សហគមន៍អន្តរជាតិទទួលស្គាល់ក្រុមឧទ្ទាមថាជារដ្ឋាភិបាលស្របច្បាប់របស់លីប៊ី
សហគមន៍អន្តរជាតិបានសម្រេចទទួលស្គាល់ក្រុមប្រឹក្សាជាតិអន្តរកាល (ក្រុមឧទ្ទាមលីប៊ី) ថាជារដ្ឋាភិបាលស្របច្បាប់របស់លីប៊ី។ ការទទួលស្គាល់នេះត្រូវបានធ្វើឡើង កាលពីថ្ងៃសុក្រ ១៥ កក្កដា ២០១១ នៅក្រោយកិច្ចប្រជុំក្រុមប្រទេសទទួលបន្ទុកដោះស្រាយវិបត្តិលីប៊ី ក្នុងនោះរួមមានជាអាទិ៍ តំណាងអ.ស.ប. សហភាពអឺរ៉ុប អង្គការអូតង់ សហព័ន្ធអារ៉ាប់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៣:០៨
គិតជាសរុប មានប្រទេសជាង ៣០ ដែលបានទទួលស្គាល់ក្រុមប្រឹក្សាជាតិអន្តរកាលលីប៊ី (ក្រុមឧទ្ទាម) ជារដ្ឋាភិបាលស្របច្បាប់លីប៊ី។ ប្រទេសទាំងនេះក៏បានទាមទារផងដែរឲ្យលោកកាដាហ្វ៊ីបោះបង់អំណាច ហើយទាមទារឲ្យក្រុមប្រឹក្សាជាតិអន្តរកាលលីប៊ី ខិតខំធ្វើយ៉ាងណារៀបចំបង្កើតរដ្ឋាភិបាលបណ្តោះអាសន្នមួយឲ្យបាន នៅក្នុងពេលឆាប់ៗនេះ។ សហរដ្ឋអាមេរិក ដែលកន្លងមកនៅរារែកមិនចង់ទទួលស្គាល់ក្រុមឧទ្ទាមលីប៊ីនោះ ក៏បានប្រកាសទទួលស្គាល់ក្រុមឧទ្ទាមដែរ។
លើសពីនេះទៅទៀត កាលពីថ្ងៃសុក្រម្សិលមិញនេះ សមាជិកព្រឹទ្ធសភាអាមេរិកបានស្នើសុំឲ្យរដ្ឋាភិបាលរបស់លោកអូបាម៉ាបើកស្ថានទូតអាមេរិក ប្រចាំទីក្រុងប៊ិនហ្កាហ្ស៊ី (Benghazi) ដែលជាមូលដ្ឋានធំរបស់ក្រុមឧទ្ទាមលីប៊ី។
ការទទួលស្គាល់ផ្នែកការទូតពីសហគមន៍អន្តរជាតិអាចនឹងជួយពង្រឹងកម្លាំងរបស់ក្រុមឧទ្ទាម ទាំងផ្នែកនយោបាយ ការទូត និងជាពិសេស ផ្នែកហិរញ្ញវត្ថុ។ ក្រុមឧទ្ទាមអាចនឹងមានសិទ្ធិដកយកលុយរាប់ពាន់លានដុល្លារ ដែលប្រទេសមួយចំនួន ដូចជា បារាំង អ៊ីតាលី និងអាមេរិក ជាដើម បានផ្អាប់ទុក ចាប់តាំងពីមានចលនាបះបោរមក។
កន្លងមក ប្រទេសកូវ៉ែត និងកាតាបានផ្តល់លុយប្រមាណជា ១០០លានដុល្លារដល់ពួកឧទ្ទាមលីប៊ី។ កាលពីថ្ងៃសុក្រ ម្សិលមិញនេះ បារាំងក៏បានសន្យាផងដែរថា នឹងអនុញ្ញាតឲ្យក្រុមឧទ្ទាមដកលុយចំនួន ២៥០លានដុល្លារ នៅក្នុងរយៈពេលប៉ុន្មានសប្តាហ៍ខាងមុខនេះ។ អ៊ីតាលីសន្យាឲ្យក្រុមឧទ្ទាមដក ១០០លានដុល្លារ។ អាមេរិកវិញ នៅមិនទាន់សម្រេចនៅឡើយទេថា តើក្នុងចំណោមលុយជាង ៣០ពាន់លានដុល្លារ ដែលផ្អាប់ទុកនៅអាមេរិក ក្រុមឧទ្ទាមនឹងអាចដកយកបានប៉ុន្មាន?
គួរបញ្ជាក់ថា ក្នុងកិច្ចប្រជុំនៅតួគី កាលពីថ្ងៃសុក្រនេះ មិនមានវត្តមានរុស្ស៊ី និងចិនទេ។ ចិន និងរុស្ស៊ីក៏ត្រូវបានគេអញ្ជើញឲ្យចូលរួមដែរ ក៏ប៉ុន្តែ ប្រទេសទាំងពីរនេះបានបដិសេធ។ រុស្ស៊ីតែងតែបានរិះគន់ប្រតិបត្តិការរបស់កងកម្លាំងអូតង់ នៅលីប៊ី ដោយចោទថា បានធ្វើហួសពីអ្វីដែលបានអនុញ្ញាតដោយក្រុមប្រឹក្សាសន្តិសុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ