ចិន-កូរ៉េ ច្រឡោតខ្លាំង ពេលនាយករដ្ឋមន្ត្រីជប៉ុនទៅវិហារយ៉ាស៊ូគូនី
ចុះផ្សាយនៅថ្ងៃ៖
ស្តាប់ - ០៦:១៧
ភាពតានតឹងរវាងចិននិងជប៉ុន បានផុងចូលដល់វគ្គថ្មីមួយទៀត ដោយនៅថ្ងៃព្រហស្បតិ៍នេះ តាំងពីព្រលឹម លោក ស៊ីនហ្សូ អាបេ បានអញ្ជើញទៅគោរពវិញ្ញាណក្ខន្ធ នៅវិហារ យ៉ាស៊ូគូនី ទីសក្ការៈសម្រាប់ឧទ្ទិសដល់វិញ្ញាណក្ខន្ធបណ្តាជនជប៉ុនពលីឬបូជាជីវិតដើម្បីជាតិ។ ប៉ុន្តែសម្រាប់ ចិន និងកូរ៉េខាងត្បូង ប្រទេសជិតខាងពីរដែលធ្លាប់រងការត្រួតត្រាឈ្លានពានរបស់ជប៉ុន វិហារនេះជាតំណាងអំពើឈ្លានពានវាតទីនិយមជប៉ុនដ៏ឃោរឃៅក្នុងសម័យសង្គ្រាមលោកលើកទីពីរ។ « មិនអាចទទួលបានដាត់ខាត » នេះជាប្រតិកម្មរបស់ចិន ! ជា « ទស្សនកិច្ចខុសសម័យកាល » សម្រាប់កូរ៉េ។ លើកនេះ សូម្បីតែសហរដ្ឋអាមេរិកក៏បានសម្តែងការខកចិត្តចំពោះទង្វើរបស់នាយករដ្ឋមន្ត្រីជប៉ុនដែរ។
ថ្ងៃនេះជាថ្ងៃខួបមួយឆ្នាំគត់ដែលលោក ស៊ីនហ្សូអាបេ ឡើងកាន់តំណែងជានាយករដ្ឋមន្ត្រីជប៉ុន។ តាំងពីបានទទួលនាទី ប្រមុខរដ្ឋាភិបាលជាថ្មីមក លោក អាបេ មិនខ្លាចនឹងបញ្ចេញកាយវិការ ណាដែលបង្ហាញពីលក្ខណៈជាតិនិយមឡើយ ហើយឥលូវនេះបានអញ្ជើញទៅវិហារយ៉ាស៊ូគូនីទៀត បើទោះបីជាដឹងថានឹងមានប្រតិកម្មយ៉ាងពុះកញ្ជ្រោលពីសំណាក់ប្រទេសជិតខាង និងរុញច្រានទំនាក់ទំនងឱ្យកាន់តែតានតឹងខ្លាំងយ៉ាងណាក៏ដោយ។
លោកជានាយករដ្ឋមន្ត្រីជប៉ុនទីមួយ គិតចាប់ពីថ្ងៃទី ១៥សីហា ឆ្នាំ២០០៦ ដែលបានអញ្ជើញទៅកាន់វិហារដ៏ចម្រូងចម្រាសនេះ។
ការអញ្ជើញទៅ ក្នុងថ្ងៃខួបមួយឆ្នាំនៃការឡើងកាន់អំណាច ក្នុងខណៈដែលទំនាក់ទំនងចិនជប៉ុន កំពុងធ្លាក់ចុះដុនដាបខ្លាំង ដោយជម្លោះដណ្តើមប្រជុំកោះ រហូតដល់មានការបញ្ជួននាវា យន្តហោះល្បាត ចូលដែនអាកាសគ្នាផងដូច្នេះ ក៏ព្រោះតែលោក ស៊ីនហ្សូអាបេ ចង់បង្ហាញពីខ្សែបន្ទាត់នយោបាយ ថាជាអ្នកស្តាំជាតិនិយមពិតៗ។ អ្នកជាតិនិយមដែលមានគ្នាតិចមែន ប៉ុន្តែមានកម្លាំងឥទ្ធិពលក្នុងសម្ព័ន្ធភាពរដ្ឋាភិបាល ដែលចេះនិយាយច្បាស់ៗថា "ទេ » ជាមួយចិន។ ថាកុំឱ្យលេងជ្រុលជាមួយជប៉ុន។
សម្រាប់លោកស៊ីនហ្សូអាបេ ចិនធ្វើហួសហេតុពេកហើយសព្វថ្ងៃនេះ ! បញ្ជូននាវាចម្បាំង ស្ទើររាល់ថ្ងៃទៅក្រវែលប្រជុំកោះសេនកាគូ ដែលស្ថិតក្រោមរដ្ឋបាលជប៉ុន តែចិននៅតែទាមទារថាជារបស់ខ្លួន។ បន្ទាប់មកចិន បានប្រកាសបង្កើតតំបន់ដែនអាកាសហាមឃាត់ ជាឯកតោភាគី ដោយរាប់ទាំងដែនអាកាសជប៉ុន មួយចំណែក និងដែនអាកាសលើប្រជុំកោះសេនកាគូទៀត។ ចំពោះស្ថានការណ៍បែបនេះ ក្នុងសមុទ្ទ ឬលើអាកាស គ្រោះប៉ះទង្គិចគ្នារវាងនាវាឬយន្តហោះ ចិន និងជប៉ុន អាចកើតឡើងបានគ្រប់ពេលវេលា។ ហេតុដូច្នេះហើយបានជា លោកស៊ីនហ្សូ អាបេ សម្រេចចិត្តធ្វើអ្វីមួយតបវិញ ដើម្បីបិទបញ្ចប់ការសម្លុតរបស់ចិន។
វិហារយ៉ាស៊ូគូនី ទីសក្ការៈរបស់បណ្តាជន តែចម្រូងចម្រាសផ្នែកនយោបាយ
វិហារយ៉ាស៊ូគូនី គឺជាទីសក្ការៈដ៏សំខាន់មួយ ដែលត្រូវបានសាងសង់ឡើង កាលពីឆ្នាំ១៨៦៩ ដោយអធិរាជម៉ីជី ដើម្បីទុកជាទីកន្លែងរំឭកដល់បណ្តាជនជប៉ុនទាំងឡាយណា ដែលបានបូជាជីវិតដើម្បីជាតិ ពោលគឺមានកត់ត្រាឈ្មោះមនុស្សប្រមាណជាជិត ២,៥លាននាក់ ដែលបានបាត់បង់ជីវិតក្នុងសង្រ្គាម ចាប់តាំងពីឆ្នាំ១៨៦៧ រហូតដល់ចុងសង្រ្គាមលោកលើកទី២ នៅឆ្នាំ១៩៤៥ ប៉ុន្តែក្នុងនោះ ក៏មានកត់ត្រាផងដែរនូវឈ្មោះ អតីតមន្រ្តីជាន់ខ្ពស់ជប៉ុនចំនួន ១៤រូប ដែលត្រូវបានតុលាការអន្តរជាតិក្រុងតូក្យូកាត់ឲ្យជាប់ទោសពី បទឧក្រិដ្ឋកម្មសង្រ្គាម ប្រព្រឹត្តក្នុងអំឡុងសង្រ្គាមលោកលើកទី២។
ចិន កូរ៉េខាងត្បូង និងកូរ៉េខាងជើង តែងតែផ្ទុះកំហឹង នៅពេលឃើញមានថ្នាក់ដឹកនាំជប៉ុន ទៅគោរពវិញ្ញាណក្ខន្ធ នៅទីនោះ សម្រាប់ប្រទេសជិតដែលធ្លាប់រងអាណានិគម ជប៉ុន (ពីឆ្នាំ១៩១០ ដល់ ១៩៤៥ សម្រាប់កូរ៉េ និងពីឆ្នាំ១៩៣១ដល់៤៥ សម្រាប់ចិន) វិហារយ៉ាស៊ូគូនី គឺជានិមិត្តរូបនៃអំពើឈ្លានពានរបស់ជប៉ុន ក្នុងសម័យសង្រ្គាម ដូច្នេះការណ៍ដែលមន្រ្តីជប៉ុននាំគ្នាទៅបួងសួងនៅវិហារយ៉ាស៊ូគូនីនេះ គឺមានន័យស្មើនឹងការផ្តល់កិត្តិយសដល់ឧក្រិដ្ឋជនសង្រ្គាម និងជាការមិនទទួលស្គាល់អំពើឃោរឃៅរបស់ខ្លួន នៅអាស៊ី កាលពីអតីតកាល។
សម្រាប់លោក ស៊ីនហ្សូ អាបេ ការចចេសធ្វើដំណើរចូលវិហារយ៉ាស៊ូគូនី នៅព្រឹកមិញនេះត្រូវបានពន្យល់ថា ដើម្បីបញ្ជាក់ពីការប្តេជ្ញាចិត្តរបស់លោក មិនចង់ឃើញនរណាឈឺចាប់ព្រោះសង្គ្រាមជាថ្មីទៀត គ្មានឡើយបំណងចង់គាស់កកាយបញ្ជឺចិននិងកូរ៉េខាងត្បូង។
អាមេរិក ខកចិត្តខ្លាំង
ពិតណាស់ ! ចិននិងកូរ៉េខាងត្បូងមិនអាចទទួយយកហេតុផលរបស់លោក អាបេ និងមិនអាចទប់កំហឹងបានឡើយ ! ចិន តាមរយៈក្រសួងការបរទេស បានព្រមានជប៉ុនអំពីផលវិបាក បង្កឡើងដោយទង្វើរបស់នាយករដ្ឋមន្ត្រី។ ព្រោះដូចយើងបានដឹងហើយ ថាប្រទេសពីរនេះកំពុងតានតឹងដាក់គ្នាខ្លាំងស្រាប់ផង ក្នុងរយៈពេលចុងក្រោយនេះ។ ចំពោះកូរ៉េខាងត្បូងវិញ បានចាត់ទុកទស្សនកិច្ចនេះថាជា « ទង្វើខុសកាល »។ លើសពីនេះទៅទៀត សូម្បីតែសហរដ្ឋអាមេរិក ជាសម្ព័ន្ធមិត្ត ធ្លាប់គាំទ្រជប៉ុនកន្លងមក ក៏បានសម្តែងការខកចិត្តខ្លាំងដែរ នៅពេលឃើញលោកអាបេ ទៅវិហារដ៏ចម្រូងចម្រាសនេះ ព្រោះមិនចង់ឃើញមានសម្ពាធក្នុងតំបន់ទេ។ អាមេរិក ធ្លាប់ទទូចដដែលឱ្យជប៉ុនបញ្ចៀសកុំបង្កភាពតានតឹងជាមួយចិននិងកូរ៉េ។
ប្រមុខការទូតអាមេរិកធ្លាប់បានទាំងណែនាំ ដោយប្រយោល ឱ្យរដ្ឋាភិបាលជប៉ុនឱ្យចេះគោរពវិញ្ញាណក្ខន្ធទាហានពលីជីវិតក្នុងសង្គ្រាមដើម្បីប្រទេសជាតិ ដោយអញ្ជើញទៅវិមានសពជាតិ មិនមែនវិហារយ៉ាស៊ូគូនី។ ជប៉ុននិងកូរ៉េខាងត្បូង សុទ្ធតែជាសម្ព័ន្ធមិត្តអាមេរិកទាំងអស់គ្នា ប៉ុន្តែទំនាក់ទំនងរវាងប្រទេសទាំងពីរមានភាពល្អក់កករខ្លាំង ដោយជម្លោះដែនដី ដូចជាមួយចិនដែរ រហូតដល់ថ្នាក់ត្រូវលុបជំនួបទ្វេភាគីជប៉ុនកូរ៉េផង កាលពីខែវិច្ឆិកា។
អាមេរិកពិតជាមិនចង់ធ្វើអាជ្ញាកណ្តាលឱ្យមិត្តទេ។ ជប៉ុនត្រូវការគោរពវិញ្ញាណក្ខន្ធជនរងគ្រោះក្នុងសង្គ្រាមជាង២លាននាក់កន្លះ ប៉ុន្តែ១៤នាក់ជាឧក្រិដ្ឋជនសង្គ្រាម ដែលតំណាងឱ្យការសាបព្រោះសោកនាដកម្មនៅចិននិងនៅកូរ៉េ ព្រមទាំងបណ្តាជនអាស៊ីផ្សេងទៀត។ ដោយមូលហេតុមនោគម ចិត្តសាស្រ្ត សាសនា វប្បធម៌ប្រពែណី ឬច្បាប់ គេមិនអាចលើកគាស់ឈ្មោះ១៤នាក់នោះចេញ តែអ្វីដែលប្រាកដគឺអាជ្ញាធរនយោបាយមិនអាចបង្ខំវិហារឯកជនឱ្យធ្វើតាមទិសដៅនយោបាយឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ