ម៉ាឡេស៊ីកាន់ទុក្ខទូទាំងប្រទេស ខណៈសាកសពអ្នកស្លាប់ដោយការផ្ទុះយន្តហោះ MH17 មកដល់មាតុប្រទេសវិញ
យន្តហោះដឹកសាកសពអ្នកស្លាប់ដោយសារឧបទ្ទវហេតុផ្ទុះយន្តហោះម៉ាឡេស៊ី ជើងហោះហើរ MH17 នៅប្រទេសអ៊ុយក្រែន បានមកដល់ប្រទេសម៉ាឡេស៊ីហើយ នៅថ្ងៃសុក្រនេះ។ ទង់ជាតិម៉ាឡេស៊ីត្រូវគេទម្លាក់ចុះពាក់កណ្ដាល ដើម្បីជាសញ្ញាកាន់ទុក្ខ។ ព្រះមហាក្សត្រ នាយករដ្ឋមន្ដ្រី និងមន្ដ្រីរដ្ឋាភិបាលគ្រាក់ៗរបស់ម៉ាឡេស៊ី បានជួបជុំគ្នានៅព្រលានយន្តហោះគូឡាឡាំពួរតាំងពីព្រឹកព្រលឹម ដើម្បីទទួលសាកសពជនជាតិម៉ាឡេស៊ី។ ជនជាតិម៉ាឡេស៊ី ដែលបានស្លាប់តាំងពីខែកក្កដានៅអ៊ុយក្រែន និងដែលទើបតែត្រូវបញ្ជូនចេញពីប្រទេសហូឡង់ក្រោយបញ្ចប់ការពិនិត្យអត្តសញ្ញាណ។
ចុះផ្សាយនៅថ្ងៃ៖
ស្តាប់ - ០២:០១
យន្តហោះជើងហោះហើរពិសេស របស់ក្រុមហ៊ុនអាកាសចរណ៍ម៉ាឡេស៊ីអ៊ែរឡាញ ធ្វើដំណើរពីទីក្រុងអាមស្ទែរដាម ប្រទេសហូឡង់ បានចុះចតនៅព្រលានយន្តហោះអន្ដរជាតិគូឡាឡាំពួរ នៅម៉ោង១០ព្រឹក ម៉ោងនៅក្នុងប្រទេសម៉ាឡេស៊ី។ ជើងហោះហើរពិសេសនេះ ដឹកសាកសពជនជាតិម៉ាឡេស៊ីចំនួន២០នាក់ ដែលបានស្លាប់នៅក្នុងការផ្ទុះយន្តហោះម៉ាឡេស៊ី MH17 នៅតំបន់ដូណេត ប្រទេសអ៊ុយក្រែន កាលពីខែកក្កដា។
ព្រះមហាក្សត្រ Abdul Halim Mu’adzam Shah នៃប្រទេសម៉ាឡេស៊ី លោកនាយករដ្ឋមន្ដ្រីណាជីព រ៉ាហ្សាក់ និងមន្ដ្រីជាន់ខ្ពស់ជាច្រើននាក់ ស្ថិតក្នុងសម្លៀកបំពាក់ពណ៌ខ្មៅ បានបង្ហាញមុខនៅព្រលានយន្តហោះអន្ដរជាតិគូឡាឡាំពួរ ដើម្បីទទួលសាកសពជនរងគ្រោះចំនួន២០នាក់ ដែលទើបតែធ្វើមាតុភូមិនិវត្តន៍នៅព្រឹកថ្ងៃសុក្រ ទី២២សីហានេះ។
ថ្ងៃទី២២សីហានេះ ត្រូវបានប្រទេសម៉ាឡេស៊ីកំណត់ជាថ្ងៃកាន់ទុក្ខជាតិ។ ទង់ជាតិម៉ាឡេស៊ី ត្រូវគេទម្លាក់ចុះពាក់កណ្ដាល។ ចំណែកប្រជាពលរដ្ឋម៉ាឡេស៊ីទាំង២៨លាននាក់ បានស្មឹងស្មាធិ៍គោរពវិញ្ញាណក្ខន្ធជនរងគ្រោះអស់ពេលមួយនាទី។ សកម្មភាពដែលមានលក្ខណៈកម្សាន្តសប្បាយទាំងអស់ ត្រូវបានអាជ្ញាធរម៉ាឡេស៊ី អំពាវនាវឲ្យផ្អាកជាបណ្ដោះអាសន្នសិន នៅថ្ងៃសុក្រនេះ។
មានជនជាតិម៉ាឡេស៊ីចំនួន៤៣នាក់ បានស្លាប់បាត់បង់ជីវិត នៅក្នុងការផ្ទុះយន្តហោះម៉ាឡេស៊ី ជើងហោះហើរ MH17។ សាកសពចំនួន២០ ដែលទើបតែមកដល់ម៉ាឡេស៊ីវិញនេះ ត្រូវបានបញ្ជូនចេញពីប្រទេសហូឡង់ក្រោយបញ្ចប់ការពិនិត្យអត្តសញ្ញាណ។ ចំណែក សាកសពដែលនៅសល់ នឹងត្រូវបញ្ជូនមកជាបន្តបន្ទាប់ទៀត។
គួររំលឹកថា ជើងហោះហើរ MH17 របស់ក្រុមហ៊ុន Malaysia Airlines ដែលចាកចេញពីទីក្រុង Amsterdam ប្រទេសហូឡង់ ទៅកាន់ទីក្រុងគូឡាឡាំពួរ ត្រូវបានបាញ់ទម្លាក់នៅតំបន់ជម្លោះ ភាគខាងកើតអ៊ុយក្រែន កាលពីថ្ងៃទី១៧ ខែកក្កដា សម្លាប់មនុស្សទាំង២៩៨នាក់នៅលើយន្តហោះនោះ ដែលរួមបញ្ចូលទាំងជនជាតិម៉ាឡេស៊ី៤៣នាក់ផង។ ការស៊ើបអង្កេតនៅតែបន្ត ប៉ុន្តែនៅមិនទាន់រកមុខអ្នកទទួលខុសត្រូវលើការបាញ់ប្រហារនោះនៅឡើយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ