ជំនួបរវាងប្រមុខការទូតអាមេរិកនិងប្រមុខការទូតរុស្ស៊ី ផ្តោតលើវិបត្តិស៊ីរី
នៅក្រុងហ្សឺណែវ ថ្ងៃ២៦សីហានេះ ប្រមុខការទូតអាមេរិកចន ឃែររី បានជួបជាមួយប្រមុខ ការទូតរុស្ស៊ី ស៊ែរហ្កី ឡាវ្រូវ ដើម្បីពិភាក្សាពីវិបត្តិជម្លោះស៊ីរី។ អាមេរិកនិងរុស្ស៊ីចង់ជំរុញអោយមានកិច្ចពិភាក្សាសន្តិភាពស៊ីរី ឡើងវិញ។ រុស្ស៊ីក៏ត្រៀមជជែកជាមួយអាមេរិកពីរបាយការណ៍អង្គការសហប្រជាជាតិ ដែលបានចោទថា កងទ័ពស៊ីរីប្រើប្រាស់អាវុធគីមីដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៣
នៅចំពោះមុខក្រុមអ្នកសារព័ត៌មាន នៅក្រុងហ្សឺណែវ ថ្ងៃសុក្រ២៦សីហានេះ ប្រមុខការទូតអាមេរិក និងរុស្ស៊ីមិនបានប្រាប់ថា តើពួកគេរង់ចាំអ្វីអោយពិតប្រាកដពីកិច្ចពិភាក្សាសន្តិភាពស៊ីរីទេ។ ប្រមុខការទូតស៊ែរហ្កី ឡាវ្រូវ ព្យាយាមមិនបង្កភាពតានតឹងជាមួយអាមេរិក ដោយមិនឆ្លើយសំណួរអ្នកសារព័ត៌មាន ទាក់ទងនឹងឧបសគ្គក្នុងការប្រកាសបទឈប់បាញ់នៅស៊ីរី។
អាមេរិកនិងរុស្ស៊ីមានក្រុមជីហាតរដ្ឋអ៊ីស្លាមជាសត្រូវតែមួយ។ អាមេរិកគាំទ្រក្រុមប្រឆាំងស៊ីរី មិនចង់ឃើញលោកអាសាដ បន្តកាន់អំណាច។ តែរុស្ស៊ីវិញគាំទ្រលោកអាសាដ។ តាំងពីដើមឆ្នាំ២០១៦មក ក្រុងហ្សឺណែវបានរៀបចំកិច្ចពីភាក្សាអន្តរស៊ីរីជាច្រើន ប៉ុន្តែគ្មានលទ្ធផលអ្វីទេ។
សង្គ្រាមស៊ីរីជាង៥ឆ្នាំនេះ សម្លាប់មនុស្សជាង២សែន៩ម៉ឺននាក់ហើយ។ ជំនួបរវាងប្រមុខការទូតរុស្ស៊ីនិងអាមេរិក នៅក្រុងហ្សឺណែវពេលនេះ ប្រហែលអាចផ្តល់ផលវិបាកដល់ការផ្តួចផ្តើមរបស់អង្គការសហប្រជាជាតិ ក្នុងការជំរុញដំនើរការនយោបាយស៊ីរី។ នេះបើយោងតាមប្រេសិតអង្គការសហប្រជាជាតិ លោកស្តាហ្វាន ដឺ មីស្ទូរ៉ា។ ជំនួបប្រមុខការទូតទាំង២ អាចនឹងស្មុគស្មាញច្រើន ព្រោះពេលនេះ នៅស៊ីរី កងទ័ពតួកគី កំទេចទាំងក្រុមជីហាតរដ្ឋអ៊ីស្លាម ទាំងក្រុមគួដឌីស្ថានដែលជាមិត្តរបស់អាមេរិក។
កងទ័ពលោកអាសាដវិញ បានវាយយកបានក្រុងដារ៉ាយ៉ាស្ថិតនៅភាគនិរតីក្រុងដាម៉ាស ពីក្រុមឧទ្ទាមមកវិញ។ ក្រុងដារ៉ាយ៉ាតំណាងចលនាបះបោរប្រឆាំងលោកអាសាដ ឆ្នាំ២០១១។ កងទ័ពឡោមព័ទ្ធក្រុងនេះ ៤ឆ្នាំហើយ។ កងទ័ពស៊ីរី និងក្រុមឧទ្ទាមបានព្រមព្រៀងគ្នា អោយជម្លៀសជនស៊ីវិលនិងក្រុមបះបោរចេញពីក្រុងដារ៉ាយ៉ា។ ហើយថ្ងៃសុក្រនេះ ក្រុមឧទ្ទាមនិងគ្រួសារពួកគេ បាននាំគ្នាចាកចេញពីក្រុងនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ