មួយឆ្នាំនៃការចូលកាន់តំណែង លោកស្ហ៊ិនហ្សូ អាបេស្គាល់ត្រជាក់ផង ក្តៅផង
ចុះផ្សាយនៅថ្ងៃ៖
ស្តាប់ - ០៦:២២
នៅថ្ងៃព្រហស្បតិ៍ទី ២៦ ធ្នូ ជាខួបគម្រប់មួយឆ្នាំ នៃការចូលកាន់តំណែងរបស់លោកស៊ីនហ្សូ អាបេ។ កាលពីថ្ងៃទី ២៦ ធ្នូ ឆ្នាំ ២០១២ លោកអាបេមកពី គណបក្សសេរីប្រជាធិបតេយ្យ បានចូលកាន់តំណែងជានាយករដ្ឋមន្រ្តីជប៉ុន បន្ទាប់ពីឈ្នះឆ្នោតលើគូប្រកួតប្រជែងមកពីគណបក្សប្រជាធិបតេយ្យជប៉ុន។
នៅពេល លោកស្ហ៊ិនហ្សូ អាបេ ចូលធ្វើជានាយករដ្ឋមន្រ្តី ជប៉ុន កាលពីចុងឆ្នាំ ២០១២ ជប៉ុនកំពុងស្ថិតនៅក្នុងស្ថានភាពមួយដ៏លំបាក ដែលពិបាកនឹងមើល។ ជប៉ុនបានបាត់បង់តំណែងជាមហាអំណាចសេដ្ឋកិច្ចពិភពលោកទីពីរទៅឲ្យចិន និងត្រូវធ្លាក់មកនៅទីបី។ សេដ្ឋកិច្ចជប៉ុនកំពុងតែដើរអូសជើង ប្រជាជនជប៉ុនកំពុងរងវិបត្តិផ្លូវចិត្ត ដោយសារគ្រោះមហន្តរាយ រញ្ជួយដី នៅហ្វូគូស៊ីម៉ា។ មួយវិញទៀត ជប៉ុនកំពុងចាប់ផ្តើមថ្នាំងថ្នាក់ចិត្តជាមួយអាមេរិក នៅពេលដែលចិនចាប់ផ្តើមបញ្ចេញឥទ្ធិពល និងទាមទារជាម្ចាស់លើប្រជុំកោះសេនកាគូ ដែលជប៉ុនគ្រប់គ្រងតាំងពីក្រោយសង្រ្គាមលោកលើកទីពីរ។
ក្នុងស្ថានភាពបែបនេះ លោកអាបេត្រូវបានគេចាត់ទុកជាមេដឹកនាំ ត្រលប់មកជួយសង្រ្គោះ ស្រោចស្រង់ប្រទេសជប៉ុនឡើងវិញ។ រូបភាពរបស់ជប៉ុនដែលត្រូវតែខ្លាំង។ ជាមួយគំនិតនេះ លោក ស្ហ៊ិនហ្សូ អាបេដែលធ្លាប់ធ្វើជានាយករដ្ឋមន្រ្តី ជប៉ុន បានមួយឆ្នាំដែរ កាលពីឆ្នាំ ២០០៦បានផ្តោតទៅលើកំណើនសេដ្ឋកិច្ចជាអាទិភាពជាងគេ។ លោកបានបង្កើតនយោបាយសេដ្ឋកិច្ចមួយ ដែលត្រូវបានគេផ្តល់រហស្សនាមថា Abenomics។ នយោបាយសេដ្ឋកិច្ចរបស់លោកអាបេ ផ្តោតទៅលើការបង្កើនចំណាយសាធារណៈ និងបោះពុម្ពក្រដាសប្រាក់បន្ថែម។
នយោបាយAbenomics របស់លោក ស្ហ៊ិនហ្សូ អាបេបានធ្វើឲ្យកំណើនសេដ្ឋកិច្ចជប៉ុនមានការកើនឡើងខ្ពស់ ហួសពីការរំពឹងទុក នៅដើមឆ្នាំ រហូតធ្វើឲ្យប្រទេសនៅអឺរ៉ុបខ្លះ ដែលកំពុងជួបវិបត្តិប្រាក់បំណុល ចង់យកគំរូតាម។
ក្រៅតែពីជាស្ថាបនិកដែលនាំឲ្យជប៉ុនជួបកំណើនសេដ្ឋកិច្ច លោកនាយករដ្ឋមន្រ្តីជប៉ុនត្រូវបានគេមើលឃើញថា ជាមេដឹកនាំដែលពូកែខាងនយោបាយការទូត។ លោកបានពង្រឹងចំណងមិត្តភាព មិនថា ជាមួយសម្ព័ន្ធមិត្ត ដូចជាអាមេរិក ឬអតីតសត្រូវ ដូចជារុស្ស៊ី។ លោកបានធ្វើដំណើរទៅប្រទេសដែលសំបូរប្រេងនៅសមុទ្រពែរ្ស ដើម្បីរកទិញប្រេង មកផ្គត់ផ្គង់ជប៉ុន ដែលជួបការខ្វះខាតផ្នែកថាមពល ចាប់តាំងពីជប៉ុន ពន្លត់រោងចក្រអគ្គិសនី ដើរដោយថាមពលនុយក្លេអ៊េរ ក្រោយគ្រោះថ្នាក់ នៅFukushima។ មួយវិញ ទៀត នៅតែប៉ុន្មានខែនៃការចូលកាន់តំណែងរបស់គាត់ ជានាយករដ្ឋមន្រ្តី លោកអាបេបានទៅធ្វើទស្សនកិច្ច នៅគ្រប់ប្រទេសសមាជិកអាស៊ាន។ បំណងគឺដើម្បី បញ្ចុះបញ្ចូលប្រទេសមួយចំនួន ដែលជាសមាជិកអាស៊ាន ដែលកំពុងឈ្លោះដណ្តើមដីកោះជាមួយចិន ឲ្យមកនៅខាងភាគីខ្លួន។
ប៉ុន្តែ រហូតមកដល់ពេលនេះ លោកអាបេ មិនដែលបានជួបប្រជុំជាមួយមេដឹកនាំចិន និងកូរ៉េខាងត្បូង ដែលតាមពិតទៅ ជាភាគីជម្លោះដ៏សំខាន់ របស់ ជប៉ុន
នរណាក៏ដឹងដែរថា លោកអាបេជានាយករដ្ឋមន្រ្តីជាតិនិយម។ ក្នុងបញ្ហាទាមទារទឹកដីជាមួយចិន លោកអាបេ បានសន្យាទៅប្រជាជនជប៉ុនរួចហើយថា លោកនឹងការពារ ដែនកោះរបស់ជប៉ុន។ ប្រជុំកោះសេនកាគូស្ថិតនៅក្នុងដែនអធិបតេយ្យភាពរបស់ជប៉ុន ដែលលោកនឹងមិនចរចាជាដាច់ខាតជាមួយចិន។ ក្នុងហេតុផលការពារទឹកដីរបស់ជប៉ុន លោកអាបេ ជានាយករដ្ឋមន្រ្តីជប៉ុនទីមួយ ដែលគ្រាន់តែក្នុងរយៈពេលតែមួយឆ្នាំនៃការចូលកាន់តំណែង បានដំឡើងថវិកាការពារជាតិ ដល់ទៅពីរដង ដែលតាមពិតទៅ ជប៉ុនខានបានធ្វើអស់រយៈពេល១០ឆ្នាំមកហើយ។
បន្ទាប់ពីចិនបង្កើតតំបន់ការពារដែនអាកាស កាលពីចុងខែវិច្ឆិកា ជប៉ុនបានប្រកាសជាបន្តបន្ទាប់វិធានការយោធា ដើម្បីទប់ទល់ និងអន្តរាគមន៍នៅក្នុងពេលណាដែលជប៉ុនរងការឈ្លានពានពីចិន។ នៅលើក្រៅស្រុក លោកនាយករដ្ឋមន្រ្តីជប៉ុនរឹតតែខំប្រឹងសម្រុកនយោបាយការទូតរបស់ខ្លួន។ ជប៉ុនបានដុតដៃ ដុតជើងជួយហ្វីលីពីន ដែលជួបរងគ្រោះដោយខ្យល់ព្យុះហៃយ៉ាន់។ កាលពីពីរសប្តាហ៍មុននេះទៀត ជប៉ុនថែមទាំងបានប្រកាសផ្តល់ជំនួយ ដល់ប្រទេសសមាជិកអាស៊ាន រាប់ពាន់លានដុល្លារទៀត។
នៅមុនប្រារព្ធខួបមួយឆ្នាំ នៃការចូលកាន់តំណែងជានាយករដ្ឋមន្រ្តី លោកអាបេទទួលអប្រជាប្រិយភាពខ្លាំង នៅក្នុងការស្ទង់មតិ ចុងក្រោយនេះ
លោកអាបេបានជួយឲ្យជប៉ុនជួបកំណើនសេដ្ឋកិច្ច និងការពារទឹកដីជប៉ុន។ ប៉ុន្តែ លោកក៏អាចធ្លាក់កូដ ដោយសារតែ គេចាប់ផ្តើមសង្ស័យពីប្រសិទ្ធិភាពនយោបាយសេដ្ឋកិច្ចរបស់លោក និងនយោបាយជាតិនិយមជ្រុលរបស់លោក។ រហូតមកដល់ពេលនេះ នយោបាយសេដ្ឋកិច្ចរបស់លោកអាបេ មិនបានជួយធ្វើឲ្យអត្រាអតិផរណាជប៉ុនកើនឡើង ដល់២ភាគរយ តាមការកំណត់ទេ។ អង្គការមូលនិធិរូបិយវត្ថុអន្តរជាតិជាដើម បារម្ភថា នយោបាយសេដ្ឋកិច្ចរបស់លោកអាបេ ដែលបង្កើនថវិកាចំណាយសាធារណៈ នឹងមិនជួយកំណើនសេដ្ឋកិច្ចជប៉ុនរយៈពេលវែង បើសិនជារដ្ឋាភិបាលមិនព្រមធ្វើកំណែទម្រង់ក្នុងស្ថាប័នរដ្ឋ ដូចការសន្យា។ រដ្ឋគិតតែបង្កើនប្រាក់ការចំណាយ ដែលធ្វើឲ្យប្រាក់បំណុលជាតិរបស់ជប៉ុន បានកើនឡើងខ្ពស់ គឺរហូតដល់ទៅ ២៣០ភាគរយនៃផលិតផលក្នុងស្រុកសរុប។ ក្នុងពេលជាមួយគ្នានោះ ការចំណាយរបស់ប្រជាជនក៏មិនបានកើនឡើងគួរឲ្យកត់សំគាល់ដែរ។
ងាកមកមើលនយោបាយជាតិនិយមរបស់លោកអាបេវិញ ប្រជាជនជប៉ុន គំាទ្រគំនិតដែលរដ្ឋាភិបាលត្រូវការពារទឹកដី ប៉ុន្តែ ពួកគេព្រួយបារម្ភដែរថា លោកអាបេអាចនឹងកែប្រែរដ្ឋធម្មនុញ្ញសន្តិភាព ដើម្បីបំពាក់អាវុធ និងបញ្ចូលកងទ័ពជប៉ុនទៅក្នុងសង្រ្គាមជាថ្មី។
មូលហេតុចុងក្រោយដែលធ្វើឲ្យលោកអាបេធ្លាក់ប្រជាប្រិយភាពដែរ គឺរដ្ឋាភិបាលរបស់លោកបានបង្កើតច្បាប់ស្តីពីការណ៍សម្ងាត់របស់រដ្ឋាភិបាល។ ប្រព័ន្ធផ្សព្វផ្សាយ និងសង្គមស៊ីវិលជាច្រើន បានបរិហារច្បាប់នេះ ថា ជាឧបសគ្គរំលោភសិទ្ធិ បញ្ចេញមតិរបស់ប្រជាជន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ