សមរភូមិហាសាកេHassake របត់ថ្មីនៃសង្គ្រាមនៅស៊ីរី ?
ចុះផ្សាយនៅថ្ងៃ៖
ស្តាប់ - ០៦:១១
ក្នុងខណៈដែលតំបន់អាឡិប បានក្លាយជាសមរភូមិយ៉ាងសន្ធោសន្ធៅ កងកម្លាំងរដ្ឋាភិបាលស៊ីរី និងពួកឧទ្ទាមត្រៀមបើកសង្វៀនប្រយុទ្ធគ្នាទឹកថ្មី មានសមរភូមិប្រយុទ្ធមួយកន្លែងទៀត នៅចម្ងាយប្រមាណតែជាងបីរយគីឡូម៉ែត្រពីតំបន់អាឡិប ក៏បាននិងកំពុងឆាបឆេះឡើងយ៉ាងតានតឹង។ ក្រោយពីមានប៉ះទង្គិចប្រយុទ្ធគ្នារវាងកងយុទ្ធជនគាំទ្រក្រុងដាម៉ាស និងប៉ូលិសគួដឌីស្ថាន កងកម្លាំងរបស់លោកបាស្ហារ អាល់អាសាដ បានបើកយុទ្ធនាការផ្លូវអាកាស ជាលើកទីមួយ គិតចាប់ពីសង្គ្រាមបានផ្ទុះឡើងនៅឆ្នាំ២០១១ វាយប្រហារទីតាំងរបស់គួដឌីស្ថាន នៅហាសាកេ Hassake។ ឯចំណែកអាមេរិក ក៏បានសម្រេចចិត្ត ជាលើកទីមួយដែរ វាយប្រហារផ្លូវអាកាស ប្រឆាំងនឹងរបបក្រុងដាម៉ាស។
យន្តហោះនៃកងទ័ពអាកាសស៊ីរី បានបន្តហោះឆ្វែលពេញមេឃលើតំបន់ ហាសាកេ (Hassake) នៅថ្ងៃសៅរ៍នេះទៀត ប៉ុន្តែក្នុងពេលភ្លាមៗដូច្នេះ គេមិនច្បាស់ទេថា តើយន្តហោះយោធាស៊ីរី យប់មិញ ហោះឆ្វែលក្នុងបំណងដូចកាលពីថ្ងៃព្រហស្បតិ៍និងថ្ងៃសុក្រឬយ៉ាងណាទេ។
នេះគឺជាលើកទីមួយ គិតចាប់តាំងពីសង្គ្រាមនៅស៊ីរីបានផ្ទុះឡើង នៅឆ្នាំ២០១១មក ដែលកងកម្លាំងការពារជាតិ ឬទាហានរបស់រដ្ឋាភិបាលលោកបាស្ហារ អាល់អាសាដ បានបើកការវាយប្រហារលើទីតាំងរបស់ពួកគួដឌីស្ថាន នៅតំបន់ហាសាកេ ដែលធ្លាប់ធ្វើការរួមគ្នាដើម្បីយកឈ្នះពួកអង្គការរដ្ឋអ៊ីស្លាម។
នៅក្នុងសេចក្តីថ្លែងការណ៍ អាជ្ញាធរស៊ីរី បានបញ្ជាក់ថា សកម្មភាពវាយប្រហាររបស់យោធាស៊ីរី គឺជាប្រតិកម្មតបតយ៉ាងសក្តិសមលើពួកគួដឌីស្ថាន ដែលចង់គ្រប់គ្រងទាំងស្រុងតំបន់ ហាសាកេ។ ប្រភពរដ្ឋាភិបាលប្រចាំតំបន់បានអះអាង ប្រាប់ភ្នាក់ងារសារព័ត៌មានបារាំងថា ការទម្លាក់គ្រាប់បែកនេះ គឺជាសារព្រមានដល់ពួកគួដឌីស្ថាន ឱ្យបញ្ឈប់សកម្មភាពទាមទារណាមួយដែលប៉ះពាល់ដល់បូរណភាពជាតិ។
គួដឌីស្ថាននៅស៊ីរី តំណាង១៥%នៃប្រជាពលរដ្ឋស៊ីរីទាំងអស់។ ក្រុមនេះ ត្រួតត្រាតំបន់ហាសាកេដល់ទៅពីរភាគបី។ ម្យ៉ាងទៀតពួកគួដឌីស្ថាន គឺជាសម្ព័ន្ធមិត្តដ៏រឹងមាំរបស់សហរដ្ឋអាមេរិក ក្នុងការប្រយុទ្ធប្រឆាំងនឹងអង្គការរដ្ឋអ៊ីស្លាម នៅស៊ីរី។
អាមេរិកបញ្ជូនយន្តហោះចម្បាំងទៅស៊ីរី
ដោយឃើញមានការប្រយុទ្ធលើដី និងការសម្រុកវាយប្រហារទម្លាក់គ្រាប់បែកយ៉ាងសន្ធាប់លើទីតាំងគូដឌីស្ថាន ពីរថ្ងៃជាប់គ្នាយ៉ាងដូច្នេះ សហរដ្ឋអាមេរិក ក្នុងនាមជាប្រមុខដឹកនាំកងកម្លាំងសម្ព័ន្ធមិត្តអន្តរជាតិ ក៏បានចេញមុខធ្វើអន្តរាគមន៍ដោយផ្ទាល់ ជាលើកទីមួយ ដោយសម្រេចបញ្ជូនយន្តហោះចម្បាំងជាច្រើនគ្រឿងទៅស៊ីរី តែម្តង។ ប៉ុន្តែជាសំណាងល្អ នៅពេលយន្តហោះចម្បាំងអាមេរិក US Air force ទៅដល់ យន្តហោះចម្បាំងរបស់ស៊ីរី SU-24 ទាំងពីរគ្រឿងបានត្រលប់ចូលបន្ទាយវិញ ទើបគ្មានក៏ប៉ះទង្គិចច្បាំងគ្នាដោយផ្ទាល់។
ការបញ្ជូនយន្តហោះចម្បាំងទៅស៊ីរី របស់អាមេរិក មិនមែនដើម្បីការពារកងកម្លាំងគួដឌីស្ថានដែលជាសម្ព័ន្ធមិត្ត ក្នុងការប្រយុទ្ធប្រឆាំងនឹងអង្គការរដ្ឋអ៊ីស្លាមទេ ប៉ុន្តែ នៅទីនោះ មានកងទ័ពពិសេសអាមេរិក ប្រមាណ៣០០នាក់ កំពុងឈរជើង នៅចម្ងាយប្រមាណ៤ឬ៥គីឡូម៉ែត្រពីក្រុងហាសាកេ។ កងកម្លាំងពិសេសអាមេរិកនេះ មានភារៈផ្តល់ ប្រឹក្សា និងបំពាក់បំប៉នកងកម្លាំងគួដឌីស្ថាន។
សម្រាប់វ៉ាស៊ីនតោន ការវាយប្រហារផ្លូវអាកាសរបស់ស៊ីរី ប្រឆាំងនឹងកងកម្លាំងគួដឌីស្ថាន គឺជាការវាយប្រហារប្រឆាំងនឹងកម្លាំងសម្ព័ន្ធមិត្ត និងដែលមិនអាចអនុគ្រោះឱ្យបានឡើយ។ អ្នកនាំពាក្យសហរដ្ឋអាមេរិកបានទាក់ទងទៅរុស្ស៊ី ដឹងច្បាស់ណាស់ថាមិនមែនជាស្នាដៃវាយប្រហាររបស់ម៉ូស្គូទេ តែបានស្នើសុំឱ្យសម្ព័ន្ធមិត្តស៊ីរីម្នាក់នេះទៅប្រាប់លោក បាស្ហារ អាល់អាសាដ ឱ្យបញ្ឈប់ការទម្លាក់គ្រាប់លើទីតាំងគួដឌីស្ថាន តែមើលទៅសារនេះ មិនបានទៅដល់ក្រុងដាម៉ាសទេ ឬទៅដល់ដែរតែគ្មានអ្នកធ្វើឮ។
ហេតុអ្វីស៊ីរីធ្វើសង្គ្រាមជាមួយកងកម្លាំងគួដឌីស្ថាន ពេលនេះ ?
អាចមានមូលហេតុពីរ ៖ ទីមួយគឺមូលហេតុជាតិ ! កងកម្លាំងប្រជាធិបតេយ្យស៊ីរី ដែលកម្លាំងសម្ព័ន្ធមិត្តយុទ្ធជនអារ៉ាបភាគតិច និងភាគច្រើនជាគួដឌីស្ថាន បានរុលទៅមុខឈ្នះលើពួកអង្គការរដ្ឋអ៊ីស្លាមជាបន្តបន្ទាប់។ ហើយក្នុងពេលដែលកងកម្លាំងរដ្ឋាភិបាលក្រុងដាម៉ាស វក់វីក្នុងសមរភូមិក្រុងអាឡិប កងកម្លាំងគួដឌីស្ថានក៏ឆ្លៀត យកចំណេញពីជោគជ័យនេះ ដើម្បីប្រមូលផ្តុំសហគមគួដឌីស្ថាន នៅហាសាកេ និងខេត្តជាប់គ្នាពីរបីទៀត ពង្រីកដី មានកម្លាំងច្រើន ដែលអាចមានប្រៀបលើរដ្ឋាភិបាលនៅពេលចរចាផ្សេងៗ។ ប្រឈមនឹងទស្សនវិស័យនេះ ទើបរដ្ឋាភិបាលក្រុងដាម៉ាសត្រូវងាកមកវាយលើពួកគួដឌីស្ថាននៅហាសាកេនេះទៅ។
បរិបទតំបន់និងអន្តរជាតិ អាចជាមូលហេតុទីពីរ។ នារយៈពេលប៉ុន្មានថ្ងៃចុងក្រោយ បញ្ហា គួដឌីស្ថាននៅស៊ីរី បានក្លាយជាប្រធានបទមួយនៃការចរចាការទូត។ របបក្រុងដាម៉ាស ទំនងកំពុងចរចាជាមួយមហាអំណាចក្នុងតំបន់ផ្សេងទៀត ពិសេសតួកគី ដែលក៏លូកដៃដោយផ្ទាល់ក្នុងវិបត្តិស៊ីរី និងគួដឌីស្ថាននេះដែរ។ ការវាយប្រហារនេះ អាចជាសញ្ញានៃកិច្ចសហប្រតិបត្តិការប្រទាក់ក្រឡា រវាង តួកគី អ៊ីរ៉ង់និងស៊ីរី។ បីភាគីនេះអាចរកឃើញការព្រមព្រៀងគ្នា ជុំវិញបញ្ហាគូដឌីស្ថាននេះផង ទន្ទឹមនឹងការត្រូវរ៉ូវគ្នាថ្មីៗរវាង ម៉ូស្គូនិងអង់ការ៉ា។ តាមរយៈជំនួបរវាងលោកពូទីន និងអែដូហ្កាន កាលពីសប្តាហ៍មុនទៀត រុស្ស៊ី តួកគី និងអ៊ីរ៉ង់ ក៏ទំនងសម្រេចកិច្ចព្រមព្រៀងគ្នា ដោយសម្ងាត់មួយដែរ។
តែការត្រូវរ៉ូវដោយស្ងាត់ៗ ត្រូវប្រឈមនឹងអន្តរាគមន៍អន្តរជាតិ នោះគឺអាមេរិក ដែលបញ្ជូនយ៉ាងទាន់ហន់យន្តហោះចម្បាំងមកស៊ីរី។ វិបត្តិស៊ីរី ទំនងជាដើរមកដល់របត់ថ្មី ដែលមានគ្រប់ទស្សនវិស័យការទូត។ ថ្វីបើគ្រប់គ្នាកំពុងផ្តោចចក្ខុទៅក្រុងអាឡិបមែន តែគឺស្ថានការណ៍នៅហាសាកេនេះឯង ដែលជាមូលហេតុនៃភាពពុះកញ្ជ្រោលផ្នែកយោធានិងការទូត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ