ឯកសារទាំងនោះជារួមមាន៖ កិច្ចសម្របសម្រួលពាណិជ្ជកម្មទ្វេភាគី កិច្ចព្រមព្រៀងស្តីពីការផ្លាស់ប្តូរទំនិញ សន្ធិសញ្ញាស្តីពីបត្យាប័ន កិច្ចព្រមព្រៀងឥណទានសម្បទាន ផែនការ សហប្រតិបត្តិការវិស័យអប់រំ ផែនការសហប្រតិបត្តិការខាងព័ត៌មាន ផែនការសហប្រតិបត្តិការរវាងក្រសួងមហាផ្ទៃនៃប្រទេសទាំងពីរ អនុស្សរណៈយោគយល់គ្នាស្តីពីផែនការសហប្រតិបត្តិការរវាងបណ្ណសារដ្ឋានជាតិនៃទីស្តីការគណៈរដ្ឋមន្ត្រីកម្ពុជានិងសាកលវិទ្យាល័យហាណូយ និងកិច្ចព្រមព្រៀងនាំចូលជីកសិកម្មដែលមានតម្លៃថោក។
គួរកត់សម្គាល់ថា ដំណើរទស្សនកិច្ចរបស់លោកនាយករដ្ឋមន្ត្រី ហ៊ុន សែន ទៅកាន់ប្រទេសវៀតណាមនៅពេលនេះបានកើតឡើងចំពេលដែលស្ថានការណ៍នយោបាយផ្ទៃក្នុងកម្ពុជាកំពុងតានតឹងខ្លាំង។ គណបក្សប្រឆាំងកំពុងធ្វើបាតុកម្មទាមទារឲ្យលោកនាយករដ្ឋមន្ត្រីចុះចេញពីមុខតំណែង។ ស្ថានភាពនេះបានធ្វើឲ្យមេដឹកនាំបក្សប្រឆាំងសង្ស័យថា ទស្សនកិច្ចនេះអាចជាឱកាសពិគ្រោះយោបល់អំពីរឿងនយោបាយ។
ប៉ុន្តែ ការសង្ស័យនេះត្រូវបានគណបក្សកាន់អំណាចបដិសេធ។ លោក ជាម យៀប មន្ត្រីជាន់ខ្ពស់គណបក្សប្រជាជនកម្ពុជាប្រាប់វិទ្យុបារាំងអន្តរជាតិថា នេះជាទស្សនកិច្ចដើម្បីរឹតចំណងមិត្តភាពជាមួយប្រទេសជិតខាងនិងប្រទេសក្នុងតំបន់ដែលបានគ្រោងទុកនិងដែលលោកនាយករដ្ឋមន្ត្រីបានធ្វើជាហូហែររួចទៅហើយ។ បើតាមលោក ជាម យៀប កម្ពុជាជាប្រទេសអធិបតេយ្យមួយដែលមានសិទ្ធិសម្រេចអំពីជោគវាសនារបស់ខ្លួនគ្រប់បែបយ៉ាងដោយមិនចាំបាច់ទៅសុំយោបល់ពីបរទេសណាឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ