ប្រមុខសាសនាអ៊ីស្លាមអ៊ីរ៉ង់ព្រមានពីការផ្ទុះសង្រ្គាមស៊ីវិលក្នុងប្រទេសអេហ្ស៊ីប និងបរិហារកិច្ចចរចាសន្តិភាពរវាងអ៊ីស្រាអែល និងប៉ាឡេស្ទីន
ចុះផ្សាយនៅថ្ងៃ៖
ស្តាប់ - ០៤:៥០
ពិធីបួស ឬអាចហៅម្យ៉ាងទៀតថា ពិធីតមអាហាររបស់អ្នកកាន់សាសនាអ៊ីស្លាមរយៈពេល ១ខែបានបិទបញ្ចប់ហើយ នៅថ្ងៃព្រហស្បតិ៍ ទី៨ សីហាម្សិលមិញ។ ថ្លែងនៅថ្ងៃសុក្រទី៩ សីហានេះនាឱកាសបិទបញ្ចប់ពិធីតមអាហាររបស់អ្នកកាន់សាសនាអ៊ីស្លាម លោកអាលី ខាមេនី មេដឹកនំាសាសនាអ៊ីស្លាមក្នុងប្រទេសអ៊ីរ៉ង់បានសម្តែងក្តីបារម្ភចំពោះស្ថានការណ៍នៅក្នុងប្រទេសអេហ្ស៊ីប និងបានបរិហារចំពោះដំណើរកិច្ចចរចាស្វែងរកសន្តិភាពរវាងអ៊ីស្រាអែល និងប៉ាឡេស្ទីន។
ស្ថានការណ៍ដែលបាននិងកំពុងកើតមានឡើងនៅក្នុងប្រទេសអេហ្ស៊ីបនាពេលសព្វថ្ងៃ វាហាក់ដូចជាការចាប់ផ្តើមសង្រ្គាមស៊ីវិល។ ប៉ុន្តែ អ្វីដែលជាការព្រួយបារម្ភធំរបស់លោកអាលី ខាមេនី ប្រមុខដឹកនំាសាសនាអ៊ីស្លាមក្នុងប្រទេសអ៊ីរ៉ង់ពេលនេះ គឺការដែលប្រទេសអេហ្ស៊ីបកំពុងផុងខ្លួនកាន់តែជ្រៅទៅក្នុងសង្រ្គាមស៊ីវិលពីមួយថ្ងៃ ទៅមួយថ្ងៃ។ លោកខាមេនីបានហៅស្ថានការណ៍របៀបនេះថា ជាគ្រោះមហន្តរាយសម្រាប់ប្រទេស និងប្រជាជនអេហ្ស៊ីបទំាងមូល។ ដោយសម្លឹងឃើញនូវគ្រោះមហន្តរាយជាយថាហេតុនេះ លោកប្រមុខដឹកនំាសាសនាអ៊ីរ៉ងបានអំពាវនាវប្រជាជនអេហ្ស៊ីបគ្រប់ជាន់ថ្នាក់ ថ្នាក់ដឹកនំានយោបាយ ថ្នាក់នំាសាសនាគ្រប់រូប ព្រមទំាងក្រុមបញវន្តទំាងអស់ ឲ្យថ្លឹងថ្លែងអំពីកម្រិតគ្រោះថ្នាក់ ប្រសិនបើស្ថានការណ៍នៅតែបន្តដូចសព្វថ្ងៃ។
ជាមួយគ្នានេះ លោកខាមេនីក៏បានធ្វើការផ្តន្ទាទោសចំពោះទង្វើសម្លាប់ប្រជាជនស្លូតត្រង់ និងការប្រើប្រាស់ភាសាកម្លំាងបាយប្រឆំាងដាក់គ្នាទៅវិញ ទៅមក។ យោងតាមលោកខាមេនី បើសង្រ្គាមស៊ីវិលចាប់ផ្តើមមានរូបរាងពិតប្រាកដហើយនោះ គឺពិតជាគ្មានអ្វីអាចនឹងបញ្ឈប់វាបានឡើយ។
អ្វីដែលគួរឲ្យកត់សម្គាល់បន្ថែម គឺការដែលប្រមុខដឹកនំាសាសនាអ៊ីរ៉ង់បានចាត់ទុកស្ថានការណ៍វឹកវរក្នុងប្រទេសអេហ្ស៊ីបសព្វថ្ងៃ ថាជាការលូតដៃចូលជ្រៀតជ្រែកពីសំណាក់ក្រុមប្រទេសលោកខាងលិច ដោយលោកខាមេនីមិនបាននិយាយចំឈ្មោះប្រទេសណាមួយទេ។ អ៊ីចឹងហើយបានមេដឹកនំាសាសនាអ៊ីរ៉ង់រូបនេះបានផ្តល់ទូន្មានដល់ថ្នាក់ដឹកនំាអេហ្ស៊ីបគ្រប់និន្នាការនយោបាយទំាងអស់ កុំទុកបណ្តោយឲ្យបរទេសបង្វិលក្បាលស្រេចតែនឹងចិត្ត។
គួរបញ្ជាក់ជូនបន្តិចថា តំាងពីជាង ៣០ឆ្នំាមកហើយដែលអ៊ីរ៉ង់ និងអេហ្ស៊ីបមិនមានទំនាក់ទំនងការទូតរវាងគ្នាទេ។ មូលហេតុ គឺមកពីអេហ្ស៊ីបជំនាន់លោកប្រធានាធិបតី Hosni Moubarak បានចុះហត្ថលេខាសន្តិភាពជាមួយប្រទេសអ៊ីស្រាអែលដែលជាសត្រូវស៊ីសាច់ហុតឈាមរបស់ប្រទេសអ៊ីរ៉ង់។
លោកអាលី ខាមេនីបរិហារកិច្ចចរចាជាថ្មីរវាងអ៊ីស្រាអែល និងប៉ាឡេស្ទីន
ក្រៅពីចាប់អារម្មណ៍ស្ថានការណ៍នៅក្នុងប្រទេសអេហ្ស៊ីប ប្រមុខដឹកនំាសាសនាក្នុងប្រទេសអ៊ីរ៉ង់ក៏និយាយអំពីដំណើរការចរចាជាថ្មីស្វែងរកសន្តិភាពរវាងអ៊ីស្រាអែល និងប៉ាឡេស្ទីនផងដែរ។ សម្រាប់លោកខាមេនី ដំណើរការចរចានោះបាននិងកំពុងធ្វើឲ្យខូចប្រយោជន៍របស់ប្រជាជនប៉ាឡេស្ទីនទៅវិញទេ។
គួរបញ្ជាក់ជូនឡើងវិញបន្តិចថា កិច្ចចរចាដោយផ្ទាល់រវាងតំណាងភាគីអ៊ីស្រាអែល និងប៉ាឡេស្ទីនក្នុងទីក្រុងវ៉ាស៊ីនតោនកាលពីដំណាច់ខែកក្កដាកន្លងទៅថ្មីៗនេះ គឺជាលទ្ធផលបានមកពីការខិតខំប្រឹងប្រែងរបស់សហរដ្ឋអាមេរិក ពិសេសគឺលោកប្រមុខការទូត John Kerry។ លោក John Kerry ដែលបានទៅទស្សនកិច្ចនៅតំបន់ដើមបូព៌ារហូតដល់ទៅ ៦លើកឯណោះ ក្នុងរយៈពេល ៤ខែចុងក្រោយនេះ។ មួយវិញទៀត ការផ្តើមកិច្ចចរចាជាថ្មីស្វែងរកសន្តិភាពរវាងអ៊ីស្រាអែល និងប៉ាឡេស្ទីនបានធ្វើឡើង បន្ទាប់ពីបានជាប់គំាងអស់រយៈពេល ៣ឆ្នំា និងក្រោយពីមានជម្លោះដ៏រុំារ៉ៃរវាងគ្នាអស់រយៈពេលជាង ៦ទស្សវត្សកន្លងទៅ។
យ៉ាងណាក៏ដោយ លោកប្រមុខដឹកនំាសាសនាអ៊ីស្លាមក្នុងប្រទេសអ៊ីរ៉ង់ អាលី ខាមេនីមិនបានត្រេកត្រអាលចំពោះព្រឹត្តិការណ៍នេះទេ។ សម្រាប់លោកខាមេនី កិច្ចចរចារវាងអ៊ីស្រាអែល និងប៉ាឡេស្ទីនដែលបានផ្តួចផ្តើមឡើងដោយសហរដ្ឋអាមេរិកពេលនេះ គឺកំពុងផ្តល់ផលប្រយោជន៍បន្ថែមឲ្យអ៊ីស្រាអែល ជាងឲ្យប៉ាឡេស្ទីនទៅវិញ។ ត្រង់ចំណុចនេះ លោកខាមេនីបានអំពាវនាវឲ្យពិភពអ៊ីស្លាមនំាគ្នាផ្តន្ទាទោសលើទង្វើដែលរៀបចំឡើងដោយអ៊ីស្រាអែល និងអាមេរិកក្នុងគោលដៅបំផ្លាញប្រយោជន៍របស់ប្រជាជនប៉ាឡេស្ទីន។
លោកខាមេនីបានសម្លឹងឃើញទុកជាមុនថា លទ្ធផលនៃកិច្ចចរចាជាថ្មីរវាងអ៊ីស្រាអែល និងប៉ាឡេស្ទីននឹងរឹតតែជួយលើកទឹកចិត្តដល់ក្រុមអ្នកឈ្លានពានឲ្យបន្តគាបសង្កត់ និងធ្វើទុក្ខបុកម្នេញលើសិទ្ធិទាមទារស្របច្បាប់របស់ប្រជាជនប៉ាឡេស្ទីន។
ប្រតិកម្មរបស់លោកប្រមុខដឹកនំាសាសនាអ៊ីស្លាមក្នុងប្រទេសអ៊ីរ៉ង់ពេលនេះ មិនមានអ្វីគួរឲ្យភ្ញាក់ផ្អើលទេ ព្រោះថា អ៊ីរ៉ងមិនដែលទទួលស្គាល់ភាពស្របច្បាប់របស់ប្រទេសអ៊ីស្រាអែល ហើយថ្នាក់ដឹកនំាជាន់ខ្ពស់អ៊ីរ៉ង់ទៀតសោត ពិសេសគឺរូបលោកខាមេនីធ្លាប់បានប្រកាសជាច្រើនដងថា ប្រទេសអ៊ីស្រាអែលនឹងត្រូវរលប់បាត់ពីផែនទីពិភពលោកនៅថ្ងៃណាមួយជាមិនខាន។ ថ្មីៗនេះទៀត លោកប្រធានាធិបតីថ្មីអ៊ីរ៉ង់ ហាស់សាន រ៉ូហានីដែលគេស្គាល់ថា ជាមនុស្សប្រកាន់និន្នាការកណ្តាលនិយម ក៏បានប្រកាសថា អ៊ីស្រាអែលគឺជាស្នាមរបួសគ្មានថ្ងៃរលុបនៅក្នុងខ្លួនរបស់ពិភពអ៊ីស្លាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ