អាមេរិកមានសុទិដ្ឋិនិយមចំពោះសន្ទុះថ្មីនៃដំណើរការចរចាសន្តិភាពអ៊ីស្រាអែល-ប៉ាឡេស្ទីន
ប្រធានរដ្ឋអំណាចប៉ាឡេស្ទីន លោក មាមូតអាប៉ាស (Mahmoud Abbas) បានកោះប្រជុំគណៈកម្មាធិការកណ្តាលចលនាហ្វាតាស និងគណៈកម្មាធិការប្រតិបត្តិអង្គការរំដោះប៉ាឡេស្ទីន នៅរសៀលថ្ងៃព្រហស្បតិ៍ម្សិលមិញ ដើម្បីសិក្សាលើសំណើរបស់អាមេរិកក្នុងការផ្តល់សន្ទុះថ្មីដល់ការចរចាស្វែងរកសន្តិភាពឱ្យអ៊ីស្រាអែលនិងប៉ាឡេស្ទីន។ ប្រមុខការទូតអាមេរិក ដែលអញ្ជើញមកដល់ប្រទេសហ្ស័កដានី តាំងពីថ្ងៃពុធមក មានសុទិដ្ឋិនិយមថាភាគីទាំងពីរអាចនឹងខិតរកគ្នា ឈានដល់ការផ្តើមបើកតុចរចាឡើងវិញ។
ចុះផ្សាយនៅថ្ងៃ៖
ស្តាប់ - ០១:៤០
តាំងពីបានទទួលនាទីជាប្រមុខការទូតអាមេរិកមក នេះជាលើកទី៦ហើយ ដែលលោក ចន ឃែរី (John Kerry) បានអញ្ជើញមកកាន់តំបន់ដើមបូព៌ា។ ផែនការផ្តល់សន្ទុះថ្មី ដល់ការចរចាសន្តិភាពអ៊ីស្រាអែល និងប៉ាឡេស្ទីន បានទទួលការគាំទ្ររហូតមកពីសំណាក់សម្ព័ន្ធអារ៉ាប។ ហើយកាលពីថ្ងៃអង្គារ លោក ឃែរី បានជំនួបពិភាក្សាជាមួយនឹងប្រធានអាជ្ញាធរប៉ាឡេស្ទីនអស់ ៥ម៉ោងពេញ។
តាមគម្រោងលោកប្រមុខការទូតអាមេរិក ត្រូវចាកចេញពីប្រទេសហ្ស័កដានី នៅព្រឹកថ្ងៃព្រហស្បតិ៍ម្សិលមិញ ប៉ុន្តែត្រូវលើកពេលទៅវិញ ទំនងដើម្បីរង់ចាំស្តាប់លទ្ធផលនៃជំនួបប្រជុំរបស់ប៉ាឡេស្ទីន។
ជំនួបប្រជុំគណៈកម្មាធិការកណ្តាលនៃចលនាហ្វាតាស (Fatah) និងគណៈកម្មាធិការប្រតិបត្តិអង្គការរំដោះប៉ាឡេស្ទីន (OLP) បានអំពាវនាវឱ្យប្រមុខការទូតអាមេរិកកែប្រែលក្ខខណ្ឌនៃការផ្តើមចរចាឡើងវិញជាមួយអ៊ីស្រាអែល ដោយទាមទារយកបន្ទាត់ព្រំដែនឆ្នាំ១៩៦៧ មកធ្វើជាគោល ដូចអ្វីដែលលោកប្រធានាធិបតីអាមេរិកបានប្រកាសកាលពីឆ្នាំ២០១១។
សូមបញ្ចាក់ថា អ្វីដែលសំខាន់នៅក្នុងសំណើអាមេរិកនេះ គឺ ចាប់ចរចាឡើងវិញដោយគ្មាននិយាយអំពីការបញ្ឈប់សកម្មភាពធ្វើអាណានិគមកិច្ចរបស់អ៊ីស្រាអែល។ ពីមុនៗមក បញ្ហាធ្វើអាណានិគមកិច្ចអ៊ីស្រាអែលតែងរាំងស្ទះដំណើរការចរចា។ រដ្ឋាភិបាលអ៊ីស្រាអែល ត្រូវទទួលរងការរិះគន់ ទាំង ពីសហគមន៍អន្តរជាតិ និងពីសហរដ្ឋអាមេរិក ជាសម្ព័ន្ធមិត្ត។ សហភាពអឺរ៉ុបបានថែមទាំងព្រមានបែងចែងភាពខុសគ្នា រវាងទឹកដីអ៊ីស្រាអែល និងទឹកដីអាណានិគម។ ប៉ុន្តែសម្រាប់អ៊ីស្រាអែលគំនាបរបស់អឺរ៉ុប អាចនឹងធ្វើឱ្យប៉ាឡេស្ទីនបានចិត្ត ឯការខិតខំប្រឹងប្រែងរបស់ប្រមុខការទូតអាមេរិក ចន ឃែរី ជួបបរាជ័យ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ