រឿងអាស្រូវគេចពន្ធនៅលុចសំបួរ ដំណឹងអាក្រក់សម្រាប់ប្រធានគណៈកម្មការអឺរ៉ុប
លុចសំបួ ដែលគេចាត់ទុកថាជាប្រទេសឋានសួគ៌ពន្ធដារមួយ នៅលើពិភពលោក កំពុងត្រូវរងការចោទប្រកាន់ ថាបានរៀបចំប្រព័ន្ធគេចពន្ធ ទ្រង់ទ្រាយធំ ជាមួយក្រុមហ៊ុនអន្តរជាតិ។ រឿងអាស្រូវដែលបានធ្វើឱ្យប្រទេសរកស៊ីជាមួយក្រុមហ៊ុនទាំងនោះ ខាតពន្ធរាប់ពាន់លានក្នុងមួយឆ្នាំៗ។ ប្រធានគណៈកម្មការអឺរ៉ុប ដែលជាអតីតនាយករដ្ឋមន្ត្រីលុចសំបួ អាចនឹងត្រូវរងការរិះគន់ខ្លាំងក្នុងសំណុំរឿងនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
ការអង្កេត ដែលមានចុះផ្សាយក្នុងទំព័រសារព័ត៌មានអន្តរជាតិចំនួន ៤០ នៅថ្ងៃនេះ បានបង្ហាញថាលុចសំបួ មានការព្រមព្រៀងសម្ងាត់ជាមួយ៣៤០ក្រុមហ៊ុនអន្តរជាតិ រកស៊ីឆ្លងប្រទេស មានជាអាទិ៍ក្រុមហ៊ុនApple Amazone Ikea Pepsi … ឱ្យបង់ពន្ធក្នុងអត្រាទាបបំផុត។ ការតាមដានរយៈពេល៦ខែ របស់ក្រុមអ្នកកាសែតផ្នែកអង្កេត បានរកឃើញភស្តុតាង២៨០០០ទំព័រ បញ្ជាក់អំពីកិច្ចព្រមព្រៀងសម្ងាត់គេចពន្ធ ឬ Tax Ruling។
កិច្ចព្រមព្រៀងដែលស្របច្បាប់ និងមានអនុវត្តតែនៅប្រទេសលុចសំបួមួយប៉ុណ្ណោះនេះ អាចអនុញ្ញាតឱ្យក្រុមហ៊ុនស៊ើបសួរដឹងជាមុនថាតើក្រុមហ៊ុនខ្លួនត្រូវបង់ពន្ធប៉ុន្មាននៅក្នុងប្រទេសមួយ និងបានការធានារ៉ាប់រងមួយចំនួនតាមផ្លូវច្បាប់ទៀត ដូចជារក្សាការសម្ងាត់ធនាគារជាដើម។ ការដឹងជាមុនដែលអនុញ្ញាតឱ្យ ក្រុមហ៊ុនអាចបង្វែរប្រាក់ចំណេញពីសាខាមួយទៅសាខាមួយ ក្នុងប្រទេសផ្សេងគ្នា ធ្វើយ៉ាងណាកុំឱ្យមានការបង់ពន្ធច្រើន។
នរណាក៏ដឹងដែរថា លុចសំបួ ជាឋានសួគ៌គេចពន្ធ ប៉ុន្តែអ្វីដែលគួចឱ្យភ្ញាក់ផ្អើល គឺលុចសំបួ អាចគេចផុតពីភ្នែកអ្នកត្រួតពិនិត្យបានដោយសារអ្នកទទួលខុសត្រូវនយោបាយ និងធនាគារ តែងបដិសេធ តាំងពីជាច្រើនឆ្នាំមក និងអះអាងថាTax ruling របស់លុចសំបួឆ្លើយតបទៅនឹងបទដ្ឋានច្បាប់អន្តរជាតិ និងស្តង់ដារសហភាពអឺរ៉ុប ឬអង្គការOCDE។ លុចសំបួរបានសន្យាលុបបំបាត់ចោល ការសម្ងាត់ធនាគារ ដើម្បីឆ្លើយតបទៅនឹងវិធាន អឺរ៉ុបស្តីពីការពង្រឹងច្បាប់ពន្ធដារ ចាប់ពីឆ្នាំ២០១៧ទៅ។
ការទម្លាយរឿងអាស្រូវ រដ្ឋលុចសំបួ សុំគ្រលំជាមួយក្រុមហ៊ុនធំៗឆ្លងប្រទេស បានធ្វើឱ្យដៃគូអឺរ៉ុបមិនអាចនៅស្ងៀមបានឡើយ។ រដ្ឋមន្ត្រីក្រសួងហិរញ្ញវត្ថុអាល្លឺម៉ង់ យល់ថាលុចសំបួត្រូវធ្វើកែប្រែទម្លាប់ក្នុងផ្នែកពន្ធដារ ចំណែកក្រុមអ្នកបរិស្ថានអឺរ៉ុបវិញបានបរិហារថា លុចសំបួការពារតែប្រយោជន៍ផ្ទាល់ខ្លួន និងធ្វើឱ្យគេបាត់ជំនឿ។
ម្យ៉ាងវិញ រឿងអាស្រូវ លុចសំបួមានប្រព័ន្ធជួយក្រុមហ៊ុនអន្តរជាតិធំៗគេចពន្ធ កំពុងតែធ្វើឱ្យប្រធានគណៈកម្មការអឺរ៉ុបថ្មី ទើបចូលបំពេញតួនាទីកាលពីដើមសប្តាហ៍ លោក Jean-Claude Juncker ស្ថិតក្នុងស្ថានភាពស្អុះស្អាប់បំផុត រហូតសុខចិត្តលុបចោល មិនទៅចូលរួមសន្និសីទក្រុងព្រុចសែល រសៀលថ្ងៃព្រហស្បតិ៍នេះ ព្រោះលោកគឺជាអតីតនាយករដ្ឋមន្ត្រីលុចសំបួរ ចំនួន១៨ឆ្នាំ (ពីឆ្នាំ ១៩៩៥-២០១៣)៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ